Vanavazinyetu vamwe kuruganesa yikwakonentu mokuzogera nekoro lyawo ntani novapuli vakwawo. Nye Vakriste ava va kura pampepo kukwama epukururo eli asi: “Vantu wonondunge kudimburura yimpagwa nsene tayi wiza, makura tava yi vanda. Nye vantu wokupira nondunge, awo kuvyukilira mo tupu moruhura ntani nye vana kulivera.”—Yis. 27:12.

Ose twa yi diva asi Jehova ana hara kutupopera. Yipo nye, kapi tuna hara kulikwata ukwawo novantu ava ava retesa po maligaunuko ndi ava va gusa mombunga ntani nava ava gava magano gepuko. (Rom. 16:17; 1 Kol. 5:11; 2 Joh. 10, 11) Vamwe womombungakriste kuvhura va rugane yininke eyi ya lilimba noBibeli. (2 Tim. 2:20, 21) Yipo nye, ya kara nomulyo tu takamese nsene kuna kutulisa po vakaume. Nye ayo kapi a yi kara ureru kuhorowora vakaume wovawa nsene asi ose kuzogera nawo pokulitjangera nombudi.

Nsene asi ove kuna ku gazadara ko o hamene mombunga zonene zo ku litumina nombudi, wa hepa kutakamesa asi vakaume musinke ono kutulisa po. Vakriste vamwe ava va lihameka monombunga dononene dokulitumina nombudi, kwa ligwanekera noyitundwamo yoyidona. Ngapi munazinyetu na takamesa nsene asi mombunga ozo kwa hamena mo vantu wovanzi? Ayo na yi kara udigu mokuvadiva upampepo wawo. Episarome 26:4 kutanta asi: “Ame kapi ani kara kumwe nava woyimpempa; ndi asi ni lizuke mundiro novayilipaki.” Eyi kulikida asi ayo ya kara nomulyo tu litumine nombudi novantu tupu ava twa diva.

Nampili kuna kulihameka mokambungagona kokulitumina nombudi, Mukriste ga hepa kutakamesa asi siruwo sokuhura kupi ana kuruganesa ntani nonzogera musinke vana kusimwitira. Ntani kapisi tu lizuvhe asi twa hepa kulimburura konombudi odo yikare asi dokukara ngapi ndi siruwo sokuhura kupi tuna kulitjangera. Paurusa kwa rondwere Timoteusa kuhamena vantu ava ava “kavauka nokulitura mononkango da hana si dawo.” (1 Tim. 5:13) Yininke eyi kuvhura kuhoroka neina kupitira moyikwakonentu.

Mukriste ogu ga kura pampepo, kapi nga uyunga ndi a purakene nombudi doyipempa ndi domokahorehore kuhamena vapuli vakwawo. (Epis. 15:3; Yis. 20:19) Ntani Mukriste ogo kapi nga purakena konombudi dokuswaukisa ndi edi dina dili ku kara nomaumbangi. (Efe. 4:25) Kointaneta zetu jw.org ntani kelikwamo lyetu lyo-JW Broadcasting^® lya nkenye kwedi, ose ku gwana ko nondya dopampepo dononzi ntani nonombudi dousili.

Vanavazinyetu vamwe kuruganesa yikwakonentu yokutuma nombudi yipo va randese ndi va rande ntani nokutjingisa yininke yongesefa nokukuta vantu moyirugana. Yininke eyi kuna kara ruha rongesefa, ayo kapi ya likwatakana noukareli wetu. Yipo nye, Mukriste ogu ana hara ‘kunyokera po edowo lyoyimaliva,’ kapi ta vhuru kuruganesa vapuli vakwawo yipo a gwanene mo yimaliwa.—Heb. 13:5.

Ngoso kuvhura tu ruganese yiruganeso yokutuma nombudi yipo tu hundire yimaliwa yi ka kwafe vanavazinyetu ava sina kundama simpagwa ndi? Ose kwa hara vanavazinyetu, yipo nye ose nkenye apa kuvavatera nokuvakorangeda apa ava hepa ekwafo. (Jak. 2:15, 16) Nye nsene tu yi rugana mombunga zonene zokulitumina nombudi, kuvhura nga yi kare udigu koBeteli ndi kovakuronambunga womombungakriste mokugava evatero. (1 Tim. 5:3, 4, 9, 10, 16) Yosili, kapi tuna hara kuninkisa vantu va gazare asi ose kwa tu pa situmbukira sokupakera mbili yihepwa yovanavazinyetu.

Ose tuna hara kurugana yininke monkedi zokufumadekesa ko Karunga gwetu. (1 Kol. 10:31) Yipo nye, nsene kuna kutokora kuruganesa yiruganeso yokutuma nombudi ndi yikwakonentu yimwe, wa hepa kutakamesa ntani nokugazadara ko yiponga eyi ya hamena mo.