1. Yisinke twa diva kuhamena vadinkantu wovagara?

VADINKANTU wovagara, one kuvhura kurugana yoyinzi mombungakriste. Sinzi seni mwa kara nononkondo. (Yis. 20:29) Ntani one kurugana yoyinzi yipo mu vatere vapuli vakweni mombungakriste. Nampo muna hara kukara vakwafimbunga ezuva limwe nye nampili ngoso, kuvhura mu lizuvhe asi nampo vamwe kumutara asi one simpe vanona ndi nampo asi kapi muna wapere kugwana yitumbukira. Nampili mu kare asi one simpe muvanona, yininke yinzi eyi nomu vhura kurugana ngesi yipo womombungakriste va mu huguvare nokumufumadeka.

2. Yisinke natu ka zogera mosirongwa esi?

² Mosirongwa esi tatu ka konakona kuhamena hompa Ndafita. Ntani natu ka zogera nakauke kuhamena vahompa vaJuda vavali, Asa naJehosafata. Tatu ka zogera maudigu aga va ligwanekerere nago vagara ava vatatu ntani neyi va rugene ko. Ntani tatu ka tara eyi vadinkantugara nava lirongera ko koyihonena yawo.

3. Nkedi musinke zimwe omu vadinkantu wovagara nava vhura kuvatera vakurupe ava va kara mombungakriste?

³ Apa Ndafita ga kere mumati, age kwa kere noudivi ou wa vaterere wopeke. Age kwa tulisire po elikwatakano lyenene naJehova ntani age kwa kere hena musiki gomuwa gosiumba. Age nga ruganesa udivi owo yipo a vatere hompa Sauru ogu ga horowere Jehova. (1 Sam. 16:16, 23) Vadinkantugara,  one kwa kara noudivi ou nomu vhura kuruganesa mokuvatera wopeke mombungakriste ndi? Sinzi seni mwa kara noudivi. Pasihonena, one kuvhura mu ruganese udivi weni pokuvatera vakurupe omu nava ruganesa notablet dawo ndi yikwakonentu yimwe va vhure kuliwapaikira mapongo ndi va rugane elirongo lyawo lyoBibeli. Nsene mu vatera vakurupe omu nava ruganesa yikwakonentu, awo ngava gwanena mo mauwa gomanzi.

4. Ngwendi Ndafita, yikara musinke va hepa kukara nayo vanavazinyetugara wovadinkantu? (Tara efano lyopontunda.)

⁴ Ndafita kwa yi likidire meparu lyendi asi kuvhura kumuhuguvara. Pasihonena, apa ga kere mumati, age nga pakere mbili nonzwi doguhwe. Esi kwa kere sirugana sosiponga unene. Sikando simwe, Ndafita kwa tanterere hompa Sauru asi: “Ame nonzwi dotate ani lisa, nye nsene a wiza nyime ndi simbungu, a ya damune mo zimwe, tani mu sikura ni ka mu toone dogoro tani zi mu hokora.” (1 Sam. 17:34, 35) Ndafita ga yi divire asi age ga kere nositumbukira sokupakera mbili nonzwi ntani age ngadi popere nouradi. Vadinkatu wovagara kuvhura va honene hompa Ndafita pokusikisa mo yitumbukira nayinye eyi ava va pe.

5. Kuliza nEpisarome 25:14, sininke musinke somulyo va hepa kurugana vanavazinyetugara wovadinkantu?

⁵ Ndafita kwa tulisire po elikwatakano lyenene naJehova. Elikwatakano lyendi naJehova kwa kere sininke somulyo unene kupitakana uradi ou ga kere nawo ndi udivi wokusika siumba. Jehova kapi tupu ga kere Karunga gwaNdafita, nye hena kaume kendi. (Resa Episarome 25:14.) Vanavazinyetugara wovadinkantu, sininke somulyo po esi nomu vhura kurugana kuna kara mokunkondopeka elikwatakano lyeni naGuhyeni gemeguru. Nsene mu yi rugana ngoso, ngomu gwana yitumbukira mombungakriste.

6. Ngapi omu vantu vamwe ngava tara Ndafita?

⁶ Udigu umwe ou ga ligwanekerere nawo Ndafita kwa kere asi vantu vamwe ngava gazara asi age munona ntani nokuvhura si kumuhuguvara. Pasihonena, apa Ndafita ga tokwere kukarwisa Golyata, hompa Sauru kwa hetekerere ko kumusilika nokuuyunga asi: “Ove mumati simpe.” (1 Sam. 17:31-33, NW) Komeho hompa Sauru a tantere Ndafita nonkango odo, mukurwaNdafita kwa tanterere Ndafita asi nokuvhura si kumuhuguvara. (1 Sam. 17:26-30) Nye nampili ngoso, Jehova kapi ga tere Ndafita asi age munona ntani  nokuvhura si kumuhuguvara. Age ga divire nawa-nawa Ndafita. Ndafita kwa dipagere Golyata morwa ga huguvarere kaume kendi Jehova.—1 Sam. 17:45, 48-51.

