1, 2. (a) Maugawo musinke gatatu aga ga tu pa Jehova? (b) Yisinke natu ka konakona mosirongwa esi?

JEHOVA yige ngawo po zonene mouzuni naunye. (1 Hist. 29:11, 12) NgaGuhya gougavi, age kugava maugawo gopampepo kwava navenye ava dimburura mulyo gomaugawo ogo. Ayo kutuhafesa morwa Jehova ga tu pa maugawo gopampepo ngwendi (1) Uhompa wendi, (2) yirugana yokuzuvhisa ntani (3) usili womoNonkango dendi. Nsene kapi tuna kutakamesa kuvhura tu dire kukara norupandu komaugawo ogo nokugazumbanesa. Mokudira kugazumbanesa twa hepa kugaruganesa nawa ntani nokutwikira kunkondopeka eharo lyetu kwago. Jesus kwa tente asi: “Oku wa kara ugawo weni, yiko kooko adi kara nomutjima deni.”—Ruk 12:34.

² Tu zeni tu ka konakone omu natu tunga po eharo nokukara norupandu koUhompa nokoyirugana yokuzuvhisa ntani kousili womoNonkango daKarunga. Ngomu ono kuyirugana ngoso teda ko omu no nkondopeka eharo lyoge komaugawo gopampepo.

3. Yisinke ga rugene murandi gomosifanekeso saJesus mokugwana mbamba zina zomulyo gomunene? (Tara efano pepenuno 9.)

³ Resa Mateusa 13:45, 46. Jesus kwa simwitilire sifanekeso somurandi ogu nga papara nombamba. Mwaza nomvhura murandi ogo nampo nga randa nokurandesa nombamba dononzi. Nye ezuva limwe ta ya gwana mbamba zimwe zongwa, apa ga zi mwene makura ta hafa. Nye mokuziranda ga hepere kurandesa emona lyendi nalinye eli ga wekere. Mbamba zina kwa kere nomulyo gomunene kwendi.

4. Nsene tu hara Uhompa waKarunga ngamoomu ga here murandi mbamba, yisinke ngatu rugana?

⁴ Yisinke natu lirongera ko? Uhompa waKarunga kwa fana ngwendi mbamba zomulyo gomunene. Nsene tu hara Uhompa waKarunga ngamoomu ga here murandi mbamba, ngatu siga nayinye meharo lyanyamwetu nokuyakara konhi zepangero lyoUhompa. (Resa Marukusa 10:28-30.) Tu tareni yihonena yovantu vavali ava va yi rugene oyo.

5. Ngapi Sakeusa ga yi likidire asi ga tokomenene kudiva Uhompa waKarunga?

⁵ Sakeusa kwa kere mukurona govafutisi womutero, ogu ga ya kere ngawo morwa nga rugana ufuki mokugwana yimaliwa. (Ruk 19:1-9) Nye mugara gwina gomunanzo apa ga zuvhire Jesus kuna kuzuvhisa kuhamena Uhompa, ga dimbwilire mulyo gweyi ga zuvhire makura ta rugana ko yuma. Age kwa tente asi: “Tate, tara, harufa zemona lyange tani zi pe vahepwe. Nsene pweli ogu na hakana yuma, tani yi mu tengwidire pwarune.” Age kwa tengwidire yimaliwa eyi nga gusa kovantu nokuhageka kudowokera emona.

6. Marunduruko musinke ga tulire po Rose, ntani morwasinke ga yi ruganene?

⁶ Nomvhura da ka pita, apa Rose va mu zuvhisilire mbudi zoUhompa age nga lihameke moyirugana yoruhonda ngwendi kulirara mukadi nomukadi. Ntani age kwa kere mukurona gombunga ezi ngazi kondjere umanguruki wovantu wokulirara vagara novagara ndi vakadi novakadi. Ngomu Rose ga li rongere Bibeli, ga ya nongwene usili kuhamena Uhompa waKarunga. Nye ga ya dimbwilire asi ga hepere kutura po marunduruko gomanene. (1 Kol. 6:9, 10) Eharo lyendi lyokuhara Jehova lya mu tumangedere a hageke kukara mukurona gombunga zina nokuhageka yirugana yoruhonda. Rose kwa gwene ekuho mo-2009 ano mvhura za kweme ko yipo ga tamekere kurugana uzuvhisi wokukarerera. Eharo lyendi lyokuhara Jehova ntani Uhompa kwa nkondoparere kupitakana madowo gopanyama.—Mar. 12:29, 30.

