1. Yisinke va hara kurugana vakurona kovana vawo?

 VAKURONA, twa yi diva asi one kuna hara kuvatera vana veni va dive Jehova ntani nokumuhara. Nye ose kapi atu mono Karunga. Ngapi omu no vatera vana woge yipo va tare Karunga asi age muntu ntani nokumuhedera pepi?—Jak. 4:8.

2. Ngapi omu vakurona nava ronga vana vawo kuhamena yikara yaJehova?

² Nkedi zomulyo po mokuvatera vanona va hedere Jehova pepi kuna kara pokulironga nawo Bibeli. (2 Tim. 3:14-17) Nye Bibeli kulikida nkedi zimwe hena omu vanona nava lironga kuhamena Jehova. Mobuke zoYisewe, guhya kudiworokesa munendi gomumati a dire kudivara yikara yaJehova, eyi ayi lilikida mounsitwe. (Yis. 3:19-21) Natu ka zogera ko nonkedi dimwe omu vakurona na va ruganesa yininke eyi ga sita Jehova yipo va vatere vana vawo va lironge kuhamena yikara yendi.

3. Ngapi omu vakurona nava vatera vana vawo?

³ Bibeli kuuyunga kuhamena Karunga asi “yikara yendi . . . kuyimonenena moyininke eyi ga sita kutunda ketameko lyouzuni.” (Rom. 1:20) Vakurona, one nampo kwa hara kukahafera po no vana veni komavango gokulisiga siga. Ruganeseni siruwo oso mokuvatera vana veni va dimburure yikara yaJehova yoyiwa “moyininke eyi ga sita.” Tu zeni tu ka tare eyi vakurona nava lirongera ko monkedi omu nga rongo Jesus.

4. Ngapi omu Jesus ga rongere varongwa vendi pokuruganesa unsitwe? (Rukasa 12:24, 27-30)

⁴ Konekeni omu Jesus ga ruganesere unsitwe yipo a ronge vantu. Sikando simwe, age kwa pulire varongwa vendi yipo va tare  komakorova ntani nokonombya. (Resa Rukasa 12:24, 27-30.) Jesus ngano ga ruganesere nkenye sikorama ndi simeno, nye age kwa tokwere kuruganesa sidira ntani mbya, yininke eyi va divire nawa varongwa vendi. Varongwa vendi nampo va mwene omu makorova gana kutuka keguru ntani nomu dina kutemuna nombya mezana. Gazara tupu omu Jesus nampo ga likire koyininke oyo ngomu ga uyungire. Ntani yisinke ga rugene konyima zapa ga tumbwire yihonena oyo? Age kwa rongere varongwa vendi sirongwa somulyo kuhamena ugavi ou ga kara nawo Guhyetu gemeguru ntani nonkenda ezi ga kara nazo. Sirongwa oso kuna kara asi: Jehova nga rera nokudwareka vakareli vendi wovalimburukwi ngwendi moomu tupu ayi rugana komakorova ntani nonombya edi da kara mezana.

5. Yininke musinke eyi ga sita Jehova eyi nava ruganesa vakurona yipo va ronge munawo kuhamena Jehova?

⁵ Vakurona, ngapi omu no mu honena Jesus ngomu muna kuronga vana veni? Kuvhura mu tantere vana veni kuhamena yininke eyi ga sita Jehova eyi mwa hara, pasihonena sikorama ndi simeno. Ngomu muna ku va tantera kuhamena yininke oyo, va tantereni eyi ayi tu rongo yininke oyo kuhamena Jehova. Kuvhura o pure munoge kuhamena sikorama ndi simeno esi ga hara. Nsene kuna kuruganesa simwe soyininke eyi ga sita Jehova esi ga hara munoge , age nga purakena nelituromo apa ngo mu ronga kuhamena Jehova.

