1-2. Kuliza noYirugana 8:27-31, 35-38, yisinke ya tumangedere erenga lyomoEtiyopiya li gwane ekuho?

ONO HARA kugwana ekuho yipo o kare murongwa gwaKristusa ndi? Eharo norupandu kwa vatera vantu wovanzi yipo va gwane ekuho. Koneka sihonena serenga eli nga li ruganene hompa gomukadi gwaEtiyopiya.

² Mugara ogo goMuetiyopiya kwa gwene ekuho konyima tupu zapa ga lirongere moMatjangwa asi ga hepa kugwana ekuho. (Resa Yirugana 8:27-31, 35-38.) Yisinke ya tumangedere mugara ogo a gwane ekuho? Mugara ogo kwa tere Nonkango daKarunga asi mulyo, morwa apa ga kere mokarukara age kwa resere buke zaJesaya. Konyima apa Filipusa ga uyungire nage, ayo kwa ninkisire mugara ogo a kare norupandu kweyi ga mu ruganena Jesus. Yisinke ya ninkisire mugara ogo a ze koJerusarema? Morwa age kwa here Jehova. Morwasinke tuna kuuyungira ngoso? Mugara ogo kwa zire koJerusarema yipo a ka karere Jehova. Age kwa sigire ukarelikarunga wendi wanare nokulipakerera kumwe nomuhoko ogu ngagu karere Karunga gosili. Eharo lyendi kwaJehova kwa mu tumangedere a gwane ekuho nokukara gumwe govarongwa vaKristusa.—Mat. 28:19.

3. Yisinke nayi vhura kukondera muntu yipo a dire kugwana ekuho? (Tara kakende “ Yisinke ya kara momutjima goge?”)

³ Nsene wa hara Jehova, ayo ngayi kutumangeda o gwane ekuho. Nye eharo kuvhura hena li ku kondere yipo o dire kugwana ekuho. Ngapi omu nayi vhura kuhoroka? Koneka maukaro gamwe. Kuvhura o hare unene vekoro lyoge novakaume woge ava va dira kukara Nombangi, makura kuvhura o kare nosinka asi nsene o gwana ekuho, kuvhura va ku  nyenge. (Mat. 10:37) Ndi nampo kuvhura o hare yininke eyi ga nyenga Karunga, eyi nampo ayi kudigopere kusiga. (Epis. 97:10) Ndi nampo ove nare ngo hafere yilika eyi ya likwatakana nomaukarelikarunga goyimpempa, makura ove nampo kudiworoka omu ngo hafere yilika oyo. Ano ayo nampo kukuninkisa yi ku karere udigu kuhageka yilika oyo ayi dili kuhafesa Jehova. (1 Kol. 10:20, 21) Yipo nye, wa hepa kulipura asi: “Yinke ndi yilye ogu na hara po unene?”

4. Konda musinke zomulyo po zeyi no gwanena ekuho?

⁴ Natuvenye twa kara noyininke yoyinzi eyi twa hara ntani neyi natu gavera rupandu. Pasihonena, komeho o tameke kulironga Bibeli kumwe noNombangi daJehova, ove nampo kwa here Bibeli nare ntani nampo wa here Jesus. Ngesi konyima zokuyadiva Nombangi, ove nampo kwa hara kukara kumwe nawo. Nye kuhara yininke oyo kapi ngayi kutumangeda o ligave kwaJehova nokugwana ekuho. Konda zomulyo po zeyi no gwanena ekuho kuna kara asi morwa wa hara Jehova. Nsene o hara Jehova kupitakana yininke nayinye, ove kapi ngo pulisira nkenye eyi ndi nkenye ogu a ku kondere mokumukarera. Eharo lyoge kwaJehova ngali ku tumangeda o gwane ekuho ntani ngali ku vatera o twikire kulimburukwa konyima zokugwana ekuho.

