1-2. Morwasinke nayi dilira kukudompesa nsene asi kapi simpe ono liwapaikire kugwana ekuho? (Tara efano lyopontunda.)

 NSENE asi ono hara kugwana ekuho, ove ngoso kwa litulira po sitambo sosiwa. Ono liwapaikire kugwana ekuho ngesi ndi? Nsene ono liwapaikire ntani nsene vakuronambunga va yi kwatesa ko, wa ha likatakata kugwana ekuho nsene mpito zina moneka. Nsene o yi rugana ngoso, ove ngo gwana mauwa gomanzi mosirugana saJehova.

² Nye kweli gumwe ga ku tantera asi wa hepa kutura po simpe ezokomeho, komeho o gwane ekuho ndi? Ndi wa yi dimburura nyamoge asi wa hepa kutura po ezokomeho? Nsene yimo ngoso, ya ha kudompesa. Yikare asi ove munona ndi mukondi, ove kuvhura kutura po ezokomeho yipo o sikise mo sitambo oso somulyo.

3. Yisinke lya pulire erenga lyomoEtiyopiya Filipusa ntani epuro musinke ayi retesa po? (Yirugana 8:36, 38.)

³ Resa Yirugana 8:36, 38. Erenga lyomoEtiyopiya kwa pulire Filipusa muzuvhisi gombudi zongwa asi: “Yisinke hena nayi limba po kukuhwa nge?” Mugara ogo gomuEtiyopiya, kwa here kugwana ekuho. Nye ngoso age sili ga liwapaikilire kugwana ekuho ndi?

4. Ngapi omu erenga lyomoEtiyopiya lya yi likidire asi lya tokomenene kutwikira kulironga?

⁴ Mugara ogo gomuEtiyopiya “kwa zire koJerusarema a ka karere Karunga.” (Yirug. 8:27) Yipo nye, ayo kumoneka nawa-nawa asi age ga tambwire ukarelikarunga woVajuda. Twa si huguvara asi age kwa lirongere kuhamena Jehova moMatjangwa gokupongoka goRuhebeli. Nye nampili ngoso, age kwa here kulironga yoyinzi. Yisinke lya rugene erenga olyo apa Filipusa ga li gwene kositaura? Age kwa resere bukegango ezi ga tjenge muporofete Jesaya. (Yirug. 8:28) Ago kwa kere marongo gokonhi-nhi. Erenga olyo kapi  lya yi gwanenene po tupu kulironga marongo gamwe goBibeli, nye alyo kwa here kutwikira kulironga.

5. Yisinke ga rugene ko mugara gomuEtiyopiya kuhamena eyi ga lirongere?

⁵ Mugara ogo gomuEtiyopiya “kwa kere mepangero lyahompa gomukadi gwaEtiyopiya, Kandake, ntani nga takamesa emona lyahompa ogo.” (Yirug. 8:27) Yipo nye age nampo kwa kere mugara ogu ga kere noyitumbukira yoyinzi. Nye nampili ngoso, age kwa litulilire po siruwo sokukarera Jehova. Ayo kapi ya mu gwanenene po tupu yokulironga usili, nye ga tulire hena pasirugana eyi ga lirongere. Yipo nye, age kwa gendere sinano sosire a tunde koEtiyopiya aze kontembeli moJerusarema, yipo a ka karere Jehova. Rugendo oro nampo kwa gusire siruwo sosire ntani noyifutwa yoyinzi, nye mugara ogu kwa here kukarera Jehova yi kare asi yisinke eyi ya hepere po.

6-7. Yisinke ga rugene mugara gomuEtiyopiya yipo a twikire kuhara unene Karunga?

