1. Mpangera musinke ga geve Jesus kovarongwa vendi? (Tara efano lyopontunda.)

MASIKU gokuhulilira komeho Jesus va ka mu dipage, age kwa geve mpangera zokulikarera kovarongwa vendi. Age kwa va tanterere asi: “Omu lihara-hare moomu na mu hara ame.” Ntani ta gwederere ko hena asi: “Nsene mu lihara-hara, yipo ngava divira vantu asi one sili varongwa vange.”—Joh. 13:34, 35.

2. Morwasinke ya karera nomulyo tu likide eharo kovakwetu?

² Jesus kwa tente asi varongwa vendi wousili ngava va dimburura nsene va lilikida eharo eli ga va likidire. Yi kare asi mosiruwo sanare ndi mosiruwo setu, eharo yilyo ali ninkisa vantu va dimburure varongwa vaJesus. Eyi yiyo ya karera nomulyo tu likide eharo kovakwetu nampili yi kare udigu kuyirugana.

3. Yisinke natu ka lironga mosirongwa esi?

³ Mokumona asi natuvenye kapi twa sikilira mo, ayo kapisi ureru kulikida eharo kovakwetu. Nye nampili ngoso, twa hepa kuhetekera ko kuhonena Kristusa. Mosirongwa esi, tatu ka lironga omu eharo ali tu vatere tu tulise po mbili, tu dire kukara nompongo ntani tu litambure-tambure. Ngomu natu ka lironga sirongwa esi, lipura nyamoge asi: ‘Yisinke nani lirongera ko kovanavazinyetu ava va twikira kulikida eharo nampili ngomu ya va karerere udigu?’

4. Kuliza naMateusa 5:23, 24, morwasinke natu tulisira po mbili novanavazinyetu ava tuna kudira kuzora nawo?

⁴ Jesus kwa tu ronga asi ayo mulyo kutulisa po mbili nomupuli mukwetu ogu tuna kudira kuzora nage. (Resa Mateusa 5:23, 24.) Age kwa tente asi nsene tuna hara kuhafesa Karunga, twa hepa kutulisa po mbili novakwetu. Ayo kuhafesa Jehova  apa atu mono kuna kukondja tu tulise po mbili novapuli vakwetu. Age kapi nga tambura ukareli wetu nsene tu kara nonkoko ntani nsene tu dira kutulisa po mbili novakwetu.—1 Joh. 4:20.

5. Morwasinke ya karerere udigu komunazinyetu gumwe a tulise po mbili namukwawo?

⁵ Ayo kuvhura yi tu karere udigu kutulisa po mbili novakwetu. Morwasinke? Tu tareni eyi ya horokerere Mark. * Age kwa mu koresere komutjima apa munazinyetu gumwe gomugara ga tamekere kutantera womombungakriste yininke yoyidona kumuhamena. Yisinke ga rugene ko Mark? Age kwa tanta asi: “Ame kwa handukire ntani kapi na pangerere ehandu lyange.” Konyima Mark kwa ya liverere kweyi ga rugene ntani kwa zire kwa munazinyetu ogo yipo a ka tulise po mbili. Nye munazinyetu ogo kapi ga here kutulisa po mbili naMark. Pomuhowo Mark kwa litanterere mwene asi: ‘Yisi nani lihepekera mokumona asi age kapi ana hara kutulisa po mbili?’ Nye mutareli gonombunga ogu ga dingwire mbungakriste zawo kwa mu korangedere a twikire kutulisa po mbili. Yisinke ga rugene ko Mark?

6. (a) Ngapi omu Mark ga kondjere yipo a tulise po mbili? (b) Ngapi omu Mark ga tulire pasirugana Vakorosi 3:13, 14?

⁶ Mark kwa konakonene nkareso zendi, makura yipo ga dimbwilire asi poyiruwo yimwe age nga lizuvhu asi age mulyo kupitakana vakwawo. Yipo ga dimbwilire asi ga hepa kutjindja nkareso zendi. (Koros. 3:8, 9, 12) Age kwa linunupikire ntani kwa zire hena kwamunazinyetu ogo yipo a ka hundire egusiro po. Mark kwa tjangerere hena munazinyetu ogo nombilive yipo a hundire egusiro po ntani nokumutantera asi ana hara hena va kare vakaume. Mark kwa geve hena mauhwi gomanunu kwamunazinyetu ogo. Nye nampili ngomu ga kondjere, munazinyetu ogo kapi ga mu gusilire po ntani kwa twikilire kukara nonkoko. Nampili ngoso, Mark kwa twikilire kutura pasirugana epukururo lyaJesus pokuhara  munazinyetu ogo ntani nokumugusira po. (Resa Vakorosi 3:13, 14.) Nampili wopeke va dire kutugusira po, eharo lyoSikriste ngali tu vatera tu va gusire po ntani nokukanderera kwaJehova a tu vatere tu tulise po mbili.—Mat. 18:21, 22; Gar. 6:9.

