1, 2. Ngapi omu Jehova atu hengagwida momaudigu getu, ntani ehuguvaro musinke atu gwana moNonkango dendi?

MUDINKANTUGARA gedina Eduardo kwa pwagesere sinka sendi kwaStephen mukuronambunga gokukwara gomukondi. Sinka esi ga kere naso Eduardo kwa kere nonkango edi va tjanga mo-1 Vakolinte 7:28 asi: ‘Vantu wokukwara ngava gwana maudigu gomouzuni ou.’ Eduardo kwa pulire asi: “‘Maudigu’ musinke ogo, ntani ngapi omu ngani vhura kugalididimikira nsene ngani kwara?” Komeho Stephen a limburure epuro olyo age kwa pulire Eduardo a gazadare ko kononkango edi ga tjenge mupositoli Paurusa asi Jehova ‘Karunga kutuhengagwida momaudigu getu nagenye.’—2 Kol. 1:3, 4.

² Jehova age Guhya geharo ntani age kutuhengagwida momaudigu. Ove nampo wa limonena omu Karunga ga ku vatera nokukuvyukisa kupitira moNonkango dendi. Age kuna hara kuturuganena uwa ngwendi moomu ga yi rugene kovakareli vendi vanare.—Resa Jeremiya 29:11, 12.

3. Mapuro musinke natu ka konakona?

 ³ Yosili, ose kuvhura kulididimikira maudigu nsene tuna diva eyi yina ga retesa po. Unene po maudigu gomononkwara ndi gemepata. Yininke musinke ayi retesa po ‘maudigu’ aga ga tumbwire Paurusa? Yihonena musinke yomoBibeli ntani yomomazuva getu eyi nayi tu vatera tu gwane ehengagwido? Pokudiva yihonena oyo ngayi tu vatera tu lididimike.

4, 5. Yininke musinke ayi retesa po ‘maudigu’ mononkwara?

⁴ Apa Karunga ga sitire vantu age kwa tente asi: ‘Yipo nye a sigire mugara oguhwe nozina, makura ta likwatakana namukadendi, makura tava kara gumwe tupu.’ (Gen. 2:24) Jehova kwa uyungire nonkango odo apa ga tulisire po nonkwara dokuhova. Nye morwa kudira kusikilira mo, kukwara nokukara nepata kuvhura kureta maudigu mononkwara. (Rom. 3:23) Nsene mukadi ana kwara age kutunda mo mepangero lyovakurona vendi aya kare mepangero lyamugara gwendi. Karunga kwa pa mugara situmbukira sokukara mupangeli gomukadi. (1 Kol. 11:3) Nye vagara novakadi vamwe kuvadigopera kukwama ngendeseso ezi. Kuliza noNonkango daKarunga, mukadi ga hepa kutambura upangeli wamugara gwendi mevango lyokukwama upangeli wovakurona vendi. Womukwarero kuvhura kuretera maudigu valikwali wovape.

⁵ Yinka yimwe kuwiza po apa mukadi a tantere mugara gwendi asi ana kara nomarutu gavali. Valikwali kuvhura va kare nosinka kwanayinye eyi ya hamena mo apa mukadi a kara nomarutu gavali ntani apa a hampuruka. Kuvhura va kare nosinka soyimaliwa eyi ngava ruganesa mokureresa ko munwawo. Marunduruko gamwe kuwiza po apa mukeke ava mu hampuruka. Mukadi kuruganesa siruwo sendi mokurera munona. Vagara wovanzi kwa lizuvha mukuma morwa vakadi vawo kuruganesa siruwo sawo sosinzi komukeke. Nampili ngoso, guhya nage kuyakara nosimbukira. Yitumbukira yendi nayo kuligwederera morwa ana kara nepata eli ga hepa kupakera mbili.

6-8. Kudira kuvhura kureta, ngapi omu ayi kundama valikwali?

⁶ Pwa kara udigu umwe ou ava ligwanekere nawo valikwali vamwe. Awo kwa hara kukara novana, nye kapi ava reta. Apa mukadi a dili kureta, age kuvhura a guve unene. Kapi ayi tanta asi nsene o kwara ndi o kara novana kapi to kara nosinka. Nye kudira kukara novana nayo ‘kureta maudigu.’ (Yis. 13:12) Posiruwo sanare, kukara nganze kwa kere eswau. Rakera mukadaJakopo kwa fililire mfudu mukurwendi ogu ga kere novana. (Gen. 30:1, 2) Moyirongo yimwe vatumwa kuvapura eyi va dilira kukara novana morwa yizo mpo zomoyirongo oyo asi muntu wa hepa kureta vana wovanzi. Nampili ngomu vatumwa ava hetekere ko kufaturura nawa konda zeyi ava dilire kureta vana, vantu owo kuuyunga asi “ngatu mu tura momakanderero getu.”

