1. Morwasinke Jesus ga kanderere kwaJehova yipo a kunge varongwa vendi?

MASIKU gokuhulilira gaJesus pevhu, age kwa gazadarere ko maudigu aga va ya ligwanekerere nago varongwa vendi. Jesus kwa here varongwa vendi, makura yipo ga tanterere oGuhwe va “va kunge koMudona.” (Joh. 17:14, 15) Jesus ga yi divire asi konyima zapa na tengura meguru, Satana Muzonaguli nga twikira kurwanesa navenye ava va hara kukarera Jehova. Yosili, vantu vaJehova va hepere kuvapopera.

2. Ngapi omu tuna yi diva asi Jehova nga limburura makanderero getu?

² Jehova kwa limbwilire makanderero gaJesus morwa ga here Munwendi. Nsene tu rugana paapa twa hulira tu hafese Jehova, nage ngatu hara ntani nga limburura makanderero getu. Mokumona asi Jehova ga kara nosinka kepata lyendi, age nga twikira kupakera mbili vana vendi. Nsene a dira kuyirugana oyo, ngayi swaukisa edina lyendi.

3. Morwasinke tuna hepere epopero lyaJehova naina?

³ Ngesi tuna hepa unene epopero lyaJehova kupitakana pwanare. Satana va mu zuguma mo meguru ntani ana kara “nehandu lyenene.” (Ehor. 12:12) Age kwa ninkisa vantu yipo va tu hepeke nokugazara asi awo kuna ‘kukarera Karunga.’ (Joh. 16:2) Vamwe ava va dira kupura mwaKarunga kutuhepeka morwa kapi atu rugana eyi ava rugana sinzi sovantu mouzuni. Nye yi kare asi konda musinke zeyi vana kutuhepekera vantu, ose nokutjira si. Morwasinke? Morwa Nonkango daKarunga kuuyunga asi: “Hompa mulimburukwi, age kumunkondopeka, ta mu popere koMudona.” (2 Tes. 3:3) Ngapi omu Jehova a tu popere? Tu zeni tu ka zogere ko nonkedi mbali.

4. Kuliza noVaefeso 6:13-17, yisinke ga tu pa Jehova mokutupopera?

⁴ Jehova kwa tu pa yirwiso yipo yi tu popere komahomokero gaSatana. (Resa Vaefeso 6:13-17.) Yirwiso eyi yopampepo nonkondo ntani kuvhura kutuvatera. Nye mokuninka asi yi tu popere, ntudi twa hepa kuyiruganesa. Yisinke ya fanekesa yirwiso eyi? Tu zeni tu ka yi zogere simwe nasimwe.

5. Yisinke rwa fanekesa liva romombunda ntani morwasinke natu ru dwarera?

⁵ Liva romombunda kwa fanekesa usili ou wa kara moNonkango daKarunga Bibeli. Morwasinke natu dwarera liva ropasifanekeso? Morwa Satana yige ‘guhya yimpempa.’ (Joh. 8:44) Nomvhura dokusika komayovi, age kwa uyunga yimpempa ntani kwa pukisa “uzuni naunye.” (Ehor. 12:9) Nye usili womoBibeli kutupopera yipo Satana a dire kutupukisa. Ngapi omu natu dwara oru liva ropasifanekeso? Ose kuyirugana oyo pokulironga usili kuhamena Jehova nopokumukarera “mompepo nomousili” ntani nokuhungika mwanayinye.—Joh. 4:24; Efe. 4:25; Heb. 13:18.

6. Yisinke sa fanekesa sikoverero sosivera soponturo ntani morwasinke natu si dwarera?

⁶ Sikoverero sosivera soponturo kwa fanekesa nompango daJehova douhungami. Morwasinke natu dwarera sikoverero sosivera soponturo sopasifanekeso? Ngwendi moomu tupu sikoverero ngasi popere mutjima gomukwayita, nompango daJehova nado kutupopera koyininke yoyidona. (Yis. 4:23) Jehova kuna tu harere tu mu hare nokumukarera nomutjima gwetu nagunye. (Mat. 22:36, 37) Satana kuhetekera ko kutuninkisa tu kare nonomutjima mbali yipo tu hare yininke yomouzuni eyi ga nyenga Jehova. (Jak. 4:4; 1 Joh. 2:15, 16) Ano nsene kapi yina kumutompoka oyo, age kuhetekera ko kutuhepeka yipo tu rugane eyi ya dira kuliza nonompango daJehova.

7. Ngapi natu dwara sikoverero sosivera soponturo sopasifanekeso?

⁷ Apa atu tura nompango daJehova pasirugana meparu lyetu, ose kulikida asi kuna dwara sikoverero sosivera sopasifanekeso. (Epis. 97:10) Vamwe kulizuvha asi nompango daJehova kutuninkisa tu dire kukara noumanguruki. Nye nsene tu hageka kutura pasirugana nompango daJehova meparu lyetu, ose ngatu fana ngwendi mukwayita ogu ana kara moyita ana kuhutura ko sikoverero sendi sosivera nokugazara asi aso udigu. Nye ayo ugova mokuyirugana ngoso. Nompango daJehova ‘kapi da kara udigu’ kovantu ava va mu hara ntani ado kuvhura ngadi va popere meparu.—1 Joh. 5:3.

