1. Matungiko musinke gamwe atu hafere morwa kuhama kombunga zaJehova?

 ALYO kuna kara etungiko mokuhama kombunga zaJehova, posiruwo esi sosidigu somazuva gopouhura. Jehova ga tu pa vanavazinyetu va tu vatere nampili ngomu gana kutwikira kudonapa maukaro gomouzuni. (Epis. 133:1) Age kutuvatera tu kare noruhafo mepata. (Efe. 5:33–6:1) Age hena kutupa unongo nonondunge edi twa hepa yipo tu kare nombili.

2. Yisinke twa hepa kurugana ntani morwasinke?

² Nampili ngoso, twa hepa kurugana unene yipo tu twikire kukarera Jehova noulimburukwi. Morwasinke? Morwa poyiruwo yimwe, eyi ava uyunga neyi ava rugana wopeke kuvhura kutukoresa. Ano pamwe kuvhura tu dompe mutjima apa atu rugana epuko, unene po nsene ose kuna kurugana epuko lyokulifana yikando yoyinzi. Twa hepa kutwikira kukarera Jehova (1) apa vanavazinyetu ava tu handukisa, (2) apa mulikwali gwetu a tu handukisa ntani (3) apa atu dompo mutjima morwa mapuko ganyamwetu. Mosirongwa esi, tatu ka zogera maukaro nagenye ogo. Tatu ka zogera hena eyi natu lirongera ko koyihonena yomoBibeli yovantu wovalimburukwi.

TWIKIRA KUKARERA JEHOVA NAMPILI MUPULI MUKWENI ANA KUHANDUKISA

3. Udigu musinke ava ligwanekere nawo vantu vaJehova?

³ Udigu. Vanavazinyetu vamwe va kara noyikara eyi ayi vhuru kutuhandukisa. Vamwe kuvhura va rugane yininke eyi nayi tu guvisa ndi va tu tekure monkedi zokudira kuwapera. Vakuronambunga kuvhura va ture mapuko. Maukaro ogo kuvhura kuninkisa vamwe va singanyeke nsene asi ezi mbunga zaJehova. Mevango lyokutwikira kukarera Jehova kumwe novanavazinyetu,  vamwe kuvhura va hageke kuuyunga nava va va koresa ndi kuvhura va hageke kuza komapongo. (Sef. 3:9) Yimo ya wapera ngoso ndi? Tu tareni eyi natu ka lirongera ko kosihonena sagumwe gomoBibeli ogu ga ligwanekerere nomaudigu gokulifana.

4. Maudigu musinke ga ligwanekerere nago mupositoli Paurusa?

⁴ Sihonena somoBibeli. Mupositoli Paurusa gayi divire asi Vakriste vakwawo kapi va sikilira mo. Pasihonena, vamwe womombungakriste zaJerusarema, kapi va yi pulire asi ana kara murongwa gwaJesus. (Yirug. 9:26) Ano konyima, vantu vamwe kwa uyungire yoyidona kumuhamena yipo va ninkise wopeke va dire kumuhuguvara. (2 Kol. 10:10) Paurusa ga mwene mukuronambunga ogu ga tulire po etokoro lyepuko, eli nampo lya pundukisire wopeke. (Gar. 2:​11, 12) Ntani kaume gumwe gwaPaurusa gomunene gedina Marukusa, kwa mu guvisire unene. (Yirug. 15:​37, 38) Paurusa ngano ga pulisilire maukaro aga ga mu ninkise a dire kukara kumwe nava va mu guvisire. Nye age ga twikilire kuhara vapuli vakwawo ntani nokutwikira kukarera Jehova noulimburukwi. Yisinke ya vaterere Paurusa a twikire kukarera Jehova?