7. Yisinke no lirongera ko kosihorokwa saNdafita?

⁷ Yisinke no lirongera ko kweyi ya horokerere Ndafita? Twa lirongere ko asi twa hepa kulididimika. Ayo kuvhura yi guse siruwo kwava va ku divire kutunda unona va ya dimburure asi ngesi ono kuru. Nye nampili ngoso, diva asi Jehova kapi a demenene kemoneko lyopontunda. Age ga ku diva nawa ntani ga diva eyi no vhura kusikisa mo. (1 Sam. 16:7) Nkondopeka elikwatakano lyoge naKarunga. Ndafita nga yi rugana oyo pokutara kweyi ga sita Jehova. Ndafita nga lirongere ko kounsitwe kuhamena Jehova. (Epis. 8:3, 4; 139:14; Rom. 1:20) Sininke simwe esi no rugana kuna kara kukanderera kwaJehova a ku pe nonkondo. Pasihonena, nsene asi vanasure vakweni kukusindagura morwa ove Mbangi zaJehova, kanderera kwaJehova a ku vatere o lididimikire udigu owo. Ntani tura pasirugana magano aga ga kara moBibeli nomoyimbapiratjangwa ntani monovidiyo. Nsene o dimburura omu Jehova ana kukuvatera o lididimikire maudigu, ove ngo mu huguvara unene. Ntani apa wopeke ngava dimburura asi ove wa huguvara mwaJehova, nawo ngava kuhuguvara.

8-9. Yisinke ya vaterere Ndafita a lididimikire komeho a ya kare hompa, ntani yisinke nava lirongera ko vadinkantugara kosihonena sendi?

⁸ Konekeni udigu umwe ou ga ligwanekerere nawo Ndafita. Konyima zokumugwaveka a kare hompa, Ndafita ga hepere kundindira nomvhura dononzi komeho a ya kare hompa gwaJuda. (1 Sam. 16:13; 2 Sam. 2:3, 4) Yisinke ya vaterere Ndafita a lididimikire siruwo nasinye oso? Mevango lyokudompa, Ndafita kwa demenene kweyi ga vhulire kurugana ko. Pasihonena, apa Ndafita ga tjwayukire hompa Sauru ogu ga here kumudipaga noku ka kara mosirongo soVafilisiti, age kwa ruganesere mpito ozo yipo a rwanese nonkore doVaisraeli. Mokuyirugana ngoso, age ga poperere nomukunda doVajuda.—1 Sam. 27:1-12.

⁹ Yisinke nava lirongera ko vadinkantu wovagara kosihonena saNdafita? Ruganeseni nkenye mpito yipo mu vatere vanavazinyetu. Tu tareni sihonena samunazinyetugara Ricardo. * Kutunda unona wendi, age kwa here kukara muzuvhisi gokukarerera. Nye vakuronambunga kwa mu tanterere asi kapi ana wapere kukara muzuvhisi gokukarerera. Mevango lyokuguva ndi a kare nonkoko, Ricardo nga litura mo unene mokuzuvhisa. Age kwa tanta asi: “Apa ani gazadara ko kosiruwo esi na here kukara muzuvhisi gokukarerera, ame kudimburura asi na hepere kutura po malitjindjo. Ame kwa litulire mo unene yipo ni zuvhisire vantu ava va kere neharo lyokulironga Bibeli ntani ngani liwapaikire nawa komeho zokukarugana nkenye etengwiropo. Ame hena na tamekere kulironga Bibeli nagumwe. Ngomu na kere noudivi, ayo kwa ninkisire nge ni kare nouradi.” Ricardo ngesi age muzuvhisi gokukarerera gomuwa ntani mukwafimbunga.