8. Yisinke a yi tanta kudwara nonkaku dopasifanekeso?

⁸ Paurusa kutukorangeda hena tu dware nonkaku dopasifanekeso nokuliwapaikira kuzuvhisa mbudi zongwa zombili. Eyi kutanta asi twa hepa kukara tuna liwapaikire nkenye apa yipo tu zuvhise mbudi zongwa zokuhamena Uhompa. Apa atu tantere ko wopeke mbudi zomoBibeli, ose kukara nepuro lyenene. Ose kulizuvha ekorangedo pokumona vantu vaJehova mouzuni mudima kuna kuruganesa nkenye mpito yipo va zuvhise mbudi zongwa, yi kare asi kosure, koyirugana, komavango gonongesefa ndi kuzuvhisa tunda embo zende embo ndi koyitora ndi kovanekoro vawo ntani kovantu ava va diva. Nsene tu kara noutjirwe nokuhageka kuzuvhisa, ayo ngayi fana ngwendi mukwayita ogu ana kuhutura nonkaku dendi ndi yicamakaku yendi moyita, ano nompadi dendi kuvhura di remane. Ngoyitundwamo, nonkore dendi kuvhura kumuhomokera ntani kuvhura yi mu karere udigu mokukwama mapukururo gokutunda komukurona govakwayita.

9. Morwasinke twa hepera kusimba silikandwiso setu?

 ⁹ Silikandwiso kwa fanekesa kepuro eli twa kara nalyo mwaJehova. Ose twa kara nehuguvaro asi age nga sikisa mo matumbwidiro gendi. Epuro kutuvatera tu “dimise yikutji eyi a ponyesa Mudona.” Morwasinke twa hepera kusimba silikandwiso sepuro? Morwa aso kutupopera komarongo goyimpempa govarwanesi usili ntani kapi a yi tu dompesa apa vantu ava tu swaura. Nkenye apa atu nyokere po kurugana eyi ga nyenga Jehova yi kare asi kosure ndi koyirugana, ngoso epuro lyetu kuna kutupopera. (1 Pet. 3:15) Ntani epuro lyetu kutupopera tu nyokere po yirugana yokufuta yimaliwa yoyinzi morwa twa yi diva asi kuvhura yi tu ninkise tu dire kukarera Jehova momunene. (Heb. 13:5, 6) Epuro lyetu kutupopera yipo tu liture mo unene mokukarera Jehova nampili kuna kutuhepeka.—1 Tes. 2:2.

10. Yisinke lya fanekesa ekoli ntani morwasinke natu li dwarera?

¹⁰ Ekoli kwa fanekesa ehuguvaro eli a tu pe Jehova. Ose twa kara nehuguvaro asi Jehova ngatu vhumbura koufe ntani ngaka futa ava ava rugana mpango zendi. (1 Tes. 5:8; 1 Tim. 4:10; Tit. 1:1, 2) Ngwendi moomu tupu  ekoli ali popere mutwe gomukwayita, ehuguvaro kupopera magazaro getu. Monkedi musinke? Ehuguvaro kutuvatera tu demenene komatumbwidiro gaKarunga ntani kutuvatera tu dire kudemenena komaudigu getu. Ngapi natu dwara ekoli lyopasifanekeso? Ose kuvhura kuyirugana oyo pokutara yininke ngwendi moomu a yi tara Karunga. Pasihonena, twa hepa kuhuguvara mwaKarunga mevango lyokuhuguvara memona.—Epis. 26:2; 104:34; 1 Tim. 6:17.

11. Yisinke rwa fanekesa rufuro ntani morwasinke natu ru ruganesera?

¹¹ Rufuro kwa fanekesa Nonkango daKarunga, Bibeli. Bibeli kwa kara nononkondo mokutura poruzera yimpempa nayinye ntani azo kuvhura kutumangurura tu sige marongo goyimpempa nononkareso donondona. (2 Kol. 10:4, 5; 2 Tim. 3:16, 17; Heb. 4:12) Elirongo lyanyamwetu lyoBibeli ntani nomavyukiso aga atu gwana kombunga zaJehova kutuvatera tu dive omu natu ruganesa nawa Bibeli. (2 Tim. 2:15) Kugusa ko yirwiso yopampepo, pwa kara hena nkedi zimwe omu Jehova a tu popere. Nkedi musinke ozo?

12. Evatero musinke hena twa hepa ntani morwasinke?

¹² Mukwayita ogu ga kara noudivi ga yi diva asi kapi tayi mu tompoka moyita pwagelike, ga hepa evatero lyovakwayita vakwawo. Mokulifana, nose kapi tayi tu tompoka kurwanesa Satana novantu vendi pwanyoselike nye twa hepa evatero lyovapuli vakwetu. Jehova kwa tu pa ‘vapuli vakwetetu’ mouzuni mudima yipo va tu vatere.—1 Pet. 2:17.

