1, 2. (a) Sininke musinke somulyo esi sa kundama vantu navenye? (b) Morwasinke natu litulira mo mokuhungameka upangeli waJehova?

VANTU wovanzi naina, yimaliwa kuna kara sininke somulyo po kwawo. Awo kukondjera kulipongaikira emona ndi kuhara unene yininke eyi va weka. Ano vamwe kutara asi sininke somulyo po kwawo kuna kara mapata gawo ndi ukanguki wawo ndi eyi vana hara kutompora meparu.

² Nampili ngoso, sininke somulyo po esi sa kundama vantu navenye kuna kara kuhungameka upangeli waJehova. Nsene kapi tuna kutakamesa kuvhura tu divare sininke oso somulyo. Monkedi musinke? Ose kuvhura tu hokwe tupu kudemenena koyinka yetu yemeparu nokudivara omu ya kara nomulyo kuhungameka upangeli waKarunga. Ndi kuvhura tu pulisire maudigu getu ga tu ninkise tu divare upangeli owo. Nye nsene tu litura mo unene kukwatesa ko upangeli waJehova, ose ngatu vhura kulididimikira maudigu getu. Ntani ngatu hedera pepi naJehova.

3. Yisinke ga tente Satana kuhamena upangeli waJehova?

³ Satana kwa homwene nkedi zaJehova zokupangera. Age kwa  tente asi Karunga mupangeli gomudona ntani kapi ga harera uwa yisitwa yendi. Ntani hena asi vantu kugwana ruhafo nsene va lipangera vene. (Gen. 3:1-5) Satana kwa tanta hena asi kwato muntu ogu sili a limburukwa Karunga, nsene a ligwanekera nomaudigu gomanene age kunyoka upangeli waJehova. (Joba 2:4, 5) Morwa nompata odo daSatana, Jehova ga pa vantu siruwo yipo va limonene yitundwamo yoyidona yokudira kulimburukwa koupangeli wendi.

4. Morwasinke ehomono lyoupangeli waJehova va hepera kulikohonona po?

⁴ Jehova ga diva asi ehomono lyaSatana yimpempa. Morwasinke Karunga ga pulisira Satana a twikire kupangera? Morwa yisitwa yendi nayinye kwa hamena mo monompata odo. (Resa Episarome 83:18.) Adamu naEva kwa nyokere upangeli waJehova, ano kutunda opo vantu wovanzi nawo kapi ava limburukwa. Eyi kuvhura yi ninkise vamwe va pure asi eyi ga tente Muzonaguli usili. Ehomono olyo nsene va dira kulikohonona po, kapi ngapa kara mbili nouumwe pokatji konomuhoko ndi marudi ndi mapata ndi vaengeli. Nye apa upangeli waJehova ngava ka uhungameka, yisitwa nayinye ngayi limburukwa koupangeli waJehova. Ano moyisitwa nayinye ngamu kara mo mbili.—Efe. 1:9, 10.

5. Ngapi natu kwatesa ko upangeli waJehova?

⁵ Upangeli waKarunga ngava ka uhungameka ano upangeli waSatana novantu vendi ngava ka u hagekesa po. Upangeli waKarunga kupitira mwaMesiyasa ngau ka pangera, posiruwo oso, vantu wovalimburukwi ngava gava umbangi asi muntu kuvhura kukwatesa ko upangeli waKarunga. (Jes. 45:23, 24) Ono hara kukara gumwe govantu ava ava kwatesa ko upangeli waJehova ndi? Nsene yimo, twa hepa kutwikira kudemenena koupangeli wendi nokukwata egano mulyo gwawo.

6. Ngapi kuhungameka upangeli waJehova wa kara nomulyo?

⁶ Kuhungameka upangeli waJehova kuna kara sininke somulyo po unene esi sa kundama vantu. Ayo mulyo unene kupitakana yininke eyi ayi tu retere ruhafo. Nye ayo kutanta asi ezoworo lyetu kwato mulyo ndi asi Jehova kapi a pakere mbili vantu ndi? Kapisi yimo. Ntani morwasinke yina karere ngoso?

