1, 2. Yisinke ga hepa kutambura nkenye muntu? (Tara efano.)

NGAMOOMU katu yi zogerere mosirongwa sina ka pita, Satana kwa tanta asi Jehova mupangeli gomudona ntani vantu kugwana ruhafo nsene va lipangera vene. Nye oyo usili ndi? Vantu nsene va paruka narunye nokulipangera vene, kuvhura ngava kare noruhafo kupitakana pokuvapangera Karunga ndi? Ove ngo kara noruhafo nsene o paruka narunye nokulipangera nyaamoge ndi?

² Kwato gokuvhura kukulimbwilira po mapuro ogo. Nkenye muntu ga hepa kugazadara ko komapuro ogo. Mokurugana ngoso, ngayi lihorora asi Karunga yige ga wapera kupangera. Ntani twa hepa kukwatesa ko upangeli wendi nomutjima nagunye. Bibeli za gava konda zeyi natu kwatesera ko upangeli wendi. Tu tareni eyi za uyunga ko Bibeli eyi natu yi pulira asi Jehova yige gelike ga wapera kupangera.

3. Morwasinke Jehova gelike ga wapera kupangera?

³ Jehova ga wapera kupangera uzuni naunye morwa age Karunga Munankondo nadinye ntani age Musiti. (1 Hist. 29:11; Yirug. 4:24) MEhororo 4:11, ava ngava ka pangera naKristusa  meguru, kwa uyungire memoneko asi: “Ove Hompa Karunga gwetu, uyerere nefumano nononkondo yoge, yeeyi nyove wa sita nayinye, ano mpango zoge yizo za pakesa po nayinye, yi pwe kusita.” Mokumona asi Jehova yige ga sita nayinye, ga kara nounankondo wokupangera vantu ntani noyisitwa yemeguru.

4. Morwasinke umanguruki wokutura po matokoro nau dira kutupa nonkondo dokunyokera upangeli waKarunga?

⁴ Satana kwato eyi ga sita. Eyi yiyo ga dilira kuwapera kupangera. Satana naAdamu naEva kwa linenepekere apa va dilire kumulimburukwa Jehova. (Jer. 10:23) Nampili ngomu va va sitire noumanguruki wokutura po matokoro gavene, kapi ya va pere umanguruki wokunyoka upangeli waKarunga. Umanguruki owo kuninkisa muntu a vhure kutura po matokoro gomawa nkenye ezuva. Nampili ngoso, vantu kapi va kara nononkondo dokurwanesa Musiti gwawo ogu gava pa eparu. Yipo nye, nsene tu ruganesa momudona umanguruki wetu ose ngoso kuna kurwanesa upangeli waJehova. Ngovantu ose twa hepa upangeli waJehova nomavyukiso gendi.

5. Morwasinke natu karera nehuguvaro asi matokoro gaKarunga ga hungama?

⁵ Pwa kara hena konda zimwe zeyi Jehova ga wapera kupangera. Age kuruganesa unankondo wendi monkedi zouhunga. Age kwa tanta asi: “Ogu ana hara kulitanga, a litangere nondunge dokudiva nge, morwa eharo lyange lyanarunye, hena ame kurugana eyi ya vyuka ya hungama. Eyi yiyo ayi hafesa nge. Ame HOMPA, nyame na yi uyunga.” (Jer. 9:24) Jehova kapi ga hepa noveta dovantu di vhure kumuvatera a tokore eyi ya hungama. Nye age kwa pa vantu noveta edi nava kwama morwa age kwa hungama. Yipo nye, kuvhura tu kare nehuguvaro asi noveta nonompango nomatokoro gendi ya hungama morwa ‘untungi wendi kwa u tatekera kouhungami nousili.’ (Epis. 89:14; 119:128) Nampili ngomu Satana ga tanta asi Jehova mupangeli gomudona, nye mwene ya mu sumpira kuretesa po uhungami nombili mouzuni.

