Nonzo detu kuvhura ku di tu dongwenena po kupitira tupu mohonde zaJesus. (Efe. 1:7) Nye, Bibeli kutanta asi: “Nare age [Karunga] kwa gusilire po vantu nonzo dawo medidimiko lyendi,” kutanta asi, komeho Jesus a gave sizoweseso. (Rom. 3:25) Ngapi omu Jehova na dongonona po nonzo komeho sizoweseso va si fute nye simpe a kare Karunga gokuhungama?

Jehova kwa tumbwidilire kuhamena “ruvharo” oru nga ru ya zowora ava ngava kara nepuro mwendi ntani nomomatumbwidiro gendi. Apa ga geve etumbwidiro olyo, ayo kwa fene ngwendi sizoweseso va na si futu nare. (Gen. 3:15; 22:18) Karunga ga divire nawa-nawa asi Munendi nga ligava mwene ngosizoweseso posiruwo esi ga here Karunga a yi rugane. (Gar. 4:4; Heb. 10:​7-10) Apa ga kere Jesus pevhu, Jehova kwa mu pere nonkondo doku dongonona po nonzo komeho a gave sizoweseso. Jesus ga vhulire ku dongonona po nonzo da va va kere nepuro morwa ga divire asi nzambo ezi nga gava ngazi gusa po nonzo dawo.—Mat. 9: 2-6.