⁶ Mugara gomuEtiyopiya kwa lirongerere kwaFilipusa mausili gamwe gomape gomulyo. Umwe wousili owo kuna kara asi Jesus kwa kere Mesiyasa. (Yirug. 8:34, 35) Erenga olyo kwa haferere kulironga eyi ga mu ruganena Jesus. Yisinke lya rugene ko erenga konyima zokulironga yininke oyo? Age ngano ga twikilire kukara moomu ga kere, ngoMujuda ogu va fumadekere. Nye mevango lyoyo, eharo lyendi lyokuhara Jehova naMunendi kwa kulire. Ayo kwa mu tumangedere a ture po etokoro lyomulyo lyokugwana ekuho, yipo a kare murongwa gwaJesus Kristusa. Mokumona asi mugara ogo ga liwapaikilire, Filipusa makura yipo ga mu kuhwire.

⁷ Ove kuvhura o liwapaikire kugwana ekuho nsene o kwama sihonena somugara gomuEtiyopiya. Nove kuvhura ngo uyunge wa hana masinganyeko asi: “Yisinke hena nayi limba po kukuhwa nge?” Tu zeni tu ka zogere omu nove no vhura kurugana yininke yokulifana ngwendi yeyi ga rugene mugara gomuEtiyopiya. Age kwa twikilire kulironga, kwa tulire pasirugana eyi ga lirongere ntani kwa twikilire kuhara Karunga.

8. Yisinke ali uyunga etjangwa lyaJohanesa 17:3 kuhamena eyi wa hepa kurugana?

⁸ Resa Johanesa 17:3. Ngoso nonkango edi ga uyungire Jesus kukuvatera yipo o tokore kulironga Bibeli ndi? Sinzi setu yimo atu lizuvhu ngoso. Nye ngoso nonkango odo dokulifana kututantera hena tu twikire kulironga ndi? Yii. Ose kapi ngatu hageka kudiva Karunga gosili. (Muud. 3:11) Ose ngatu twikira kulironga dogoro narunye. Moomu tuna kulironga, yimo hena ngatu hedera unene Jehova pepi.—Epis. 73:28.

9. Yisinke twa hepa kurugana konyima zokulironga madi gomoBibeli?

⁹ Apa atu tameke kulironga kuhamena  Jehova, ose kulironga tupu madi gomoBibeli. Mombilive zendi ezi ga tjangerere koVahebeli, mupositoli Paurusa kwa tumbwire madi gomoBibeli asi ‘yininke yokuhova eyi twa lironga.’ Age kapi ga uyungire asi “erongo eli twa hovere kulironga” kwato mulyo. Nye mevango lyoyo, age kwa yi likidire asi erongo olyo kwa fana ngwendi masini aga a zamwa mukeke. (Heb. 5:12; 6:1) Nye age hena kwa korangedere Vakriste navenye va twikire kulironga yoyinzi kupitakana tupu madi gomoBibeli ntani va lironge mausili gokonhi-nhi gomoNonkango daKarunga. Nove wa tunga po eharo lyokulironga yininke yokonhi-nhi yomoBibeli ndi? Ono kara neharo lyokutura po ezokomeho, lyokutwikira kulironga kuhamena Jehova ntani nositambo sendi ndi?

10. Morwasinke nampo vamwe ayi va karerere udigu kulironga?

¹⁰ Sinzi setu, kutudigopera kulironga. Ngapi omu o lizuvhu kuhamena kulironga? Wa li rongere kosure asi ngapi omu no vhura kuresa nokulironga nawa ndi? Wa haferere eyi wa lirongere nokulizuvha asi yinzi wa lirongere ndi? Ndi wa lizuvhire asi kapi to vhuru kulirongera ko konobuke? Nsene yimo wa lizuvhire ngoso, yidiva asi sinzi sovantu nawo yimo ava lizuvhu ngoso. Nye nampili ngoso, Jehova kuvhura a ku vatere. Age ga sikilira mo ntani murongi gomuwa po unene.

