1. Kuliza naMateusa 24:9, morwasinke nayi dilira kututetukisa nsene vantu va tu nyenga?

JEHOVA kwa tu sita nevhuliko lyokuhara vakwetu ntani nawo yipo va tu hare. Yipo nye, apa vantu ava tu nyenge ayo kutukoresa komutjima ntani kututjilisa. Pasihonena, munazinyetukadi Georgina ogu ga tunga moEuropa kwa tanta asi: “Apa na kere nonomvhura 14, oyina kwa nyengere nge morwa yeeyi ngani karere Jehova. Ame kwa guvire nokulizuvha ngwendi nyamelike nina kara ntani na tamekere kugazara asi ame nampo muntu gomudona.” * Munazinyetugara Danylo, kwa tjanga asi: “Apa vakwayita ngava toona nge nokutuka nge ntani nokutjilisa nge morwa yeeyi na kara Mbangi zaJehova, ayo ngayi tjilisa nge.” Ayo kutukoresa komutjima apa vantu ava tu nyenge, nye eyi kapi ayi tu tetukisa. Jesus kwa pumbire asi vantu ngava tu nyenga.—Resa Mateusa 24:9.

2-3. Morwasinke va va nyengera varongwa vaJesus?

² Vantu womouzuni ou kwa nyenga varongwa vaJesus. Morwasinke? Morwa ose kapi twa “hamena kouzuni” ou ngwendi moomu tupu ga yi rugene Jesus. (Joh. 15:17-19) Nampili ngomu atu fumadeke epangero, ose kunyokera po kulihameka moupolitika ndi kufumadeka erembe ndi kudimba rusumo rosirongo. Ose kukarera Jehova gelike. Ose hena kukwatesa ko Karunga morwa gelike ya tumbukira mokupangera. Nye Satana ‘noruvharo’ rwendi kapi ava kwatesa ko Karunga ntani awo kuuyunga asi Karunga kapi ga wapera kupangera. (Gen. 3:1-5, 15) Ose kuzuvhisa kuhamena Uhompa waKarunga asi yiwo welike ngau ya gusa po maudigu  govantu ntani awo ntaantani ngau ya zonagure po navenye ava ava u rwanesa. (Ndan. 2:44; Ehor. 19:19-21) Mbudi ezi atu zuvhisa kuna kara mbudi zongwa kovahungami, ano kovadinikarunga, azo mbudi zondona.—Epis. 37:10, 11.

³ Konda zimwe zeyi vantu va tu nyengera kuna kara asi ose kulimburukwa nompango daKarunga. Nompango daKarunga da lisiga unene neyi ava rugana vantu mouzuni. Pasihonena, vantu wovanzi kugazara asi kapisi epuko kulihameka moruhonda. Nye ezi kuna kara konda zeyi Karunga ga zonagwilire vantu womoSodoma naGomora! (Juda 7) Mokumona asi ose kulimburukwa nompango domoBibeli edi da uyunga kuhamena nkareso ozo, vantu wovanzi kutuswaura nokututara asi ose kwa limona nondunge.—1 Pet. 4:3, 4.

4. Yikara musinke ayi tu vatere apa ava tu nyenge vantu?

⁴ Yisinke nayi tu vatera tu lididimikire apa ava tu nyenge vantu ntani nokutuswaura? Twa hepa kukara nepuro lyenene asi Jehova nga tu vatera. Ngwendi silikandwiso, epuro lyetu kuvhura “kudimisisa yikutji yomundiro, eyi a ponyesa Mudona.” (Efe. 6:16) Nye kugusa ko epuro, twa hepa hena kukara neharo. Morwasinke? Morwa eharo “kapi ali nyegenya.” Eharo kwa kwata nayinye ntani kudidimika nayinye. (1 Kol. 13:4-7, 13) Tu zeni tu ka tare omu kuhara Jehova novapuli vakwetu ntani nononkore detu nayi tu vatera tu lididimikire apa ava tu nyenge vantu.

5. Mokumona asi Jesus ga here oGuhwe, yisinke ga rugene?

⁵ Masiku, komeho nonkore dendi di ka mu dipage, Jesus kwa tanterere varongwa vendi wovalimburukwi asi: “Ame kurugana moomu ga tantera nge Tate, asi uzuni u dive asi ame nani kwa hara Tate.” (Joh. 14:31) Mokumona asi Jesus kwa here Jehova, eyi kwa mu vaterere a lididimikire maudigu aga ga mu kere komeho. Nsene tu hara Jehova, nose nga yi tu vatera tu lididimikire maudigu.

