1-2. Yisinke eyi ayi horoka rorunzi apa vantu ava gwana ekuho, ntani yisinke wa hepa kugazadara ko?

 WA MONA rumwe mbunga zovantu ava vana sikama yipo va gwane ekuho ndi? Ove nampo wa dimbwilire asi awo va kara nepuro lyokupama kupitira momazwi gawo, ngomu va limbwilire mapuro gavali aga va va pulire komeho va gwane ekuho. Ove wa mwene womomapata gawo novakaume vawo omu vana kumenya-menya. Apa vagwani ekuho va zaukire momema, ove wa zuvhire vantu omu vana kusakerera ntani wa mwene ruhafo koyipara yawo. Hambara nkenye sivike, mayovi govantu kutura po ntambo ozo noku gwana ekuho ntani noku ya kara Nombangi daJehova.

² Ngapi kuhamena ove? Nsene asi ove kuna kugazadara kugwana ekuho, ove kuna kara muntu gomulyo unene mouzuni ou woudona morwa ove kuna ku “papara Karunga.” (Epis. 14:1, 2) Yikare asi ove mukondi ndi munona, sirongwa esi kuna si tambesere koge. Nye kwetu ko ose ava twa gwana nare ekuho, nose tuna hara kutokomena kunkondopeka erwameno lyetu lyokukarera Jehova narunye. Tu zeni tu ka zogereni kumwe nokonda ntatu deyi natu karera Jehova.

3. Morwasinke vakareli vaJehova va harera usili ntani nouhungami? (Episarome 119:128, 163)

³ Jehova kwa pangerere vantu vendi va “hare usili.” (Sak. 8:19) Jesus kwa pamperekedere varongwa vendi va kondjere uhungami. (Mat. 5:6) Eyi kutanta asi muntu ga hepa kuhara unene kurugana youhunga neyi yoyiwa ntani neyi ya zera kosipara saKarunga. Ove wa hara usili nouhungami ndi? Tuna sihuguvara asi wa u hara. Ove kwa nyenga yipempa ntani noyininke nayinye yepuko neyi yoyidona. (Resa Episarome 119:128, 163.) Muntu ogu a uyunga yipempa, kuhonena Satana, mupangeli gouzuni ou. (Joh.  8:44; 12:31) Sitambo simwe saSatana kuna kara sokunyatekesa edina lyokupongoka lyaKarunga Jehova. Satana kwa hanesa yipempa kuhamena Karunga gwetu kutundilira apa wa tamekere urwanesi moEdeni. Age kwa hetekerere ko kuninkisa vantu va gazare asi Jehova kuligazara tupu mwene ntani Mupangeli ogu a dili kuuyunga usili ntani asi kapi ga harera vantu yininke yoyiwa. (Gen. 3:1, 4, 5) Yipempa yaSatana yokuhamena Jehova, kwa ninkisa vantu va gazare yininke yoyidona kuhamena Jehova. Apa vantu ava tokora mokudira “kuhara usili,” Satana kuvhura ku va ninkisa yipo va rugane yininke nayinye eyi ya dira kuhungama ntani noyirugana yoyidona.—Rom. 1:25-31.

4. Ngapi omu Jehova ga yi likida asi age “Karunga” gosili? (Tara hena efano.)

⁴ Jehova age “Karunga” gosili ntani age kuronga usili kwava va mu hara. (Epis. 31:5) Pokuyirugana ngoso, age ku va vatera yipo yi dire kuvapukisa hena yipempa yaSatana. Jehova kuronga hena vantu vendi va uyunge usili ntani nokurugana yokuhungama. Eyi ku va vatera yipo va li fumadeke vene ntani yipo va kare nombili zomomutjima. (Yis. 13:5, 6) Ga yi kuruganena oyo nove ngomu wa lirongere Bibeli ndi? Ove wa lirongere asi nonzira daJehova, narunye nongwa kovantu navenye ntani noku koge pamundinda. (Epis. 77:13) Yipo nye, ove ono hara kurugana eyi a tanta Karunga asi yiyo youhunga. (Mat. 6:33) Ove ono hara kupopera usili mokuyilikida asi eyi a uyunga Satana kuhamena Karunga gwetu, kuna kara yipempa. Ngapi omu no yi rugana oyo?

5. Ngapi omu no popera usili nouhungami?

⁵ Ove kuvhura kuparuka eparu lyoge monkedi ezi azi yi likida nawa-nawa kovantu navenye asi ove kunyokera po yipempa yaSatana ntani asi ove kukwatesa ko yininke yousili. Ove kuvhura kuyilikida asi ono hara Jehova a kare Mupangeli goge ntani asi ono hara kurugana eyi a uyunga asi yiyo youhunga. Ngapi omu no yi rugana oyo? Hedera Jehova kupitira mekanderero ntani ligava nyamoge kwendi ntani nokulikida eligawo lyoge moyitarameho pokugwana ekuho. Eharo lyokuhara yininke yousili ntani youhunga, kuna kara konda zomulyo ezi nazi ku ninkisa o gwane ekuho.

