1-2. Mauwa musinke a gwana muntu konyima zokugwana ekuho?

 OSE kuhafa apa atu gwana ekuho noku ya hama kepata lyaJehova. Ava va kara nelikwatakano lyewa kumwe naJehova kukwatesa ko nonkango domuepisarome Ndafita ogu ga uyungire asi: “Va kara nerago vantu ava wa horowora, ava o twara va ka kare moupongoki woge.”—Epis. 65:4.

² Jehova kapi a pulisire nkenye ogu a wize mepata lyendi. Ngwendi moomu tupu katu yi zogerere mosirongwa sina ka pita, age kuhedera pepi ava ava yi likida asi vana hara kutulisa po elikwatakano kumwe nendi. (Jak. 4:8) Apa o ligava nyamoge kwaJehova nokugwana ekuho, ove kumuhedera pepi monkedi zokulikarera. Kara nehuguvaro asi konyima zapa ngo gwana ekuho, Jehova nga ku “tjukumwina yoyinzi yoyiwa yomarudi nagenye.”—Mara. 3:10; Jer. 17:​7, 8.

3. Situmbukira musinke sosinene va kara naso Vakriste navenye ava va ligava nokugwana ekuho? (Muudisi 5:​4, 5)

³ Ekuho kuna kara tupu etameko lyokukarera Jehova. Konyima zokugwana ekuho, ove ngo hara kurugana paapa wa hulira, yipo o sikise mo mugano goge nampili kuna kuligwanekera nomaheteko ndi maudigu. (Resa Muudisi 5:​4, 5.) Mokumona asi ove murongwa gwaJesus, ove ngo kwama sihonena sendi ntani nonompango dendi. (Mat. 28:​19, 20; 1 Pet. 2:21) Sirongwa esi tasi ka kuvatera o yi rugane oyo.

‘TWIKIRA KUKWAMA’ JESUS NAMPILI KUNA KULIGWANEKERA NOMAUDIGU NTANI NOMAHETEKO

4. Monkedi musinke varongwa vaJesus ava ‘likambeke sitji’? (Rukasa 9:23)

⁴ Konyima zapa ngo gwana ekuho, ove ngo ligwanekera nomaudigu. Jesus kwa tente asi varongwa vendi ngava ‘likambeka  sitji.’ Awo ngava yi rugana “nkenye ezuva.” (Resa Rukasa 9:23.) Ngoso Jesus kwa tembe asi varongwa vendi ngava hepa nkenye apa ndi? Hawe. Age kwa nkondopekere sitwa esi asi kugusa ko mauwa aga ngava gwana, awo ngava ligwanekera nomaudigu. Gamwe gomaudigu ogo ngaga kara gomanene.—2 Tim. 3:12.

5. Mauwa musinke ga tumbwidilire Jesus aga ngava gwana ava ava tura po malizambero?

⁵ Nampo ove wa ligwanekera nare nomarwaneso gokutunda kovanekoro, ndi nampo ove wa tura po malizambero gokusiga yininke yopanyama yipo o ture Uhompa muhowo meparu lyoge. (Mat. 6:33) Nsene wa yi rugana ngoso, kara nehuguvaro asi Jehova ga diva yirugana nayinye eyi wa mu ruganena. (Heb. 6:10) Nampo wa limonena nonkango edi ga uyungire Jesus asi: “Kwato ogu a sigi embo lyawo ndi vakuru novamumbya vendi ndi vampanza vendi ndi oguhwe nozina ndi vana vendi nomapya gendi, morwa kukara murongwa gwange nombudi zongwa ogu nga dira kugwana yoyinzi kupitakana yikando 100 kweyi ana kuzumbanesa ngesi. Age nga gwana mambo novakuru novamumbya novazinya novana nomapya nampili va mu hepeke ntani mouzuni wokomeho nga gwana mwenyo gwanarunye.” (Mar. 10:​29, 30) Mauwa aga wa gwana ga pitakana nkenye malizambero aga wa tura po.—Epis. 37:4.