5. Mapuro musinke natu ka zogera mosirongwa esi?

⁵ Jesus kwa tente asi twa hepa kuhara Jehova nomutjima gwetu nagunye, nomwenyo gwetu nagunye, nonondunge detu nadinye ntani nononkondo detu nadinye. (Mar. 12:30) Yisinke nayi kuvatera yipo o tameke kuhara unene Jehova nokumufumadeka? Nsene o gazadara ko omu Jehova a tu likida eharo, ayo ngayi ku tumangeda nove o mu hare. (1 Joh. 4:19) Yipo nye, mosirongwa esi no ka lironga yininke eyi norugana yipo o hare unene Jehova nokugwana ekuho.

6. Kuliza noVaroma 1:20, nkedi musinke zimwe no lironga kuhamena Jehova?

⁶ Lironga kuhamena Jehova kupitira mweyi ga sita. (Resa Varoma 1:20; Ehor. 4:11) Gazadara ko kounongo waJehova monkedi omu ga sita yimeno noyikorama. Ntani gazadara ko hena omu rutu roge va ru sita monkedi zokutetukisa. (Epis. 139:14) Gazadara ko hena kononkondo edi ga tura Jehova mezuva, nye ezuva kuna kara tupu zimwe zonombungururu mabiliyona edi ga sita. * (Jes. 40:26) Nsene o gazadara ko kuhamena yininke eyi ga sita Jehova, ayo ngayi ku ninkisa o mu fumadeke unene. Ayo mulyo kudiva unongo nononkondo edi ga kara nado Jehova. Nye mokuninka asi o hare unene Jehova, wa hepa kudiva yoyinzi kumuhamena.

7. Mokuninka asi o hare Jehova unene, yisinke wa hepa kupura nawa-nawa?

⁷ Wa hepa kuyipura nawa-nawa asi Jehova ga ku hara. Nove kukudigopera kuyipura asi Musiti geguru nevhu ga kudiva ntani kukupakera mbili ndi? Nsene yimo o lizuvhu ngoso, diworoka asi Jehova ‘kapi ga kara ure nose natuvenye.’ (Yirug. 17:26-28) Age “ga diva magazaro getu nomaharo getu nagenye,” ntani ngwendi moomu Ndafita ga tumbwidilire Saromo, Jehova kwa tumbwidira asi “nsene o za kwendi, age ta ku tambura.” (1 Hist. 28:9) Diworoka hena asi ove kuna kulironga Bibeli morwa Jehova kwa ku kokera kwendi. (Joh. 6:44) Nsene o diva eyi ga kuruganena Jehova, ayo ngayi ku ninkisa o mu hare unene.

8. Ngapi omu no likida Jehova asi wa mu hara?

 ⁸ Nkedi zimwe omu no yi likida asi wa hara Jehova kuna kara pokuuyunga nage kupitira mekanderero. Eharo lyoge lyokuhara Jehova ngali kura nsene omu tantera yinka yoge ntani nokumupandura kweyi a ku ruganene. Elikwatakano lyoge naJehova ngali nkondopara ngomu ono kumona omu Jehova ana kulimburura makanderero goge. (Epis. 116:1) Ove ngo ya dimburura asi age kukukwata egano. Nampili ngoso, nsene ono hara kuhedera Jehova pepi, wa hepa kukwata egano eyi ga hara neyi ga nyenga. Wa hepa kudiva hena eyi ana hara o rugane. Kulironga Bibeli yizo nkedi zelike ngatu kwata egano eyi ga hara Jehova neyi ga nyenga ntani nokudiva eyi ana tu harere tu rugane.

9. Ngapi omu no yi likida asi ove kutara Bibeli asi mulyo?

⁹ Tara Nonkango daKarunga asi mulyo. MoBibeli yimo mwelike mwakara usili wokuhamena Jehova ntani nositambo esi ga kara naso kovantu. Nsene o resa Bibeli nkenye ezuva nokuliwapaikira komeho mu ya lironge Bibeli ntani nokutura pasirugana eyi ono kulironga, ove ngo yi likida asi ove kutara Bibeli asi mulyo. (Epis. 119:97, 99; Joh. 17:17) Nove wa kara nelikwamo lyereso lyoge lyoBibeli ndi? Ove kuresa Bibeli nkenye ezuva ndi?

