1-2. Yilye ogu ya tumbukira mokuvatera murongwa goBibeli a ture po ezokomeho dogoro kekuho?

AMY OGU ga tunga moFiji, kwa tanta asi: “Ame ngani hafere eyi ngava rongo nge. Na yi divire asi awo kwa kere usili womoBibeli. Nye apa na tamekere kulitulira po siruwo yipo ni kare novanavazinyetu, ya vaterere nge ni ture po malitjindjo nokugwana ekuho.” Sihorokwa esi kuturonga asi mokuninka asi murongwa goBibeli a ture po ezokomeho dogoro kekuho, navenye womombungakriste va hepa kumuvatera.

² Nkenye muzuvhisi kuvhura kuvatera murongwa goBibeli a ture po ezokomeho. (Efe. 4:16) Munazinyetu gomukadi gomuzuvhisi gokukarerera Leilani ogu ga tunga moVanuatu kwa tanta asi: “Pwa kara mbuuyungiso asi navenye womomukunda kuvhura kuvatera mokurera munona. Eyi ya lifana tupu nokutulisa po varongwa. Mokuninka asi murongwa a ture po ezokomeho, navenye womombungakriste va hepa kumuvatera.” Pasihonena, mokuninka asi munona a ya kare mukondi, vakurona vendi novanekoro vamwe novakaume ntani novarongi vendi wokosure, va hepa kumuvatera. Awo kuvhura va yi rugane oyo pokumukorangeda ntani pokumuronga. Mokulifana, vanavazinyetu kuvhura kuvatera varongwa woBibeli pokuvapa ko magano nokuvakorangeda ntani nokuvatulira po sihonena sosiwa. Eyi nga yi va vatera va ture po ezokomeho dogoro kekuho.—Yis. 15:22.

3. Yisinke natu lirongera ko kononkango edi ga uyungire Ana naDorin ntani Leilani?

³ Morwasinke murongi goBibeli na tambwira evatero lyokutunda kovanavazinyetu nsene asi awo kuna kuvatera murongwa gwendi? Koneka nonkango edi ga uyunga Ana, muzuvhisi  gosiruwo nasinye ogu ga tunga moMoldova. Age kwa tanta asi: “Murongwa goBibeli ga hepa evatero lyokutunda kovantu wovanzi kupitakana tupu lyomurongi gwendi.” Munazinyetu gomugara Dorin, muzuvhisi gosiruwo nasinye ogu ga tunga nage mosirongo oso, kwa tanta asi: “Yikando yoyinzi, vanavazinyetu kuuyunga nonkango edi adi gumu varongwa komutjima ntani magano ogo kukara mape kwange name.” Leilani kwa tumbura ko konda zimwe asi: “Eharo nonkenda ezi ava likida murongwa, kuvhura kumuvatera a dimburure asi ose sili vakareli vaJehova.”—Joh. 13:35.

4. Yisinke natu ka zogera mosirongwa esi?

⁴ Nampo kuvhura o lipure asi ‘ngapi nani vatera murongwa goBibeli a ture po ezokomeho nsene asi kapisi nyame ani lirongo nendi Bibeli?’ Tu zeni tu ka zogere eyi natu rugana nsene munazinyetu gumwe ana tu pura tu ka kare pelirongo lyendi lyoBibeli ntani neyi natu rugana nsene murongwa goBibeli ana tameke kuwiza komapongo. Tatu ka konakona hena omu vakuronambunga nava vatera varongwa woBibeli va ture po ezokomeho dogoro kekuho.

5. Yisinke no rugana nsene gumwe ana kupura mu ze komurongwa gwendi goBibeli?

⁵ Nsene kuna kuronga murongwa Bibeli, murongi yige ya tumbukira mokufatwilira murongwa gwendi a kwate egano Bibeli. Nsene munazinyetu ana kupura mu ze nendi komurongwa gwendi goBibeli, situmbukira soge kuna kara sokumuvatera, nye kapisi sokukara murongi. (Muud. 4:9, 10) Nye yisinke no rugana yipo nove o lihameke mo monzogera?