6. Nokonda musinke o gwana mo mEpisarome 45:4, deyi no harera Jesus Kristusa?

⁶ Morwasinke wa harera Jesus Kristusa? Koneka nokonda dimwe donongwa edi da kara mEpisarome 45:4. (Resa.) Jesus kwa hara usili nelinunupiko ntani nouhungami. Nsene asi wa  hara usili nouhungami, ayo kulikida nawa-nawa asi ove wa hara hena Jesus Kristusa. Gazadara ko tupu omu Jesus ga poperere yininke yousili ntani youhunga. (Joh. 18:37) Nye ngapi omu Jesus a likida elinunupiko?

7. Yisinke o hafere po unene kuhamena elinunupiko lyaJesus?

⁷ Jesus kuyilikida asi ga kara nelinunupiko kupitira mosihonena sendi. Pasihonena, age kugava efumano nalinye koGuhwe, nye kapisi kwamwene. (Mar. 10:17, 18; Joh. 5:19) Ngapi omu o lizuvhu kuhamena elinunupiko lyaJesus? Ngoso ayo kapi ayi kutumangeda o hare MunaKarunga noku kwama sihonena sendi ndi? Yosili ayo kukutumangeda. Morwasinke ga linunupikira Jesus? Morwa ga hara oGuhwe ava va linunupika ntani age ku va honena. (Epis. 18:35; Heb. 1:3) Ngoso eyi kapi yina kukutumangeda o hare Jesus ogu a likida nawa-nawa yikara yaJehova ndi?

8. Morwasinke twa harera Jesus ngaHompa gwetu?

⁸ Ose kwa hara Hompa gwetu Jesus morwa age Mupangeli gomuwa. Jehova yige mwene ga deura Munendi ntani age kwa mu horowora yipo a pangere. (Jes. 50:4, 5) Gazadara ko tupu hena kelizambero lyeharo eli ga likida Jesus. (Joh. 13:1) Mokumona asi Jesus Hompa goge, ove wa fira kumuhara. Age kwa fatwilire asi age kutumbura ava va mu hara ngovakaume vendi ntani asi awo kulikida eharo lyawo pokulimburukwa konompangera dendi. (Joh. 14:15; 15:14, 15) Azo kuna kara sili mfumwa zonene mokukara kaume kaMuna gwaJehova.

9. Ngapi omu ekuho lyoVakriste lya lifana nekuho lyaJesus?

⁹ Mpangera zimwe zaJesus kuna kara asi varongwa vendi va gwane ekuho. (Mat. 28:19, 20) Age ga tura po nare sihonena. Ekuho lyendi kwa lisiga neli lyovarongwa vendi mononkedi dimwe. (Tara kakende “ Ngapi omu ekuho lyaJesus lya lisiga neli lyovarongwa vendi?”) Nye nampili ngoso, alyo lya lifana mononkedi dimwe. Apa Jesus va mu kuhwire, agekwa li geve mwene yipo a rugane mpango zoGuhwe. (Heb. 10:7) Mokulifana, apa varongwa vaJesus ava gwana ekuho, awo kuyilikida moyitarameho yovantu asi vana ligava kwaJehova Karunga. Kutunda nye opo, sininke somulyo unene meparu lyawo ku ya kara kurugana mpango zaKarunga, nye kapisi eyi vana hara. Monkedi zangoso, awo kuna kukwama sihonena sahekurwawo.

10. Morwasinke eharo lyokuhara Jesus na li kutumangedera o gwane ekuho?

¹⁰ Ove wa yi pura asi Jesus kuna kara MunaKarunga gelike a huru ntani ove ono hafa kweyi Jehova ga mu horowora yipo a kare Hompa ogu a tu pangere. Ove wa yi diva asi Jesus ga linunupika ntani age kuhonena nawa-nawa oGuhwe. Ove wa lironga asi age kwa kutikire ava va zuvhire nzara, nga hengagwida ava ngava dompo ntani nga verura hena ava ngava vere. (Mat. 14:14-21) Ove wa limonena omu a pitisire mbungakriste zendi neina. (Mat. 23:10) Ntani hena ove wa yi diva asi ngaHompa goUhompa waKarunga, age nga ka tu ruganena yininke yoyiwa komeho. Ngapi omu no yi likida asi wa mu hara? Pokukwama sihonena sendi. (Joh. 14:21) Sininke simwe sokuhova esi no vhura kurugana mokukwama sihonena sendi kuna kara, kugava eparu lyoge kwaJehova ntani noku gwana ekuho.

