1. Sininke musinke asi tu ninkisa tu lisige noyikorama?

SININKE simwe esi asi ninkisa vantu va lisige noyikorama kuna kara ezwi lyokomutjima. Ngapi twa yi diva asi Adamu naEva kwa kere nezwi lyokomutjima? Apa va tezere po Veta zaJehova awo kwa vende. Eyi kulikida asi ezwi lyawo lyokomutjima kwa va pangwire.

2. Ngapi omu ezwi lyokomutjima natu li hetakanesa kombwa?

² Ezwi lyokomutjima eli va dira kudeura kuvhura kulihetakanesa kombwa ezi azi dili kuhuda. Eyi kuvhura kukara siponga morwa muwidi kuvhura a wize nokuyavaka membo. Nye nsene mbwa va zi deura nawa azo kuvhura kupopera yiweka yahekurwazo. Ezwi lyetu lyokomutjima kuvhura kulihetakanesa kombwa ezi va deura nawa. Mokulifana nsene tu deura nawa ezwi lyetu lyokomutjima ngali tu pitisira.

3. Yisinke nayi horoka nsene tu dira kudeura nawa ezwi lyetu lyokomutjima?

³ Ezwi lyokomutjima eli va dira kudeura kapi ali rondora muntu a nyokere po kurugana udona. (1 Tim. 4:1, 2) Alyo  hena kuvhura kutupukisa tu gazare “udona asi uwa.” (Jes. 5:20) Jesus kwa tanterere varongwa vendi asi: “Mazuva taga wiza, apa ngava gazara nkenye ogu gokumudipaga asi age ta kerere Karunga.” (Joh. 16:2) Ava va dipagere Sitefanesa yimo va gazarere ngoso, ntani vantu wovanzi nawo yimo ava gazara ngoso. (Yirug. 6:8, 12; 7:54-60) Maukarelikarunga gamwe kwa rugana ukorokotji ngwendi edipago morwa awo kugazara asi kuna kuyiruganena Karunga. Nye ayo kwa lilimba nonoveta dendi. (Ex. 20:13) Eyi kulikida asi ezwi lyawo lyokomutjima kapi ali va pitisire nawa.

4. Ngapi natu deura ezwi lyetu lyokomutjima?

⁴ Ngapi natu deura ezwi lyetu lyokomutjima? Noveta nomagano gaKarunga kwa ‘kara nomulyo gokuronga usili. Ago kukorangeda nokupukurura nokurongesa uhungami.’ (2 Tim. 3:16) Yipo nye, pokulironga Bibeli nokuteda ko ntani nokutura pasirugana eyi tuna kulironga ngatu deura ezwi lyetu lyokomutjima. Alyo ngali tu vatera tu dive eyi ga hara Karunga, ntani ngali tu pitisira. Tu konakoneni omu noveta nomagano gaKarunga nayi tu vatera tu deure ezwi lyetu lyokomutjima.

5, 6. Ngapi atu gwanene mo mauwa pokukwama noveta daKarunga?

⁵ Nsene tuna hara kugwanena mo uwa monoveta daKarunga twa hepa kurugana yoyinzi kupitakana tupu kudiresa nokudidiva. Twa hepa hena kudihara nokudisikisa mo. Bibeli kutanta asi: “Omu nyenge eyi ya yipa, tomu hara yoyiwa.” (Amosa 5:15) Nye ngapi omu nayi tu tompoka oyo? Twa hepa kutara yininke ngamoomu ayi tara Jehova. Mokuyifanekesa: Tu tante asi ayo kukudigopera kuponyoka. Ano ndokotora ta ku tantere o lye nondya dokukanguka nokuhufena ntani nokurugana hena yimwe meparu. Ano konyima to mono asi yininke oyo kuna kukuvatera. Yosili, ayo nayi kuhafesa kweyi ndokotora ga ku vatera yipo yi ku tompoke meparu.

⁶ Mokulifana, Musiti gwetu kwa tu pa noveta edi adi tu popere koyitundwamo yononzo ntani ayo kutuvatera yi tu tompoke meparu. Pasihonena, Bibeli kuturonga tu nyokere po yimpempa nowidi noruhonda nonyanya ntani umpure. (Resa Yisewe 6:16-19; Ehor. 21:8) Apa atu li monene mauwa aga aga tundu mokulimburukwa Jehova, ayo kutuvatera tu mu hare unene noNoveta dendi.