6. Kuliza noVaroma 5:3-5, ngapi omu vakareli vaJehova ava lizuvhu nampili ngomu vantu ava va nyenge?

⁶ Kuhara Jehova kwa vatera vakareli vendi va lididimikire mahepeko. Pasihonena, sikando simwe sigongi somasimbi kwa tanterere vapositoli va hageke kuzuvhisa. Nye vapositoli kwa here unene Karunga makura yipo va uyungire asi “ose twa hepa po kulimburukwa unene Karunga, kupitakana vantu.” (Yirug. 5:29; 1 Joh. 5:3) Nampili ngomu vanavazinyetu vana kuligwanekera nomarwaneso gokutunda komapangero, awo simpe kuna kutwikira kulimburukwa Jehova morwa va mu hara unene. Apa vantu ava tu nyenge, ayo kapi ayi tu dompesa, nye ose kuhafa.—Yirug. 5:41; resa Varoma 5:3-5.

7. Yisinke natu rugana nsene vekoro lyetu kuna kuturwanesa?

⁷ Nampo ove kuna kuligwanekera noudigu wokutunda kekoro lyoge. Apa atu tameke kulironga Bibeli, vamwe vekoro lyetu kuvhura va gazare asi kuna kutupukisa ano vamwe kugazara asi tuna piyagana. (Hetakanesa Marukusa 3:21.) Awo kuvhura hena va tu hepeke mononkedi dimwe. Mahepeko aga, kapisi ga tu tetukise. Jesus kwa tente asi: “Ano ava ga tunga nawo muntu, yiwo ngava kara wonkore zendi woowo.” (Mat. 10:36) Nye yi kare asi monkedi musinke vana kututekura vekoro lyetu, twa hepa kunyokera po kuvatara ngwendi nonkore detu. Mevango lyoyo, nsene tu twikira kuhara unene Jehova, nose ngatu hara hena vantu. (Mat. 22:37-39) Nye kapi tuna hara kuteza po nompango daJehova yipo tu hafese vantu.

8-9. Yisinke ya vaterere munazinyetukadi gumwe yipo a lididimikire marwaneso gomanene?

⁸ Georgina ogu ka tu tumbura pomuhowo, kwa lididimikilire marwaneso gomanene gokutunda kozina. Georgina kwa tanta asi: “Name noyina kwa tamekere kulironga  Bibeli noNombangi daJehova. Nye konyima zomakwedi ntazimwe apa na here kuza komapongo, oyina kwa tamekere kurwanesa nge. Ame kwa ya dimbwilire asi awo kwa va pukisire varwanesi usili ntani ngava ruganesa magano govarwanesi usili apa ngava uyunga name. Awo hena ngava swaura nge nokudera nohuki dange ntani nokuzuguma yimbapiratjangwa yange. Apa na kere nonomvhura 15, yipo na gwene ekuho. Oyina kwa hetekerere ko kuhagekesa nge kukarera Jehova apa va tulire nge ni kare novadinkantu vamwe membo limwe, ano vadinkantu owo ngava ruganesa yikwepangwe ntani ngava rugana yininke yimwe hena yoyidona. Ayo kapisi ureru kulididimikira marwaneso, unene po nsene gokutunda kwagumwe ogu wa hara ntani ogu a ku pakere mbili.”

⁹ Yisinke ya vaterere Georgina a lididimikire? Age kwa tanta asi: “Apa va rwanesere nge oyina, ame opo nina mana kuresa Bibeli zange nazinye. Ame nayi divire asi nina gwana usili ntani kwa lizuvhire ngwendi nina kara nelikwatakano lyenene naJehova. Ame nkenye apa ngani kanderere kwendi ntani nga purakene makanderero gange. Apa na kere membo olyo, munazinyetu gomukadi kwa zigidire nge ni ze kembo lyendi ntani ngatu lirongo nendi Bibeli. Posiruwo oso, ame kwa gwene ekorangedo lyokutunda kovanavazinyetu apa ngatu kara koSinyanga soUhompa. Awo ngava vatere nge ni lizuvhe asi name gumwe gekoro lyawo. Ame na dimbwilire nawa-nawa asi Jehova nonkondo unene kupitakana ava ava tu rwanesa, yi kare asi vantu musinke.”

10. Ngapi omu Jehova nga tu vatera?

¹⁰ Mupositoli Paurusa kwa tjenge asi ‘kwato eyi yokutugusa mo meharo lyaKarunga eli twa kara nalyo mwaJesus Kristusa, Hompa gwetu.’ (Rom. 8:38, 39) Nampili tu ligwanekere nomaudigu, Jehova nga tu hengagwida nokutunkondopeka. Ngomu vana yi likida mosihonena saGeorgina, Jehova kutuvatera hena kupitira movanavazinyetu ntani kuhara vapuli vakwetu kutuvatera tu lididimikire apa ava tu nyenge vantu.