11. Konda musinke zomulyo po unene zeyi natu gwanena ekuho ntani morwasinke ya karera ngoso?

¹¹ Konda musinke zomulyo po unene zeyi natu gwanena ekuho? Jesus kwa likidire mpangera zaKarunga zomulyo po unene, pokuuyunga asi: “Hara Jehova Karunga goge nomutjima goge nagunye nomwenyo goge nagunye nonondunge doge nadinye ntani nononkondo doge nadinye.” (Mar. 12:30) Nove yimo wa hara ngoso Karunga ndi?

12. Morwasinke wa harera Jehova? (Tara hena efano.)

¹² Nokonda nonzi deyi natu harera Jehova. Pasihonena, wa hepa ku ya yi kwata egano asi  Jehova yige “ntundiliro zomwenyo” ntani asi yige a gava “nkenye uhwi wouwa ou wa sikilira mo.” (Epis. 36:9; Jak. 1:17) Yininke nayinye yoyiwa eyi o hafere kutunda kwaKarunga gwetu gougavi ntani geharo.

13. Morwasinke sizoweseso sa karera uhwi wouwa?

¹³ Sizoweseso kuna kara uhwi wouwa ou ga tu pa Jehova. Morwasinke tuna kuuyungira ngoso? Gazadara ko tupu koukaume wounene ou wakara pokatji kaJehova naMunendi. Jesus kwa uyungire asi: “Eyi yiyo va harera nge Otate” ntani “ame kwa hara Otate.” (Joh. 10:17; 14:31) Elikwatakano lyawo kwa nkondoparere unene ngomu va tungire kumwe ure wonomvhura mabiliyona. (Yis. 8:22, 23, 30) Gazadara ko tupu kukora oku ga lizuvhire Karunga apa ga pulisilire Munendi a ya hepe nokufa. Jehova kwa hara vantu kukwatera mo nove, ano eyi yiyo ya mu ninkisire a gave Munendi ogu ga hara ngonzambo yipo ngo ka paruke narunye kukwatera mo nava wopeke. (Joh. 3:16; Gar. 2:20) Ezi kuna kara konda zonene po zeyi twa hepera kuhara Karunga.

14. Sitambo musinke sosiwa po esi no vhura kulitulira po meparu?

¹⁴ Eharo lyoge lyokuhara Jehova kwa ya kura morwa ove kwa ya lironga yoyinzi kumuhamena. Yosili ove ono hara kumuhedera pepi unene ngesi ntani narunye. Ntani ove kuvhura ku yi rugana oyo. Age kuna kukukorangeda o hafese mutjima gwendi. (Yis. 23:15, 16) Ove kuvhura  kuyirugana oyo kupitira moyirugana, nye kapisi mononkango tupu mwelike. Ayo ngayi lilikida monkedi omu o paruka asi wa hara sili Jehova. (1 Joh. 5:3) Oso kuna kara sitambo sosiwa po esi no vhura kulitulira po meparu.

15. Ngapi omu no vhura kuyilikida asi wa hara Jehova?

¹⁵ Ngapi omu no vhura kuyilikida asi wa hara Jehova? Pomuhowo, wa hepa kugava ekanderero lyokulikarera pokuligava nyamoge kwaKarunga gosili. (Epis. 40:8) Makura konyima ntani nye no vhura kulikida eligawo lyoge moyitarameho yovantu pokugwana ekuho. Ngwendi moomu tupu tuna yi zogere mosirongwa esi, ekuho lyoge kuna kara sininke esi asi reta ruhafo ntani alyo ezuva lyomulyo unene meparu lyoge. Ove ku ya tameka kuparuka eparu lyepe, kapisi pwanyamoge, nye kuparukira mwaJehova. (Rom. 14:8; 1 Pet. 4:1, 2) Olyo kuvhura kuzuvhika ngwendi etokoro lyenene eli no vhura kutura po ntani yosili alyo kuna kara etokoro lyenene eli wa hepa kutura po. Etokoro olyo ngali kuvatera yipo o paruke eparu lyewa po. Monkedi musinke?

16. Yisinke va likida mo mEpisarome 41:12 kuhamena omu Jehova nga futa ava ava gava eparu lyendi kwendi yipo va mu karere?