13. Kuliza noVahebeli 10:24, 25, ngapi omu aga tu vatere mapongo?

¹³ Nkedi zimwe omu atu gwana evatero kuna kara pokuwiza komapongo. (Resa Vahebeli 10:24, 25.) Poyiruwo yimwe, natuvenye kudompa mutjima nye ose kugwana ekorangedo komapongo. Malimbururo govanavazinyetu kutukorangeda. Yiuyungwa ntani malikido aga aga pitire mepongo kutuvatera tu tokomene kukarera Jehova. Apa atu zogere novanavazinyetu yi kare asi komeho zepongo ndi konyima zepongo, ose kugwanena mo ekorangedo. (1 Tes. 5:14) Ntani hena mapongo kutupa mpito tu limonene ruhafo oru aru tundu mokuvatera wopeke. (Yirug. 20:35; Rom. 1:11, 12) Mapongo getu kutuvatera hena mononkedi dimwe. Ago kutuvatera tu dive nawa kuzuvhisa nokuronga. Pasihonena, ose kulironga omu natu ruganesa nawa yiruganeso yetu yomokuzuvhisa. Yipo nye, liwapaikira nkenye apa komeho o wize kepongo. Ano nsene mepongo ono kara, purakena nawa. Konyima zepongo, tura pasirugana eyi ono lirongo. Nsene o yi rugana ngoso, ove ngo kara “mukwayita gomuwa gwaJesus Kristusa.”—2 Tim. 2:3.

14. Evatero musinke hena atu gwana?

¹⁴ Ose kugwana hena evatero lyokutunda kovaengeli. Gazara tupu eyi a vhuru kurugana muengeli gumwe tupu. (Jes. 37:36) Gazadara ko hena eyi nava vhura kusikisa mo vaengeli wovanzi. Vaengeli kwa kara nononkondo dononene kupitakana vantu ntani nonompepo donondona. Jehova yige muntu gononkondo po mouzuni naunye. Apa a hama kwetu, ose kunkondopara kupitakana vantu ava ava tu rwanesa nampili yi kare asi awo vanzi. (Vap. 6:16) Nonkango odo usili. Ado ngadi tu vatera tu dire kudompa mutjima apa varugani vakwetu ndi vanasure vakwetu ntani vanekoro ngava tu uyungira yoyidona ndi va tu rugane yoyidona. Diworoka asi kapisi nyovelike ono kara. Ove kuna kukwama mavyukiso gaJehova.

15. Kuliza naJesaya 54:15, 17, morwasinke natu uyungira asi kwato ogu nga vhura kuhagekesa po sirugana saJehova sokuzuvhisa?

¹⁵ Nokonda nonzi deyi wa tu nyengera uzuni ou ana kupangera Satana. Ose kapi atu kwatesa ko maupolitika ndi tu lihameke moyita. Ose kuzuvhisa kuhamena edina lyaKarunga ntani kuhamena Uhompa asi yiwo welike ngau reta mbili pevhu. Ose hena kuronga vantu asi mupangeli gouzuni ou, munayimpempa ntani mudipagi. (Joh. 8:44) Ose hena kudivisa vantu asi uzuni ou waSatana ntaantani ngava ka u zonagure po. Nye Satana novantu vendi kapi ngava vhura kuhagekesa po sirugana sokuzuvhisa. Ose ngatu twikira ngorooro kuhamberera Jehova pokuruganesa nkenye mpito. Nampili ngomu Satana ga kara nononkondo, kapi ya mu tompoka kuhagekesa po mbudi zoUhompa waKarunga. Eyi kulikida asi Jehova yige ga popera mbudi zendi yipo zi lihanene kovantu navenye mouzuni mudima.—Resa Jesaya 54:15, 17.

16. Monkedi musinke omu Jehova nga ka parura vantu vendi poudigu wounene?

¹⁶ Yisinke tuna kundindira komeho? Poudigu wounene, Jehova ngaka tu parura mononkedi mbali dokutetukisa. Zokuhova, age ngaka parura vakareli vendi wovalimburukwi apa nga ninkisa vahompa womouzuni va homokere Babironi zonene ndi maukarelikarunga goyimpempa. (Ehor. 17:16-18; 18:2, 4) Ano konyima, Jehova nga ka parura vantu vendi apa ngaka zonagura po vadinikarunga navenye poyita yaHarumagedoni.—Ehor. 7:9, 10; 16:14, 16.

17. Mauwa musinke atu gwanene mo nsene tu kara nelikwatakano lyenene naJehova?

¹⁷ Nsene tu twikira kukara nelikwatakano lyenene naJehova, Satana kapi ngayi mu tompoka mokutukoresa dogoro narunye. Bibeli kuuyunga asi Satana ngava mu zonagura po narunye. (Rom. 16:20) Yipo nye, ruganesa yirwiso nayinye yopampepo. Wa ha hetekera ko kurwisa Satana pwanyovelike. Vatera vapuli vakweni. Ntani kwama mavyukiso gokutunda kwaJehova. Nsene o yi rugana ngoso, ove ngo kara nehuguvaro asi Guhyetu gemeguru ngaku nkondopeka nokukupopera.—Jes. 41:10.