10. Yisinke ga rugene Ndafita sikando simwe komeho a ture po etokoro lyomulyo?

¹⁰ Gazadara ko kwe yi ya horokerere Ndafita sikando simwe. Ngomu va kere mosirongo soVafilisiti morwa kutjwayuka hompa Sauru ogu ga here kumudipaga, Ndafita novakwayita vendi kwa sigire mapata gawo kembo yipo va ka rwe moyita. Apa va zire moyita, nonkore dawo dimwe kwa ya homwene mambo gawo nokukwata mapata gawo yipo va va tware. Mokumona asi Ndafita kwa kere mukwayita gomunene, age ngano ga wapaikire usimbu  vakwayita vendi yipo va ka popere mapata gawo aga va kwete. Nye pomuhowo Ndafita kwa pulire Jehova a mu vatere. Nevatero lyomupristeli Abiyatara, Ndafita kwa pulire Jehova asi: “Ni konke Vahomoni owo ndi?” Makura Jehova ta tantere Ndafita asi a ze ntani ta mu tantere asi ta yi ka mu tompoka. (1 Sam. 30:7-10) Yisinke no lirongera ko kosihorokwa esi?

11. Yisinke no rugana komeho o ture po matokoro?

¹¹ Komeho o ture po matokoro, wa hepa kupura ko magano kwa vamwe. Pura ko magano vakurona woge. Kuvhura hena o pure vakuronambunga va ku pe ko magano. Jehova ga huguvara vagara owo ga horowora ntani nove kuvhura o va huguvare. Jehova kuvatara ngwendi “mauhwi” aga va gava kombungakriste. (Efe. 4:8) Nsene o honena epuro lyawo nokutambura magano aga nava ku pa, ngo gwanena mo uwa. Ngesi tatu ka zogera eyi natu lirongera ko kwahompa Asa.

12. Yikara musinke ga kere nayo hompa Asa apa ga tamekere kupangera?

¹² Apa hompa Asa ga kere mumati, age kwa linunupikire ntani ga kere nouradi. Pasihonena, apa oguhwe Abiya va dogorokere, Asa yige ga kweme mo mouhompa. Age kwa zonagwire po yikarunga yoyimpempa mosirongo. Ntani age kwa tanterere “mbunga zaJuda zi rugane eharo lyaHOMPA, Karunga gozinyakurwawo, oku tava limburukwa komarongo nokonompangera dendi.” (2 Hist. 14:1-7) Ntani hena, apa Musudani gedina Sisera ga homokerere Vajuda novakwayita vendi emiliyona, Asa kwa pulire evatero kwaJehova asi: “Ani HOMPA, ove kuvhura kukwafa noureru mbunga zovakwayita zokupira nonkondo moomu tupu mwezi zononkondo. Tu kwafa nye HOMPA Karunga gwetu, morwa ose koge tuna lihameke.” Nonkango edi kwa likidire asi Asa kwa huguvarere mwaJehova asi na va popera. Asa kwa huguvarere mwaJehova makura “HOMPA ta toona Vasudani.”—2 Hist. 14:8-12.

13. Yisinke ya ya horokerere Asa konyima ntani morwasinke?

¹³ Asa kwa kere nowoma apa vakwayita emiliyona va wizire va ya mu rwise, nye morwa ga huguvarere mwaJehova, Asa ya mu tompokere kufunda moyita. Nye ehudi apa Asa ga ligwanekerere noudigu umwe, age kapi ga huguvarere mwaJehova. Apa hompa gomudona  Basa gwaIsraeli ga mu tjilisire, Asa kwa pulire evatero kwahompa gwaSiliya. Etokoro olyo kwa retere yitundwamo yoyidona. Jehova kwa tanterere Asa kupitira momuporofete Hanani asi: “Morwa ove ono lihameke kwahompa gwaSiliya, kapi ono lihameke kwaHOMPA, Karunga goge, yipo nye vana yoworokere mo momawoko goge vakwayita vahompa gwalsraeli.” Kutunda ezuva olyo, hompa Asa nga ligwanekere nkenye apa noyita. (2 Hist. 16:7, 9; 1 Vah. 15:32) Yisinke natu lirongera ko?

14. Ngapi no yi likida asi wa huguvara mwaJehova ntani kuliza na-1 Timoteusa 4:12, yitundwamo musinke nga yi kara nsene o huguvara mwaJehova?

¹⁴ Twikira kulinunupika ntani huguvara mwaJehova. Apa wa gwene ekuho, ove kwa likidire epuro mwaJehova nokumuhuguvara, ano Jehova ga ku tambwire o ya hamene kepata lyendi. Twikira kuhuguvara mwaJehova. Ayo kuvhura kumoneka ngwendi ureru mokuhuguvara mwaJehova nsene kuna kutura po matokoro gomulyo unene. Nye ngapi kuhamena momaukaro gamwe? Ayo ya kara nomulyo o huguvare mwaJehova nampili kuna kutura po matokoro kuhamena yilihafeso yoge ndi yirugana ndi yitambo yapeke yemeparu. Wa ha hama kondunge danyamoge nye papara nompango domoBibeli edi nadi kuvatera o ture po matokoro ntani nokutura pasirugana nompango odo. (Yis. 3:5, 6) Nsene oyi rugana ngoso, ove ngo hafesa Jehova ntani vapuli vakweni womombungakriste ngava kufumadeka.—Resa 1 Timoteusa 4:12.