6. Konda musinke zeyi Jehova ga wapera kupangera uzuni?

⁶ Ntani hena konda zimwe zeyi Jehova ga wapera kupangera kuna kara asi age ga kara nediwo nounongo mokupakera mbili yisitwa nayinye. Pasihonena, Karunga kwa pere Munwendi nonkondo dokuverura mauvera aga ava dili kuvhura kuverura vandokotora. (Mat. 4:23, 24; Mar. 5:25-29) Yininke oyo ose kuyimona asi yitetu, nye kwaJehova kapisi yitetu. Age ga diva omu aru rugana rutu ntani ga kara nononkondo dokuwapeka nkenye eyi nayi yipa mo morutu. Ntani ga kara hena nononkondo dokuvhumbura vafe ntani kukandana po yimpagwa.

7. Ngapi unongo waJehova wa lisiga nounongo womapangero gomouzuni waSatana?

⁷ Mapangero gomouzuni waSatana simpe kuna kukondja mokuretesa po mbili monomukunda ndi moyirongo, nye Jehova gelike ga kara nediwo lyokuretesa po mbili mouzuni. (Jes. 2:3, 4; 54:13) Apa atu lirongo kuhamena ediwo nounongo ou ga kara nawo Jehova, ose kulizuvha ngwendi mupositoli Paurusa ogu ga tjenge asi: “Ee, ugawo waKarunga kounzi! Ukonentu wendi nediwo lyendi unzigona! Yilye ogu gokuvhura kusingonona nompangera dendi? Di kare nonzira dendi yilye ogu gokudikwata egano?”—Rom. 11:33.

8. Ngapi o lizuvhu monkedi omu Jehova a ruganesa upangeli wendi?

⁸ Bibeli kapi tupu za tumbura asi Jehova yige ga wapera kupangera. Nye azo kwa tumbura  hena eyi upangeli wendi wa karera wouwa po. Konda zimwe kuna kara asi upangeli wendi kwau tatekera keharo. Yosili, ayo kutuhafesa monkedi omu a ruganesa upangeli wendi. Age ‘mufenkenda, age Karunga gombili nomudidimiki. Uwa wendi unzi [ndi eharo lyendi enene], age mulimburukwi.’ (Ex. 34:6) Karunga kutekura vakareli vendi nefumadeko. Age hena kuvapakera mbili kupitakana omu ava lipakere vene mbili. Ayo kwa lisiga neyi ga tente Satana asi Jehova kuhorekera vakareli vendi wovalimburukwi yininke yoyiwa. Karunga kwa tumine hena Munwendi aya fire vantu yipo ngava ka paruke narunye.—Resa Episarome 84:11; Varoma 8:32.

9. Ngapi twa yi diva asi Karunga kapi tupu a pakere mbili vantu vendi ngombunga?

⁹ Jehova kapi tupu a pakere mbili vantu vendi ngombunga. Nye hena age kupakera mbili nkenye muntu pwagelike. Pasihonena, posiruwo sanare Jehova kwa ruganesere vapanguli mokupitisira nokupopera muhoko goVaisraeli kononkore dawo. Posiruwo esi ya horokere oyo, pwa kere mukadi gedina Rutu gomomuhoko gwapeke ogu ga tulire po marunduruko nokuyahama koukareli wousili woVaisraeli. Jehova ga nongwenene Rutu nokumutungika pokumupa mugara ntani nomuna gomumati. Nye kapisi yiyo yelike ga mu ruganenene. Apa nga ka vhumbuka Rutu, age nga ka diva asi munwendi kwa ya kere gomoruvharo omu ga ya tundire Mesiyasa. Ntani gazara tupu omu Rutu nga ka hafa pokukadiva asi sihorokwa sendi naso kwa si tjanga mobuke zomoBibeli ezi va tumbura kedina lyendi.—Rutu. 4:13; Mat. 1:5, 16.

10. Morwasinke natu uyungira asi Jehova kapi a pangere monkedi zonyanya?

¹⁰ Jehova kapi a pangere monkedi zonyanya. Upangeli wendi kutupa umanguruki noruhafo. (2 Kol. 3:17) Ndafita kwa tente asi: “Uyerere nefumano kwa mu kundurukida, unankondo nehafo kwa zura ntembeli zendi.” (1 Hist. 16:7, 27) Mutjangi gepisarome Etani kwa tjenge asi: “Va kara nerago vantu ava ava ku tongamene nononsumo, ava va kara mouzera wouwa woge. Mwaroge ava hafa ezuva mudima va ku pwandwire uwa woge.”—Epis. 89:15, 16.