6. Morwasinke no twikilira kunyokera po “edowo lyorutu” konyima zekuho?

⁶ Ove ngo hepa simpe kunyokera po “edowo lyorutu” konyima zekuho. (1 Joh. 2:16) Morwa kapi wa sikilira mo. Poyiruwo yimwe, nampo kuvhura ngo lizuvhe ngwendi moomu ga lizuvhire mupositoli Paurusa. Age kwa tjenge asi: “Momutjima gwange, ame kwa hara veta zaKarunga, nye na dimburura asi morutu rwange mwa kara hena veta zapeke ezi azi rwanesa veta zomomagazaro gange. Veta ozo kuna kara nzo ezi za kara morutu rwange, azo kupangera nge.” (Rom. 7:​22, 23) Madowo gomadona aga o ligwanekere nago kuvhura ga ku dompese. Nye nsene o gazadara ko ketumbwidiro eli wa tulire po kwaJehova apa wa ligeve kwendi, ngayi kutumangeda yipo o nyokere po maheteko. Apa ngo ligwanekera nomaheteko, etumbwidiro lyoge ngali kuvatera. Monkedi musinke?

7. Ngapi omu eligawo lyoge kwaJehova nali kuvatera o twikire kumulimburukwa?

⁷ Apa o ligava kwaJehova, ove kapi o litura muhowo nyamoge. Eyi kutanta asi ove kutokora mokunyokera po yininke eyi wa hara, eyi nayi dira kuhafesa Jehova. (Mat. 16:24) Yipo nye, apa ngo ligwanekera neheteko, kapi ngo hepa kulipura asi yisinke no rugana. Ove wa tokora nare eyi ngo vhura kurugana. Ayo kuna kara kulimburukwa Jehova. Ove ngo tokomena kuhafesa Jehova. Ove ngo fana ngwendi Joba. Nampili ngomu ga ligwanekerere nomaudigu gomanene, age kwa uyungire asi: “Ame ngani kara ngorooro mokupira unzoni wange.”—Joba 27:5.

8. Ngapi omu kugazadara ko keligawo eli wa tura po nali kuvatera o nyokere po maheteko?

⁸ Nsene o gazadara ko keligawo eli wa tulire po kwaJehova, ove ngo gwana nonkondo dokunyokera po nkenye eheteko. Pasihonena, ngoso kuvhura o lihorese komukadi ndi komugara govantu ndi? Hawe. Ove wa tumbwidira nare Jehova asi kapi ngo yi rugana oyo. Nsene o dira kupulisira malizuvho gomadona ga kure, ayo ngayi kukarera ureru kuganyokera po apa ngo ligwanekera nago. Ove kapi ngo rugana yirugana yoyidona.—Yis. 4:​14, 15.

9. Ngapi omu kugazadara ko keligawo lyoge kwaJehova nayi kuvatera o twikire kutura Uhompa muhowo?

⁹ Ngapi nsene ono gwana yirugana eyi nayi kuninkisa o dire kuza nkenye apa komapongo?  Ove ngo diva eyi ngo rugana. Komeho o ya gwane yirugana oyo, ove wa tokora nare mokudira kutambura yirugana eyi ngayi ku kondera o dire kuza komapongo. Ove kapi no tambura yirugana oyo ntani nokugwana ko hena nkedi zapeke omu no tura Jehova muhowo. Nsene tu gazadara ko kosihonena saJesus, ayo ngayi tu vatera. Age kwa tokomenene kuhafesa oGuhwe. Ngwendi Jesus, nyokera po nkenye eyi nayi guvisa Karunga.—Mat. 4:10; Joh. 8:29.

10. Ngapi omu Jehova na ku vatera konyima zekuho yipo o twikire kukwama Jesus?

¹⁰ Eyi o rugana apa o ligwanekere nomaudigu ndi apa o ligwanekere neheteko lyokurugana yoyidona, kuvhura kulikida asi ono tokomene “kukwama” Jesus. Ngomu ono kuyirugana, kuvhura o kare nehuguvaro asi Jehova nga ku vatera. Bibeli kutanta asi: “Karunga mulimburukwi ntani age kapi nga mu tarerera mu pite momaheteko aga ngomu dira kuvhura kulididimikira, nye age nga mu vatera mu pite momaheteko yipo mu vhure kugalididimikira.”—1 Kol. 10:13.

YISINKE NO RUGANA YIPO O KWAME JESUS?