10. Ngapi omu Bibeli za lisiga nonobuke nonkwawo?

¹⁰ Bibeli za lisiga nonobuke nonkwawo morwa yininke eyi va tjanga mo kuhamena Jesus, kwa yi mwene vantu. Azo yizo zelike Buke ezi azi faturura eyi ga ku ruganena Jesus. Ngomu ngo lironga kuhamena eyi ga uyungire Jesus neyi ga rugene, ayo ngayi ku tumangeda o tulise po ukaume nage.

11. Yisinke no rugana yipo o hare Jehova?

¹¹ Hara Jesus. Nsene o hara Jesus, ove ngo hara unene Jehova. Morwasinke tuna kuuyungira ngoso? Morwa Jesus nga honene yikara yoGuhwe nawa-nawa. (Joh. 14:9) Yipo nye, nsene o lironga kuhamena Jesus, ayo ngayi kuvatera o dive Jehova nokukuninkisa o mu pandure. Gazadara ko kuhamena nkenda ezi ga likidire Jesus kovantu ava ngava tara asi kwato mulyo morwa ruhepo, ndi kuvera. Gazadara ko hena  komagano aga a ku pe nomu aga kuvatere meparu apa o ga kwama.—Mat. 5:1-11; 7:24-27.

12. Yisinke ngo rugana ngomu ngo lironga kuhamena Jesus?

¹² Ove ngo tameka kuhara unene Jesus nsene o gazadara kuhamena nzambo zendi ezi ga geve yipo tu gwane edongweneno po lyononzo. (Mat. 20:28) Apa ngo kwata egano asi Jesus kwa lizamberere yipo a ku fire, ayo ngayi kutumangeda o litezurure nokupura Jehova a ku gusire po. (Yirug. 3:19, 20; 1 Joh. 1:9) Ngomu ngo hara unene Jesus naJehova, ayo ngayi kutumangeda o tulise po ukaume nava va hara Jehova naJesus.

13. Yisinke ga ku pa Jehova?

¹³ Hara vantu ava va hara Jehova. Vanekoro novakaume woge wovahapuli kuvhura va dire kukwata egano konda zeyi ono harere kukarera Jehova. Awo kuvhura va ku rwanese. Nye Jehova nga ku vatera pokukupa vapuli vakweni ava ngava kara ngwendi ekoro lyoge. Nsene o kara pepi nepata eli lyopampepo, awo ngava ku likida eharo ntani nokukupakera mbili. (Mar. 10:29, 30; Heb. 10:24, 25) Mwaza siruwo, vekoro lyoge kuvhura nawo ngava tameke kukarera Jehova nokulimburukwa nompango dendi.—1 Pet. 2:12.

14. Kuliza na-1 Johanesa 5:3, yisinke wa ya dimburura kuhamena nompango daJehova?

¹⁴ Tara nompango daJehova asi mulyo ntani di limburukwa. Komeho o ya lironge kuhamena Jehova, ove nampo ngo rugana eyi wa here, nye ngesi ove wa ya dimburura asi kukwama nompango daJehova kureta mauwa. (Epis. 1:1-3; resa. 1 Johanesa 5:3.) Gazadara ko komapukururo aga atu gwana moBibeli kuhamena vanturagumbo, vagolikadi, vakurona ntani vanona. (Efe. 5:22–6:4) Epata lyeni lya gwanena mo mauwa apa mwasikisire mo mapukururo ogo ndi? Ove ngesi kuna kara muntu gomuwa morwa kusikisa mo mapukururo gaJehova kuhamena kutulisa po vakaume wovawa ndi? Ove muntu goruhafo ndi? (Yis. 13:20; 1 Kol. 15:33) Tuna si huguvara asi elimbururo komapuro ogo kuna kara asi, nhi.

