1, 2. (a) Yisinke ga tumbwire Jesus mekanderero lyendi lyokuhulilira novapositoli vendi? (b) Morwasinke Jesus nampo ga karerere nosinka kuhamena uumwe?

JESUS kwa kere nosinka kuhamena uumwe pomurarero gokuhulilira novapositoli vendi. Apa ga kanderere nawo, age kwa va harerere va kare mouumwe ngwendi moomu ga kara age noGuhwe. (Resa Johanesa 17:20, 21.) Uumwe wovarongwa vendi kwa ya geve umbangi asi Jehova yige ga tumine Jesus a sikise mo mpango zaKarunga. Eharo kwa ninkisire vantu va dimburure asi awo varongwa vaJesus wosili ntani yava ninkisire va kare mouumwe.—Joh. 13:34, 35.

² Ngurova zina Jesus kwa uyungire unene kuhamena uumwe morwa ga yi dimbwilire asi varongwa vendi kapi va kere mouumwe. Pasihonena, awo ‘kwa kere nonompata asi pwawo yilye munene po.’ (Ruk. 22:24-27; Mar. 9:33, 34) Sikando simwe, oJakopo naJohanesa kwa pulire Jesus nsene kuvhura nga ka va pe yipundi yoyinene moUhompa wendi.—Mar. 10:35-40.

3. Yisinke ya ninkisire varongwa vaKristusa va dire kukara mouumwe ntani mapuro musinke natu ka zogera?

 ³ Kuliharera mfumwa kapisi yiso selike sininke sa ninkisire varongwa vaKristusa va dire kukara mouumwe. Vantu womosiruwo sina kwa kere nomaligaunuko morwa elitondororo ntani awo kwa linyengere. Varongwa vaJesus va hepere kunyokera po nkareso ozo. Mosirongwa esi tatu ka zogera mapuro aga: Yisinke ga rugene ko Jesus kuhamena elitondororo? Ngapi omu ga vaterere varongwa vendi va dire kukara nompongo ntani va kare mouumwe? Ntani ngapi omu sihonena sendi nasi tu vatera tu kare mouumwe?

4. Gava yihonena yelitondororo eyi ga ligwanekerere nayo Jesus.

⁴ Jesus nage kwa ligwanekerere nelitondororo. Apa Filipusa ga tanterere Natanayera asi ana gwana Mesiyasa moNasareta, age ta limburura asi: “MoNasareta nani kuvhura kutunda mo yoyiwa?” (Joh. 1:46) Ayo kumoneka asi Natanayera ga divire uporofete wa kara mwaMika 5:2 asi Mesiyasa ngava mu hampurukira moBeterehema. Eyi nampo kwa mu ninkisire a gazare asi Mesiyasa kapi ta vhuru kutunda moNasareta. Vajuda nawo kwa sensere Jesus morwa yeeyi ga kere Mugalireya. (Joh. 7:52) Sinzi soVajuda ngava tara Vagalireya asi kwato mulyo. Ano vamwe kwa swawire Jesus pokumutumbura asi Musamaliya. (Joh. 8:48) Mpo zoVasamaliya ntani ukarelikarunga wawo kwa lisigire nou woVajuda. Vagalireya noVajuda kapi ngava fumadeke Vasamaliya ntani kapi ngava ligendere.—Joh. 4:9.

5. Elitondororo musinke va ligwanekerere nalyo varongwa vaJesus?

⁵ Vampitisili woukarelikarunga woVajuda kwa nyengere varongwa vaJesus. Vafalisayi ngava tara varongwa owo asi “kwa va fingilira.” (Joh. 7:47-49) Ntani hena awo ngava tara nkenye ogu nga dili kuza konosikora doVajuda ndi kukwama mpo zawo asi kwato mulyo. (Yirug. 4:13) Jesus novarongwa vendi kwa ligwanekerere nelitondororo morwa vantu kwa here unene maukarelikarunga gawo nonompo dawo. Nye mokukara mouumwe, varongwa vaJesus va hepere kurundurura mutaro gwawo kovantu.