7, 8. Ngapi omu kuhungameka upangeli waKarunga ngayi retera vantu mauwa?

⁷ Jehova kwa hara unene vantu ntani awo mulyo kwendi. Age kwa liwapaikilire mokutuma Munwendi a ya fire vantu yipo ngava ka gwane mwenyo gwanarunye. (Joh. 3:16; 1 Joh. 4:9) Ngano Jehova kapi ga sikisire mo matumbwidiro gendi, Muzonaguli ngano ga gwene konda zokutumbura Karunga asi munayimpempa ntani asi kapi ga harera vantu uwa ntani age mupangeli gomudona. Ano ava ava rwanesa Karunga ngano ngava uyunga asi: “Kwa va tumbwidira asi nga wiza, gupi nye? Gupi po apa? Ozinyakurwetu va fa nare, nye nayinye ha ya kerera moomu ya kere pesito lyouzuni.” (2 Pet. 3:3, 4) Yiyo nye, apa Jehova nga ka hungameka upangeli wendi, ngayi kwatera mo hena ezoworo lyovantu wovalimburukwi. (Resa Jesaya 55:10, 11.) Upangeli waJehova kwa u tatekera keharo. Yipo nye natu karera nehuguvaro asi age nga twikira kuhara vakareli vendi wovalimburukwi ntani age nga va tara asi mulyo kwendi.—Ex. 34:6.

 ⁸ Mokumona asi upangeli waJehova mulyo unene, kapi yina kutanta asi vantu ndi ezoworo lyawo kwato mulyo. Jehova ga tu hara unene. Nye yomulyo po, twa hepa kudemenena unene koupangeli wendi nokuukwatesa ko.

9. Yisinke ga tente Satana kuhamena Joba? (Tara efano pepenuno 22.)

⁹ Mobuke zaJoba, kwa zogera mo eyi ya karera nomulyo kukara nomutaro gouhunga kuhamena upangeli waJehova. Satana kwa uyungire asi Joba nsene a ligwanekera nomaudigu gomanene ta hageke kukarera Karunga. Satana yipo ga pulire Karunga a pe Joba mahepeko. Nye Jehova kapi ga yi rugene oyo, age kwa pulisilire Satana a heteke Joba nokutanta asi: “Nayinye eyi ga weka tani yi gava mepangero lyoge.” (Resa Joba 1:7-12.) Joba yipo ga zumbanesere varugani noyiweka ntani vana vendi murongo. Satana kwa yi rugene monkedi ezi za ninkisire yi moneke ngwendi Karunga yige ga reterere Joba maudigu. (Joba 1:13-19) Satana ta retere hena Joba uvera wokukora unene. (Joba 2:7) Ano vakaume vaJoba namukadendi kwa gwederere ko koudigu wendi morwa kapi va mu hengagwidire.—Joba 2:9; 3:11; 16:2.

10. (a) Ngapi omu Joba ga likidire ulimburukwi kwaKarunga? (b) Monkedi musinke ga dilire kukara nomutaro gouhunga?

¹⁰ Yitundwamo musinke ya kere? Eyi ga tente Satana kuhamena Joba kwa ya li horwere asi yimpempa. Joba ga nyokere kuteza po ulimburukwi wendi kwaKarunga. (Joba 27:5) Nye pokaruwogona, Joba kapi ga kere nomutaro gouhunga. Age kwa uyungire asi kwato epuko eli ga rugene ntani ga here kudiva konda zeyi ga pitilire momaudigu. (Joba 7:20; 13:24) Kuvhura tu kwate egano omu ga lizuvhire Joba, nye Karunga ga mwene hepero zokuvyukisa magazaro gaJoba. Yisinke Jehova ga tantererere Joba?

11, 12. Yisinke Jehova ga vaterere Joba a dimburure, ntani ngapi Joba ga tere mavyukiso gaJehova?

