1. Yisinke ava ya dimburura vantu apa ava wiza sikando sawo sokuhova komapongo getu? (Tara hena efano.)

 GAZADARA ko valikwali ava vana wiza sikando sawo sokuhova koSinyanga soNombangi daJehova. Valikwali owo yina va tetukisa monkedi omu vanavazinyetu vana va tambura ntani pokumona omu va li hara-hara mombungakriste. Monzira zawo zokuza kembo, mukadi ta tantere mugara gwendi asi ‘Nombangi daJehova vantu wovawa, awo va li siga novantu vapeke.’

2. Yisinke ya ninkisa vamwe va punduke?

² Eharo eli ava likida Nombangi daJehova kutetukisa sili. Nye nampili ngoso, Nombangi daJehova nado kapi da sikilira mo. (1 Joh. 1:8) Nye nampili ngoso, moomu tuna ku diva unene vanavazinyetu womombungakriste, yimo hena ngatu ya dimburura mapuko gawo gamwe. (Rom. 3:23) Nye ehudi, vamwe kwa pulisira mapuko govakwawo ga va pundukise.

3. Ngapi omu vantu nava dimburura varongwa vaJesus wousili? (Johanesa 13:34, 35)

³ Tu tareni hena etjangwa oku sina demenene sirongwa esi. (Resa Johanesa 13:34, 35.) Ngapi omu vantu nava dimburura Vakriste wousili? Eharo yilyo ngali va dimbwilisa nye kapisi kusikiliramo. Konekeni hena asi Jesus kapi ga uyungire asi: ‘Ngomu yi dimburura asi one sili varongwa vange.’ Nye age kwa uyungire asi: “Navenye ngava yi dimburura asi one sili varongwa vange.” Jesus kwa yi likidire asi kapisi varongwa vendi velike ngava yi dimburura asi awo va li hara-hara, nye nava  wopeke ngava yi dimburura asi awo sili varongwa vendi ava va li hara-hara.

4. Yisinke nampo vamwe nava hara kudiva kuhamena Vakriste wousili?

⁴ Vantu vamawe ava va dira kukara asi kapisi Nombangi daJehova kuvhura va pure asi: ‘Ngapi omu eharo na li tu vatera tu dimburure varongwa vaJesus wousili? Ngapi omu Jesus ga likidire eharo kovapositoli vendi? Ntani ngapi omu nayi tu tompoka neina kukwama sihonena saJesus?’ Nombangi daJehova kuvhura va gazadare ko malimbururo komapuro ogo. Nsene tu yi rugana oyo ngayi tu vatera tu likide eharo momunene, unene po nsene kuna kurugana kumwe novakwetu ava nawo va dira kusikilira mo.—Efe. 5:2.

5. Faturura nonkango daJesus edi da kara mwaJohanesa 15:12, 13.

⁵ Jesus kwa fatwilire asi varongwa vendi ngava li hara-hara monkedi zokulikarera. (Resa Johanesa 15:12, 13.) Koneka asi Jesus kwava pangerere asi: “Omu lihara-hare moomu na mu hara ame.” Yisinke ayi tanta eyi? Ngomu ga yi fatwilire Jesus, eharo eli kuna kara lyokulizambera, kutanta asi kuhara unene wopeke kupitakana nyamoge ndi kukara neharo lyokufira Vakriste vakwetu nsene hepero. b

6. Ngapi omu Nonkango daKarunga da nkondopeka mulyo gosikara seharo?

⁶ Nonkango daKarunga kuturonga asi eharo mulyo unene. Pasihonena, sinzi sovantu kwa hara novelise ngwendi edi dina kukwama ko. “Karunga yige eharo.” (1 Joh. 4:8) “Hara mukweni moomu wa lihara nyamoge.” (Mat. 22:39) “Eharo kudongwenesa po nonzo dononzi.” (1 Pet. 4:8) “Eharo kapi ali haga.” (1 Kol. 13:8) Novelise edi ntani nadimwe da yi zeresa  asi ya kara nomulyo tu likide sikara esi somulyo.