7. Ngapi omu natu twikira kuhara nomutjima nagunye Uhompa waKarunga?

⁷ Sinzi setu kwa tura po marunduruko meparu yipo tu hame koUhompa waKarunga. (Rom. 12:2) Nye simpe twa hepa kurugana ko yuma. Twa hepa kutwikira kuvangarara yipo tu dive yininke eyi nayi vhura kudonganesa eharo lyetu koUhompa ngwendi edowo lyemona ntani nankenye yirugana yoruhonda. (Yis. 4:23; Mat. 5:27-29) Mokutuvatera tu twikire kuhara nomutjima nagunye Uhompa waKarunga, Jehova ga tu pa ugawo umwe womulyo.

8. (a) Morwasinke mupositoli Paurusa ga singwenene sirugana setu sokuzuvhisa ngwendi ‘ugawo va simbira moyipako yerova’? (b) Ngapi omu Paurusa ga yi likidire asi ga here sirugana sokuzuvhisa?

⁸ Jesus kwa tu pa sirugana sokuzuvhisa nokuronga vantu mbudi zongwa zoUhompa waKarunga. (Mat. 28:19, 20) Mupositoli Paurusa ga dimbwilire mulyo gosirugana sokuzuvhisa.  Age kwa singwenene sirugana sokuzuvhisa ngwendi ‘ugawo va simbira moyipako yerova.’ (2 Kol. 4:7; 1 Tim. 1:12) Nampili ngomu twa dira kusikilira mo, mbudi ezi atu zuvhisa kuvhura kutuvatera ngatu ka gwane mwenyo gwanarunye kumwe nava vana kutupurakena. Morwa ga divire eyi, Paurusa yipo ga tente asi: “Nayinye eyi ame kuyiruganena morwaMbudi zoNgwa, ngani gwane ko name komatungiko gamo.” (1 Kol. 9:23) Morwa kuhara sirugana sokuzuvhisa, Paurusa ya mu tumangedere a rugane unene pokutulisa po varongwa. (Resa Varoma 1:14, 15; 2 Timoteusa 4:2.) Ayo ya mu vaterere a lididimikire mahepeko gomanene. (1 Tes. 2:2) Ngapi natu likida eharo lyangoso moyirugana yokuzuvhisa?

9. Mononkedi musinke dimwe natu likida rupandu kosirugana sokuzuvhisa?

⁹ Nkedi zimwe omu Paurusa ga likidire rupandu kosirugana sokuzuvhisa kuna kara pokuruganesa nkenye mpito mokuzuvhisira wopeke. Ngwendi vapositoli noVakriste womosiruwo sina, nose kuzuvhisira mononzira nomomambo ntani nkenye oku atu gwana vantu. (Yirug. 5:42; 20:20) Nsene ukaro wetu una tu pulisire, ose kutamununa sirugana setu pamwe pokurugana uzuvhisi wokuvatera ndi wokukarerera. Ntani kuvhura hena tu lironge eraka lyapeke ndi kudirukira komukunda gwapeke mosirongo setu ndi kosirongo sapeke.—Yirug. 16:9, 10.

10. Ngapi omu Irene va mu tungikire morwa kutokomena kuzuvhisa mbudi zongwa?

¹⁰ Tarurura sihonena samunazinyetukadi Irene gomoAmerika. Age kwa here unene kuzuvhisira Varusia ava va wizire mosirongo sawo. Apa ga tamekere kuvazuvhisira mo-1993, mokambunga koVarusia komositata saNew York, kwa kere mo tupu vazuvhisi 20. Irene kwa rugana unene mokuvazuvhisira ure wonomvhura 20. Age kwa tanta asi: “Simpe kapi ani uyunga nawa eraka lyoVarusia.” Jehova kwa tungika elituromo lyendi ntani nava va litura mo ngwendi yige. Ano naina pana kara nombungakriste ntazimwe demeraka lyoVarusia mositata saNew York. Movantu ava ga lirongere nawo, murongo navatano va gwana ekuho. Vamwe ngesi kuna kurugana koBeteli ano vamwe vazuvhisi wokukarerera ntani vakuronambunga. Irene kwa tanta asi: “Apa ani gazadara yitambo eyi nkare ni kondjere, kwato simwe esi asi retere nge ruhafo rorunene ngwendi sesi.” Age kwa hara unene sirugana sokuzuvhisa.