15. Ngomu va yi tumbura mo-2 Histoli 18:1-3; 19:2, mapuko musinke ga rugene hompa Jehosafata?

¹⁵ Natuvenye kapi twa sikilira mo ntani poyiruwo yimwe ose kutura mapuko. Nye nampili ngoso, ya ha kukondera yipo o dire kulitura mo unene mosirugana saJehova. Koneka sihonena sahompa Jehosafata. Age kwa kere noyikara yoyiwa. Apa ga kere mudinkantu, “age nga ruganene Karunga goguhwe, ta limburukwa konompangera daKarunga.” Ntani age kwa tumine vakurona va ze moyitata yaJuda yipo va ka ronge vantu kuhamena Jehova. (2 Hist. 17:4, 7) Nye nampili ngoso, poyiruwo yimwe Jehosafata nga tura po matokoro gomadona. Sikando simwe apa Jehosafata ga tulire po etokoro lyedona, age kwa gwene mapukururo gokutunda komukareli gwaJehova gumwe. (Resa 2 Histoli 18: 1-3; 19:2.) Yisinke no lirongera ko kosihonena saJehosafata?

16. Yisinke ono lirongere ko kosihorokwa saRajeev?

¹⁶ Tambura mapukururo nokugatura pasirugana. Ngwendi vadinkantu vakweni, nampo nove kukudigopera kutura yininke yomulyo muhowo meparu lyoge. Nye ya ha kudompesa. Tu tareni sihonena samunazinyetugara gomudinkantu Rajeev. Age kwa uyunga kuhamena eparu lyendi lyoudinkantu asi: “Ame kapi na divire eyi ngani vhura kurugana meparu lyange. Ngwendi vadinkantu vakwetu, ame ngani litura mo unene momaudano ntani nokuhafera eparu mevango lyokuza komapongo ndi mokuzuvhisa.” Yisinke ya vaterere Rajeev? Mukuronambunga ogu ga kere nosinka kwendi kwa mu pere ko mapukururo. Rajeev kwa tanta asi: “Age kwa vaterere nge ni gazadare ko kompango ezi za kara mwa-1 Timoteusa 4:8.” Rajeev kwa tambwire mapukururo ogo nelinunupiko ntani ga gazadarere ko eyi na vhura kutura muhowo meparu lyendi. Age kwa tanta asi: “Ame kwa tokwere kutura muhowo yitambo yange yopampepo meparu lyange.” Yitundwamo musinke ya kere? Rajeev kwa tanta asi: “Konyima zonomvhura dongandi kutunda apa va pere nge epukururo olyo, ya tompokere nge kukara mukwafimbunga.”

17. Ngapi omu vakurupe ava lizuvhu kuhamena vadinkantu wovagara ava ava karere Jehova?

¹⁷ Vakurupe kuyihafera apa ava mu mono one vadinkantu wovagara kuna kukarera Jehova noulimburukwi kumwe nawo. (Sef. 3:9) Awo hena kuyihafera apa omu rugana paapa mwa hulira yipo mu sikise mo yitumbukira yeni. Yosili one kuhafesa sili vakurupe.—1 Joh. 2:14.

18. Ngomu va yi tumbura moYisewe 27:11, ngapi Jehova a lizuvhu kuhamena vadinkantu wovagara ava ava mu karere?

¹⁸ Vadinkantu wovagara, diworokeni asi Jehova ga mu hara ntani ga mu huguvara. Age kwa pumbire asi pomazuva gopouhura, vadinkantu wovagara ngava ligava vene va mu karere. (Epis. 110:1-3) Jehova ga yi diva asi one mwa mu hara ntani muna hara kumukarera paapa mwa hulira. Yipo nye, twikireni kulididimika. Nsene muna tura mapuko, tambureni mapukururo nepisuro ntani nokutara mapukururo ogo asi kuna tundu kwaJehova. (Heb. 12:6) Ruganeni paapa mwa hulira yipo mu sikise mo yitumbukira eyi mwa kara nayo. Nye unene po, hafeseni Guhyetu gemeguru yi kare asi yinke muna kurugana.—Resa Yisewe 27:11.