6. Ngapi natu tura pasirugana mpango ezi za kara moYisewe 20:18, nsene gumwe ana tu pura tu ze nendi komurongwa gwendi?

⁶ Liwapaikira komeho zokuza kelirongo lyoBibeli. Pomuhowo, pura munazinyetu aku tantere kuhamena murongwa gwendi goBibeli. (Resa Yisewe 20:18.) Kuvhura omu pure asi: “Yisinke wa diva kuhamena murongwa goge? Sirongwa musinke no ka lironga nage? Yisinke ono hara aka lirongere ko kosirongwa esi murongwa goge? Yisinke eyi nani ka uyunga neyi nani ka dira kukauyunga? Ngapi nani ka korangeda murongwa goge yipo a ture po ezokomeho?” Yosili, ayo yawapa komurongi mokudira kugava mauzera gomokahore-hore kuhamena murongwa gwendi. Mauzera aga na ku tantera kuhamena murongwa gwendi kuvhura ga ku vatere. Munazinyetukadi gomutumwa Joy, kutantera vanavazinyetu mauzera gokuhamena murongwa gwendi. Age kwa tanta asi: “Mauzera aga ani tantere vanavazinyetu kuvavatera va dive eyi nava ka uyunga komurongwa gwange.”

7. Morwasinke noliwapaikilira komeho zosiruwo nsene munazinyetu ana kupura mu ka rugane kumwe elirongo lyendi?

⁷ Nsene munazinyetu gumwe ana ku pura oze kumwe nendi komurongwa gwendi, ya wapa kuliwapaikilira sirongwa esi nava ka lironga. (Esira 7:10) Munazinyetugara Dorin ogu ka tu  tumbura muhowo kwa tanta asi: “Ame kuyihafera apa ani mono vanavazinyetu ava ani zi nawo vana liwapaikire. Ayo kuvavatera va pwagese yitwa yomulyo.” Ntani murongwa goBibeli nga yi dimburura asi natuvenye tuna liwapaikire nawa. Eyi nga yi mu vatera nage a liwapaikire nkenye apa. Nampili kapi ono liwapaikire nawa sirongwa oso, kuvhura o purakene nawa yipo o didilike yitwa yomulyo.

8. Yisinke norugana yipo ekanderero lyoge lika gume murongwa komutjima?

⁸ Ekanderero kuna kara sininke somulyo pelirongo lyoBibeli. Yipo nye, gazadara ko eyi nokauyunga nsene munazinyetu ogu ana kupitisira na ka kupura o kanderere. Nsene o liwapaikira, ekanderero lyoge tali ka tanta yuma. (Epis. 141:2) Hanae ogu ga kara moYapani, kudiworoka simpe makanderero gamunazinyetu gomukadi ogu nga zi nomurongi gwendi. Age kwa tanta asi: “Ame na yi dimbwilire asi age kwa kara nelikwatakano lyenene naJehova ntani name kwa here ni kare ngwendi yige. Ntani apa nga tumbura edina lyange momakanderero, ame kwa lizuvhire asi ga hara nge.”