11. Yitundwamo musinke yoyiwa ngayi kara nsene tu twikira kuzuvhisa nampili momahepeko?

¹¹ Nsene twa hara sirugana sokuzuvhisa, ose ngatu kara ngwendi mupositoli Paurusa nokutwikira kuzuvhisa nampili momahepeko. (Yirug. 14:19-22) Koyiha yomvhura  1930 ntani ketamekero lyomvhura 1940, vanavazinyetu moAmerika kwa ligwanekerere nomahepeko. Nye, awo kwa lididimikire nokutwikira kuzuvhisa ngwendi Paurusa. Mokupopera unankondo wetu wokuzuvhisa, awo kwa va twere konompanguro dononzi. Momvhura 1943 Munazinyetu Nathan H. Knorr apa va fundire mompanguro zonene moAmerika age kwa uyungire asi: “Morwa elituromo lyeni yiyo tuna fundu mpanguro ezi, ngano one vazuvhisi mwa hagekere kuzuvhisa ngano kapi twa za kompanguro zonene, nye morwa nyone, vanavazinyetu mouzuni mudima kuna kutwikira kuzuvhisa nampili momahepeko aga vana kuligwanekera nago.” Elididimikiro lyokulifana lyovanavazinyetu moyirongo ya pekeke kwa va ninkisa va funde monompanguro dokulifana. Yosili, eharo lyetu kosirugana sokuzuvhisa kuvhura kufunda po mahepeko.

12. Yisinke ono tokomene kurugana kuhamena sirugana sokuzuvhisa?

¹² Nsene tu tara sirugana sokuzuvhisa ngwendi ugawo wokutunda kwaJehova, kapi ngatu kondjera tupu kugwana novili edi natu tjanga pononzapo detu. Mevango lyoyo, ose ngatu rugana paapa twa hulira tu ‘zuvhise mbudi zongwa.’ (Yirug. 20:24; 2 Tim. 4:5) Nye yisinke ngatu ronga wopeke? Tarurura ugawo umwe wokutunda kwaKarunga.

13, 14. ‘Ugawo’ musinke ga tembe Jesus mwaMateusa 13:52, ntani ngapi omu natu vhura kupungura mo yuma?

¹³ Ugawo wetu wautatu kuna kara usili ou twa lironga. Jehova age Karunga goMunasili. (2 Sam. 7:28; Deut 32:4) NgaGuhya gougavi, age kutantera usili kwava ava mu tjira. Ose twa lironga usili owo moNonkango daKarunga Bibeli, moyimbapiratjangwa yetu, koyigongi ntani momapongo getu. Ngwendi moomu ga yi singwenene Jesus, mwaza siruwo ose twa pungura ‘mougawo’ wetu usili wanare nou woupe ou twa lironga. (Resa Mateusa 13:52.) Jehova ngatu vatera tu zwide ‘mougawo’ wetu usili woupe nsene tu papara usili owo ngwendi moomu atu papara emona lyokuhoreka. (Resa Yisewe 2:4-7.) Ngapi natu yi rugana oyo?

¹⁴ Twa hepa kukara neharo lyokulironga nyamwetu Bibeli noyimbapiratjangwa nkenye apa nokurugana nawa epaparo. Eyi ngayi tu vatera tu gwane usili woupe ou twa dira kudiva simpe. (Jos. 1:8, 9; Epis. 1:2, 3) Sifo sokuhova soRuhungu esi va pwagesere mwaPembankuru 1879 kwa tente asi: ‘Usili kwa kara ngwendi mbya zongwa mokatji kowayi wounzi woudona. Mokuninka asi o gwane mbya ozo wa hepa kuzipapara nawa. Nsene ono zi gwana wa hepa simpe kupapara hena o gwane nombya nonkwawo.’ Mokulifana, nose twa hepa kukara neharo lyokupapara mausili gomanzi yipo tu pungure yuma mougawo wetu.

15. Morwasinke pamwe natu uyungira asi usili umwe ‘wanare,’ ntani usili musinke wa hara unene?

¹⁵ Ose kwa gwene usili womulyo apa twa tamekere kulipakerere novantu vaKarunga. Eyi twa hovere kulironga kuvhura tu yi tumbure asi usili ‘wanare.’ Yisinke ya kwatera mo mousili owo? Ose twa lirongere asi Jehova yige Musiti noNtundiliro zeparu ntani ga kara nositambo kovantu. Twa lirongere hena asi Karunga kwa geve Munwendi ngonzambo mokuzowora vantu kononzo nokonomfa. Ntani twa lirongere hena asi Uhompa wendi ngau hagekesa po ruhepo narunye rovantu ntani asi twa kara nehuguvaro lyokukaparuka narunye mombili mepangero lyoUhompa.—Joh. 3:16; Ehor. 4:11; 21:3, 4.