11. Ngapi omu eharo eli ga fatwilire Jesus mwaJohanesa 15:12, 13 lya vaterere varongwa vendi? Gava sihonena.

¹¹ Masiku gokuhulilira ga Jesus pevhu komeho va ka mu dipage, age kwa tanterere varongwa vendi va lihara-hare. (Resa Johanesa 15:12, 13.) Jesus ga yi divire asi eharo lyokulizambera ngali va vatera va kare mouumwe ntani va lididimikire nampili ngomu vantu va  va nyenga. Tu tareni sihonena sombungakriste zomoTesaronika. Posiruwo esi va zi tulisire po, womombungakriste ngava va hepeke. Nye vanavazinyetu owo, kwa twikilire kulididimika nokulikida eharo. (1 Tes. 1:3, 6, 7) Paurusa kwa va korangedere va twikire kulihara ngorooro. (1 Tes. 4:9, 10) Eharo kwa va tumangedere va korangede wompwagetjima nokukwafa varupiranonkondo. (1 Tes. 5:14) Awo kwa kweme mapukururo gaPaurusa morwa mombilive zaPaurusa zauvali ezi ga va tjangerere konyima zomvhura zimwe, Paurusa kwa uyungire kuvahamena asi: “Neharo lyeni lya hara mukweni nalyo tali koro.” (2 Tes. 1:3-5) Eharo kwa va vaterere va lididimikire maudigu nomahepeko.

12. Ngapi omu vanavazinyetu womosirongo simwe va likidire eharo kovakwawo posiruwo soyita?

¹² Tu tareni eyi ya horokerere munazinyetu Danylo ogu ka tu tumbura ketameko namukadendi. Apa mwa kere yita modoropa zawo, awo ngava twikire kuza komapongo nokuzuvhisa ntani ngava peko vapuli vakwawo nondya. Nye ezuva limwe, vakwayita kwa wizilire Danylo. Danylo kwa tanta asi: “Awo kwa tanterere nge asi ni hageke kukara mbangi, ano apa na nyokere awo kwa toonene nge nokulika nge uta momutwe. Komeho va ze, awo kwa uyungire asi nava ka tengura yipo va ya kwatere kononkondo mukadange. Nye vanavazinyetu kwa tu rondekere usimbu mehina lyorutenda tu ze kodoropa zapeke. Kapi ngani divara eharo eli va tu likidire vanavazinyetu. Apa twa ka sikire kodoropa ozo zompe, vanavazinyetu kwa ka tu pere nondya nokutuvatera tu gwane yirugana ntani nembo omu twa kere. Ngoyitundwamo, konyima na ya tambwire vanavazinyetu vamwe ava va tjwayukire yita.” Yihorokwa eyi kulikida asi eharo eli ava tu likida vanavazinyetu kuvhura kutuvatera tu lididimikire nampili ngomu va tu nyenga vantu.

13. Ngapi omu mpepo zokupongoka azi tu vatere tu twikire kukarera Jehova nampili ngomu va tu nyenga vantu?

¹³ Jesus kwa tanterere varongwa vendi va hare nonkore dawo. (Mat. 5:44, 45) Ayo ureru kuyirugana ndi? Hawe! Nye kuvhura tu yi sikise mo nevatero lyompepo zokupongoka. Yiyimwa yompepo kwa kwatera mo eharo, edidimiko, nkenda, ugomoki ntani elipangero. (Gar. 5:22, 23) Yikara eyi kutuvatera tu lididimikire nampili ngomu va tu nyenga vantu. Sinzi sovantu ava ava tu rwanesa, va hageka kuturwanesa morwa vagara vawo ndi vakadi vawo ndi vana vawo ndi vamusinda kulikida yikara eyi. Sinzi sovantu  ava ava tu rwanesa, ngesi vamwe kuna kara vanavazinyetu. Yipo nye, nsene kukudigopera kuhara ava va kunyenga, morwa yeeyi o karere Jehova, kanderera kwendi a ku pe mpepo zokupongoka. (Ruk. 11:13) Ntani diva asi kulimburukwa Karunga kuna kara sininke sosiwa kurugana.—Yis. 3:5-7.

14-15. Ngapi omu Varoma 12:17-21 za vaterere Yasmeen a hare mugara gwendi nampili ngomu nga mu hepeke?

¹⁴ Tu tareni eyi ya horokerere munazinyetukadi Yasmeen. Apa ga ya kere gumwe goNombangi daJehova, mugara gwendi kwa gazarere asi vana mu pukisa ntani nga hetekere ko ku mu hagekesa kukarera Karunga. Mugara gwendi nga mu swaura nokutantera vanekoro nompitisili gumwe goukarelikarunga ntani mpure asi va mu tjilise. Age hena nga mu rundire asi kuna kuteza po epata. Mugara gwendi nga swaura vanavazinyetu poSinyanga! Yasmeen nga lili yikando yoyinzi morwa mugara gwendi nga mu tekura monkedi zondona.