15. Yisinke no rugana nsene ono hara kudiva omu no tura pasirugana nompango domoBibeli?

¹⁵ Poyiruwo yimwe, kuvhura o dire kudiva omu no tura pasirugana nompango domoBibeli. Eyi yiyo nye Jehova a ruganesere mbunga zendi mokutupa yimbapiratjangwa, yipo yi tu vatere tu kwate egano Bibeli ntani tu dive kuhangura uwa koudona. (Heb. 5:13, 14) Nsene o lironga yimbapiratjangwa oyo, ove ngo dimburura omu nompango domoBibeli da kara nomulyo nomu no di sikisa mo ntani ayo ngayi ku tumangeda o hamene kombunga zaJehova.

16. Ngapi omu Jehova ga wapaika vantu vendi?

¹⁶ Hara mbunga zaJehova nokuzikwatesa ko. Jehova kwa tura vantu vendi monombungakriste, ano Munwendi Jesus yige a di pitisire. (Efe. 1:22; 5:23) Jesus kwa horowora kambunga kovagwavekwa, yipo va pitisire yirugana nayinye eyi ana hara tu sikise mo neina. Jesus kutumbura vagara owo asi “mukareli gokulimburukwa gonondunge.” Vagara owo kulitura mo unene paapa va hulira yipo va kuvatere o hedere pepi naJehova ntani nokupopera elikwatakano lyoge nendi. (Mat. 24:45-47) Nkedi zimwe omu mukareli gokulimburukwa a ku pakere mbili kuna kara pokudivilisa asi twa kara novakuronambunga wokuwapera ava nava tu pitisira. (Jes. 32:1, 2; Heb. 13:17; 1 Pet. 5:2, 3) Vakuronambunga va liwapaikira kurugana paapa va hulira yipo va ku hengagwide nokukuvatera o hedere  pepi naJehova. Vakuronambunga kurugana hena sininke simwe somulyo, awo kukuvatera yipo o ronge wopeke kuhamena Jehova.—Efe. 4:11-13.

17. Kuliza noVaroma 10:10, 13, 14, morwasinke natu tanterera ko wopeke kuhamena Jehova?

¹⁷ Vatera wopeke yipo va hare Jehova. Jesus kwa tanterere varongwa vendi va ronge vantu wopeke kuhamena Jehova. (Mat. 28:19, 20) Ayo ureru kusikisa mo mpangera ozo morwa twa diva asi Jehova yiyo ana hara tu rugane. Nye ngomu eharo lyoge kwaJehova ngali kura, ove ngo tameka kulizuvha ngwendi Peturusa naJohanesa ava va tente asi: “Ose ko nokuwapa si asi tu dire kuuyunga yokuhamena eyi twa zuvha neyi twa mona.” (Yirug. 4:20) Nsene tu vatera muntu a hare Jehova, ose ngatu hafa. Gazadara ko tupu omu ga hefe Filipusa apa ga vaterere mugara gomoEtiyopiya a lironge usili womoMatjangwa nokugwana ekuho. Nsene o honena Filipusa pokulimburukwa mpangera zaJesus zokutulisa po varongwa, ayo ngayi likida asi ono hara kukara gumwe goNombangi daJehova. (Resa Varoma 10:10, 13, 14.) Ntani nove ngo pura epuro eli ga pulire mugara gomoEtiyopiya asi: “Yinke hena nayi limba po kukuhwa nge?”—Yirug. 8:36.

18. Yisinke ngatu ka zogera mosirongwa sokukwama ko?

¹⁸ Apa ngo tokora kugwana ekuho, alyo kuna kara etokoro lyenene eli ngo vhura kutura po. Mokumona asi alyo kuna kara etokoro lyenene, ya wapa kugazadara ko kweyi ya hamena mo. Yisinke wa hepa kudiva kuhamena ekuho? Yisinke wa hepa kurugana komeho o gwane ekuho ntani konyima zokugwana ekuho? Mapuro ogo ngava ka ga zogera mosirongwa sokukwama ko.