7. (a) Yisinke ga tu korangedere Jesus natu rugana? (b) Ukaro musinke woudigu ga ligwanekerere nawo munazinyetu gumwe?

⁷ Jesus kwa korangedere varongwa vendi va tekure vakwawo ngwendi moomu vana hara kuvatekura. Age kwa tente hena asi kapisi tu likide tupu eharo kovantu ava va tu hara. (Ruk. 6:31-33) Ngapi nsene munazinyetu gumwe gomombungakriste kapi ana hara nampili kutumorora? Eyi kapi ayi horauka, nye yiyo ya horokerere munazinyetu gedina Lara. Age kwa tanta asi: “Munazinyetu gumwe gomukadi kapi nga morora nge ntani kapi na divire konda zeyi ga yi ruganenene. Ame kwa kere nosinka ntani kapi ngani hafere kuza komapongo.” Pomuhowo, Lara kwa litanterere mwene asi: ‘Ame kapi na rugana yuma yoyidona. Nayene vantu navenye womombungakriste yimo nawo ava lizuvhu kuhamena munazinyetu ogo.’

8. Yisinke ga rugene Lara yipo a tulise po mbili, ntani yisinke natu lirongera ko kosihonena sendi?

⁸ Lara kwa rugene ko yuma yipo a tulise po mbili. Age kwa kanderere kwaJehova ntani kwa tokwere kuza kwamunazinyetu ogo, yipo a ka uyunge nendi. Awo kwa uyungire kuhamena udigu wawo ntani kwa lidingilire nokutulisa po mbili. Konyima age kwa lizuvhire asi nayinye yiwaawa. Nye Lara kwa tanta hena asi: “Nye konyima, munazinyetu ogo kwa tamekere hena kulikida nge nkareso ezi nga likida nge nare. Ayo kwa guvisire nge sili.” Pomuhowo Lara kwa lizuvhire asi age nga hafa tupu nsene munazinyetu ogo a rundurura nkareso zendi. Nye konyima Lara kwa ya dimbwilire asi somulyo po kwendi ga hepa tupu kutwikira kutekura munazinyetu ogo gomukadi neharo ntani ‘nokumudongwenena po.’ (Efe. 4:32–5:2) Lara kwa diworokere nonkango edi kuhamena eharo lyoSikriste asi: “Kapi lya paka nkoko, kwa kwata nayinye, kupura nayinye, kuhuguvara nayinye, kudidimika nayinye.”  (1 Kol. 13:5, 7) Ayo kwa vaterere Lara a dire kukara hena nosinka kuhamena udigu owo. Konyima, munazinyetu ogo kwa tamekere hena kumutekura monkedi zongwa. Nsene o kondjera kutulisa po mbili novanavazinyetu nokuvalikida eharo, ayo ngayi ninkisa “Karunga geharo nombili nga kara neni.”—2 Kol. 13:11.

9. Kuliza noYirugana 10:34, 35, morwasinke natu dilira kukara nompongo?

⁹ Jehova kapi ga kara nompongo. (Resa Yirugana 10:34, 35.) Apa atu dili kukara nompongo, ose kuyilikida asi ose vana vendi. Ose hena kulimburukwa mpango zokuhara vakwetu ngwendi moomu twa lihara nyamwetu ntani nokuhetekera ko kukara nombili novakwetu.—Rom. 12:9, 10; Jak. 2:8, 9.

10-11. Ngapi munazinyetu gomukadi ga fundire po magazaro gendi gomadona?