7. Morwasinke Satana nayi dilira kumutompoka mokuronga vantu yipo va li hare ntani yipo va kare mouumwe?

⁷ Sinzi sovantu kupura asi ngapi omu nani diva asi ou kuna kara ukareli wousili? Maukarelikarunga nagenye kutanta asi ago kuronga usili, nye nkenye ukarelikarunga kuronga yininke yokulisiga-siga yokuhamena Karunga. Satana ya mu tompoka kupiyaganeka vantu pokutulisa po maukarelikarunga goyimpempa. Nye age kapi ta vhuru kureta kumwe vantu navenye mouzuni mudima yipo va li hara-hare. Jehova gelike gokuvhura kuyirugana oyo. Ose twa yi diva oyo morwa eharo kwa tunda kwaJehova, ano ava va kara nompepo zaJehova ntani ava a tungike yiwo velike ava likida eharo lyosili. (1 Joh. 4:7) Eyi yiyo nye Jesus ga uyungilire asi varongwa vendi ngava va dimbwilira keharo lyosili.

8-9. Ngapi omu vantu wovanzi ya va kundamene pokumona eharo eli va kara nalyo Nombangi daJehova?

⁸ Ngwendi moomu ga yi pumbire Jesus, sinzi sovantu kudimburura Vakriste wousili keharo eli ava lilikida. Pasihonena, munazinyetu gomugara Ian kudiworoka sikando sendi sokuhova ga zire kosigongi somazuva gatatu esi sa karerere mosira somaudano esi sa kara pepi nembo lyendi. Makwedi gongandi komeho si kare sigongi oso, Ian kwa zire mosira oso a ka tarere maudano. Age kwa tanta asi: “Nkareso zovantu ava va kere posigongi nava vatarere maudano kwa li sigire unene. Nombangi kwa kere nonkareso zongwa, kwa dwere nawa ntani vana vawo kwa kere nonkareso zongwa.” Age hena kwa tanta asi: “Vantu ava kwa monekere ngwendi ya va gwanena po eyi va kara nayo ntani kwa kara nombili. Oyo yiyo na here name meparu lyange. Kapi nina kudiworoka yiuyungwa eyi va geve mezuva olyo, nye ame kudiworoka nkareso ezi va kere nazo Nombangi.” c Ano nkareso ozo kwa reta yitudwamo yoyiwa yokulihara-hara. Mokumona asi ose kwa hara vanavazinyetu, ose kuvatekura nonkenda ntani nefumadeko.

⁹ Munazinyetu gomugara John kwa lizuvhire monkedi zokulifana apa ga tamekere kuza komapongo goNombangi daJehova. Age kwa tanta asi: “Ayo kwa tetukisire nge pokumona nkareso zawo zongwa zokulihara-hara. Awo kwa kere vantu wovawa ano eyi kwa ninkisire nge ni gazare asi awo kwa sikilira mo. Eharo lyosili eli va kara nalyo kwa ninkisire nge ni yi pure asi nina gwana ukareli wousili.” d Yihorokwa eyi ntani nayimwe kulikida asi vantu vaJehova kuna kara Vakriste wousili.

10. Unene po posiruwo musinke natu vhura kulikida eharo? (Tara hena nonkango dokonhi.)

¹⁰ Ngomu katu yi tumbura ketameko, vanavazinyetu navenye kapi va sikilira mo. Poyiruwo yimwe kuvhura va rugane ndi va tu uyungire yininke eyi nayi tu handukisa. e (Jak. 3:2) Poyiruwo oyo, unene po nsene wopeke vana tu handukisa, ose kuvhura kuvalikida asi twa va hara mweyi atu rugana. Kuliza noukaro ou, yisinke natu lirongera ko kosihonena esi ga tulire po Jesus?—Joh. 13:15.

11. Yikara musinke yoyidona ga likidire Jakopo naJohanesa? (Tara hena efano.)

¹¹ Jesus kapi ga ndindilire ko kovarongwa vendi va sikilire mo. Nye age kwa va vaterere va wapukurure yikara yawo yoyidona yipo va  hafese Jehova. Sikando simwe vapositoli vendi vavali kwa tanterere zinyawo a ka pure Jesus yipo ngava ka hingire nendi moUhompa. (Mat. 20:20, 21) Eyi ga rugene Jakopo naJohanesa kwa likidire asi awo kwa linenepekere ntani awo kwa here kukara vantu womulyo unene kupitakana wopeke.—Yis. 16:18.

