SIRONGWA SELIRONGO 10
Ove kuvhura ‘kuhutura muntu gomukuru-kuru’
“Hutureni muntu gomukuru-kuru noyirugana yendi yanare.”—KOROS. 3:9.
RUSUMO 29 Tu lize kumwe nedina lyetu
ETWAROMO *
1. Ngapi omu lya fene eparu lyoge komeho o ya tameke kulironga Bibeli?
NGAPI omu lya fene eparu lyoge komeho o ya tameke kulironga Bibeli noNombangi daJehova? Sinzi setu kapi atu hafere kugazara omu lya kere eparu lyetu lyanare. Monkedi omu ngatu tara yininke ntani nonkareso zetu, kwa li fene nezi zomouzuni. Nsene yimo ngoso, ose kapi twa kere ‘nehuguvaro ntani kapi twa divire Karunga.’ (Efe. 2:12) Nye konyima zapa twa ya tamekere kulironga Bibeli, eparu lyetu kwa ya li tjindjire.
2. Yisinke wa ya dimbwilire konyima zapa wa tamekere kulironga Bibeli?
2 Ngomu wa tamekere kulironga Bibeli, ove wa ya dimbwilire asi wa kara naGuhyetu gemeguru ogu ga ku hara sili unene. Ntani wa dimbwilire asi nsene ono hara kuhafesa Jehova nokuhama kepata lyovakareli vendi, wa hepere kutura po malitjindjo gomanene meparu lyoge nomonkareso zoge ntani nomomagazaro goge. Wa hepere kulironga kuparuka kuliza nonompango daJehova.—Efe. 5:3-5.
3. Kuliza noVakorosi 3:9, 10, yisinke ana tu harere Jehova tu rugane ntani yisinke natu ka zogera mosirongwa esi?
3 Jehova Musiti gwetu ntani Guhyetu gemeguru, ga kara nononkondo dokutokora asi yisinke nava rugana vemepata lyendi. Ntani age kwa hara asi komeho tu gwane ekuho, twa hepa ‘kuhutura muntu gomukuru-kuru noyirugana yendi yanare.’ * (Resa Vakorosi 3:9, 10.) Sirongwa esi nasi ka vatera ava vana hara kugwana ekuho va limburure mapuro gatatu aga gana kukwama ko: (1) Yisinke ayi tanta “muntu gomukuru-kuru?” (2) Morwasinke Jehova ana tu harere tu huture muntu gomukuru-kuru? (3) Ngapi omu natu yi rugana? Ano kwava va gwana nare ekuho, sirongwa esi nasi ka tu vatera tu nyokere po nkareso zomuntu gomukuru-kuru.
YISINKE AYI TANTA “MUNTU GOMUKURU-KURU?”
4. Yisinke a rugana muntu ogu ga kara ‘nonkareso zomuntu gomukuru-kuru?’
4 Muntu ogu ga kara ‘nonkareso zomuntu gomukuru-kuru’ rorunzi age kugazara nokurugana yininke monkedi zokudira kuwapera. Age nampo kuligazara mwene, kuhanduka usimbu, kapi ga kara norupandu ntani kulinenepeka. Age nampo kuhafera kutarera mafano goruhonda ntani nokutarera nomuvi doruhonda ndi donyanya. Yimo, age ga kara noyikara yoyiwa ntani nampo kulizuvha unzoni koyininke yoyidona eyi a uyunga ndi eyi a rugana. Nye kapi ga kara neharo lyenene lyokunyokera po magazaro gomadona noyirugana yoyidona.—Gar. 5:19-21; 2 Tim. 3:2-5.
Apa atu hutura “muntu gomukuru-kuru” ose kunyokera po nkareso zondona ntani noyirugana yoyidona (Tara paragarafu 5) *
5. Kuvhura yi tu tompoke kuhutura muntu gomukuru-kuru ndi? Faturura. (Yirugana 3:19)
5 Mokumona asi natuvenye kapi twa sikilira mo, kwato gumwe gwetu na vhura kunyokera po magazaro nagenye gomadona nomadowo monomutjima detu nomonondunge detu. Poyiruwo yimwe kuvhura ngatu uyunge ndi ngatu rugane yininke eyi ngatu livera. (Jer. 17:9; Jak. 3:2) Nye apa atu hutura muntu gomukuru-kuru, nkareso zetu zondona noyirugana yetu yanare kapi ngayi tu pangera. Ose ngatu li tjindja tu kare muntu gomuwa.—Jes. 55:7; resa Yirugana 3:19.