6. Tumbura ko yihonena eyi ayi likida omu elitondororo ali tu kundama.

⁶ Naina, sinzi sovantu kwa kara nonkareso zelitondororo. Wopeke kuvhura va tu tekure momudona ndi nose kuvhura tu va tekure momudona morwa nkareso ozo. Muzuvhisi gokukarerera gomoAustralia kwa tanta asi: “Nare ame kwa nyengere yirumbu morwa yeeyi ava tekura rudi rwetu momudona. Ame kwa va nyengere morwa yeeyi ngava tekura nge momudona.” Munazinyetu gomugara gomoKanada kwa kere nelitondororo kombinga zeraka. Age kwa tanta asi: “Ame ngani gazara asi vantu ava ava uyunga Rufransa mulyo unene. Konyima ame kwaya nyengere ava ava uyunga Ruingilisa.”

7. Yisinke ga rugene ko Jesus kuhamena elitondororo?

⁷ Naina, nose kuvhura yi tu digopere kusiga nkareso zelitondororo ngwendi moomu ya horokerere vantu womomazuva gaJesus. Yisinke ga rugene ko Jesus kuhamena elitondororo? Pomuhowo, age kwa nyokerere po kukara nompongo. Age hena nga zuvhisire vanangawo novahepwe noVafalisayi noVasamaliya novafutisi womutero ntani vananzo. Sauvali, Jesus kwa rongere varongwa vendi nokuyilikida kupitira mosihonena sendi asi va hepa kunyokera po kugazarera vakwawo ndi kuhara po tupu rudi rongandi.

8. Yisinke ayi reta Vakriste mouumwe? Fatutura.

⁸ Jesus kwa rongere varongwa vendi sitwa somulyo  esi asi tu reta mouumwe. Age kwa tente asi: “Namuvenye vezimo limwe tupu.” (Resa Mateusa 23:8, 9.) Ose “vezimo limwe tupu” morwa natuvenye kwa tundilira moruvharo rwaAdamu. (Yirug. 17:26) Jesus kwa tente hena asi varongwa vendi vemezimo limwe morwa awo kwa tambura Jehova ngaGuhyawo gemeguru. (Mat. 12:50) Ntani awo kwa hamena kepata lyaKarunga eli lya kara mouumwe morwa awo kwa lihara-hara ntani kwa kara nepuro limwe. Eyi yiyo nye vapositoli ngava tumbwire vapuli vakwawo asi “vakwetu” ndi vanavazinyetu monombilive dawo.—Rom. 1:13; 1 Pet. 2:17; 1 Joh. 3:13.

9, 10. (a) Morwasinke Vajuda va heperere kunyokera po kulinenepekera rudi rwawo? (b) Ngapi Jesus ga yi likidire asi ayo epuko kunyenga marudi nagopeke? (Tara efano pepenuno 8.)

⁹ Konyima zapa Jesus ga tanterere varongwa vendi va litekure ngwendi vemezimo limwe, age kwa va tanterere hena va linunupike. (Resa Mateusa 23:11, 12.) Ngamoomu tuna yi zogere, poyiruwo yimwe kulinenepeka kwa ninkisire varongwa vaJesus va dire kukara mouumwe. Ntani vamwe womosiruwo sina kwa here unene marudi gawo. Sinzi soVajuda ngava lizuvhu asi awo mulyo unene kupitakana wopeke morwa awo kwa kere womoruvharo rwaAbirahamu. Nye Johanesa Mukuhwi kwa va tanterere asi: “Karunga kuvhura kuninka mamanya aga, ga kare ruvharo rwaAbirahamu.”—Ruk. 3:8, 9.

¹⁰ Jesus kwa nyengere elitondororo lyoparudi. Ano age kwa yi likidire oyo apa mulirongi goMatjangwa ga mu pulire asi: “Mwene ogo mukwetu yilye?” Mokulimburura epuro lyendi, Jesus kwa mu tanterere sifanekeso kuhamena Musamaliya ogu ga vaterere murugendanzira goMujuda ogu va toonene vanamahaka. Vajuda vamwe ava va ya pitire po kapi va mu vaterere, nye Musamaliya ta mu fire nkenda. Jesus kwa ya hulisire sifanekeso oso pokukorangeda mulirongi gwina goMatjangwa mokuhonena nkareso zoMusamaliya. (Ruk. 10:25-37) Jesus kwa here kuronga Vajuda va hare vantu navenye ngwendi Musamaliya gwina.