5. Yisinke ya vaterere Paurusa a twikire kukara novakwawo? (Vakorosi 3:​13, 14) (Tara hena efano.)

⁵ Paurusa kwa here vapuli vakwawo. Eharo lyokuhara vakwawo kwa mu ninkisire a dire kudemenena kediro kusikilira mo lyawo, nye age kwa demenene koyikara yawo yoyiwa. Eharo kwa mu ninkisire hena a rugane eyi ga tjenge moVakorosi 3:​13, 14. (Resa.) Tu tareni omu Paurusa ga tekwire Marukusa. Nampili ngomu Marukusa ga sigire Paurusa morugendo rwendi rokuhova routumwa, Paurusa kapi ga twikilire kuhanduka. Konyima apa Paurusa ga tjenge mbilive kombungakriste zoVakorosi, age kwa pandadekere Marukusa ngomurugani mukwawo ogu nga mu ‘hengagwida unene.’ (Koros. 4:​10, 11) Apa ga kere modorongo moRoma, Paurusa kwa zigidire Marukusa a ya mu vatere. (2 Tim. 4:11) Kuyimonenena asi Paurusa ga gusilire po vakwawo ntani ga twikilire kukara kumwe nawo. Yisinke natu lirongera ko kwaPaurusa?

6-7. Ngapi natu twikira kulikida eharo kovanavazinyetu nampili ngomu va dira kusikilira mo? (1 Johanesa 4:7)

⁶ Eyi natu lirongera ko. Jehova ana hara tu twikire kulikida eharo kovanavazinyetu. (Resa 1 Johanesa 4:7.) Nsene vanavazinyetu kapi vana kututekura monkedi ezi ga wapera kututekura Mukriste, kuvhura tu kare nehuguvaro asi awo kapi vana yi harere asi va tu korese. Ntani awo kuna kuhetekera ko kurugana eyi a tara Jehova asi uhunga. (Yis. 12:18) Jehova kwa hara vakareli vendi wovalimburukwi  nampili ngomu va dira kusikilira mo. Nampili ngomu atu tura mapuko, age kutwikira kukara kaume ketu ntani kapi a tu handukire. (Epis. 103:9) Ayo ya kara nomulyo tu honene Guhyetu ogu a tu gusire po.—Efe. 4:32–5:1.

⁷ Diworoka hena asi ngomu uhura una kuhedera pepi, twa hepa kukara pepi novanavazinyetu. Ose kuvhura tu ndindire mahepeko ngaga ligwederere unene. Kuvhura hena ngava tu ture modorongo morwa epuro lyetu. Nsene ngayi horoka oyo, ose ngatu hepa unene vanavazinyetu. (Yis. 17:17) Konekeni eyi ya horokerere Josep, a mukuronambunga gomoSpain. Nage novakwawo wovagara kwa va tulire modorongo morwa yeeyi va nyokere kuza koyita. Age kwa tanta asi: “Modorongo ose kwa tungire kumwe, yipo nye ayo ya kere ureru yi ku handukise yikara yagumwe. Ose twa hepere kulididimikira-didimikira nokuligusira-gusira po. Eyi kwa tu vaterere tu kare mouumwe ntani tu lipakere mbili. Ose kwa kere kumwe novanadorongo ava ngava dili kukarera Jehova. Sikando simwe ame kwa remanene kokuwoko, ano ewoko lyange kwa li tulire mosamende. Yipo nye, kapi na vhulire kurugana yirugana pwanyamwa nge. Nye munazinyetu gumwe gomugara kwa kuhwire yidwara yange ntani nokupakera nge mbili mononkedi dokulisiga-siga. Ame kwa limonene eharo lyosili posiruwo esi na hepere evatero lyenene.” Yosili edi kuna kara nokonda donongwa deyi twa hepera kukohonona po ngesi maudigu novakwetetu.