11. Ngapi omu Jehova ga yi likida asi age Murongi gomunene po?

¹¹ Jehova kulitumbura mwene asi Murongi gomunene. (Jes. 30:20, 21) Age murongi ogu ga kara nelididimiko, nombili ntani age kutukwata egano. Age kumona uwa movarongwa vendi. (Epis. 130:3) Ntani kapi a ndindire ko yoyinzi kwetu kupitakana pweyi natu dira kusikisa mo. Diworoka asi age kwa sita uruvi woge ngouhwi wouwa. (Epis. 139:14) Ose kwa kara neharo lyokulironga. Musiti gwetu kuna tu harere tu twikire kulironga dogoro narunye ntani nokuhafera eyi atu lirongo. Yipo nye, ya kara nomulyo tu tunge po ngesi eharo lyokuhara mausili gomoBibeli. (1 Pet. 2:2) Litulira po yitambo eyi no vhura kusikisa mo ntani resa nokulironga Bibeli nkenye ezuva. (Jos. 1:8) Nevatero lyaJehova, ove ngoya hafera kuresa ntani nokulironga momunene kuhamena Jehova.

12. Morwasinke natu lirongera kuhamena eparu lyaJesus nosirugana sendi sokuzuvhisa?

¹² Litulira po nkenye apa siruwo sokuteda ko keparu lyaJesus nosirugana sendi sokuzuvhisa. Ayo ya kara nomulyo tu honene nawa Jesus nsene tuna hara kukarera Jehova, unene po moyiruwo eyi yoyidigu. (1 Pet. 2:21) Jesus kwa tanterere varongwa vendi asi ngava ligwanekera nomaudigu. (Ruk. 14:27, 28) Nye nampili ngoso, age ga kere nehuguvaro asi varongwa vendi ngava twikira kulimburukwa Karunga, ngwendi moomu tupu ga yi rugene age. (Joh. 16:33) Lironga kuhamena eparu lyaJesus ntani litulira po yitambo yipo o mu honene meparu lyoge lyankenye ezuva.

13. Yisinke no twikira kuhundira Jehova nkenye apa ntani morwasinke?

¹³ Ayo kapi ya gwanena po tupu kukara nediwo. Konda zeyi wa hepera ediwo kuna kara asi yipo o lironge yoyinzi kuhamena Jehova ntani nokutunga po yikara ngwendi eharo lyo kumuhara ntani nokutunga po epuro mwendi. (1 Kol. 8:1-3) Ngomu ono kutwikira kulironga, twikira kuhundira Jehova a ku vatere yipo o kare nepuro lyokupama. (Ruk. 17:5) Age kulimburura makanderero gangoso. Nsene o kara nepuro lyokupama mwaKarunga, ayo ngayi kuvatera o ture po ezokomeho.—Jak. 2:26.

14. Ngapi omu mupositoli Peturusa ga nkondopekere mulyo gokutura pasirugana eyi atu lirongo? (Tara hena efano.)

¹⁴ Mupositoli Peturusa kwa nkondopekere omu ya kara nomulyo kovarongwa vaKristusa  va twikire kutura pasirugana eyi ava lirongo. Age kwa tumbwire sihorokwa somoBibeli saNowa. Jehova kwa tanterere Nowa asi age nga ruganesa ruhanzo a zonagure po vantu wovadona womomazuva gendi. Ayo kapi tupu ya gwanenene po mokuzowora Nowa nepata lyendi pokudiva asi ruhanzo ngaru wiza. Koneka asi Peturusa kwa tembe kosiruwo esi sa horokere komeho zoruhanzo ntani “alyo emuwato kuna ku li tunga.” (1 Pet. 3:20) Yimo, Nowa nepata lyendi kwa tulire pasirugana eyi va lirongere kwaKarunga pokutunga emuwato lyemunene. (Heb. 11:7) Makura Peturusa yipo ga hetakanesere eyi ga rugene Nowa kokugwana ekuho, apa ga tjenge asi: “Sihorokwa esi kwa fanekesa ekuho eli lina kumuparura.” (1 Pet. 3:21) Yipo nye, ose kuvhura kuhetakanesa sirugana esi ono kurugana ngesi yipo o liwapaikire kugwana ekuho kosirugana esi ga rugene Nowa nepata lyendi nomvhura dononzi mokutunga emuwato. Sirugana musinke wa hepa kurugana yipo o liwapaikire kugwana ekuho?