11. Morwasinke varongwa vaJesus va heperere kunyokera po mpongo ntani ngapi omu Jesus gava vaterere va yi kwate egano?

¹¹ Komeho Jesus a ze meguru, age kwa tanterere varongwa vendi va zuvhisire “moJerusarema nomoJudeya nazinye nomoSamaliya, dogoro nokooku wa ka twa uzuni.” (Yirug. 1:8) Mokusikisa mo situmbukira oso, varongwa vaJesus va hepere kunyokera po elinenepeko nelitondororo. Jesus nga va rongo va nomene yikara yoyiwa eyi va kara nayo vanayirongo. Eyi kwa ya va vaterere va zuvhisire vantu navenye. Age kwa pandadekere mupitisili goVakwayita woVaroma morwa ga kere nepuro. (Mat. 8:5-10) Ntani hena, Jesus kwa uyungire omu Jehova ga vaterere vanayirongo ngwendi mufisayendi gokoSarufata naNamani goMusiliya ogu ga kere nouvera woyingondwe. (Ruk. 4:25-27) Jesus kapi tupu ga zuvhisilire mukadi goMusamaliya nye hena age kwa kere modoropa zoVasamaliya morwa vantu kwa here kupurakena kombudi zendi.—Joh. 4:21-24, 40.

12, 13. (a) Ngapi omu ya kundamene vapositoli apa Jesus ga rongere mukadi goMusamaliya? (Tara efano pepenuno 8.) (b) Yisinke ya likidire asi Jakopo naJohanesa kapi va kwete egano eyi ga rongere Jesus?

¹² Kapi ya kere ureru kovarongwa vaJesus mokunyokera po elitondororo. Ayo kwava tetukisire apa Jesus ga rongere mukadi goMusamaliya. (Joh. 4:9, 27) Vampitisili woVajuda kapi ngava uyunga nomukadi moyitarameho yovantu unene po nsene ogo mukadi Musamaliya ntani ga kara nonkareso  zondona. Vapositoli kwa tanterere Jesus a lye, nye nondya kapi da kere nomulyo posiruwo oso morwa age kwa demenene konzogera zendi nomukadi ogo. Karunga kwa mu harerere a zuvhise, ano kurugana mpango zoGuhwe kukwatera mo kuzuvhisira mukadi gwina kwa kere nondya dendi.—Joh. 4:31-34.

¹³ Jakopo naJohanesa kapi va kwete egano eyi ga here kuvaronga Jesus. Apa va zire morugendo naJesus awo kwa paparere mararo momukunda gumwe gwaSamaliya. Ano Vasamaliya kwa nyokere kuvatambura makura oJakopo naJohanesa tava pura Jesus nsene kuvhura va hundire mundiro meguru yipo gu hanagure po mukunda ogo. Makura Jesus yipo ga va tugumukilire. (Ruk. 9:51-56) Ngano eyi kwa horokerere momukunda goJakopo naJohanesa, awo ngano nampo kapi va handukire. Awo kwa handukire nampo yeeyi va dilire kuvatambura. Konyima, Johanesa nampo ga ya lifire nomuga apa vantu womoSamaliya va tambwire mbudi zongwa.—Yirug. 8:14, 25.

14. Ngapi va kohonwene po udigu ou nampo wa kere pokatji komaraka gavali?

¹⁴ Konyima zomvhura 33, pwa ya horokere udigu welitondororo mombungakriste. Apa ngava gavere nondya, vafisavayawo woVagereka kapi ngava va tara eho. (Yirug. 6:1) Eyi nampo kwa yi retesere po morwa vantu ngava uyunga maraka gokulisiga. Vapositoli kwa kohwenene po usimbu udigu owo. Awo kwa horowere vagara ava va kere nomadina goSigereka va gavere nondya. Eyi nampo kwa hengagwidire vafisavayawo vena.

15. Yisinke ya vaterere Peturusa a hageke kukara nompongo? (Tara efano pepenuno 8.)

¹⁵ Momvhura 36, sirugana sokutulisa po varongwa kwa ya lihene unene. Mupositoli Peturusa kwa here kukara tupu noVajuda vakwawo. Nye apa Karunga ga yi mu zereserere asi Vakriste kapi va hepa kukara nompongo, makura ta zuvhisire Koroneliusa, mupitisili govakwayita woVaroma. (Resa Yirugana 10:28, 34, 35.) Kutunda pena, Peturusa ga ya tamekere kulya nokukara noVakriste wokonomuhoko dapeke. Nye konyima zonomvhura, ga ya hagekere kulya noVakriste wokonomuhoko dapeke moAntiyokiya. (Gar. 2:11-14) Morwa oyo, Paurusa yipo ga pukwilire Peturusa, makura ta yi tambura. Apa Peturusa ga tjenge mbilive zendi zokuhova koVajuda ntani koVakriste wokonomuhoko dapeke womoAsiya, age kwa uyungire omu ya kara nomulyo tu hare vapuli vakwetu navenye.—1 Pet. 1:1; 2:17.