¹⁶ Johova kuna kara muntu gougavi po unene. Yi kare asi yisinke eyi ngo mu pa, age narunye nga ku tengwidira yoyinzi. (Mar. 10:29, 30) Age nga ku pa eparu lyewa po unene ntani lyomfeto zongwa, nampili ngesi mouzuni ou woudona. Ntani olyo kuna kara tupu etameko. Eparu eli o tameke kuparuka kutunda pezuva lyekuho lyoge, kapi lya hepa kuhaga. Ove kuvhura kutwikira kukarera narunye Guhyetu geharo. Eharo eli lya kara pokatji koge naGuhyetu Jehova, nga li twikira kukura ntani ove ngo twikira kuparuka dogoro narunye ngwendi moomu tupu Jehova a paruka narunye.—Resa Episarome 41:12.

17. Yisinke no vhura kugava kwaJehova eyi ga dira kukara nayo nare?

¹⁷ Apa o gava eparu lyoge kwaKarunga ntani noku gwana ekuho, ove ku ya kara nositumbukira sokugava yuma yomulyo po unene kwaGuhyetu Jehova. Age ga ku pa yininke nayinye yoyiwa noyiruwo nayinye yoruhafo eyi wa hafera po unene. Mokulikida rupandu, ove kuvhura kugava kwamwenya eguru nevhu yuma eyi ga  dira kukara nayo nare, ano ayo kuna kara ukareli woge woulimburukwi. (Joba 1:8; 41:11; Yis. 27:11) Yosili ezi kuna kara nkedi zongwa po omu no vhura kuparuka eparu lyoge! Pwa hana masinganyeko, eharo lyoge lyokuhara Jehova kuna kara konda zomulyo po unene zeyi no gwanena ekuho.

18. Mapuro musinke no vhura kulipura?

¹⁸ Ngapi omu no limburura epuro eli asi: Kuvhura o gwane ekuho ndi? Nyovelike tupu gokuvhura kulimburura epuro olyo. Nye ayo nampo kuvhura kukuvatera nsene o li pura nyamoge asi: ‘Morwasinke nina kudilira kugwana ekuho?’ (Yirug. 8:36) Diworoka nokonda ntatu edi tuna zogere. Zokuhova, ove kwa hara usili ntani nouhungami. Lipura nyamoge asi: ‘Nina hara kuka mona apa nkenye ogu nga ka uyunga usili noku ka rugana youhunga ndi?’ Zauvali, ove wa hara Jesus Kristusa. Lipura nyamoge asi: ‘Nina hara MunaKarunga a kare Hompa gwange ntani noku kwama sihonena sendi ndi?’ Zautatu zomulyo po unene kuna kara asi ove wa hara Jehova. Lipura nyamoge asi: ‘Nina hara kuhafesa Jehova pokumukarera ngaKarunga gwange ndi?’ Nsene asi malimbururo komapuro ogo kuna kara asi nhi, makura yinke hena yina kukukondera kugwana ekuho? Konda musinke ono kara nazo zeyi no dilira kugwana ekuho ngesi?—Yirug. 16:33.

19. Morwasinke no dilira ku likatakata kugwana ekuho? Yifanekesa. (Johanesa 4:34)

¹⁹ Nsene ono kara nomasinganyeko kuhamena kugwana ekuho, koneka sifanekeso esi ga ruganesere Jesus. (Resa Johanesa 4:34.) Koneka asi Jesus kwa hetakanesere kurugana mpango zoGuhwe konondya. Morwasinke? Morwa nondya mulyo kwetu. Jesus ga yi divire asi nkenye eyi atu pura Jehova tu rugane, yiwa kwetu. Jehova kapi ana tu harere tu rugane nkenye eyi nayi tu koresa. Ngoso Jehova kuna kuharere o gwane ekuho ndi? Yimo. (Yirug. 2:38) Yipo nye, ove kuvhura kukara nehuguvaro asi kulimburukwa kompangera zokugwana ekuho, ngayi kuvatera o gwanene mo mauwa. Nsene asi ove kapi o li katakata kulya nondya doutovara, morwasinke nye ono kulikatakatera kugwana ekuho?

20. Yisinke ngatu ka zogera mosirongwa sokukwama ko?

²⁰ Morwasinke vamwe ava li katakatere kugwana ekuho? Sinzi sovantu kuvhura nampo va limburure asi, ‘Kapi simpe nina liwapaikire kugwana ekuho.’ Sitwa sesi asi etokoro lyokuligava nyamoge kwaJehova ntani nokugwana ekuho kuna kara etokoro lyomulyo unene eli ngo vhura kutura po. Yipo nye, pwa hepa siruwo, noku gazadara ko nawa ntani noku litura mo unenene yipo o liwapaikire. Nye nsene asi wa kara neharo lyokutura po ntambo zangoso, yisinke no vhura kurugana ngesi yipo o liwapaikire kugwana ekuho? Sirongwa sokukwama ko ngasi ka limburura epuro olyo.