15. Yisinke ya hamena mo melitezururo lyosili?

¹⁵ Sininke simwe somuhowo esi twa hepa kurugana kuna kara kulitezurura kononzo detu. (Yirug. 2:37, 38) Elitezururo lyosili kutwaredesa komalitjindjo gosili. Wa hageka kurugana nkenye yirugana eyi ayi dili kuhafesa Jehova, pasihonena, kuhondera, kuruganesa makanya ndi kuruganesa nonkango donondona ndi? (1 Kol. 6:9, 10; 2 Kol. 7:1; Efe. 4:29) Nsene kapi wa yi rugana simpe, twikira kuhetekera ko kutura po malitjindjo. Uyunga nogu a ku rongo Bibeli ndi pura mukuronambunga yipo a ku vatere ntani a ku pe ko mavyukiso. Nsene asi ove munona ntani kwa tunga novakondi woge, twikira kuva pura va ku vatere yipo o nyokere po nkareso zondona ezi nampo na zi kuninkisa o dire kugwana ekuho.

16. Yisinke twa hepa kurugana nsene tuna hara kukarera Jehova nkenye apa?

¹⁶ Ya kara hena nomulyo kukwama elikwamo lyetu lyokurugana yininke yopampepo. Ayo kwa kwatera mo kuponga mapongo goSikriste ntani nokulihameka mo. (Heb. 10:24, 25) Ntani nsene asi ono wapere kulihameka mo mokuzuvhisa, divilisa mokuza nkenye apa mokuzuvhisa. Moomu ono kulihameka mo unene mokuzuvhisa, yimo hena ngo yi hafera. (2 Tim. 4:5)  Nsene asi ovemunona ntani kwa tunga novakondi woge, lipura nyamoge asi: ‘Ame kundindira yipo vakondi vange va diworokese nge ni ze komapongo ndi yipo ni lihameke mokuzuvhisa ndi? Ndi ame kuyirugana pwanyamwange? Pokuyirugana ngoso, ove kuyilikida asi wa kara nepuro ntani wa hara Jehova Karunga ntani wa kara norupandu koyininke eyi a ku pe. Yirugana eyi kuna kara mauhwi aga o gava kwaJehova. (2 Pet. 3:11; Heb. 13:15) Mauhwi nagenye aga atu gava kwaJehova gokutundilira komutjima, kumuhafesa. (Hetakanesa 2 Vakolinte 9:7.) Ose kurugana yirugana oyo morwa ayo kutuhafesa apa atu ruganene Jehova paapa twa hulira.

17-18. Sikara musinke somulyo nasi kuvatera o ture po ezokomeho yipo o gwane ekuho ntani ngapi omu nasi kuvatera? (Yisewe 3:3-6)

¹⁷ Ngomu ono kutwikira kutura po ezokomeho o gwane ekuho, ove ngo ligwanekera nomaudigu. Vantu vamwe kuvhura ngava kuswaure morwa epuro lyoge ntani kuvhura hena ngava kuhepeke. (2 Tim. 3:12) Nampo ove kuna kurugana unene yipo o hageke kurugana yininke eyi wa diva asi ayo epuko, nye poyiruwo yimwe ove simpe kurugana yoyidona. Ndi kuvhura o dire kukara nelididimiko ntani kuvhura o handuke morwa sitambo soge kapi sina kusika mo. Yisinke nayi kuvatera yipo o lididimikire? Sikara somulyo kuna kara kuhara Jehova.