9. Kuliza naJakopo 1:19, yisinke norugana yipo o kwatese ko munazinyetu ogu ana kurugana elirongo lyoBibeli?

⁹ Kwatesa ko munazinyetu ogu ana kurugana elirongo lyoBibeli. Omamuyovbi, muzuvhisi gosiruwo nasinye gomoNigeria kwa tanta asi: “Mokuninka asi o kwatese ko munazinyetu ana kurugana elirongo lyoBibeli, wa hepa kupurakena nawa. Munazinyetu ogu a kwatesa ko elirongo lyoBibeli, kugava magano gomawa, nye kapi a uyunga yoyinzi morwa ga yi diva asi aso situmbukira somurongi.” Ngapi omu no diva siruwo esi no uyunga ntani nomu no gava magano goge? (Yis. 25:11) Purakena nawa ngomu murongi ana kuronga murongwa gwendi. (Resa Jakopo 1:19.) Nsene o purakena nawa, ngayi kuvatera o dive omu no gava magano. Nye nampili ngoso, komeho o uyunge wa hepa kugazadara ko. Pasihonena, wa hepa kunyokera po kuuyunga unene ndi o donganese murongi ngomu ana kuronga ndi o uyunge eyi yina dili kuliza neyi vana kuzogera. Nye kuvhura o gave ko egano lyesupi ndi sifanekeso ndi epuro, yipo o zerese sitwa esi vana kuzogera. Poyiruwo yimwe kuvhura o lizuvhe asi kapi ono kara nomagano aga no vhura kugava kuhamena eyi vana kuzogera. Nye nsene o pandadeka murongwa nokulikida elituromo mwendi, nga yi mu vatera a ture po ezokomeho.

10. Ngapi murongwa goBibeli na gwanena mo uwa nsene omu tantera eyi wa pita meparu?

¹⁰ Simwitira eyi ya kupita meparu. Kuvhura o simwitire ko murongwa goBibeli kuhamena omu wa lironga usili nomu wa lididimikira maudigu ntani nomu Jehova ga ku vatera meparu lyoge. (Epis. 78:4, 7) Nsene omu simwitira kuhamena eyi ya kuhorokera, kuvhura yi mu vatere. Ayo kuvhura yi nkondopeke epuro lyendi ndi yi mu korangede yipo a twikire dogoro a ka gwane ekuho. Ntani kuvhura yi mu vatere a dimburure  omu na lididimikira maudigu gendi. (1 Pet. 5:9) Munazinyetugara Gabriel, muzuvhisi gosiruwo nasinye ogu ga tunga moBrazil, kudiworoka eyi ya mu vaterere apa nga lirongo Bibeli. Age kwa tanta asi: “Apa na zuvhire eyi va ligwanekerere nayo vanavazinyetu, ya vaterere nge ni dimburure asi Jehova kumona maudigu aga atu ligwanekere nago. Nsene asi ya va tompokere mokugalididimikira, name nga yi tompoka nge.”

11-12. Morwasinke natu tambwira murongwa goBibeli ogu a wiza komapongo?

¹¹ Mokuninka asi murongwa goBibeli a ture po ezokomeho dogoro kekuho, ga hepa kuwiza komapongo nkenye apa nokugwanena mo uwa. (Heb. 10:24, 25) Pomuhowo murongi gwendi goBibeli ga hepa kumuzigida komapongo. Nsene ana tameke kuwiza komapongo, natuvenye twa hepa kumukorangeda a twikire kuwiza komapongo. Nye ngapi natu yi rugana?

¹² Tambura murongwa goBibeli. (Rom. 15:7) Nsene tu tambura murongwa goBibeli apa a wiza komapongo, nga yi mu tumangeda a twikire kuwiza nkenye apa. Twa hepa kumumorora nokumudivisa hena kwava wopeke. Wa ha gazara asi nampo kweli ogu ana kumupakera mbili, morwa nampo murongi gwendi kapi simpe ana ya siki kepongo ndi nampo ana kara noyitumbukira yimwe hena. Purakena nawa kweyi ana kuuyunga murongwa goBibeli ntani mu likida eharo. Ngapi omu na lizuvha nsene omu tambura nawa? Koneka sihonena saDmitrii ogu ga gwene ekuho nomvhura dongandi dina ka pita ntani ogu ana kara ngesi mukwafimbunga. Age kwa uyunga kuhamena epongo lyendi lyokuhova asi: “Munazinyetugara gumwe kwa mwene nge nina sikama noutjirwe ponze zoSinyanga, makura yipo ga wizire a ya simbe nge tu ze kumwe monda. Wovanzi kwa ya morwere nge. Ame kwa tetukire sili. Ame kwa yi haferere ntani kwa lizuvhire ngwendi tu ponge nkenye ezuva. Aso kwa kere sininke na dira kumona rumwe.”

