EVANGELI lyaMateusa kwa uyunga asi: “Konyima zeyi ntani ana hwilire Jesus montembeli. Makura ta tjida mo varandi novarandesi navenye montembeli. Yitafura yovasinti woyimaliva noyipundi yovarandesi wonomputukuwa ta yi gandanga. Makura age ta va tantere asi: ‘Kwa tjangwa va tjanga asi, “Nzugo zange ava zi tumbure asi nzugo zokukandererera.” Ano one yiyo muna zi paka zi kare sipwapwa sovamahaka.’”—Mat. 21:12, 13.

Kuliza nomauzera goVajuda kwa likida asi varandesi wopontembeli ngava fukire varandi pokuvafutisa ndando zonene. Pasihonena, umbangi umwe kwa likida asi mukoso gonomputukuwa mbali kwa zerukire unene. Mukoso gwado kwa ka sikire koyimaliwa eyi ga vhulire kugwana muntu pokurugana mazuva 25. Vanaruhepo kwa va pulisilire kugava nonzambo donomputukuwa ndi nonkutji nye mukoso gwayo kwa zerukire unene. (Lev. 1:14; 5:7; 12:6-8) Mulirongi Simeon ben Gamaliel kapi za mu hafesere ndando ezi va tulisire po varandesi, yipo ga tokwere kugurumwisa ko mukoso gonomputukuwa mbali.

Mauzera aga tuna konakona, Jesus ga wapekere kutumbura varandesi womontembeli asi ‘vanamahaka’ morwa awo ngava fukilire mo vakwawo.