¹⁸ Eharo lyoge lyokuhara Jehova, kuna kara sikara sosiwa esi wa kara naso. (Resa Yisewe 3:3-6.). Kuhara unene Jehova kuvhura kukuvatera yipo yi ku tompoke kulididimikira maudigu gemeparu. Rorunzi Bibeli kufaturura eharo lyanarunye eli ga kara nalyo Jehova kovakareli vendi. Eharo lyanarunye kutanta asi age kapi nga sigilira vakareli vendi ndi a hageke kuvahara. (Epis. 100:5 ) Ove kwa ku sita yipo o fane Karunga. (Gen. 1:26) Ngapi omu no likida eharo lyangoso?

19. Ngapi omu no likida rupandu rorunene koyininke nayinye eyi ga ku ruganena Jehova? (Vagarata 2:20)

¹⁹ Tameka kukara norupandu. (1 Tes. 5:18) Lipura nyamoge nkenye ezuva asi: ‘Ngapi omu Jehova ana likida nge eharo?’ Makura divilisa mokupandura Jehova momakanderero goge, pokuyukilira kutumbura yininke eyi ga ku ruganena. Koneka asi Jehova kukuruganena yininke yoyiwa morwa ga ku hara ngwendi moomu tupu mupositoli Paurusa ga yi dimbwilire eyi kuhamena Jehova. (Resa Vagarata 2:20.) Lipura nyamoge asi: ‘Name ni na hara kuhara Jehova ngwendi moomu tupu ga hara nge age ndi? Kuhara Jehova ngayikuvatera yi ku tompoke o nyokere po maheteko ntani nokulididimikira  maudigu. Ayo ngayi kutumangeda o twikire kukarera Jehova nkenye apa nokuyilikida nkenye ezuva asi wa mu hara.

20. Yisinke wa hepa kurugana yipo o ligave kwaJehova ntani ngapi omu etokoro eli lya kara nomulyo?

²⁰ Mwaza siruwo, eharo lyoge lyokuhara Jehova ngali kutumangeda o ligave kwaKarunga kupitira mekanderero. Diworoka asi nsene o ligava kwaJehova, ove ngo kara nehuguvaro eli asi: Ove ngo hama kwendi narunye. Apa o ligava kwaJehova, ove kumutumbwidira asi ngo mu karera yikare asi moyiruwo yoyiwa neyi yoyidona. Ove kapi hena ngo hepa kutura po etumbwidiro lyokuligava kwaJehova. Apa atu ligava kwaJehova, ose kutura po etokoro lyomulyo unene. Nye gazadara ko kositwa esi: Ove ngo tura po matokoro gomanzi meparu lyoge, gamwe gomawa, nye ove kapi ngo tura po etokoro lyewa unene kupitakana etokoro lyokuligava nyamoge kwaJehova. (Epis. 50:14) Satana nga hetekera ko kukuninkisa o dire kuhara unene Jehova nokukara nehuguvaro asi kapi ngo twikira kulimburukwa Jehova. Wa ha pulisira Satana yi mu tompoke. (Joba 27:5) Kuhara unene Jehova ngayi kuvatera o sikise mo etumbwidiro lyoge lyokumukarera narunye ntani nokumuhedera unene pepi.

21. Morwasinke natu uyungira asi ekuho kapisi sininke sokuhulilira, nye asi alyo kuna kara etameko tupu?

²¹ Konyima zokuligava kwaJehova, uyunga novakuronambunga womombungakriste zeni kuhamena ntambo zomulyo zokukwama ko ezi no rugana. Diworoka nkenye apa asi ekuho kapisi sininke sokuhulilira, nye alyo kuna kara etameko tupu. Alyo kuna kara etameko lyokukarera Jehova dogoro narunye. Yipo nye, tunga po eharo lyokuhara Jehova unene ngesi. Litulira po yitambo yipo eharo lyoge li kure nkenye ezuva. Pokuyirugana oyo, ayo ngayi kutumangeda o gwane ekuho. Alyo ngali kara ezuva lyewa sili unene. Nye eli kuna kara tupu etameko. Ngano eharo lyoge lyokuhara Jehova naMunendi li twikire kukura dogoro narunye!