6. Yisinke natu lirongera ko kosihonena sozina vaChristopher?

⁶ Ngoso ayo ya kara hepero mokuruganesa siruwo sosinzi pokurugana epaparo kosikorama songandi ndi kosimeno, komeho va ya zogere eyi asi likida kuhamena Jehova ndi? Kapisi hepero. Jesus kapi ga geve efatururo lyere kuhamena omu makorova aga li ndi omu a di kuru nombya. Nampili yi kare asi munoge nampo kwa hara kudiva yininke yoyinzi kuhamena yininke eyi ga sita Jehova, nye poyiruwo yimwe efatururo lyesupi ndi epuro kuvhura kuvatera munoge a kwate egano sitwa songandi. Koneka eyi a diworoka munazinyetu gomugara Christopher apa ga kere munona. Age kwa tanta asi: “Oyina ngava ruganesa yitwa yoyisupi yipo va tu vatere tu kare norupandu koyininke eyi ga sita Jehova eyi ya tu kundurukida po pepi. Pasihonena, apa ngatu kara pepi nonondundu, awo pamwe ngava uyunga asi: ‘Tareni omu nondundu dina da nenepa ntani nomu da wapa! Eyi kulikida asi Jehova Karunga gomuwa.’ Ndi apa ngatu kara pepi nefuta, awo pamwe ngava uyunga asi: ‘Tareni omu mankupi ogo ga kara nononkondo! Eyi kulikida asi Karunga ga kara nononkondo.’” Christopher kwa tanta asi: “Nonkango odo dononsupi kwa tu ninkisire tu gazadare ko unene.”

7. Ngapi omu no deura vana woge yipo va gazadare ko kounsitwe?

⁷ Ngomu vana woge vana ku kura, kuvhura o va deure va tameke kugazadara ko koyininke eyi ga sita Jehova ntani nokulirongera ko koyikara yendi. Kuvhura mu zogere kuhamena sininke simwe esi ga sita Jehova ntani nokupura vana woge asi: “Yisinke sina kumuronga kuhamena Jehova?” Ayo kuvhura ngayi kutetukise ntani nokukuhafesa apa ngo zuvha eyi ava gazara vana woge kuhamena sininke oso.—Mat. 21:16.

8. Mpito musinke va kere nazo vakurona woVaisraeli apa ngava gendi moyitaura?

⁸ Vakurona woVaisraeli kwa va korangedere va ronge vana vawo kuhamena nompango daJehova apa ngava gendi “morugendo” ndi moyitaura. (Deut. 11:19) Yitaura kwa kere monomukunda daIsraeli. Vantu va vhulire kumona yikorama yoyinzi noyidira ntani nonombya. Apa mapata goVaisraeli ngaga gendi moyitaura oyo, vakurona va kere nompito zokuzogera novana vawo kuhamena yininke eyi ga sita  Jehova. Vakurona, none nampo mwa kara nonompito dokulifana yipo mu ronge vana veni kuhamena yininke eyi ga sita Jehova. Tu tareni omu vakurona vamwe va yi rugana oyo.

9. Yisinke no lirongera ko kwaPunitha ntani kwaKatya?

⁹ Zinya gedina Punitha ogu ga tunga mositata sosinene saIndia, kwa tanta asi: “Apa atu zi nepata lyetu konomukunda tu ka dingure ekoro lyetu, ose kuruganesa nawa mpito ezi mokuvatera vana vetu va lironge yininke yoyiwa eyi ga sita Jehova. Ame kulizuvha asi vana vange kukwata nawa egano yininke eyi ga sita Jehova apa ava likara ure nositata.” Vakurona, vana veni nampo kapi ngava divara siruwo esi omu kara nawo mevango lyoufuuli. Katya, munazinyetu gomukadi gokoMoldova, kwa tanta asi: “Yiruwo yoyiwa eyi na ku diworoka eyi na hafera po unene kuna kara, yiruwo eyi ngani kara novakondi vange konomukunda. Amena hafa sili kweyi va ronga nge kutunda unona wange yipo ni tede ko koyininke eyi ga sita Jehova ntani nokudimburura yikara yendi moyininke eyi ga sita.”

10. Yisinke nava rugana vakurona nsene kuvakarera udigu kuza ponze zositata? (Tara kakende “ Evatero kovakurona.”)

¹⁰ Ngapi nsene kapi yina kukutompoka kuza konomukunda? Amol ogu ga tunga moIndia kwa tanta asi: “Oku na tunga, vakurona kurugana novili dononzi ntani rugendo ro kuza konomukunda kuvhura kukosa yimaliwa yoyinzi. Nye kuvhura o mone yininke eyi ga sita Jehova nokuzogera kumwe yikara yaJehova nsene kuna kara mevango lyokupwizumukira lyenunu ndi kuna kara keguru lyetungo.” Nsene o tara nawa, ove kuvhura ngo dimburure yininke yimwe eyi ga sita Jehova pepi nembo lyoge, eyi no vhura kulikida vana woge. (Epis. 104:24) Ove nampo kuvhura o mone yidira, yimbumburu, yimeno ntani nayimwe hena yoyinzi. Karina ogu ga tunga moGermany kwa tanta asi: “Oyina kwa hara nombya. Yipo nye, apa na kere ni mukadonagona,  awo ngava likida nge nombya donongwa nkenye apa ngatu gendi kumwe.” Vakurona, one hena kuvhura mu ruganese novidiyo dononzi ntani noyimbapiratjangwa eyi ya zogera kuhamena unsitwe, eyi za pwagesa mbunga zetu yipo mu ronge vana veni. Yi kare asi kupi mwa tunga, one kuvhura kuvatera vana veni yipo va tare koyininke eyi ga sita Karunga. Ngesi tu zeni tu ka zogere ko yikara yimwe yaJehova eyi no vhura kuronga vana woge.