⁷ Tu tareni sihonena samunazinyetukadi gomoIngiranda ogu ga here kukara nomuna nye kapi ya mu tompoka. Apa ga ya sikire ponomvhura dokudira kuvhura kureta, age kwa guvire unene morwa ga yi dimbwilire asi kapi nga vhura kureta mouzuni ou. Makura nage namugara gwendi yipo va tokwere kurera munona gwa hana asi gwawo.  Nampili ngoso, age kwa tente asi: “Ame simpe kwa guvire unene. Ame na yi divire asi kurera munona ga hana asi goge kapi ya lifana nokurera munona gwanyamoge.”

⁸ Bibeli kwa tumbura asi mukadi goMukriste “nga ka parukira mokureta vanona.” (1 Tim. 2:15) Nye kapi ayi tanta asi kureta ndi kurera vanona kutwaredesa o ka gwane mwenyo gwanarunye. Nye kwa tamba asi apa mukadi a kara novanona nokupakera mbili yininke yemembo, kuvhura yi mu vatere a dire kulihameka morugambo ndi a liture mononkango dovantu. (1 Tim. 5:13) Nye, simpe kuvhura a ligwanekere nomaudigu gomononkwara nemepata.

9. Morwasinke kufisa mulikwali goge wa karera udigu wounene?

⁹ Pwa kara hena udigu umwe ou au kundama nonkwara. Awo kuna kara kufisa muhali goge. Udigu wounene ou va ligwanekera nawo wovanzi kuna kara kufisa mulikwali gwawo. Owo kuna kara udigu ou au horoka hararasi. Vakriste va kara nehuguvaro lyokupama metumbwidiro lyaJesus kuhamena evhumbuko. (Joh. 5:28, 29) Ngapi omu ehuguvaro olyo ali kundama ogu ana fisa? Alyo kumupa ehengagwido. Ezi kuna kara nkedi zimwe omu Guhyetu geharo kupitira moNonkango dendi a gava evatero nokuhengagwida ava vana kara nomaudigu. Tu konakoneni omu vakareli vaKarunga va lizuvhire ntani nomu va gwanenene mo uwa mehengagwido lyokutunda kwaJehova.

10. Ngapi omu Hana ga gwene ehengagwido koruguwo rwendi? (Tara efano pepenuno 4.)

¹⁰ Hana mukadaElikana kwa kere noudigu. Age kwa kere nganze ano musupakadi zendi Penina nga reta vana. (Resa 1 Samwere 1:4-7.) “Nkenye mumvho” Penina nga swaura Hana. Ayo kwa reterere Hana ruguwo rorunene. Age kwa paparere ehengagwido pokutantera Jehova udigu wendi. Age kwa “twikilire ngorooro kukanderera siruwo sosire.” Age ga yi ndindilire asi Jehova na limburura ekanderero lyendi ndi? Age ga kere nehuguvaro. Apa ga mene kukanderera “sipara sendi tasi runduruka.” (1 Sam. 1:12, 17, 18) Age ga kere nehuguvaro asi Jehova nga gusa po udigu wendi wonganze ndi nga mu vatera monkedi zapeke.

11. Ngapi omu kukanderera na kutuhengagwida?

¹¹ Morwa kudira kusikilira mo ntani morwa uzuni kuna kara mepangero lyaSatana ose ngatu twikira kuligwanekera nomaudigu. (1 Joh. 5:19) Ayo kutuhafesa kudiva asi Jehova ‘Karunga kutuhengagwida.’ Nkedi zimwe omu atu gwana evatero lyokulididimikira maudigu getu kuna kara pokukanderera. Hana kwa pwagesere malizuvho gendi kwaJehova. Mokulifana, nsene kuna kupita momaudigu, kapisi kutantera tupu Jehova maudigu aga tuna kara nago. Nye twa hepa kumupwagesera malizuvho getu nagenye gokomutjima.—Fil. 4:6, 7.

12. Yisinke ya vaterere mufisayendi Ana a kare noruhafo?

¹² Nampili tu lizuvhe mukuma morwa kudira kureta vana ndi kuzumbanesa muhali mononkwara, kuvhura simpe tu gwane ehengagwido. Momazuva gaJesus, muporofete gomukadi Ana kwa fisire mugara gwendi konyima zokulikwara nomvhura ntambali. Bibeli kapi za tumbura asi va kere novana. Yisinke nga rugana Ana nampili apa ga kere nonomvhura 84? MwaRukasa 2:37 kutanta asi: “Age kapi nga tundu mo montembeli, nye nga kerere Karunga masiku nomutenya,  a kanderere oku ta dilire nondya.” Ana kwa gwene ehengagwido noruhafo pokukarera Jehova.

13. Gava sihonena omu vakaume wousili nava vhura kukuhengagwida nampili vekoro lyoge kapi vana kuyirugana.

¹³ Pokukara pepi novanavazinyetu, ose kutulisa po vakaume wovanene ntani wousili. (Yis. 18:24) Paula kudiworoka omu ga guvire apa ozina va hagekere kukarera Jehova, age opo nomvhura dendi ntano. Kapi ya kere ureru kwendi kulididimikira udigu owo. Nye age ga gwene ehengagwido lyenene apa Ann muzuvhisi gokukarerera gomombungakriste zawo ga mu vaterere pampepo. Paula kwa tanta asi: “Nampili ngomu twa dilire kulitundakana naAnn, age ga pakerere nge mbili. Oyo ya vaterere nge ni twikire kukarera Jehova.” Paula simpe kuna kukarera Jehova. Age ana hafa hena pokumona ozina nawo kuna kukarera Jehova. Ann nage ana hafa kweyi ga tekwire Paula ngamunwendi.