¹⁰ Vantu vamwe kuvadigopera mokunyokera po mpongo. Tu tareni sihonena samunazinyetu Ruth. Apa ga kere mudinkantu, gumwe gokosirongo sapeke kwa tekwire momudona epata lyawo. Ngapi omu ya mu kundamene? Ruth kwa tanta asi: “Ayo kwa ninkisire nge ni nyenge sirongo oso. Ame kwa gazarere asi vantu navenye womosirongo oso va lifana, kukwatera mo novanavazinyetu.” Yisinke ya vaterere Ruth a rundurure magazaro gendi?

¹¹ Ruth ga ya dimbwilire asi ga hepa kurugana ko yuma yipo a rundurure magazaro gendi. Age kwa resere yihorokwa ntani masimwititi aga ga kara moYearbook kuhamena sirongo oso. Age kwa tanta asi: “Ame kwa tamekere kugazara yininke yoyiwa kuhamena vantu womosirongo oso. Na ya tamekere kudimburura asi vanavazinyetu womosirongo oso, kwa hara Jehova. Ayo ya vaterere nge ni dimburure asi nawo kwa hamena kepata lyaJehova lyouzuni mudima.” Konyima zosiruwo, Ruth ga ya dimbwilire asi ga hepa kuvalikida eharo. Age kwa tanta asi: “Nkenye apa ngani ligwana novanavazinyetu wokosirongo oso, ame ngani tulisa po ukaume kumwe nawo. Ame ngani uyunga nawo ntani nokuvadiva momunene.” Yitundwamo musinke ya kere? Ruth kwa tanta asi: “Mwaza siruwo, na ya fundire po magazaro gange gomadona aga na kere nago pomuhowo.”

12. Udigu musinke ga kere nawo munazinyetu gomukadi Sarah?

¹² Vantu vamwe kuvhura va kare nompongo va hana kuyidimburura. Pasihonena, Sarah kwa gazarere asi kapi ga kere nompongo morwa age kapi nga pangura vantu kuliza nosirongo sawo ndi neyi va weka ndi yitumbukira eyi va kara nayo mombungakriste. Nye age kwa tanta asi: “Na ya dimbwilire asi ame na kara nompongo.” Monkedi musinke? Epata lyoSarah kwa lironga unene ntani age nga hafere kukara tupu novantu ava va lironga unene. Sikando simwe age kwa tanterere kaume kendi asi: “Ame kukara tupu novapuli vakwetu ava va lironga unene. Kapi ani kara nava va dira kulironga.” Yipo nye, Sarah ga hepere kurundurura nkareso zendi. Ngapi omu ga yi rugene?

13. Yisinke natu lirongera ko kwaSarah, monkedi omu ga rundwilire nkareso zendi?

¹³ Mutareli gonombunga kwa vaterere Sarah a likonakone nyamwendi. Sarah kwa tanta asi: “Age kwa pandadekere nge kweyi ani twikire kukarera Jehova noulimburukwi nokomalimbururo gange gomawa ntani kweyi na diva nawa Matjangwa. Makura yipo ga tanterere nge asi ngomu ediwo lyetu lyoMatjangwa lina kukura, twa hepa kutunga po yikara yoSikriste ngwendi elinunupiko ntani nkenda.” Sarah ga tulire pasirugana eyi ga mu tanterere mutareli gonombunga. Age kwa tanta asi: “Ame kwa ya  dimbwilire asi yomulyo po kuna kara kulikida eharo nonkenda kovakwetu.” Ano eyi kwa mu vaterere a kare nomutaro gomuwa kovapuli vakwawo. Age kwa tanta hena asi: “Ame kwa hetekerere ko kudimburura yikara eyi ayi ninkisa Jehova a hare vapuli vakwetu.” Yisinke natu lirongera ko? Kapisi tu gazare asi ose mulyo kupitakana vakwetu morwa yeeyi twa lironga. Nsene ‘tu hara vapuli vakwetu,’ ose ngatu nyokera po mpongo.—1 Pet. 2:17.

14. Kuliza noVahebeli 13:16, ngapi omu Jehova a lizuvhu apa atu tambura wopeke?

¹⁴ Jehova kumuhafesa apa atu tambura vakwetu. (Resa Vahebeli 13:16.) Kutambura vakwetu kuna kara ruha roukareli wetu. Unene po apa atu vatere wopeke ava vana hepa ekwafo. (Jas. 1:27; 2:14-17) Eyi yiyo Matjangwa aga tu korangedere tu ‘tambure vagenda momambo getu.’ (Rom. 12:13) Apa atu tambura wopeke, ose kulikida eharo ntani kuyilikida asi tuna hara va kare vakaume vetu. Jehova kumuhafesa apa atu zigida vakwetu yipo tu ya nwe yuma kumwe ndi tu ya lye kumwe ndi tu ya zogere kumwe. (1 Pet. 4:8-10) Nampili ngoso, koyili yimwe eyi nayi vhura kutuninkisa tu dire kutambura wopeke.