¹¹ Nonkango edi Karunga ga tantererere Joba kudigwana mobuke zaJoba egaununo 38 dogoro 41. Momagaununo ogo kapi va tumbura mo asi Karunga ga vyukilire kutantera Joba konda zeyi ga ligwanekerere nomaudigu. Sitambo kapi sa kere asi Jehova a fatwilire Joba konda zeyi ga pitilire momaudigu. Nye Jehova kwa here kuvatera Joba a dimburure asi ngaKarunga age munankondo. Ntani age kwa vaterere hena Joba a dimburure asi pwa kere sininke somulyo kupitakana maudigu  gendi. (Resa Joba 38:18-21.) Nonkango daJehova kwa vaterere Joba a kare hena nomutaro gouhunga.

¹² Ngoso Jehova kapi ga kere nonkenda pokugava mavyukiso kwaJoba age opo kuna kupita momaudigu gomanene ndi? Hawe, ntani Joba kapisi yimo ga yi tere ngoso. Nampili ngomu ga pitire momaudigu, age ga ga tambwire nokulikida rupandu komavyukiso va mu pere. Joba kwa tente asi: “Yipo nye nina lifire nomuga kweyi nayinye na tanta ni litezwilire mombundu nemenoto.” Nonkango odo kulikida omu Joba ga mu twire komutjima mavyukiso gaJehova ntani ga gwanenene mo ekorangedo. (Joba 42:1-6) Elihu mudinkantugara nage kwa vaterere Joba a rundurure magazaro gendi. (Joba 32:5-10) Apa Joba ga tambwire mapukururo gaJehova nokurundurura mutaro gwendi, Jehova yipo ga likidire vakwawo vaJoba asi ulimburukwi wendi una mu hafesa.—Joba 42:7, 8.

13. Ngapi mavyukiso gaJehova ga twikilire kuvatera Joba konyima zokupita momaudigu?

¹³ Mavyukiso gaJehova ga twikilire kuvatera Joba nampili apa ga hege maudigu gendi. Monkedi musinke? Nampili ngomu Jehova ‘ga tungikire ukaro wokuhulilira waJoba kupitakana omu ga mu tungikire muhowo,’ nye pwa pitire siruwo. Konyima ga ya kere ‘novana vatano-navavali wovagara nava wovakadi vatatu.’ (Joba 42:12-14) Joba nga rongora vana vendi ava ga dipagere Satana. Poyiruwo yimwe nga diworoka maudigu aga ga ligwanekerere nago. Nampili ngomu konyima ga ya kwete egano konda zeyi ga heperere, nampo poyiruwo yimwe nga lipura eyi Karunga ga mu pulisilire a pite momaudigu gomanene. Yi kare asi yisinke ga gazarere, age ga tedere ko komavyukiso gaKarunga. Pokurugana ngoso, ya mu vaterere a twikire kukara nomutaro gouhunga nokugwana ehengagwido.—Epis. 94:19.

14. Yisinke natu lirongera ko kwaJoba?

¹⁴ Nose kuvhura tu kare nomutaro gouhunga nokugwana ehengagwido pokuteda ko kosihorokwa saJoba. Jehova kwa tura sihorokwa saJoba moBibeli yipo ‘si tu ronge, tu kare nehuguvaro eli ali tundu medidimiko nehengagwido.’ (Rom. 15:4) Yisinke natu lirongera ko? Kapisi tu demenene unene komaudigu getu dogoro ga tu ninkise tu divare kugazara sininke somulyo po sokuhungameka upangeli waJehova. Ngwendi Joba, tu twikireni kukwatesa ko upangeli waJehova pokulimburukwa nampili momaudigu gomanene.