11. Nkedi musinke zimwe zongwa po omu no twikira kukwama Jesus? (Tara hena efano.)

¹¹ Jesus kwa kere noupampi ntani nga hedere pepi Jehova mekanderero. (Ruk. 6:12) Nkedi zimwe zomulyo po omu no twikira kukwama Jesus konyima zekuho kuna kara pokutwikira kurugana yininke eyi nayi kuhedesera pepi naJehova. Bibeli kutanta asi: “Yi kare asi marunduruko musinke twa tura po, tu twikireni monkedi zokulifana.” (Fil. 3:16) Poyiruwo yimwe, ove ngo zuvha yihorokwa yovanavazinyetu ava va rugana unene mosirugana saJehova. Nampo awo kwa zire koSikora zovazuvhisi woUhompa ndi kwa dirukilire  oku kwa hepere evatero lyenene lyovazuvhisi. Nsene asi ukaro woge kuna kukupulisira, litulira po sitambo oso. Vantu vaJehova kwa kara neharo lyenene lyokurugana mosirugana sendi. (Yirug. 16:9) Ngapi nsene kapi yina kukutompoka posiruwo esi? Wa ha gazara asi ove kwato mulyo morwa yeyi yina kutompoka vakweni. Somulyo po unene kuna kara elididimikiro. (Mat. 10:22) Diworoka asi ove kuhafesa unene Jehova apa o rugana eyi o vhuru kurugana ko kuliza noukaro woge. Ezi kuna kara nkedi zomulyo omu no twikira kukwama Jesus konyima zekuho.—Epis. 26:1.

12-13. Yisinke no rugana nsene upampi woge kuna kutameka kusesupa? (1 Vakolinte 9:​16, 17) (Tara hena kakende “ Twikira kuduka.”)

¹² Yisinke no rugana nsene o dimburura asi kapi ono kukanderera kutundilira komutjima ndi kapi ono kuhafera kuzuvhisa ngwendi nare? Yisinke no rugana nsene kapi ono kuhafera kuresa Bibeli ngwendi moomu ngo yi rugana nare? Nsene yimo o lizuvhu ngoso konyima zekuho, wa ha gazara asi kapi ono kara nompepo zokupongoka. Mokumona asi kapi twa sikilira mo, poyiruwo yimwe malizuvho getu kuvhura kulitjindja. Nsene upampi woge kuna kutameka kusesupa, honena mupositoli Paurusa. Nampili ngomu nga hetekere ko kuhonena Jesus, Paurusa ga yi divire asi poyiruwo yimwe kapi ga kere neharo lyenene lyokusikisa mo eyi ga here kurugana. (Resa 1 Vakolinte 9:​16, 17.) Age kwa tente asi: “Nsene ni dira kuyirugana nomutjima nagunye, simpe na kara nositumbukira esi va pa nge.” Monkango zimwe, Paurusa kwa tokomenene kusikisa mo sirugana sendi yi kare asi ngapi omu ga lizuvhire.

¹³ Mokulifana, wa ha tura po matokoro kuliza nomu ono kulizuvha. Tokomena kurugana youhunga nampili kuna kulizuvha asi kapi ono hara kuyirugana. Nsene o twikira  kurugana youhunga, mwaza siruwo malizuvho goge kuvhura ngaga litjindje. Nsene o li tulira po siruwo sokurugana elirongo lyanyamoge lyoBibeli nokukanderera nokuza komapongo ntani mokuzuvhisa, ngayi kuvatera o twikire kukwama Jesus konyima zekuho lyoge. Nsene o twikira kurugana yininke oyo, ayo ngayi korangeda vapuli vakweni.—1 Tes. 5:11.

LIKONAKONENI

14. Yisinke wa hepa kulikonakona nkenye apa ntani morwasinke? (2 Vakolinte 13:5)

¹⁴ Ove ngo gwanena mo hena mauwa nsene o likonakona nyamoge nkenye apa konyima zekuho. (Resa 2 Vakolinte 13:5.) Likonakona poyiruwo yimwe yipo o dive nsene asi ove kukanderera nkenye ezuva nokuresa Bibeli noku zilironga nokuza komapongo ntani mokuzuvhisa. Hetekera ko kugwana nonkedi omu no vhura kuhafera ntani nokugwanena mo mauwa gomanzi moyininke oyo. Pasihonena, lipura nyamoge mapuro aga asi: ‘Ame kuvhura ni fatwilire wopeke marongo gamwe gomoBibeli ndi? Pwa kara nonkedi dimwe edi nadi ninkisa nge ni hafere unene sirugana sange sokuzuvhisa ndi? Ame kuvyukilira kutumbura yininke momakanderero gange ntani ago kulikida asi ame na huguvara mwaJehova nomutjima nagunye ndi? Ame kuza komapongo nkenye apa ndi? Ngapi omu nani wapukurura monkedi omu ani purakene ntani noku lihameka momapongo?’