6. Morwasinke Jehova a tu korangedere tu nyokere po magazaro gomadona nonkareso zondona zomuntu gomukuru-kuru?
6 Jehova kututantera tu nyokere po magazaro gomadona ntani nkareso zondona morwa age kwa tu hara unene ntani ana hara tu hafere eparu. (Jes. 48:17, 18) Age ga yi diva asi ava ava dili kukondja paapa va hulira yipo va nyokere po madowo gomadona, kulikoresa vene ntani kukoresa wopeke. Jehova kumukoresa unene apa atu mono kuna kulikoresa nyamwetu ntani nava wopeke.
7. Kuliza noVaroma 12:1, 2, etokoro musinke twa hepa kutura po?
7 Poyiruwo yimwe, vakaume vetu novanekoro kuvhura va tu rwanese morwa yeeyi tuna kutura po malitjindjo monkareso zetu. (1 Pet. 4:3, 4) Awo kuvhura va uyunge asi ose kuvhura tu rugane nkenye eyi tuna hara nyamwetu ntani kapisi tu pulisire wopeke va tu tantere eyi natu rugana. Nye ava ava nyoka kukwama nompango daJehova kapi ava rugana yininke pwavene, nye awo kuhonena yininke yomouzuni waSatana. (Resa Varoma 12:1, 2.) Natuvenye twa hepa kutura po etokoro. Twa hepa kutokora nsene asi tatu twikire kudwara muntu gomukuru-kuru ogu za pukisa nzo ntani noyininke yomouzuni waSatana ndi tatu pulisire Jehova a rundurure nkareso zetu.—Jes. 64:8.
NGAPI NATU ‘HUTURA’ MUNTU GOMUKURU-KURU?
8. Yisinke nayi tu vatera tu nyokere po magazaro gomadona ntani nonkareso zondona?
8 Jehova ga yi diva asi ayo ngayi tu gusa siruwo nononkondo detu dononzi mokunyokera po magazaro gomadona ntani nonkareso zetu zondona. (Epis. 103:13, 14) Nye nampili ngoso, kupitira moNonkango dendi nomompepo zendi zokupongoka ntani mombunga zendi, Jehova kutupa nonkondo nounongo ntani kutuvatera tu ture po malitjindjo. Tuna si huguvara asi age ga ku vatera nare. Tu zeni tu ka zogere ko yininke yimwe eyi nayi kuvatera o twikire kuhutura muntu gomukuru-kuru ntani yipo o wapere kugwana ekuho.
9. Ngapi omu nadi kuvatera Nonkango daKarunga?
9 Resa Bibeli yipo o likonakone nyamoge. Nonkango daKarunga kwa fana ngwendi ntarero ezi nazi kuvatera o likonakone monkedi omu o gazara, neyi o uyunga ntani neyi o rugana. (Jak. 1:22-25) Murongi goge goBibeli ntani noVakriste vamwe ava va kura pampepo kuvhura va ku pe ko magano. Pasihonena, awo kuvhura va ruganese Matjangwa yipo va ku vatere o dimburure yininke yoyiwa eyi o rugana ntani nomaupirankondo goge. Awo kuvhura va ku ronge omu no gwana mapukururo moBibeli, gokuhamena omu no nyokera po nkareso zondona. Ntani Jehova ga liwapaikira nkenye apa kukuvatera. Age yige na ku vatera po unene, morwa ga diva eyi ya kara momutjima goge. (Yis. 14:10; 15:11) Yipo nye, kanderera kwendi nkenye apa ntani lironga Nonkango dendi Bibeli nkenye ezuva.