13. Ngapi sihonena soge sosiwa nasi vatera murongwa goBibeli?

¹³ Tura po sihonena sosiwa. Sihonena soge sosiwa kuvhura kuvatera murongwa goBibeli ayi pure nawa-nawa asi ana gwana usili. (Mat. 5:16) Vitalii ogu ana kara ngesi muzuvhisi gokukarerera moMoldova kwa tanta asi: “Ame ngani nomene omu womombungakriste ngava paruka neyi ngava rugana. Eyi kwa vaterere nge ni ya dimburure asi Nombangi daJehova kuna kara ukareli wousili.”

14. Ngapi sihonena soge sosiwa nasi vatera gumwe a ture po ezokomeho?

¹⁴ Mokuninka asi murongwa goBibeli a gwane ekuho, age ga hepa kutura pasirugana eyi ana kulironga. Nye ayo kapisi ureru. Nsene murongwa goBibeli a mona omu ono kutura pasirugana nompango domoBibeli, ngayi mu tumangeda nage a ku honene. (1 Kol. 11:1) Tu tareni sihonena samunazinyetukadi Hanae, ogu tuna  tumbura muhowo. Age kwa tanta asi: “Vanavazinyetu ngava sikisa mo eyi ngani lirongo. Ya vaterere nge ni dive omu nani korangeda wopeke nokugusira po ntani nomu nani likida eharo. Awo nkenye apa ngava uyunga yininke yoyiwa kuhamena wopeke. Name na here kuvahonena.”

15. Kuliza noYisewe 27:17, ngapi azi tu vatere tu dimburure mulyo gokutulisa po ukaume nomurongwa goBibeli ngomu ana kutwikira kuwiza komapongo?

¹⁵ Tulisa po ukaume nomurongwa goBibeli. Ngomu murongwa goBibeli ana kuwiza komapongo, twikira kumulikida eharo. (Fil. 2:4) Uyunga nendi. Kuvhura omu pandadeke kweyi ana kutura po malitjindjo ntani kuvhura omu pure kuhamena omu lina kugenda po elirongo lyawo lyoBibeli ndi epata lyawo ntani yirugana yendi. Nye takamesa yipo o dire kumupura mapuro gokudira kuwapera. Nsene o zogera nendi monkedi zangoso, nga tulisa po ukaume nove. Nsene o tulisa po ukaume nendi, ngayi mu vatera a ture po ezokomeho dogoro kekuho. (Resa Yisewe 27:17.) Munazinyetukadi Hanae, ngesi muzuvhisi gokukarerera. Age kudiworoka apa ga tamekere kuwiza komapongo, age kwa tanta asi: “Ngomu na tulisire po vakaume mombungakriste, ayo kwa tumangedere nge ni ze nkenye apa komapongo ntani ngani zi komapongo nampili apa ngani lizuvhu eroroko. Ame ngani hafere kutulisa po ukaume navamwe ntani ya vaterere nge ni nyokere po vakaume ava ngava dili kukarera Jehova. Ame kwa here ni tulise po ukaume naJehova ntani novanavazinyetu. Eyi kwa vaterere nge ni gwane ekuho.”

16. Yisinke hena no rugana yipo o vatere murongwa goBibeli a hafe mombungakriste?

¹⁶ Ngomu murongwa goBibeli ana kutura po ezokomeho nokutura po malitjindjo, mu vatera a lizuvhe asi age kwa hamena kombungakriste. Kuvhura o yi rugane pokumuzigida kembo lyoge. (Heb. 13:2) Denis ogu ga tunga moMoldova, kudiworoka siruwo apa nga lirongo Bibeli. Age kwa tanta asi: “Yikando yoyinzi, vanavazinyetu ngava tu zigida komambo gawo name namukadange. Awo ngava tu tantere omu Jehova ga va vatera. Eyi kwa tu korangedere sili. Yiruwo yangoso kwa tu vaterere tu kare neharo lyokukarera Jehova ntani twa ya dimbwilire asi nsene tu karera Jehova, ose ngatu kara noruhafo meparu.” Nsene murongwa goBibeli ana tameke kukara muzuvhisi, kuvhura omu pure mu ze kumwe mokuzuvhisa. Diego, muzuvhisi gomoBrazil kwa tanta asi: “Vanavazinyetu ngava pura nge yipo ni ze nawo mokuzuvhisa. Ezi kwa kere mpito zongwa zokuvadiva nawa. Ngomu ngani zi nawo mokuzuvhisa, na lirongerere ko yoyinzi kwawo ntani ame kwa lizuvhire asi nina tulisa po elikwatakano lyenene naJehova ntani naJesus.”