12. Ngoso Jakopo naJohanesa yiwo velike va likidire yikara yoyidona? Faturura.

¹² Jakopo naJohanesa kapisi yiwo velike va likidire yikara yoyidona posiruwo oso. Tu tareni omu va lizuvhire vapositoli vakwawo apa va yi zuvhire oyo. “Apa vakwawo murongo va yi zuvhire oyo, tava handukire owo vantu namumbyendi.” (Mat. 20:24) Gazadareni ko omu nampo Jakopo naJohanesa ntani novapositoli vakwawo va litangwisire. Nampo vapositoli vakwawo kwa uyungire ngesi asi ‘one kuna kugazara asi one mulyo unene kutupitakana ndi? Ano eyi yiyo nye muna pulire Jesus ngomu ka hingire nage moUhompa ndi? Kapisi nyonelike mwa rugana unene kumwe naJesus. Nose twa fira kugwana situmbukira somulyo ngwendi oso mwagwana.’ Yikare asi yisinke va gazarere ndi va rugene vapositoli, ukaro owo kwava ninkisire va dire kulihara posiruwo oso.

13. Ngapi omu Jesus ga lizuvhire apa vapositoli vendi va tulire mapuko? (Mateusa 20:25-28)

¹³ Yisinke ga rugene ko Jesus koukaro owo? Age kapi ga handukire. Age kapi ga uyungire asi ta papara ko vapositoli wovawa ava va  kara nelinunupiko ntani ava ava likida vakwawo eharo nkenye apa. Nye mevango lyoyo, Jesus kwa uyungire nawo nelididimiko morwa ga yi divire asi awo kwa hara kurugana youhunga. (Resa Mateusa 20:25-28.) Age kwa twikilire kuvatekura neharo nampili ngomu ngava lipatana asi yilye munene po mokatji kawo.—Mar. 9:34; Ruk. 22:24.

14. Mokatji kovantu musinke va kulilire vapositoli vaJesus?

¹⁴ Jesus kwa diworokere asi mpo zovapositoli ntani nomu va va rerere, kwa va kundamene meparu. (Joh. 2:24, 25) Awo kwa kulilire monomukunda omu vampitisili womaukarelikarunga ngava rongo vantu asi vantu kukara tupu nomulyo nsene vana kara noyitumbukira. Vampitisili womaukarelikarunga nawo ngava gazara asi awo mulyo unene kupitakana wopeke. f (Ruk. 18:9-12) Jesus ga yi divire asi magazaro ogo kuvhura ga kundame wopeke monkedi omu ava li tara vene ntani nomu ava tara wopeke. (Yis. 19:11) Age kapi nga ndindire ko kovarongwa vendi va dire kutura mapuko ntani age kwa lididimikire apa ngava tura mapuko. Age ga yi divire asi awo kwa here kurugana youhunga, yipo nye age kwava rongere nelididimiko yipo va linunupike nokulikida wopeke asi va va hara mevango lyokulimona vene asi awo mulyo unene.

15. Yisinke natu lirongera ko kweyi ya horokerere Jakopo naJohanesa ntani novapositoli vakwawo?

¹⁵ Kuvhura tu lirongere ko yoyinzi kweyi ya horokerere Jakopo naJohanesa. Ayo kwa kere epuko kwaJakopo naJohanesa mokupura Jesus a va pe yitumbukira moUhompa. Nye vapositoli vakwawo nawo mepuko va kere mokupulisira ukaro owo u donganese uumwe wawo. Nye Jesus kwa kere nonkenda ntani neharo kovapositoli vendi navenye 12. Sirongwa musinke natu lirongera ko? Yomulyo po kapisi yeeyi tupu ava rugana vantu, nye hena eyi atu rugana ko apa ava tura mapuko. Yisinke nayi vhura kutuvatera? Nsene munazinyetu ana tu handukisa, kuvhura tu lipure nyamwetu asi: ‘Morwasinke yina handukisire nge unene eyi ana rugana? Ayo kuna likida asi kozili nkareso zange zondona na hepa kutjindja ndi? Muntu ogu ana handukisa nge nampo kuna kara nomaudigu ndi? Nampili ni kare nokonda zogwa zeyi nina handukire, kuvhura ni likide eharo komuntu ogo ntani nokumugusira po ndi?’ Nsene tu lilikida eharo, nga tu yi likida asi ose varongwa vaJesus wousili.