11. Yisinke natu rugana yipo tu kare nepuro lyenene asi upangeli waJehova yiwo wouwa po?

¹¹ Nsene tu teda ko nkenye apa kosikara saJehova souwa, yimo ngatu kara nepuro lyenene asi upangeli wendi yiwo wouwa po. Ose ngatu lizuvha ngwendi mutjangi gepisarome ogu ga tente asi: “Kukara ezuva limwe montembeli zoge kwa pitakana mazuva eyovi gokukara pwapeke.” (Epis. 84:10) NgoMusiti gwetu, Jehova ga diva eyi nayi vhura kutuhafesa ntani age kuyitupa nkenye apa. Nkenye eyi atu pura Jehova tu rugane ose kugwanena mo uwa ntani kuturetera ruhafo, nampili yi kare asi twa hepa kutura po malizambero.—Resa Jesaya 48:17.

12. Konda musinke natu harera kukwatesa ko upangeli waJehova?

¹² Bibeli kwa tanta asi konyima zEpangero lyoNomumvho Eyovi lyaKristusa, vamwe ngava ka rwanesa upangeli waJehova. (Ehor. 20:7, 8) Yisinke ngayi ka va ninkisa va dire kulimburukwa? Satana ngava ka mu mangurura modorongo ntani age nga ka pukisa vantu va kwame madowo gokuliharera vene eyi va hara ngamoomu ga yi rugene nare. Nampo nga ka heteka kuninkisa vantu va yi pure asi awo kuvhura va paruke narunye va hana kulimburukwa Jehova. Nye owo kapisi usili. Yipo nye, twa hepa kulipura asi: Egano olyo kuvhura ngali ka tu pukise ndi? Nsene asi twa hara Jehova nokumukarera morwa sikara sendi  souwa ntani morwa age ga wapera kupangera, ose kapi ngatu ka kwama yimpempa oyo yaSatana. Ose ngatu ka hara kukakara mepangero lyaJehova ogu a pangere neharo.

13. Monkedi musinke hena natu kwatesa ko upangeli waJehova?

¹³ Ayo ya wapa kukwatesa ko upangeli waJehova nomutjima gwetu nagunye. Ngomu tuna yi zogere, age ga wapera kupangera ntani age kupangera monkedi zongwa. Ose kuvhura tu kwatese ko upangeli wendi pokumukarera noulimburukwi. Monkedi musinke hena natu vhura kumukwatesa ko? Pokurugana yininke kuliza nomu ga yi harera. Apa atu mu honene Jehova, ose kulikida asi twa mu hara ntani kuna kukwatesa ko upangeli wendi.—Resa Vaefeso 5:1, 2.

14. Ngapi vakuronambunga novanturagumbo nava honena Jehova?

¹⁴ Ose twa lironga moBibeli asi Jehova kupangera monkedi zeharo. Yipo nye, vanturagumbo novakuronambunga ava va hara upangeli waJehova, kapi ngava ruganesa upangeli wawo momudona. Nye awo ngava honena Jehova. Paurusa ga honenene Karunga naMunwendi. (1 Kol. 11:1) Paurusa kapi nga rugana yininke eyi ngayi ninkisa vakwawo va lizuvhe nomuga ndi a va sininike va rugane yuma. Nye age ngava korangeda va yi rugane. (Rom. 12:1; Efe. 4:1; Fir. 8-10) Monkedi ozo yimo Jehova a ruganesa upangeli wendi. Yimo ngano twa hepa kukara natuvenye ava twa mu hara nokukwatesa ko upangeli wendi.

15. Morwasinke natu limburukwira kwava ga tu pa Jehova va tu pitisire?

¹⁵ Ngapi omu natu tara ava ga tura po Karunga va tu pitisire? Pokuvakwatesa ko noulimburukwi ose kulikida asi kuna kukwatesa ko upangeli waJehova. Nampili kapi tuna kwata egano ndi kapi tuna hafere etokoro vana tura po, simpe twa hepa kukwatesa ko nkedi zaJehova  omu a rugana yininke. Nkareso zovantu womouzuni za lisiga, nye nsene twa tambura upangeli waJehova twa hepa kukara vantu wovalimburukwi. (Efe. 5:22, 23; 6:1-3; Heb. 13:17) Ose ngatu gwanena mo uwa nsene tu limburukwa, morwa Karunga kwa tu harera uwa.