14. Mauwa musinke nava vhura kugwana ava ava hengagwida vakwawo?

¹⁴ Apa atu pakere mbili vakwetu, kuvhura kutuvatera tu dire kudemenena komalizuvho gomadona aga twa kara nago. Vanavazinyetukadi, wokukwara ndi wovadike, va yi diva asi kuvhura va gwane ruhafo rorunene pokuzuvhisa mbudi zongwa  ngovarugani kumwe naKarunga. Sitambo sawo sokufumadeka Karunga pokurugana mpango zendi. Vamwe kulizuvha hansa ko komaudigu gawo apa ava lihameke mokuzuvhisa. Natuvenye kukwatesa ko uumwe womombungakriste apa atu pakere mbili vakwetu, nava atu zuvhisire ntani womombungakriste. (Fil. 2:4) Mupositoli Paurusa ga tulire po sihonena sosiwa. Paurusa kwa tekwire womombungakriste zoVatesaronika ngwendi moomu “a tekura mukadi vana vendi,” age kwa kere hena ngwendi guhyawo.—Resa 1 Vatesaronika 2:7, 11, 12.

15. Wolye va pa situmbukira sokuronga vanona?

¹⁵ Mapata nago ga hepa ehengagwido nevatero lyetu. Pamwe, ava simpe vana kulironga Bibeli ndi wovape mousili kuvhura kupura vazuvhisi ava va kara noudivi mokuronga vana vawo Bibeli nampili wovanonagona. Nye kuliza noMatjangwa, aso situmbukira sovakurona mokuronga nokudeura vana vawo. (Yis. 23:22; Efe. 6:1-4) Momaukaro gamwe vakurona kuvhura va hepe evatero kwava wopeke. Nye vakurona va ha sigilira situmbukira sawo. Ayo mulyo unene kuzogera novana vawo nkenye apa.

16. Nsene tatu vatere vanona, yisinke twa hepa kudiworoka?

¹⁶ Nsene mukurona a pura ko gumwe a lironge namunwendi, ogu na ronga ogo munona kapisi a hetekere ko kugusa situmbukira sovakondi wogo munona. Pwa kara yihorokwa yimwe omu vazuvhisi va va pura va lironge novanona ava vakondi vawo ava ava dili kukarera Jehova. Nye vazuvhisi va hepa kudiworoka asi kapi tava vhuru kugusa situmbukira sokukara mukurona gowo vanona. Ano nsene kuna kurugana elirongo lyoBibeli va hepa kuliruganena membo lyovakurona wogo munona ndi pa kare hena muzuvhisi gumwe ndi kevango oku nava vhura kuvamona vantu. Yipo vantu va dire kukara nomagano gepuko kweyi yina kuhoroka. Mwaza siruwo vakurona kuvhura ngava sikise mo situmbukira sawo sokuronga vana vawo.

17. Ngapi omu vanona nava vhura kureta ehengagwido?

¹⁷ Vanona ava ava lirongo kuhara Karunga gosili nokukwama mapukururo gendi kuvhura kureta ehengagwido mepata. Kuvhura va yi rugane oyo pokufumadeka vakurona vawo nokuvavatera noyihepwa yawo yopanyama. Awo simpe kuvhura va gave evatero lyopampepo. Komeho zoRuhanzo, Rameki gomoruvharo rwaSete nga karere Jehova. Rameki kwa uyungire kuhamena munwendi Nowa asi: “Munona ogu ngatu hengagwida koyirugana yetu yoyidigu, eyi ayi tundu mevhu eli ga fingilira HOMPA.” Uporofete owo kwa sikilire mo apa va gusire po efingo pevhu. (Gen. 5:29; 8:21) Mokulifana, vanona ava ava kwatesa ko ukareli wousili kureta ehengagwido komapata gawo nokuvavatera va lididimikire maudigu ngesi ntani ngava ka paruke ezonauko lyenene lyokupitakana Ekuruhanzo.

18. Yi kare asi maudigu musinke ngatu ligwanekera nago, yisinke ngayi tu vatera tu lididimike nouradi?

¹⁸ Kukanderera nokuteda ko koyihonena ya kara moBibeli ntani nokukara kumwe novantu vaJehova kuna kuvatera vantu wovanzi mokugwana ehengagwido komaudigu gawo nagenye. (Resa Episarome 145:18, 19.) Mokudiva asi Jehova kutuhengagwida ngayi tu vatera tu lididimikire nouradi mwankenye maudigu ngatu ligwanekera nago ngesi ntani komeho.