7. Ngapi omu kuresa nokuteda ko koyihorokwa yomoBibeli ayi tu vatere?

⁷ Ayo kapi tayi wapa kuteza po noveta daKarunga yipo tu lirongere ko asi eyi yiwa ndi yidona. Kuvhura tu lirongere ko komapuko gavamwe ava va tumbura moBibeli. Yisewe 15:31 kutanta asi: “Nsene kupurakena apa ava ku pukurura, ove o munongo.” Yosili, ose kugwana mapukururo gokutunda kwaKarunga apa atu resa nokuteda koyihorokwa yomoBibeli. Pasihonena, gazadara ko kukora oku ga lizuvhire hompa Ndafita apa ga dilire kulimburukwa Jehova nokuhondera naBateseba. (2 Sam. 12:7-14) Ngomu atu resa sihorokwa esi, twa hepa kulipura asi: ‘Ngapi ngano Ndafita ga hendukire yitundwamo yoyidona? Ngano nyame ya horokekere, yisinke ngano na rugene? Ngano na dukire ngwendi Josefa  ndi ngano na honderere ngwendi Ndafita?’ (Gen. 39:11-15) Nsene tu gazadara ko koyitundwamo eyi azi reta nzo ose ngatu ‘nyenga yoyidona.’

8, 9. (a) Yisinke ali rugana ezwi lyetu lyokomutjima? (b) Ngapi omu ezwi lyetu lyokomutjima ali ruganene kumwe nomagano gaKarunga?

⁸ Ose kunyokera po kurugana eyi ga nyenga Karunga. Nye pwa karamoukaro omu Bibeli za dira kuvyukilira kutumbura asi sininke songandi sidona. Moukaro wangoso, ngapi natu diva eyi ayi hafesa Karunga? Nsene asi twa deura ezwi lyetu lyokomutjima, alyo ngali tu vatera.

⁹ Jehova kwa tu pa magano gendi gomoBibeli mokutuvatera tu deure ezwi lyetu lyokomutjima. Age kwa tanta asi: “Ame nyame HOMPA Karunga goge, ogu ga hara kukuronga morwauwa waamoge a ku likide nzira ezi no genda.” (Jes. 48:17, 18) Nsene tu teda ko komagano gaKarunga ngatu deura ezwi lyetu lyokomutjima. Ano ayo ngayi tu vatera tu ture po matokoro gomawa.

10. Yisinke magano gaKarunga, ntani ngapi omu ga ga ruganesere Jesus?

¹⁰ Magano gaKarunga kuna kara erongo lyoBibeli eli ali tu vatere tu gazare nawa yipo tu ture po matokoro gomawa. Mokukwata egano magano gendi twa hepa kukwata egano omu a gazara ntani neyi ga tu pera noveta. Jesus nga rugesa magano gaKarunga mokuronga varongwa vendi va dimburure yitundwamo yoyirugana yawo. Pasihonena, age kwa va rongere asi ehandu kutwaredesa konyanya, ano magazaro gomadona kutwaredesa koruhonda. (Mat. 5:21, 22, 27, 28) Mokudeura ezwi lyetu lyokomutjima twa hepa kukwama magano gaKarunga, ano oyo ngayi tu vatera tu ture po matokoro gomawa aga aga reta eyererepeko kwaJehova.—1 Kol. 10:31.

11. Ngapi ezwi lyetu lyokomutjima lya lisiga neli lyava wopeke?

¹¹ Vakriste ava va deura ezwi lyawo lyokomutjima kuvhura kutura po matokoro gokulisiga. Konakona kuhamena yikorwesa. Bibeli kapi za silika kunwa marovhu. Nye azo kwa silika kunwa unene ndi unkorwe. (Yis. 20:1; 1 Tim. 3:8) Eyi kutanta nye asi Mukriste kapi ta vhuru kugazadara ko wopeke nampili kapi a nu unene ndi? Hawe. Nampili ezwi lyendi lyokomutjima li mu pulisire kunwa marovhu, simpe ga hepa kugazadara ko ezwi lyokomutjima lyava wopeke.

12. Ngapi etjangwa lyomoVaroma 14:21 ali tu vatere tu fumadeke ezwi lyokomutjima lyava wopeke?

¹² Paurusa kwa likidire omu ya kara nomulyo kufumadeka ezwi lyokomutjima lyava wopeke. Age kwa tjenge asi: “Yoyiwa po yokudira kulya nyama ndi o nwe vhinyu, ndi o rugane nkenye eyi yokupukisisa mukweni.” (Rom. 14:21) Kuvhura o nyokere po kurugana yininke eyi wa diva asi kuvhura yi pundukise wopeke ndi? Yimo, kuvhura o yi rugane. Vanavazinyetu vamwe komeho va wize mousili ngava nu unene marovhu, nye ngesi kapi va hara hena kunwa. Ayo kapi nayi wapa kurugana yininke eyi nayi va ninkisa va tengwire konkareso zawo zanare. (1 Kol. 6:9, 10) Yipo nye, kapisi tu sininike munazinyetu a nwe marovhu nsene ana nyoka.

13. Ngapi Timoteusa ga fumadekere ezwi lyokomutjima lyava wopeke?

 ¹³ Apa Timoteusa ga kere mudinkantu age kwa mu rugene yovamba nampili ngomu ya kere kukora. Age kwa yi rugene oyo mokudira kupundukisa Vajuda ava nga zuvhisire. Pokurugana ngoso, age kwa honenene Paurusa. (Yirug. 16:3; 1 Kol. 9:19-23) Ngwendi Timoteusa, nove ngano o kondjere uwa wovakweni.