16. Kosinke va ya va divilire Vakriste?

¹⁶ Vapositoli kwa lirongerere ko kosihonena saJesus asi va hepa kuhara vantu “navenye.” (Joh. 12:32; 1 Tim. 4:10) Nampili ngomu ya va gusire siruwo, konyima va ya rundwilire nkareso zawo. Vakriste kwa ya va divilire kweyi va lihere-here. Tertullian mutjangi gumwe ogu ga parukire koyiha yomvhura 200 kwa tjanga eyi va uyunga vantu kuhamena Vakriste asi: “Awo kwa lihara-hara. Ntani hena awo kwa liwapaikira mokufira vakwawo.” Apa Vakriste va ‘dwere muntu gomupe’ ya va vaterere va tare vantu navenye asi kwa hetakana kosipara saKarunga.—Koros. 3:10, 11.

17. Ngapi natu nyokera po kukara nelitondororo? Gava yihonena.

¹⁷ Naina, nose twa hepa kunyokera po nkareso zelitondororo. Munazinyetu gomoFransa kwa simwitira omu ya mu digopera  kufunda po nkareso ozo. Age kwa tanta asi: “Jehova kwa ronga nge ni kare neharo nougavi ntani ni hare vantu navenye. Nye ame simpe kuna kukondja kunyokera po elitondororo konomuhoko dapeke, ano eyi kapisi ureru. Eyi yiyo nye ani kanderere kwaKarunga a vatere nge.” Munazinyetu gomoSipanye nage kuligwanekera noudigu wokulifana. Age kwa tanta asi: “Ame kukondja yipo ni nyokere po elitondororo, ano rorunzi ayo kutompoka nge. Nye na yi diva asi na hepa kutwikira kukondja. Tani pandura Jehova kweyi ga reta nge kombunga zendi ezi za kara mouumwe.” Ngwendi vanavazinyetu owo, nose ngano tu nyokere po elitondororo.

18, 19. (a) Morwasinke natu tambwira vantu navenye? (b) Ngapi natu yi rugana oyo?

¹⁸ Twa hepa kudiworoka asi siruwo simwe ose kwa kere “vanayirongo”, kutanta asi ure naKarunga. (Efe. 2:12) Nye Jehova kwa tu kokera kwendi morwa ga tu hara. (Hos. 11:4; Joh. 6:44) Ano Kristusa kwa tu tambwire. Age yige ga tu vatera tu ya hame kepata lyaKarunga. (Resa Varoma 15:7) Mokumona asi Jesus ga tu tambura nampili ngomu twa dira kusikilira mo, nose twa hepa kutambura vantu navenye.

¹⁹ Ngomu uhura una kuhedera pepi nkareso zelitondororo ngazi vhura kuligwederera ntani vantu ngava linyenga. (Gar. 5:19-21; 2 Tim. 3:13) Ngovakareli vaJehova ose tuna hara kupapara unongo waKarunga mokutuvatera tu kare nombili nokunyokera po mpongo. (Jak. 3:17, 18) Ose kuhafa apa atu tulisa po vakaume wokoyirongo yapeke nokutambura monkedi ezi ava rugana yininke ntani pamwe pokulironga eraka lyawo. Apa atu yirugana oyo ose kugwana mbili ngwendi mukuro ogu agu dili kupwira ano efundo ngwendi mankupi aga aga yeraukire konontere defuta.—Jes. 48:17, 18.

20. Yisinke ngayi horoka nsene tu kara neharo?

²⁰ Apa munazinyetu gomoAustralia ga lirongere Bibeli, age kapi ga ya kere hena nelitondororo nonyengo. Age ga ya rundwilire nkareso zendi morwa ga here vantu. Eharo lya mu vaterere a gazarere vakwawo yoyiwa nokuvatara asi mulyo. Munazinyetu gomoKanada kwa tanta asi: “Nsene tu gazarera vantu yininke yoyidona ngatu kara nelitondororo. Yikara yomuntu kapi ya korera kontundiliro zendi.” Konyima ga ya kwere mukadi gosirumbu. Yihonena eyi kulikida asi eharo kuvhura kuhagekesa po elitondororo. Alyo kutureta mouumwe.—Koros. 3:14.