11. Ngapi omu vakurona nava vatera vana vawo va dimburure omu Jehova ga kara neharo?

¹¹ Mokuvatera vana veni va dimburure omu Jehova ga kara neharo, kuvhura mu va likide omu yikorama yoyinzi ayi pakere mbili vana vayo. (Mat. 23:37) Kuvhura hena mu va likide yininke yokulisiga-siga atu hafere eyi ga sita Jehova. Karina, ogu ka tu tumbura kwa tanta asi: “Apa ngatu zi tu ka gende po, oyina ngava korangeda nge ni sikame nokutara omu nkenye mbya za wapa ntani nomu a zi likida asi Jehova kwa kara neharo. Konyima zonomvhura, ame simpe kutarurura konombya nokudimburura omu dafuura ntani nomu da lisiga nononkwawo. Ado simpe kudiworokesa nge asi Jehova kwa tu hara unene.”

12. Ngapi omu vakurona nava vatera vana vawo va dimburure unongo ou ga kara nawo Karunga? (Episarome 139:14) (Tara hena efano.)

¹² Vatera vana woge va dimburure unongo ou ga kara nawo Karunga. Jehova yige ga kara nounongo wounzi kutupitakana. (Rom. 11:33) Pasihonena, kuvhura o tantere munoge omu mema aga zi meguru yipo ga ka liforome maremo ntani nomu maremo aga gava mema komavango gokulisiga-siga. (Joba 38:36, 37) Kuvhura hena o uyunge kuhamena omu rutu rwetu va ru sita monkedi zokutetukisa. (Resa Episarome 139:14.) Koneka omu guhya gumwe gedina Vladimir ga yi rugene oyo. Age kwa tanta asi: “Ezuva limwe, munetu gomumati kwa gwire pombasikora nokuremana. Ano konyima zomazuva gongandi, sironda sendi ta si poro. Name namukadange yipo twa mu fatwilire asi Jehova kwa sita marutu getu monkedi omu naga liverura gene. Yipo twa mu tanterere asi ose kapi atu mono yininke eyi moyininke eyi ava rugana vantu. Pasihonena, etuwa kapi ali lipangerere lyene konyima zosiponga. Sihorokwa esi kwa vaterere munetu gomumati a kwate egano unongo ou ga kara nawo Jehova.”

13. Ngapi omu vakurona nava vatera vana vawo va dimburure nonkondo daJehova? (Jesaya 40:26)

 ¹³ Jehova kuna kutuzigida tu tare eguru nokugazadara ko omu nonkondo dendi dokutetukisa adi ninkisa nombungururu nadinye di kare pomavega gado. (Resa Jesaya 40:26.) Kuvhura o korangede vana woge va tare keguru ntani nokugazadara ko kweyi vana kumona. Koneka eyi a diworoka munazinyetu gomukadi Tingting, gomoTaiwan apa ga kere munona. Age kwa tanta asi: “Sikando simwe, oyina kwa simbire nge tu tunde mositata, makura apa twa tere keguru, ose kwa mwene nombungururu dononzi meguru morwa kapi twa kere mositata omu mwa kara noramba dononzi. Posiruwo oso ame kwa kere nosinka asi kapi ngani twikira kulimburukwa Jehova morwa vanasure vakwetu ngava hetekere ko kuninkisa nge yi digopere nge kulimburukwa Jehova. Oyina kwa korangedere nge ni gazadare ko kononkondo daJehova edi ga ruganesere mokusita nombungururu nadinye ntani nokudiworokesa nge asi age nga ruganesa nawa-nawa nonkondo dendi dokulifana mokuvatera nge ni pite mwa nkenye eheteko. Konyima zokutara koyininke eyi ga sita Jehova apa twa kere morugendo oro, ayo kwa tumangedere nge ni dive nawa Jehova momunene ntani ame kwa tokomenene kumukarera.”