14, 15. (a) Yisinke twa hepa kurugana mokukura pampepo? (b) Yisinke ayi likida asi Mukriste ga kura pampepo?

¹⁴ Vakriste kapisi va kare tupu “petameko lyerongo lyaKristusa” nye va ‘kondjere esikisomo.’ (Heb. 6:1) Kapi atu ya kara Vakriste ava va kura pampepo morwa yeeyi twa kara nomvhura dononzi mousili. Apo pwa hepa elituromo mokukura pampepo. Mokututompoka, twa hepa kugwederera kediwo eli twa kara nalyo nekwatogano lyetu pokuresa Bibeli nkenye ezuva. (Epis. 1:1-3) Ove wa litulira po sitambo sangoso ndi? Pokuresa Bibeli, ngo ya diva magano gaKarunga nonoveta dendi.

¹⁵ Kulihara-hara yizo veta po zomulyo koVakriste. Jesus kwa tanterere varongwa vendi asi: “Nsene mu lihara-hara, yipo ngava divira vantu asi one sili varongwa vange.” (Joh. 13:35) Jakopo mumbyaJesus kwa tumbwire eharo asi “Veta zoUntungi waKarunga.” (Jak. 2:8) Paurusa kwa uyungire asi: “Eharo kusikisa mo Veta mudima.” (Rom. 13:10) Ayo kapi ayi tu tetukisa asi eharo sikara somulyo, morwa Bibeli kuuyunga asi: “Karunga yige eharo.” (1 Joh. 4:8) Nye eharo lyaKarunga kapisi malizuvho tupu. Johanesa kwa tjenge asi: “Karunga omu ga tu horwera eharo lyendi, mokututumina Munwendi thi asi tu parukire mwendi.” (1 Joh. 4:9) Yosili, eharo yilyo lya tumangedere Karunga a rugane ko yuma. Apa atu likida eharo Jehova naMunwendi novanavazinyetu ntani wopeke ayo kulikida asi twa kura pampepo.—Mat. 22:37-39.

16. Morwasinke magano gaKarunga ga karera nomulyo ngomu tuna kukura pampepo?

 ¹⁶ Ngomu tuna kukura pampepo ngatu ya dimburura asi magano gaKarunga mulyo. Noveta kwa vyukilira koukaro wongandi nye magano gaKarunga kutamba koyininke yokulisiga-siga. Pasihonena, munona kapi ga diva omu ya kara siponga kukara novakaume wovadona, yipo nye vakondi vendi va hepa kumutulira po noveta mokumupopera. (1 Kol. 15:33) Nye ngomu munona na ya kura ta ya lirongo kuteda ko komagano gaKarunga. Eyi ngayi mu vatera a ture po matokoro gomawa nokuhorowora vakaume wovawa. (Resa 1 Vakolinte 13:11; 14:20.) Apa atu teda ko komagano gaKarunga, ezwi lyetu lyokomutjima kutupitisira nawa.

17. Yininke musinke nayi tu vatera tu ture po matokoro gomawa?

¹⁷ Ose twa kara noyininke yoyinzi eyi nayi tu vatera tu ture po matokoro gomawa aga aga hafesa Jehova. MoBibeli kwa kara mo noveta nomagano gaKarunga aga naga tu vatera tu ‘sikilire mo, ntani tu fire kurugana yirugana nayinye yoyiwa.’ (2 Tim. 3:16, 17) Yipo nye, papara magano gaKarunga moMatjangwa yipo o ‘dive eyi ga hara Jehova.’ (Efe. 5:17) Mokukuvatera, ruganesa yiruganeso eyi ngwendi Indexi zoRuhungu, Buke zepaparo zoNombangi daJehova ntani BIBILIYOTEKA ZOKOINTERNETA. Yiruganeso eyi kutuvatera yipo tu gwanene mo uwa moukareli wepata ntani melirongo lyanyamwetu lyoBibeli.

18. Mauwa musinke atu gwanene mo apa atu sikisa mo noveta nomagano gaKarunga?

¹⁸ Ose kugwanena mo mauwa apa atu sikisa mo noveta nomagano gaKarunga. Episarome 119:97-100 kutanta asi: “Ee, yireru omu na hara Veta zoge! Ame kuziteda ezuva mudima. Sipango soge ame kwa si kwaterera, aso kupa nge unongo kupitakana nonkore dange nadinye. Ame kuzuvhilira ko kupitakanesa povarongi vange navenye, yeeyi ame kugazara mavyukiso goge. Unongo wange wa pita wovakurona, yeeyi ame kulimburukwa konompangera doge.” Apa atu ‘teda ko’ konoveta nokomagano gaKarunga ose kuyakara nounongo nonondunge. Nsene tu litura mo unene mokuruganesa noveta nomagano gaKarunga tu deure ezwi lyetu lyokomutjima, ngatu ka sika “moukurona wene-wene, ou au tundu kwaKristusa.”—Efe. 4:13.