TWIKIRA KUKARERA JEHOVA NAMPILI MULIKWALI GOGE ANA KUGUVISA

8. Maudigu musinke ava ligwanekere nago valikwali?

⁸ Udigu. Nonkwara nadinye kwa kara nomaudigu. Bibeli kutanta asi vantu ava va likwara “ngava ligwanekera nomaudigu gomanzi.” (1 Kol. 7:28) Morwasinke? Morwa nonkwara kureta kumwe vantu wokudira kusikilira mo. Awo kwa kara noyikara yokulisiga ntani eyi va hara neyi va dira kuhara ya lisiga. Valikwali kuvhura va kare wokonontundiliro dokulisiga nonompo dokulisiga. Ngomu sina kuza siruwo, kuvhura va likide yikara eyi va dilire kulikida komeho va ya likware. Yininke oyo kuvhura kureta maudigu. Awo kuvhura va lipe usima kuhamena maudigu gomononkwara nampili ngomu navenye ava tura mapuko. Nye mevango lyoyo, awo va hepa kuruganena kumwe yipo va kohonone po maudigu. Awo kuvhura va tameke kugazara asi kuligaunuka ndi kulizumba kuna kara nkedi zongwa zokukohonona po maudigu. Nye awo kuvhura va gwane ruhafo pokulizumba ndi pokuligaunuka ndi? b Tu zeni tu ka lirongere ko kosihonena sagumwe gomoBibeli ogu ga twikilire kulimburukwa Jehova nampili ngomu nga ligwanekere nomaudigu gomanene monokwara.

9. Maudigu musinke ga ligwanekerere nago Abigayili?

⁹ Sihonena somoBibeli. Abigayili kwa likwere naNabali ogu Bibeli azi uyunga asi kwa kere gonyanya ntani kwa kere nonkareso zondona. (1 Sam. 25:3) Ayo nampo kwa digoperere Abigayili mokuparuka nomugara gwina. Abigayili ga gwene mpito yipo a lizumbe namugara gwendi ndi? Yimo. Age kwa gwene mpito apa Ndafita ga zire a ka dipage mugara gwendi morwa kwa swawire Ndafita kumwe novantu vendi. (1 Sam. 25:​9-13) Abigayili ngano ga dukire nokupulisira Ndafita a sikise mo sitambo sendi. Nye age kapi gayi rugene. Mevango lyoyo, age kwa lihengere Ndafita a dire kudipaga Nabali. (1 Sam. 25:​23-27) Yisinke ya mu tumangedere a yi rugane oyo?

10. Yisinke nampo ya tumangedere Abigayili a twikire kukarera Jehova nampili momaudigu gomononkwara?

 ¹⁰ Abigayili kwa here Jehova ntani kwa fumadekere nompango daJehova dokuhamena kononkwara. Age ga divire eyi Karunga ga tanterere Adamu apa ga mu pere mukadi. (Gen. 2:24) Abigayili ga yi divire asi Jehova kutara nonkwara asi mulyo. Age kwa here kuhafesa Karunga, ano ayo kwa mu tumangedere a rugane paapa ga hulira mokupopera vemembo lyendi kukwateramo mugara gwendi. Age kwa rugene ko yuma usimbu yipo a kondere Ndafita a dire kudipaga Nabali. Abigayili kwa pulire egusiro po nampili ngomu ga dilire kuzona. Ayo kulikida asi Jehova ga here mukadi ogu gouradi nonkenda. Yisinke nava lirongera ko valikwali kosihonena saAbigayili?

11. (a) Yisinke a ndindire ko Jehova kovalikwali? (Vaefeso 5:33) (b) Yisinke ono lirongere ko kwaCarmen monkedi omu ga poperere nonkwara dendi? (Tara hena efano.)