10. Yisinke ono lirongere ko kosihonena saElie?
10 Yi pura asi nompango daJehova nongwa. Ose kuvhura kugwanena mo mauwa mwanayinye eyi a tu pura Jehova tu rugane. Ava ava paruka kuliza nonompango daJehova, kukara nositambo meparu ntani kugwana ruhafo. (Epis. 19:7-11) Nye mokulisiga noyo, ava ava nyoka kukwama nompango daJehova kuligwanekera noyitundwamo yoyidona eyi ayi tundu moyirugana yorutu. Tu tareni eyi ga uyunga mugara gedina Elie, kuhamena kunyoka kukwama nompango daKarunga. Age kwa mu rera vakondi ava va hara Jehova. Nye ngomu Elie ga kulire, age nga kara-kara novakaume wovadona. Age kwa tamekere kuruganesa epangwe ntani nga hondere nokuvaka. Elie kwa tanta hena asi age kwa tamekere kukara nonkareso zokuhanduka ntani nonyanya. Age kwa tanta asi: “Ame ngani rugana yininke eyi va rongere nge asi Mukriste nokuvhura si kuyirugana.” Nye nampili ngoso, Elie kapi ga divarere eyi ga lirongere apa ga kere munona. Ano konyima yipo ga ya tamekere hena kulironga Bibeli. Age kwa rugene paapa ga hulira yipo a nyokere po nkareso zendi zondona ntani kwa gwene ekuho mo-2000. Ngapi omu kuparuka kuliza nonompango daJehova ya mu vatera? Elie kwa tanta asi: “Ame ngesi nina kara nombili zopomagazaro ntani nezwi lyewa lyokomutjima.” * Sihonena saElie kuturonga asi ava ava nyoka kukwama nompango daJehova kulikoresa tupu vene. Nye nampili ngoso, Jehova ana hara kuvavatera va li tjindje.
11. Yininke musinke ga nyenga Jehova?
11 Lironga kunyenga eyi ga nyenga Jehova. (Epis. 97:10) Bibeli kutanta asi Jehova kwa nyenga “elinenepeko, eraka lyoyimpempa, mawoko gokudipaga vantu [va] hana nzo.” (Yis. 6:16, 17) Age hena “kwa nyenga mugara gomurudipagi goumbudi.” (Epis. 5:6) Jehova kwa nyenga nkareso ozo zondona ntani noyirugana yoyidona, ano eyi yiyo ya mu ninkisire a zonagure po vantu wovadona womosiruwo saNowa morwa va kere nonkareso zonyanya. (Gen. 6:13) Tu tareni ko hena sihonena simwe esi sina kukwama ko. Jehova kwa uyungire kupitira momuporofete Marakiya asi age kwa nyenga ava ava zumbu vakadi vawo pwa hana nokonda domulyo. Karunga kapi a tambura ukareli wawo ntani ngava pangura kuliza noyirugana yawo.—Mara. 2:13-16; Heb. 13:4.
Kurugana yininke yoyidona eyi ga silika Jehova kwa fana ngwendi kuna kulya nondya dokuwora (Tara paragarafu 11-12)
12. Yisinke ayi tanta ‘kunyenga udona’?
12 Jehova kuna hara tu ‘nyenge udona.’ (Rom. 12:9) Nkango “nyengeni” kutanta asi kunyenga unene sininke songandi twa hana kusihara nampili nakauke. Gazara omu no lizuvha nsene va ku pa nondya dokuwora asi o lye. Pokugazadara nondya odo, nampo kuvhura yi ku ninkise o li zuvhe ngwendi kuna kuvera. Mokulifana, pokugazadara ko koyininke yoyidona eyi ga silika Jehova, ngano yi tu ninkise tu yi nyenge.
13. Morwasinke natu nyokerera po magazaro gomadona?
13 Nyokera po magazaro gomadona. Magazaro getu kukundama eyi atu rugana. Eyi yiyo nye Jesus ga tu rongerere tu nyokere po magazaro aga naga tu ninkisa tu ture nzo zonene. (Mat. 5:21, 22, 28, 29) Ose tuna hara kuhafesa Guhyetu gemeguru. Yipo nye, ayo mulyo unene tu nyokere po usimbu magazaro gomadona aga aga wiza mononduge detu.
