Morwasinke mugara ogu va tumbwire asi “ngandi” ga uyungilire asi ngano ga ‘zonagwisire’ upingwa wendi nsene asi ngano ga kwere Rutu? (Rutu 4:1, 6)

Kuliza no mu ya kere mosiruwo sanare, nsene asi mugara gokukwara a fa ga hana kukara novanona, pwa hepere malimbururo komapuro gamwe ngwendi gaga asi: Yisinke ngano ya vhulire kuhorokera nkenye evango eli ga kere nalyo? Ngoso edina lyemekoro lyendi ngano lya ya hege po ndi? Veta zaMosesa za limbwilire mapuro gangoso.

Yisinke ya horokerere evango lyomugara ogu ga fire ndi mugara ogu ga ya kere hepwere ntani noku ya randesa evango lyendi? Mukurwendi ndi mumbyendi ndi gumwe gekoro lyendi ngano ga vhulire kutjindjisa evango olyo ndi kuliranda hena. Yipo nye, evango olyo lya vhulire ngano kukara simpe lyekoro.—Lev. 25:23-28; Num. 27:8-11.

Ngapi nye omu edina lyekoro lyomugara ogu ga fire lya dilire kuhaga po? Alyo kapi lya vhulire ku ya haga po, nsene tupu asi mumbya ndi mukurwa nakufa a kwara mukada mumbyendi ndi mukurwendi ogu ga fa, ngwendi moomu tupu ya kere moukaro waRutu. Mumbya ndi mukurwa nakufa ga vhulire kukwara swara zendi nokureta munona ogu ga vhulire ku ya gusa edina lyomugara ogu ga fa ntani noku pinga yiweka yendi. Ewapaiko eli kwa vaterere hena mufisayendi yipo va mu pakere mbili.—Deut. 25:5-7; Mat. 22:23-28.

Koneka sihonena saNaomi. Age kwa kwere mugara gedina Elimereki. Apa mugara gwendi novana vawo vavali wovagara va fire, kapi pwa hupire mugara gemepata lyawo ogu ga vhulire kumupakera hena mbili. (Rutu 1:1-5) Konyima zapa Naomi ga tengwire koJuda kumwe nangumweyi zendi Rutu, age kwa tanterere Rutu asi a ka pure Bowasa yipo va rande evango lyawo. Age kwa kere gekoro lyaElimereki. (Rutu 2:1, 19, 20; 3:1-4) Nye Bowasa ga yi divire asi pwa kere mugara gumwe gekoro lyene-lyene ogu za tumbura Bibeli asi “ngandi.” Yipo nye age ngano yige ga hovere kutokora nsene asi ga here kukara ogu ya tumbukilire mokupakera mbili ekoro.—Rutu 3:9, 12, 13.

Pomuhowo, mugara ogo gekoro kwa here kuvatera. (Rutu 4:1-4) Age ga yi divire asi nga hepa kuruganesa yimaliwa yongandi yipo a rande evango, nye age ga yi divire hena asi Naomi ga kurupire mokureta munona ogu ngano ga vhulire kupinga evango kwaElimereki. Yipo nye mugara ogo gekoro ngano ga vhulire kugusa evango yipo li kare lyendi ntani noku li ninka li kare upingwa wendi.

Nye mugara ogo gekoro kwa tokwere kudira kuranda evango olyo apa ga ya zuvhire asi ga hepere kukwara Rutu. Age kwa uyungire asi: “Kapi tani vhuru kuliranda dogoro ni zonagwise upingwa wange.” (Rutu 4:5, 6) Morwasinke ga tjindjilire etokoro lyendi?

Nsene ngano asi mugara ogo gekoro ndi mugara gwa peke ga kwere Rutu ntani noku reta munona gomugara, munona ogo ngano yige ga vhulire kupinga evango lyaElimereki. Ngapi nye ngano omu yininke eyi ya ninkisire mugara ogo gekoro a zonagwise “upingwa” wendi? Bibeli kapi za yi tumbura, nye edi kuna kara nampo nonkedi dimwe.

• Zokuhova, age ngano ga zumbanesere yimaliwa eyi ga ruganesere mokuranda evango lyaElimereki morwa mwaza siruwo, evango olyo ngano kapi lya vhulire ku ya kara hena lyendi. Alyo ngano lya ya kere lyamuna Rutu gomugara.

• Zauvali, age ga vhulire ngano ku ya kara nositumbukira sokupakera mbili Naomi naRutu.

• Zautatu, nsene ngano asi mugara ogo gekoro gaya retesere Rutu vana vamwe hena, awo ngano va vhulire kuligavera upingwa kumwe novana vapeke ava ga kere nawo mugara ogo.

• Zaune, nsene ngano asi mugara ogo kapi ga kere novana vamwene va peke, munona gomugara ogu ngano gaya retere Rutu ngano gaya kere nononkondo kepya lyaElimereki nomugara ogo gekoro. Yipo nye apa ngano ga ya fire, evango lyendi ngano lya ya tumbukilire munona ogu ga kere nedina lyaElimereki nye kapisi munona ogu ga kere nedina lyendi. Mugara ogo gekoro kapi ga here kutura mosiponga upingwa wendi yipo a vatere Naomi. Age kwa here mugara gwa peke gemekoro, ogu ga kere asi Bowasa, a guse situmbukira oso. Bowasa yimo ga rugene nage ngorooro ngoso morwa age kwa here “upingwa wanakufa u twikire kukara medina lyendi.”—Rutu 4:10.

Mugara ogo gekoro nampo kwa kondjerere kukwaterera kedina lyendi ntani koupingwa wendi. Mugara ogo kwa li gazarere tupu mwene. Nye nampili ngomu mugara ogo ga hetekerere ko unene kukwaterera kedina lyendi, ose neina kapi twa diva edina lyendi. Age hena kwa zumbanesere situmbukira sokulikarera esi ga ya gwene Bowasa pokutjanga edina lyendi momuzaro goruvharo oru rwa twaredesere kwaMesiyasa, Jesus Kristusa. Yosili eyi kwa kere yitundwamo yoyidona kweyi mugara ogo gekoro ogu va tumbura moBibeli asi “ngandi” ga ligazarere tupu mwene pokudira kukara neharo lyokuvatera muntu ogu ga hepere evatero!—Mat. 1:5; Ruk. 3:23, 32.