¹¹ Eyi natu lirongera ko. Jehova kuna harere valikwali va twikire kukara kumwe nampili ngomu gumwe gwawo ga kara nonkareso zondona. Jehova kuhafa apa a mono valikwali kuna kurugana paapa va hulira va kohonone po maudigu gawo noku lilikida eharo lyosili nefumadeko. (Resa Vaefeso 5:33.) Tu tareni sihonena saCarmen. Konyima zonomvhura ntazimwe kutunda apa ga kwere, Carmen kwa tamekere kulironga Bibeli noNombangi daJehova. Ano konyima yipo ga ya gwene ekuho. Carmen kwa tente asi: “Mugara gwange kapi ga haferere etokoro lyange. Age kwa zuvhilire Jehova mfudu. Nga swaura nge ntani nokutjilisa nge asi nga zumba nge.” Nampili ngoso, Carmen ga lididimikire mononkwara dendi. Age kwa rugene unene monomvhura 50, a likide mugara gwendi eharo nefumadeko. “Ngomu da pitire nomvhura, ame na ya lirongere kukwata egano omu nga lizuvhu mugara gwange ntani nokuuyunga nage monkedi zombili. Mokumona asi Jehova kutara nonkwara asi mulyo, ame kwa rugene paapa na hulira yipo ni di popere. Ame kapi na hetekerere ko kusiga mugara gwange morwa na here Jehova.” c Nsene ngo ligwanekera nomaudigu mononkwara doge, kuvhura ngo huguvare asi Jehova nga ku vatera o lididimikire.

TWIKIRA KUKARERA JEHOVA NSENE O DOMPO MORWA MAPUKO GANYAMOGE

12. Maudigu musinke natu ligwanekera nago nsene tu tura nzo zonene?

¹² Udigu. Ayo kuvhura yi tu dompese unene nsene tuna tura nzo zonene. Bibeli kuuyunga asi nonzo detu kutuninkisa tu guve unene. (Epis. 51:17. NW) Munazinyetu gumwe gomugara gedina Robert kwa rugene unene  nomvhura dononzi yipo a wapere kukara mukwafimbunga. Nye nampili ngoso, age kwa ya tulire nzo zonene ezi za mu nunkisire a dimburure asi ana guvisa Jehova. Age kwa tanta asi: “Apa na dimbwilire eyi na rugene, ezwi lyange lyokomutjima kwa pangwire nge unene. Konyima naya lizuvhire udona unene. Ame kwa lilire nokukanderera kwaJehova. Ame kudiworoka apa na gazarere asi Karunga kapi nga purakena nge hena morwa na mu guvisa.” Nsene tu tura nzo zonene, kuvhura tu guve unene nokulizuvha asi Jehova ga tu zumba ntani kapisi hepero tu mu karere. (Epis. 38:4) Nsene nove wa lizuvha rumwe ngoso, gazadara ko sihonena sagumwe gomoBibeli ogu ga twikilire kukarera Jehova nampili ngomu ga tulire nzo zonene.

13. Nzo musinke ga tulire mupositoli Peturusa ntani yisinke ya twaredesere konzo ozo?

¹³ Sihonena somoBibeli. Masiku gokuhulilira komeho Jesus va ka mu dipage, mupositoli Peturusa kwa tulire mapuko gomanzi, aga ga mu ninkisire aya ture nzo zonene. Pomuhowo, Peturusa kwa likidire elinenepeko nokulikanganga asi age nga twikira kulimburukwa nampili vapositoli vakwawo ngava zumbe Jesus. (Mar. 14:​27-29) Ano sauvali, ngomu va kere mosikunino saGesemani, Peturusa kapi ga twikilire kuvangarara. (Mar. 14:​32, 37-41) Ano apa mbunga za wizire nomarufuro zi ya kwate Jesus, Peturusa kwa mu zumbire. (Mar. 14:50) Ano moruhura, Peturusa kwa ya patanene Jesus yikando yitatu nokuligana asi kapi ga mu diva. (Mar. 14:​66-71) Ngapi omu Peturusa ga lizuvhire apa ga dimbwilire asi ana tura nzo zonene? Age kwa guvire unene nokutameka kulira unene. Morwa nampo kwa lizuvhire unzoni wounene. (Mar. 14:72) Gazadara ko kukora oku ga lizuvhire Peturusa apa kaume kendi Jesus va mu dipagere. Peturusa nampo kwa lizuvhire asi age kwato mulyo.