15-16. Yisinke ono lirongere ko kosihonena samunazinyetu gomugara kuhamena kufunda po eheteko?

¹⁵ Ayo ya wapa mokudiva maupirankondo goge. Munazinyetu gomugara Robert kwa simwitira sihorokwa esi asi likida konda zeyi twa hepera kudiva maupirankondo getu. Age kwa tente asi: “Apa na kere nonomvhura 20, ame kwa kere noyirugana yokurugana mazuva gamwe tupu mosivike. Ezuva limwe konyima zoyirugana, murugani mukwetu gomukadi kwa zigidire nge kembo lyendi. Age kwa tanterere nge asi tatu ka kara nyoselike noku ‘kalihafesa.’ Pomuhowo ame kwa ligusa-gusire mo. Ano konyima yipo na mu tanterere konda zeyi nani dilira kuza ko.” Robert ga fundire po eheteko lina ntani ga tulire po etokoro lyewa. Ano konyima, age kwa gazadarere ko eyi ya horokere ntani ga dimbwilire asi ngano ga rugene ko yuma monkedi zapeke. Age kwa tanta asi: “Kapi na nyokerere po usimbu-simbu eheteko lina ngwendi moomu ga yi rugene Josefa kwamukadaPotifara. (Gen. 39:​7-9) Ayo kwa tetukisire nge omu ya karere nge udigu kunyokera po eheteko lina. Sihorokwa sina  sa vaterere nge ni dimburure asi na hepere kunkondopeka ukaume wange naJehova.”

¹⁶ Kuvhura o gwanene mo mauwa pokulikonakona nyamoge, ngwendi moomu ga yi rugene Robert. Nampili yi ku tompoke kunyokera po eheteko, lipura nyamoge asi ‘Siruwo sokuhura kupi yina gusa nge mokulinyokera po?’ Nsene no dimburura asi ono hepa kutura po marunduruko, ya ha kudompesa. Hafa kweyi ono dimburura upirankondo owo. Kanderera kwaJehova kuhamena upirankondo woge ntani rugana yininke eyi nayi kuvatera yipo o mu limburukwe.—Epis. 139:​23, 24.

17. Ngapi omu edina lyaKarunga Jehova lya hamenene mo mosihorokwa saRobert?

¹⁷ Koyili yimwe hena natu lirongera ko kosihonena saRobert. Age kwa tente hena asi: “Konyima zapa na nyokerere po ezigido lyomurugani mukwetu, age kwa tanterere nge asi ‘O piti eheteko!’ Makura yipo na mu pulire eyi ga tembe. Yipo ga tanterere nge asi kaume kendi ogu ga kere Mbangi, yige ga mu tanterere asi vadinkantu navenye woNombangi kurugana yininke mokahore-hore nsene mpito za moneka. Makura yipo ga tanterere kaume kendi goMbangi asi ta ya heteke nge. Ano ame kwa ya dimbwilire ruhafo oru na kere naro kweyi na yererepekere edina lyaKarunga Jehova.”

18. Yisinke ono tokomene kurugana konyima zekuho? (Tara hena kakende “ Yirongwa eyi no hafera.”)

¹⁸ Apa o ligava nyamoge kwaJehova nokugwana ekuho, ove kuyilikida asi ono hara kuyererepeka edina lyendi yi kare asi yisinke ngayi horoka. Ntani yi pura nawa-nawa asi Jehova ga diva maudigu aga ono kuligwanekera nago ntani maheteko aga ono kufunda po. Age nga tungika elituromo lyoge yipo o twikire kulimburukwa. Kara nehuguvaro asi age nga ku pa nonkondo kupitira mompepo zendi zokupongoka. (Ruk. 11:​11-13) Nevatero lyaJehova, ayo ngayi kutompoka kutwikira kukwama Jesus konyima zekuho.