14. Yisinke ayi likida eyi atu uyunga ntani mapuro musinke natu lipura?
14 Takamesa mbuyungiso zoge. Jesus kwa tente asi: “Eyi ayi tundu mokana, komutjima ayi tundu.” (Mat. 15:18) Eyi atu uyunga kulikida nawa-nawa eyi ya kara momutjima gwetu. Yipo nye, lipura nyamoge mapuro aga asi: ‘Ame kunyokera po kuuyunga yipempa nampili yi kare asi nsene ni uyunga usili kuvhura yi tware nge moudigu ndi? Nsene asi na kwara, ame kunyokera po kulihoresa kwava wopeke ndi? Ame kunyokera po nonzogera donondona ndi? Ame kulimburura monkedi zongwa nsene gumwe ana handukisa nge ndi?’ Nsene o gazadara ko nawa komapuro ogo, ayo ngayi kuvatera sili unene. Mbuyungiso zoge kuvhura kuzifanekesa konongodi edi ava ruganesa mokuhonza sidwara. Nsene o hetekera ko paapa wa hulira yipo o nyokere po nonkango donondona, yipempa ntani nonzogera donondona, ayo ngayi kukarera ureru kuhutura muntu gomukuru-kuru.
15. Yisinke ayi tanta kupampara nkareso zetu zanare “kositji?”
15 Kara neharo lyokurugana yininke eyi yina kara hepero. Mupositoli Paurusa kwa ruganesere sifanekeso mokuturonga asi ayo ya kara nomulyo tu tjindje nkareso zetu. Age kwa uyungire asi twa hepa kupampara nkareso zetu zanare “kositji.” (Rom. 6:6) Eyi kutanta asi twa hepa kukwama sihonena saJesus. Twa hepa kunyokera po nkareso zondona ntani noyirugana yoyidona eyi ga nyenga Jehova. Nsene tu rugana yininke eyi, ose ngatu kara nezwi lyewa lyokomutjima ntani ngatu kara nehuguvaro lyokukahafera mwenyo gwanarunye komeho. (Joh. 17:3; 1 Pet. 3:21) Diworokeni asi Jehova kapi nga tjindja nompango dendi yipo a tu hafese. Nye twa hepa kutjindja mparukiso zetu yipo tu limburukwe nompango daJehova.—Jes. 1:16-18; 55:9.
16. Morwasinke no tokomenena kutwikira kunyokera po madowo gomadona?
16 Twikira kunyokera po madowo gomadona. Nampili konyima zekuho, wa hepa kutwikira kunyokera po madowo gomadona. Tu tareni sihonena samunazinyetu gomugara Maurício. Apa ga kere munona, age kwa tamekere kukara melikwatakano lyopokatji komugara-nomugara. Ano konyima taya ligwana Nonombangi daJehova makura yipo ga tamekere kulironga Bibeli. Konyima zapa ga tulire po malitjindjo meparu lyendi, makura yipo ga gwene ekuho mo-2002. Nampili ngomu ga karera Jehova nomvhura dononzi ngesi, Maurício kwa tanta asi: “Ame kukondja poyiruwo yimwe yipo ni nyokere po madowo gomadona.” Nye age kapi ayi pulisire yi mu dompese. Age kwa tanta asi: “Ayo kuhengagwida nge pokudiva asi apa ani tokora kunyokera po madowo ogo, ayo kuhafesa Jehova.” *