14. Yisinke ya vaterere Peturusa a twikira kukarera Jehova? (Tara efano .)

¹⁴ Peturusa ya mu tompokere kutwikira kukarera Jehova morwa nokonda dongandi. Age kapi ga likarerere gelike, nye kwa kere novakwawo ava va mu hengagwidire. (Ruk. 24:33) Ntani hena, apa Jesus va mu vhumbwire, age kwa monekerere Peturusa, nampo morwa kwa here kumukorangeda. (Ruk. 24:34; 1 Kol. 15:5) Ano konyima, mevango lyokuhandukira Peturusa, Jesus kwa tanterere kaume kendi asi nga gwana yitumbukira yoyinene. (Joh. 21:​15-17) Peturusa ga yi divire asi age kwa tulire nzo zonene, nye ga twikilire kuhetekera ko kurugana youhunga. Morwasinke? Morwa ga yi pulire asi Jesus simpe ga mu here. Ntani Vakriste vakwawo kwa twikilire kumuvatera. Yisinke natu lirongera ko kosihonena saPeturusa?

15. Yisinke ana hara Jehova tu pure nawa-nawa? (Episarome 86:5; Varoma 8:​38, 39) (Tara hena efano.)

 ¹⁵ Eyi natu lirongera ko. Jehova kuna tu harere tu yi pure asi ga tu hara ntani ga liwapaikira kutugusira po. (Resa Episarome 86:5; Varoma 8:​38, 39.) Apa atu zono, ose kulizuvha unzoni. Ayo kapisi epuko kulizuvha ngoso. Nye kapisi tu lizuvhe asi Jehova kapi ana tu hara hena ndi kapi nga tu gusira po. Mevango lyoyo, twa hepa kugwana evatero usimbu-simbu. Robert ogu tuna tumbura kwa tanta asi: “Ame kwa zonene morwa kwa huguvarere mononkondo danyamwa nge asi nani nyokera po eheteko.” Age gayi dimbwilire asi ga hepere kuzogera novakuronambunga. Age kwa tanta asi: “Apa na uyungire novakuronambunga, awo kwa vaterere nge ni lizuvhe asi Jehova ga hara nge. Vakuronambunga kwa twikilire kulikida nge eharo. Awo kwa vaterere nge ni yi pure asi Jehova kapi ga zumba nge.” Nose kuvhura tu yi pure nawa-nawa asi Jehova ga tu hara unene ntani kutugusira po, nsene tu li tezurura kononzo detu noku papara evatero ntani nokuhetekera ko paapa twa hulira tu dire kutura nonzo dokulifana. (1 Joh. 1:​8, 9) Nsene tu yi pura asi Jehova ga tu hara ntani kutugusira po, kapi nga tu hageka kumukarera nampili apa nga tu zona.

16. Morwasinke ono tokomenene kutwikira kukarera Jehova?

¹⁶ Jehova kupandura unene elituromo lyetu lyokumukarera, pomazuva aga gopouhura gomadigu. Nevatero lyaJehova, ose kuvhura kutwikira kumukarera nampili apa atu guwu morwa mapuko getu naga gava wopeke. Kuvhura tu tunge po eharo lyokuhara vanavazinyetu ntani tu va gusire po nsene vana tu koresa. Kuvhura tu likide eharo lyenene kwaKarunga ntani noku likida efumadeko komawapaiko gononkwara, pokurugana paapa twa hulira tu kohonone po maudigu mononkwara detu. Ntani nsene tuna tura nzo zonene, kuvhura tu papare evatero kwaJehova ntani nokutambura eharo lyendi negusiro po ntani noku twikira kumukarera. Kuvhura tu kare nehuguvaro asi Jehova nga tu tungika “nsene tu dira kuroroka” kurugana uwa.—Gar. 6:9.