14. Ngapi omu vakurona nava ruganesa yininke eyi ga sita Jehova mokuvatera vana vawo va mone asi Jehova Karunga goruhafo?

¹⁴ Yininke eyi ga sita Jehova kulikida asi age kwa kara noruhafo ntani ana hara nose tu hafe. Vadivi unsitwe kwa dimburura asi sinzi soyikorama kudanauka, kukwatera mo yidira nonomfi. (Joba 40:20) Wa mona rumwe vana woge kuna kuzoragana ngomu va tarerere sikorama esi sa danaukire ndi? Awo nampo va mona yimbwagona yina kudigana. Sikando sokukwama ko apa ngo mona vana woge kuna kuzora ngomu ngava tarera sikorama esi sina kudigana, ngova diworokese asi ose kukarera Karunga goruhafo.—1 Tim. 1:11.

15. Yisinke nayi vatera vakurona va dive eyi vana kugazara vana vawo? (Yisewe 20:5) (Tara hena efano.)

¹⁵ Poyiruwo yimwe, vakurona kuvhura yi va digopere kuvatera vana vawo va uyunge maudigu aga vana kuligwanekera nago. Nsene asi owo  yiwo ukaro woge, wa hepa kuruganesa nondunge yipo o dive eyi ava gazara vana woge. (Resa Yisewe 20:5.) Vakurona vamwe kuvarerupira kuyirugana oyo apa ava hafere kutara novana vawo yininke eyi ga sita Jehova. Morwasinke? Konda zimwe kuna kara asi morwa kapi apa kara madonganeso gomanzi kovanona ntani kovakurona. Guhya gomoTaiwan gedina Masahiko kwa uyunga ko konda zimwe asi: “Apa atu li tulire po siruwo sokupwaga tu ka hafere po novana vetu konondundu ndi pokugenda komazenga gekefuta, rorunzi awo kulizuvha epwizumuko. Eyi ku tu karera ureru mokudiva eyi vana kugazara. Katya ogu tuna tumbura kwa tanta asi: “Konyima zokupwaga kosure, oyina ngava twara nge kevango lyewa lyokupwizumukira. Apa ngatu kara kevango olyo, ayo ngayi rerupire nge kuvatantera eyi yina ka horoka kosure ndi eyi yina kuretera nge sinka.

16. Yisinke naga rugana mapata ga li zuvhe epwizumuko nokuhafera yininke eyi ga sita Jehova?

¹⁶ Ngomu mapata gana kuhafera kumwe yininke eyi ga sita Jehova, awo kuvhura kupwizumuka nokuhafera kumwe yininke oyo, ano eyi ngayi va vatera va lihare unene. Bibeli kuuyunga asi pwa kara ‘siruwo soruhafo’ ntani “nosiruwo sokudana.” (Muud. 3:1, 4) Jehova kwa sita mavango gokulisiga-siga gomawa apa pevhu, yipo tu ruganene po yininke eyi twa hara. Mapata gomanzi kwa hara kuza konomukunda, konondundu ntani komukuro. Vanona vamwe kwa hara kudukagana nokudanena momavango goufuuli nokutara yikorama ndi va zogane momukuro ndi mosidiva ndi mefuta. Odo kuna kara nompito dimwe donongwa edi twa kara nado yipo tu hafere yininke eyi ga sita Jehova.

17. Morwasinke vakurona nava vaterera vana vawo va hafere yininke eyi ga sita Karunga?

¹⁷ Vakurona novana vawo ngava ka hafera unene mouzuni woupe pokukatara yininke eyi ga sita Jehova, kupitakana ngesi. Mokulisiga naneina, kapi ngatu ka kara noutjirwe wokutjira yikorama ndi asi yikorama yi tu tjire. (Jes. 11:6-9) Ngatu ka kara nosiruwo sosinzi mokukahafera yininke eyi ga sita Jehova. (Epis. 22:26) Nye vakurona, mwa ha ndindira dogoro posiruwo oso asi ntani nye ngomu ka vatera vana veni va tameke kuhafera yininke eyi ga sita Jehova. Ngomu muna kuronga vana veni kuhamena Jehova pokuruganesa yininke eyi ga sita, awo nampo kuvhura ngava kwatese ko nonkango edi ga uyungire hompa Ndafita asi: “Kutupu karunga ogu ga ku fana, HOMPA, kutupu gokuvhura kurugana eyi o rugana.”—Epis. 86:8.