15. Yisinke atu sikisa mo apa atu kara noulimburukwi momahepeko?

 ¹⁵ Morwasinke ayi tu hengagwidire nsene tu gazadara ko komulyo goulimburukwi wetu? Morwa apa atu kara noulimburukwi momahepeko, ose kusikisa mo sininke somulyo. Maudigu kapi aga likida asi Jehova kapi ana tu hafere nye ago kutupa mpito tu likide ekwatesoko lyetu koupangeli wendi. (Yis. 27:11) Apa atu lididimike noulimburukwi ose kuhafesa Jehova ntani kupameka ehuguvaro lyetu lyokomeho. (Resa Varoma 5:3-5.) Sihorokwa saJoba kulikida asi Jehova “mufenkenda, age munambili.” (Jak. 5:11) Nsene tu kwatesa ko upangeli wendi, Jehova ngatu tungika. Pokudiva oyo ngayi tu vatera tu ‘didimike momaudigu nagenye nehafo.’—Koros. 1:11.

16. Morwasinke natu diworokera nkenye apa mulyo gokukwatesa ko upangeli waJehova?

¹⁶ Ayo kapisi ureru kutwikira kudemenena koupangeli waJehova. Pamwe maudigu getu kuvhura kutuvhukira unene. Nampili maudigu gomanunu kuvhura ga kare gomanene nsene tu ga gazadara nkenye apa. Yiyo nye twa hepera kulidiworokesa nkenye apa mulyo gokukwatesa ko upangeli waKarunga nsene tuna kara momaudigu.

17. Ngapi omu ngayi tu vatera nsene tu litura mo unene mosirugana saJehova?

¹⁷ Kulitura mo unene nkenye apa mosirugana saJehova kuvhura kutuvatera tu demenene koupangeli wendi. Pasihonena, munazinyetu gedina Renee kwa mu gwene urema nokukora unene ntani uvera wokankera. Apa ga kere mosipangero, age nga zuvhisire varugani vamo novaveli ntani nava ngava wiza va ya dingure. Kosipangero simwe, age kwa zuvhisire novili dokusika po-80 moyivike yivali noharufa. Nampili ngomu Renee ga divire asi ta fu, age simpe kwa demenene koupangeli waJehova. Oyo kwa mu vaterere a dire kudompa unene mutjima.

18. Ngapi sihorokwa samunazinyetukadi asi likida mulyo gokudemenena koupangeli waJehova?

¹⁸ Kuvhura hena tu kwatese ko upangeli waJehova nampili kuna kupita momaudigu gomanunu. Jennifer kwa ndindilire pokapare ndira mazuva gatatu. Nondira nadinye edi ga ndindilire kapi da katukire. Age kwa lizuvhire eroroko nomukuma. Nye mevango lyokulifira mwene nkenda, age kwa kanderere a gwane nonkondo omu na vhura kuvatera vantu ava nawo va kere moukaro wendi. Yitundwamo? Age kwa zuvhisilire vantu wovanzi nokuhanesa yimbapiratjangwa yoyinzi. Age kwa tanta asi: “Ame kwa lizuvhire asi Jehova kwa tungikire nge momaudigu gange ntani ga pere nge nonkondo dokuyererepeka edina lyendi.” Yosili age kwa demenene kositambo saJehova.

19. Yisinke ava rugana vakareli vaJehova kuhamena upangeli wendi?

¹⁹ Vakareli vaJehova velike va kwata nawa egano mulyo goupangeli wendi. Awo nare va gusa kukwatesa ko upangeli waKarunga. Ngomu tuna kukwatesa ko ukareli wousili, nkenye gumwe gwetu ngano a twikire kukwatesa ko upangeli waJehova.

20. Ngapi omu Jehova a lizuvhu kweyi o litura mo mokukwatesa ko upangeli wendi?

²⁰ Jehova kunomena ntani kumuhafesa nayinye eyi o rugana mokukwatesa ko upangeli wendi noulimburukwi nokulididimikira maudigu. (Epis. 18:25) Sirongwa sokukwama ko ngasi ka zogera asi eyi no kwatesera ko upangeli waJehova nomutjima goge nagunye ntani nomu no yi rugana.