15-16. (a) Morwasinke vamwe ava dilire kuhara kutambura vagenda? (b) Yisinke ya vaterere Edit yipo a tameke kutambura vagenda?

¹⁵ Kuvhura tu dire kuhara kutambura vakwetu morwa ukaro wetu. Tu tareni sihonena samunazinyetu Edit. Komeho a ya kare Mbangi, age kapi ga here kukara novantu. Edit kwa lizuvhire asi vantu wopeke yiwo va wapera kutambura vagenda.

¹⁶ Apa Edit ga ya kere Mbangi, age kwa rundwilire nkareso zendi. Age kwa rugene ko yuma yipo a tambure vagenda. Age kwa tanta asi: “Apa va dikire Sinyanga setu soUhompa, mukuronambunga gumwe kwa tanterere nge asi poveli valikwali vana kuwiza va ya vatere kutunga Sinyanga yivike yivali, age kwa pulire nge nsene kuvhura va ya kare membo lyange. Ame kwa diworokere omu  Jehova ga tungikire mufisayendi gomositata saSerefata.” (1 Vah. 17:12-16) Edit kwa tokwere kutambura valikwali owo. Matungiko musinke ga gwene? Age kwa tanta asi: “Valikwali owo kapi va ya kere yivike yivali nye kwa ya kere makwedi gavali. Siruwo nasinye esi na kere nawo, ose kwa tungire po ukaume wounene.” Edit kwa gwene hena vakaume wovanene mombungakriste. Ngesi age muzuvhisi gokukarerera ntani age kuhafera kuzigida vantu ava a rugana nawo mokuzuvhisa, yipo va wize kembo lyendi. Age kwa tanta asi: “Kugava kuninkisa nge ni lizuvhe nawa ntani kuninkisa nge ni gwane matungiko gomanzi.”—Heb. 13:1, 2.

17. Yisinke ga ya dimbwilire munazinyetu Luke namukadendi?

¹⁷ Kuvhura yi kare asi ose kutambura vagenda, nye nampili ngoso koyili simpe twa hepa kurugana. Pasihonena, Luke namukadendi kwa hara kutambura vagenda. Awo kuzigida vakondi vawo nekoro lyawo novakaume vawo wovanene ntani nomutareli gonombunga namukadendi. Nye Luke kwa tanta asi: “Ose kwa ya dimbwilire asi ngatu zigida tupu ava twa liyika nawo unene.” Ngapi omu Luke namukadendi va rundwilire nkedi zawo zokutambura vagenda?

18. Yisinke ya vaterere Luke namukadendi va rundurure nkedi zawo zokutambura vagenda?

¹⁸ Luke namukadendi kwa ya dimbwilire eyi ayi tanta nawa-nawa kutambura vagenda apa va gazadarere ko kononkango daJesus edi ga uyungire asi: “Nsenesi mu hara vaava va mu hara, yinke ngomu gwanena po?” (Mat. 5:45-47) Awo va ya dimbwilire asi va hepa kuhonena Jehova, ogu a gava kovantu navenye. Makura yipo va tokwere kuzigida vapuli vakwawo ava va dira kuzigida rumwe. Luke kwa tanta asi: “Ose ngesi kuhafera kukara kumwe poyiruwo oyo, ntani kutuvatera tu lidive unene novapuli vakwetu ntani nokuhedera Jehova pepi.”

19. Ngapi natu yi likida asi ose varongwa vaJesus, ntani yisinke ono tokomene kurugana?

¹⁹ Ngesi tuna lirongo omu kuhara vakwetu nayi tu vatera tu tulise po mbili nokudira kukara nompongo ntani tu tambure wopeke. Twa hepa kunyokera po nkenye magazaro gomadona ntani nokuhara vanavazinyetu kutundilira komutjima. Nsene tu yi rugana, ose ngatu hafa ntani ngatu yi likida asi ose sili varongwa vaJesus.—Joh. 13:17, 35.