¹⁵ Vanavazinyetu ngava hengagwida nokukorangeda Yasmeen KoSinyanga soUhompa. Vakuronambunga kwa mu korangedere a ture pasirugana nonkango edi da kara moVaroma 12:17-21. (Resa.) Yasmeen kwa tanta asi: “Ayo kapi ya kere ureru nye ame kwa pulire Jehova a vatere nge ntani na rugene paapa na hulira yipo ni sikise mo eyi azi uyunga Bibeli. Apa mugara gwange nga tjisire evhu mokombisa mowina, ame ngani li zeresa mo. Apa nga swaura nge, ame ngani mu limburura monkedi zombili ntani apa nga vere, ame ngani mu pakere mbili.”

16-17. Yisinke ono lirongere ko kosihonena saYasmeen?

¹⁶ Konyima zosiruwo, Yasmeen ga gwanene mo uwa kweyi ga likidire mugara gwendi eharo. Age kwa tanta asi: “Mugara gwange ga ya tamekere kuhuguvara nge morwa ga yi divire asi ame kuuyunga nkenye apa usili. Age ga tamekere kupurakena nge nefumadeko apa nga tu uyunga kuhamena ukarelikarunga ntani ga here kutulisa po mbili membo. Age ngesi kukorangeda nge yipo ni ze komapongo. Epata lyetu lina wapa ntani ose ngesi kuna kara mombili. Ame nina kara nehuguvaro asi mugara gwange nga tambura usili ezuva limwe nokukarera Jehova.”

¹⁷ Sihonena saYasmeen kulikida asi “eharo kwa kwata nayinye, . . . kuhuguvara nayinye, kudidimika nayinye.” (1 Kol. 13:4, 7) Apa vantu ava tu nyenge, ayo kutukoresa unene, nye eharo alyo nonkondo unene. Nsene tu hara vantu, nga yi va tumangeda va hageke kutuhepeka. Ntani nsene tu likida eharo wopeke, ayo ngayi hafesa Jehova. Nye nampili yi kare asi varwanesi kuna kutwikira kutunyenga, ose kuvhura simpe tu hafe. Ngapi nayi vhura kuhoroka ngoso?

18. Morwasinke natu karera noruhafo nsene vantu kuna kutuhepeka?

¹⁸ Jesus kwa tente asi: “One vanerago [ndi vantu woruhafo] nsene ta va mu nyenge vantu.” (Ruk. 6:22) Ose kapi twa hara va tu nyenge vantu ntani kapi atu yi hafere apa ava tu hepeke vantu. Morwasinke nye natu karera noruhafo nsene vantu kuna kutuhepeka? Tu tareni nokonda ntatu. Zokuhova, apa atu lididimikire, ose kuhafesa Jehova. (1 Pet. 4:13, 14) Zauvali, epuro lyetu kunkondopara unene. (1 Pet. 1:7) Ano zautatu, ose ngatu ka gwana mfeto zomwenyo gwanarunye komeho.—Rom. 2:6, 7.

19. Morwasinke vapositoli va karerere noruhafo konyima zokuvatoona?

¹⁹ Konyima zapa Jesus va mu vhumbwire, vapositoli kwa limonenene ruhafo oru gava tanterere Jesus. Konyima zokuvatoona nokuvatantera va hageke kuzuvhisa, awo kwa hefe. Morwasinke? Morwa “Karunga kwa va tere asi va fira kuvahepekera edina lyaJesus.” (Yirug. 5:40-42) Awo kwa here unene hekurwawo Jesus, kupitakana kutjira nonkore dawo. Ntani awo kwa likidire eharo pokutwikira kuzuvhisa mbudi zongwa. Sinzi sovanavazinyetu naina kuna kutwikira kukarera Jehova nampili momaudigu. Awo va yi diva asi Jehova kapi nga divara yirugana eyi ava mu ruganene ntani neharo lyawo.—Heb. 6:10.

20. Yisinke ngatu ka lironga mosirongwa sokukwama ko?

²⁰ Vantu ngava twikira ngorooro kutunyenga mouzuni ou. (Joh. 15:19) Nye kapisi yi tu tjilise. Ngomu ngatu ka yi lironga mosirongwa sokukwama ko, Jehova nga ‘nkondopeka nokupopera’ vakareli vendi wovalimburukwi. (2 Tes. 3:3) Yipo nye, tu twikireni kuhara Jehova novanavazinyetu ntani nononkore detu. Nsene tu kwama epukururo eli, ngatu twikira kukara ngorooro mouumwe nokunkondopara pampepo, ose hena ngatu hafesa Jehova ntani ngatu yi likida asi eharo nonkondo unene nampili yi kare asi vantu va tu nyenga.