17. Ngapi omu vakuronambunga nava vatera varongwa woBibeli?

¹⁷ Litulira po siruwo sokukara kumwe nawo. Vakuronambunga nsene mu likida eharo  varongwa woBibeli nokuvapakera mbili, ngava tura po ezokomeho dogoro kekuho. One kuvhura mu zogere nawo komapongo. Nsene mu diworoka madina gawo unene po apa ava tameke kugava malimbururo, awo ngava dimburura asi one mwa kara nosinka kwawo. Nsene o litulira po siruwo yipo o ze nomuzuvhisi komurongwa gwendi, ayo nga yi vatera unene murongwa ogo. Muzuvhisi gokukarerera Jackie ogu ga tunga moNigeria, kwa tanta asi: “Varongwa wovanzi kwa va tetukisire apa va dimbwilire asi munazinyetu ogu ngani zi nendi mokuzuvhisa kuna kara mukuronambunga. Murongwa gumwe kwa tente asi: “Pastore gwetu kapi ayi rugana oyo. Age kudingura tupu nongawo ntani nsene vana mu futu.” Ngesi murongwa ogo kuwiza komapongo.

18. Kuliza noYirugana 20:28, ngapi vakuronambunga nava sikisa mo situmbukira esi va va pa?

¹⁸ Deureni varongi woBibeli nokuvakorangeda. Vakuronambunga, one mwa kara nositumbukira sokuvatera vazuvhisi yipo yi va tompoke mokuzuvhisa ntani va kare varongi wovawa. (Resa Yirugana 20:28.) Nsene kuna zi mokuzuvhisa nomurongi goBibeli, nye kapi ana kara nemanguruko lyokupitisira, mu pura yipo o pitisire elirongo lyoBibeli. Jackie ogu ka tu tumbura kwa tanta asi: “Vakuronambunga kupura nge nkenye apa kuhamena varongwa vange woBibeli. Apa ani ligwanekere nomaudigu kuhamena varongwa vange woBibeli, awo kupa nge ko magano.” Vakuronambunga kuvhura kukorangeda varongi woBibeli yipo yi va tompoke mokuronga. (1 Tes. 5:11) Jackie kwa tanta hena asi: “Ame kuyihafera apa vakuronambunga ava korangeda nge nokutantera nge asi sirugana sange mulyo. Nonkango odo kwa fana ngwendi mema gomatenda aga a nu muntu nsene upyu wounene una kara ko. Ekorangedo lyawo kuvatera nge ni dimburure asi ame kuna kurugana sirugana sosiwa ntani kuhafesa nge unene.”—Yis. 25:25.

19. Ruhafo musinke ngatu gwana natuvenye?

¹⁹ Nampili yi kare asi kapi wa kara nomurongwa goBibeli, simpe kuvhura o vatere wopeke va ture po ezokomeho dogoro kekuho. Twa hana kuuyunga yoyinzi, ose kuvhura tu gave ko magano pelirongo lyoBibeli. Ose kuvhura kutulisa po ukaume nomurongwa goBibeli nsene ana wiza komapongo ntani kuvhura tu mu tulire po sihonena sosiwa. Vakuronambunga va hepa kulitulira po siruwo sokukorangeda varongwa woBibeli ntani va deure nokupandadeka varongi. Yosili ose ngatu hafa nsene tu rugana ko yuma yipo tu vatere wopeke va hare Jehova nokumukarera.