16. Yisinke twa hepa kurugana nsene tuna gwana ewapukururo lyekwatogano lyetu kuhamena usili?

 ¹⁶ Poyiruwo yimwe ekwatogano lyetu lyomauporofete goBibeli ndi lyoMatjangwa gamwe kuvhura kuliwapukurura. Apa atu gwana mawapukururo ogo, twa hepa kulitulira po siruwo mokugakonakona nawa nokuteda ko momunene. (Yirug. 17:11; 1 Tim. 4:15) Ose kapi atu kondjere po tupu kukwata egano mawapukururo gomanene nye hena nelisigo pokatji kekwatogano lyetu lyeyi yanare neyi yantaantani. Pokuyirugana ngoso, ose ngatu vhura kupungura usili woupe pougawo wetu. Morwasinke ya karera nomulyo tu liture mo kuyirugana oyo?

17, 18. Ngapi mpepo zokupongoka nazi tu vatera?

¹⁷ Jesus kwa rongere asi mpepo zokupongoka kuvhura kutudiworokesa yininke eyi twa lironga nare. (Joh. 14:25, 26) Ngapi omu nayi tu vatera eyi ose ngovarongi wombudi zongwa? Tarurura sihonena samunazinyetu Peter. Momvhura 1970, apa ga kere nonomvhura 19 yipo ga tamekere kurugana koBeteli zomoBritania. Ezuva limwe moyirugana yokuzuvhisa tunda embo zende embo, ta ligwana nomugara ogu ga kere nononzwedu dononde. Makura Peter ta pura mugara ogo nsene ana hara kukwata egano Bibeli. Mugara ogu kwa kere murongi goMujuda ntani age kwa tetukire asi Peter kuvhura a mu ronge Bibeli. Mokuheteka Peter, murongi ta pura asi: “Mumati, meraka musinke va tjenge buke zaNdaniyera?” Peter ta limburura asi: “Ruha rumwe kwa ru tjenge moRuarameya.” Peter kwa tanta asi: “Murongi gwina ya mu tetukisire asi na divire elimbururo, nye nyamwange ya tetukisire nge unene kupitakana murongi gwina. Ngapi na divire elimbururo? Apa na zire kembo nokukatara moyifo yoRuhungu nomoAwake! yomakwedi ganare, na gwene sirongwa sa fatwilire asi buke zaNdaniyera kwazi tjenge moRuarameya.” (Ndan. 2:4) Yosili, mpepo zokupongoka kuvhura kutuvatera tu diworoke eyi twa resa nare nokuyipungura nawa mougawo wetu.—Ruk. 12:11, 12; 21:13-15.

¹⁸ Nsene tu hara usili ou a tu rongo Jehova, ose ngatu pungura nkenye apa mougawo wetu usili wanare nou woupe. Ngomu ngatu twikira kukara neharo norupandu kounongo wokutunda kwaJehova, ose ngatu wapera kukara varongi.

19. Morwasinke twa hepera kupopera maugawo getu gopampepo?

¹⁹ Satana nouzuni wendi kuna hara kuzonagura po eharo lyetu komaugawo gopampepo aga tuna zogere mosirongwa esi. Yineya yendi nose ya tu kundama. Nsene kapi tuna kutakamesa kuvhura ga tu donganese mazedo gokukondjera yirugana ndi erongo lyokuzeruka ndi eparu lyoungawo ndi malitumbadekero gemona. Mupositoli Johanesa kwa tu diworokesa asi uzuni ngau zonauka po kumwe nomadowo gawo nagenye. (1 Joh. 2:15-17) Yipo nye twa hepera kurugana unene tu kare neharo norupandu komaugawo gopampepo aga twa gwana.

20. Yisinke ono tokomene kurugana mokupopera ugawo woge wopampepo?

²⁰ Nyokera po nkenye eyi nayi vhura kudonganesa eharo lyoge lyokuhara Uhompa waKarunga. Twikira kuzuvhisa noupampi ntani kara norupandu kosirugana sokuzuvhisa. Litura mo mokupapara usili wokutunda kwaKarunga. Ngomu ono kuyirugana, ngo ‘lipongaikira emona lyemeguru, eli ali dili kupwa, omu a dili kuza muwidi ndi li likane kontunda. Ano oku wa kara ugawo woge, yiko kooko agu kara mutjima goge.’—Ruk 12:33, 34.