17. Yisinke ono lirongere ko kosihonena saNabiha?
17 Kanderera kwaJehova a ku vatere ntani huguvara mompepo zendi zokupongoka nye kapisi mononkondo danyamoge. (Gar. 5:22; Fil. 4:6) Twa hepa kurugana unene nsene tuna hara kuhutura muntu gomukuru-kuru. Tu tareni sihonena somukadi gedina Nabiha. Oguhwe kwa mu sigire apa ga kere nonomvhura ntazimwe. Age kwa tanta asi: “Ayo kwa koresere nge unene komutjima.” Ngomu Nabiha ga kulire, age kwa kere nonkareso zokuhanduka usimbu. Age kwa tamekere kurandesa yikwaepangwe ntani kwa mu kwete nokumutura modorongo a kare mo nomvhura dongandi. Nombangi daJehova ava ngava dingura dorongo ezi va mu tulire, kwa tamekere kulironga nage Bibeli. Nabiha kwa tamekere kutura po malitjindjo gomanene meparu lyendi. Age kwa tanta asi: “Ayo kwa karerere nge ureru kuhageka yininke yimwe yoyidona eyi ngani rugana. Nye ayo kapi ya karerere nge ureru kuhageka kukoka epangwe.” Nabiha kwa mu gusire ure womvhura zimwe noharufa komeho a ya hageke kukoka epangwe. Ngapi omu ga yi rugene? Age kwa tanta asi: “Nye somulyo po, ame ngani kanderere nkenye apa kwa Jehova yipo a vatere nge ni hageke kukoka.” Age ngesi kutantera ko wopeke asi: “Nsene asi ya tompokere nge kutura po malitjindjo yipo ni hafese Jehova, nkenye gumwe kuvhura yi mu tompoke!” *
KUVHURA O WAPERE KUGWANA EKUHO!
18. Kuliza no-1 Vakolinte 6:9-11, yisinke va rugana sinzi sovakareli vaJehova?
18 Mosiruwo sovapositoli, vantu vamwe ava ga horowere Jehova va ka pangere kumwe naJesus, pomuhowo ngava rugana yininke yoyidona. Pasihonena awo ngava hondere, ngava lirara vagara novagara ntani ngava vaka. Nye nevatero lyompepo zokupongoka, ya va tompokere kutjindja nkareso zawo zondona. (Resa 1 Vakolinte 6:9-11.) Mokulifana naneina, Bibeli kwa vatera sinzi sovantu yipo va ture po malitjindjo meparu lyawo. * Awo kwa hageka yininke yoyidona eyi ngava rugana. Yihonena yawo kulikida asi nove kuvhura o ture po malitjindjo monkareso zoge ntani nokufunda po nkareso zondona yipo o wapere kugwana ekuho.
19. Yisinke ngatu ka zogera mosirongwa sokukwama ko?
19 Kugusa ko kuhutura muntu gomukuru-kuru, ava vana hara kugwana ekuho va hepa kurugana unene yipo va dware muntu gomupe. Mosirongwa sokukwama ko ngatu ka zogera omu natu yi rugana ntani nomu wopeke nava tu vatera.
RUSUMO 41 Zuvha ekanderero lyange
^ para. 5 Mokuninka asi tu wapere kugwana ekuho, twa hepa kutura po malitjindjo monkareso zetu. Sirongwa esi nasi ka tu vatera tu dive eyi ayi tanta kuhutura muntu gomukuru-kuru neyi twa hepera kuhutura muntu gomukuru-kuru ntani nomu natu yi rugana. Mosirongwa sokukwama ko ngatu ka zogera omu natu twikira kudwara muntu gomupe nampili konyima zekuho.
^ para. 3 EFATURURO LYONKANGO: ‘Kuhutura muntu gomukuru-kuru’ kutanta asi kunyokera po madowo nonkareso ezi ga nyenga Jehova. Twa hepa kutameka kuyirugana eyi komeho tu gwane ekuho.—Efe. 4:22.
^ para. 10 Komauzera gomanzi, tara sirongwa “Bibeli kurundurura maparu govantu” siparatjangwa “Na hepere kutengura kwaJehova” esi sa kara moRuhungu 1 Kudumogona 2012.
^ para. 16 Komauzera gomanzi, tara sirongwa “Bibeli kurundurura eparu lyovantu” siparatjangwa “They Were Very Kind to Me” esi sa kara moRuhungu 1 Kudumonkuru 2012 moRuhingilisa.
^ para. 17 Komauzera gomanzi, tara ruha “Bibeli kurundurura eparu lyovantu” siparatjangwa “I Became an Angry, Aggressive Young Woman” esi sa kara moRuhungu 1 Sikukutu 2012 moRuhingilisa.
^ para. 18 Tara kakende “ Bibeli kurundurura eparu lyovantu.”
^ para. 64 EFANO: Kunyokera po nkareso zondona noyirugana yoyidona kwa fana gwendi moomu atu hutura sikoverero sosikuru-kuru.