16. Ngapi omu natu likida kupitira momatokoro getu asi ose kuna kukwatesa ko upangeli waKarunga?

¹⁶ Ose kukwatesa ko hena upangeli waKarunga kupitira momatokoro aga atu tura po. Jehova kapi ga tu pa nompangera dokuvyukilira kwankenye ukaro. Nye age kwa tu pa mavyukiso aga aga likida omu a lizuvhu. Pasihonena, age kapi ga tu pa elikwamo lyoyidwara eyi twa hepa kudwara ose Vakriste. Nye age kwa tu pa mavyukiso asi tu dware nokuliwapaika monkedi zongwa zokuliza nezi za wapera Vakriste. (1 Tim. 2:9, 10) Ntani age kapi ga hara asi matokoro getu ga pundukise wopeke. (1 Kol. 10:31-33) Nsene tu tokora kuliza nomutaro gwaJehova nye kapisi gwanyamwetu, ose ngatu likida asi twa mu hara ntani kuna kukwatesa ko upangeli wendi.

17, 18. Mononkedi musinke valikwali nava vhura kukwatesa ko upangeli waJehova?

¹⁷ Tu tareni nkedi zimwe omu valikwali woVakirste nava likida asi kuna kukwatesa ko upangeli waJehova. Ngapi nsene nonkwara deni kapi dina kugenda po kuliza nomu wa yi ndindilire? Nampo walye muna kara nomaudigu gomanene. Nsene yimo ngoso, gazadara ko omu Jehova ga tekwire muhoko goVaisraeli. Age kwa litumbwire mwene asi mugara gwawo. (Jes. 54:5; 62:4) Ado kwa kere nonkwara doudigu dopasifanekeso. Nye Jehova kapi ga gendererere kuvazumba. Age ngava gusire po nkenye apa nokusikisa mo egwanekero eli ga tulire po nawo. (Resa Episarome 106:43-45.) Eharo lyaJehova lyanarunye ngano li tutumangede tu hedere pepi nendi.

¹⁸ Mokulifana, valikwali ava va hara Jehova, awo kuhetekera ko kumuhonena. Awo kapi ava papara nokonda da hana asi doPatjangwa va teze po nonkwara dawo. Awo va yi diva asi Jehova yige ga va gwanekedesa kumwe ntani kapi ana hara va ‘ligaunuke.’ Kuhondera yizo zelike konda zoPatjangwa va pulisira zokuvhura kulizumba nomulikwali goge ntani no manguruka kukakwara hena. (Mat. 19:5, 6, 9) Apa Vakriste ava kondjo paapa va hulira mokukohonona po maudigu mononkwara dawo, awo kulikida asi kuna kukwatesa ko upangeli waJehova.

19. Yisinke natu rugana nsene tuna zono?

¹⁹ Poyiruwo yimwe ose kurugana yininke eyi ayi guvisa Jehova, morwa kapi twa sikilira mo. Jehova ga yi diva oyo, yiyo ga tu pera sizoweseso saKristusa. Yipo nye, nsene tuna zono, twa hepa kuhundira Jehova a tu gusire po. (1 Joh. 2:1, 2) Mevango lyokutwikira kulipa nyamwetu usima, twa hepa kulirongera ko komapuko getu. Nsene tu hedera pepi naJehova, age nga tu gusira po ntani nga tu vatera tu dire kudompa mutjima ntani tu dive eyi ngatu vhura kurugana nsene tu ligwanekera noukaro wokulifana.—Epis. 103:3.

20. Morwasinke twa hepera kukwatesa ko upangeli waJehova ngesi?

²⁰ Mouzuni woupe, vantu navenye ngava ka kara mepangero lyaJehova ntani ngava ka kara nediwo lyokumuhamena. (Jes. 11:9) Nampili naina, ose kuna kulironga yoyinzi kuhamena Jehova. Ano komeho, kwato ogu nga ka rwanesa upangeli waJehova. Yipo nye, ngesi tu kwateseni ko upangeli waKarunga pokumulimburukwa nokumukarera ntani nokuhetekera ko kumuhonena mwanayinye eyi atu rugana.