DON, gumwe goNombangi daJehova moKanada, kwa litulire mo mokuzogera novantu ava ngava renda-renda moyitarata. Kuhamena gumwe govantu owo, Don kwa simwitira asi: “Mugara gedina Peter kwa kere mugara gokunyata unene ogu nga renda-renda moyitarata. Age kwa nyete unene ntani kapi nga pulisire vantu va mu hedere. Age nga nyoka nkenye evatero ngava mu pe vantu.” Nampili ngomu ga parukire moyitarata nomvhura dokupitakana 14, Don kwa litulire mo mokuruganena uwa mugara ogo.

Ezuva limwe, Peter kwa pulire Don asi: “Morwasinke o lisininikire kuuyungisa nge? Wopeke kapi ava uyungisa nge. Morwasinke o karere nosinka name?” Don kwa ruganesere nawa matjangwa gatatu yipo ga twe Peter komutjima. Pomuhowo, age kwa pulire Peter nsene ga diva asi Karunga ga kara nedina ntani nokumuhundira a rese Episarome 83:18 moBibeli. Mokulikida eyi ga karerere nosinka, Don kwa ninkire Peter a rese Varoma 10:13, 14, ezi azi tanta asi: “Nkenye ogu a kugu edina lyaHompa, kumuparura.” Moruhura, Don ta resa etjangwa lyaMateusa 9:36 makura ta ninki hena Peter ali li resere mwene. Etjangwa olyo kutanta asi: “Eyi ana mono mbunga, makura tazi mu gwire nkenda, morwa yeeyi va hepere va lifane nononzwi dokuzumbana da hana musita.” Poopo ngoso, Peter ta ganda mahodi nokupura asi: “Name gumwe gononzwi odo ndi?”

Peter ga tulire po marunduruko. Age kwa zoganene nokukurura nonzwedu dendi, makura ta dwara yikoverero yokuzera eyi ga mu pere Don. Peter ga twikilire kukara nemoneko lyewa.

Peter kwa pungwire buke zokutjanga yihorokwa. Mapenuno gokuhova mobuke ozo kwa tjenge po mparukiso zendi zanare, ano gokukwama ko kwa tjenge po omu ga tulire po marunduruko apa va ligwene naDon. Epenuno limwe kwa tjenge po asi: “Ame na lironga edina lyaKarunga. Ngesi apa ani kanderere,  ame kutumbura edina Jehova. Ayo kuhafesa kudiva edina lyendi. Don kwa tanta asi Jehova kuvhura kukara Kaume kange, ogu na vhura kupurakena nge nkenye apa.”

Nonkango daPeter dokuhulilira mobuke zendi kwa di tambesere kwa mumbyendi namukurwedi gomukadi. Age kwa tjenge asi:

“Naina kapi nina kulizuvha nawa. Ame kuna kugazara asi ukurupe una didi. Nampili yi kare asi tani fu naina, nina yi diva asi ngani ka mona hena kaume kange [Don] moParadisa. Apa ngomu resa nonkango edi, nampo ame nina fu. Nye nsene ngomu mona mugara pehoreko lyange ogu mwa dira kumona rumwe, ngomu uyunge nage ntani kuna kumukorangeda ngomu rese kabuke aka. * Azo kutanta asi ame ngani ka mona hena kaume kange moParadisa. Ame na yi pura eyi nomutjima gwange nagunye. Gweni geharo, Peter.”

Konyima zehoreko, mukurwaPeter gedina Ummi kwa tanta asi: “Apa na ligwene naPeter nomvhura mbali da ka pita, aso sikando sange sokuhova kumumona age ana hafa. Ntani kwa menya-menyene.” Ummi kwa tanterere Don asi: “Morwa buke ezi kwa rundwilire nkareso zamumbyange, name ngani zi resa.” Ummi ga tokwere kulironga buke Yinke azi rongo Bibeli sili? nagumwe goNombangi daJehova.

Kapisi tu tare tupu emoneko lyokotunda nye ngano tu likide eharo lyosili ntani nokuzuvhisira vantu navenye. (1 Tim. 2:3, 4) Mokurugana ngoso, ngatu vatera vantu wonomutjima donongwa wokunyata nokurenda-renda ngwendi Peter. Ose twa kara nehuguvaro asi Karunga ogu a ‘mono momutjima,’ nga ninka usili u kure monomutjima dovantu wovawa.—1 Sam. 16:7; Joh. 6:44.