16. Yisinke hena natu vhura kulirongera ko kosihonena saJesus?

¹⁶ Sihonena saJesus kuturonga hena tu hetekere ko kukwata egano vapuli vakwetu. (Yis. 20:5) Jesus ga diva eyi ya kara monomutjima detu, nye ose kapi twa yi diva. Nye kuvhura tu kare nelididimiko apa vanavazinyetu ava tu zonene. (Efe. 4:1, 2; 1 Pet. 3:8) Ayo kuvhura kutukarera ureru kuyirugana oyo nsene tu va diva nawa. Tu zeni tu ka tare sihonena sina kukwama ko.

17. Uwa musinke ga gwanenene mo mutareli gonombunga pokudiva nawa mupuli mukwawo?

¹⁷ Mutareli gonombunga gumwe kudiworoka munazinyetu gumwe gomugara gomombungakriste zimwe ezi nga dingura moEast Africa. Pomuhowo, mutareli gonombunga kwa gazarere asi munazinyetu ogo kapi ga kara  nonkenda. Yisinke ga rugene ko mutareli gonombunga? Age kwa tente asi: “Mevango lyokusigilira munazinyetu ogo, ame yipo na tokwere kumudiva nawa.” Apa mutareli gonombunga nga kara-kara namunazinyetu ogo, age kwa lirongere omu munazinyetu va mu rera ntani nomu ya mu ninkisire a tekure wopeke. Mutareli gonombunga kwa uyunga hena asi: “Apa na kwete egano omu ya mu digoperere kutura po malitjindjo yipo a mangurukire vantu ntani nomalitjindjo aga ga tulire po, ayo kwa tetukisire nge. Ose kwa ya kere vakaume.” Yosili apa atu hetekere ko kukwata egano vanavazinyetu, ayo kutukarera ureru yipo tu va hare.

18. Mapuro musinke natu lipura nyamwetu nsene mupuli mukwetu ana tu zonene? (Yisewe 26:20)

¹⁸ Poyiruwo yimwe kuvhura tu lizuvhe asi twa hepa kuhedera munazinyetu ogu ana tu zonene. Nye komeho tu ka yi rugane, twa hepa kulipura mapuro ngwendi gaga asi: ‘Nina kara nomauzera nagenye ndi?’ (Yis. 18:13) ‘Ngoso ayo kuvhura yi kare asi kapi ka yi ruganene mowina ndi?’ (Muud. 7:20) ‘Name na tura rumwe epuko lyokulifana ndi?’ (Muud. 7:21, 22) Nsene na ni ka zogera nomuntu ogo kuhamena ukaro owo, ayo na yi ka ninkisa udigu owo u ka ligwederere ndi?’ (Resa Yisewe 26:20.) Nsene tu litulira po siruwo sokulipura mapuro ogo, eharo ngali tu tumangeda tu hageke kugazara eyi ya tu horokera.

19. Yisinke ono tokomene kurugana?

¹⁹ Nombangi daJehova kuyilikida asi awo varongwa vaJesus wousili apa ava li likida eharo. Nkenye gumwe gwetu kuyilikida asi ose sili varongwa vaJesus wousili apa atu likida vanavazinyetu eharo nampili ngomu va kara nomaupirankondo gawo. Apa atu lilikida eharo, wopeke ngava dimburura ukareli wousili ntani ngava ya li pakerera kumwe nose pokukarera Karunga geharo Jehova. Tu tokomeneni kulikida eharo eli ali tu dimbwilisa asi ose Vakriste wousili.