NOBUKE odo kwa kere domaruvara gokulisiga-siga. Mafano gamo kwa vaterere nge ni kwate egano eyi ngani resa. Eyi kwa vaterere nge ni hare kudiva ko yoyinzi.

PoYita yaUvali yoUzuni apa va here kuhomokera India tapa ya horoka maudigu. Vakondi vange kwa ligaunukire ano konyima tava ya lizumbu. Kapi na kwete egano konda zeyi va lizumbilire. Kwa lizuvhire ngwendi kwato ogu ga hara nge. Kwato oku na gwene ehengagwido nevatero posiruwo sina.

Name noyina kwa tungire mositata sedina Karachi. Ezuva limwe ndokotora Fred Hardaker ogu ga kere gumwe goNombangi daJehova kwa ya zuvhisilire pembo lyetu. Age kwa here kuronga onane Bibeli. Awo kapi va here, nye tava mu tantere a lironge name. Sivike esi sa kweme ko yipo na tamekere kulironga namunazinyetu Hardaker.

Konyima zoyivike yongandi yipo na tamekere kuza komapongo aga ngaga karere kosipangerogona samunazinyetu Hardaker. Vanavazinyetu wovakurupe  wokusika ko-12 ngava wiza kepongo olyo. Awo ngava hengagwida nge nokutekura nge ngwendi munwawo gwanyamwawo. Ame simpe kudiworoka omu va hingilire name ntani kweyi na simwitilire nawo ngovakaume, sininke esi na hepere posiruwo sina.

Konyima, munazinyetu Hardaker kwa zigidire nge tu ka zuvhise kumwe. Age kwa rongere nge omu ava ruganesa ngaramafona yipo twa zi ruganesere mokuvatera vantu va purakene koyiuyungwa yomoBibeli. Yiuyungwa yimwe ngayi handukisa vantu morwa kapi ngava hafere mbudi zamo. Nye ame ngani hafere kuzuvhisira ko wopeke. Ame kwa here unene Bibeli ntani ya tumangedere nge ni tantere ko wopeke.

Apa vakwayita vaYapani va here kuhomona India, epangero lyaBritania kwa ya tamekere kuhepeka unene Nombangi daJehova. MwaPembankuru 1943 tani ya ligwanekere noudigu. Mukuronasure gwetu ogu ga kere mupitisili goukarelikarunga umwe kwa tjidire nge mosure morwa kapi ga here nkareso zange. Age kwa tanterere onane asi kukara kumwe noNombangi daJehova kuna kugava sihonena sosidona kovanasure vakwetu. Eyi kwa handukisire onane makura tava nyokesa nge kukara kumwe noNombangi daJehova. Konyima tava tumu nge ni ka kare notate kositata Peshawar esi sa kere ure wonokilometa 1 370 noku twa tungire. Ame kwa tengwire monyima pampepo morwa kapi ngani kara novanavazinyetu.

Momvhura 1947 yipo na tengwire koKarachi ni ka papare yirugana. Ezuva limwe kwa zire kosipangerogona sandokotora Hardaker. Age kwa tambwire nge.

Age kwa gazarere asi tani vere makura ta pura nge asi: “Yisinke ono kuvera?”

Tani mu limburura asi: “Kapi nina kuvera. Nina hara kulironga Bibeli.”

Ta pura nge asi: “Ezuvake ono hara kutameka.”

Tani mu limburura ame: “Nina hara kutameka ngesi.”

Ngurova ozo, ose kwa lirongere Bibeli. Ayo kwa hafesere nge mokukara hena noNombangi. Onane kwa hetekerere ko hena kusilika nge ni dire kukara noNombangi, nye ame kwa tokwere kukarera Jehova. Momazuva 31 Siwogedi 1947, yipo na gwene ekuho. Apa na ya kere nonomvhura 17 yipo na ya tamekere kurugana uzuvhisi wokukarerera.

Pomuhowo kwa tumine nge ni ka zuvhisire kositata saQuetta oku za kere nare kamba zovakwayita vaBritania. Mo-1947 sirongo saAfghanistan kwa ya tetere ko yirongo yivali yi likarere, India naPakistan. * Eyi kwa retesere po nyanya pokatji komaukarelikarunga, ano ayo kwa ninkisire vantu wovanzi va tjwayuke. Vantu wokusika pomamiliyona 14 kwa tjwayukire. Vamusilimu womoIndia kwa dirukilire koPakistan, ano Vahindu noVasikhs womoPakistan kwa dirukilire koIndia. Yipo na ka rondere mehina lyorutenda eli lya tundire koKarachi makura tani korere kosininke simwe dogoro koQuetta morwa vantu kwa zulire mo.

Ame kwa ka lidivire naGeorge Singh muzuvhisi gokukarerera gonomvhura 20 yikandwise moQuetta. Age kwa pere nge mbasikora yipo ni ruganese ko momukunda gonondundu ogu ngatu zuvhisire. Yiruwo yoyinzi ngani zuvhisa nyamelike. Momakwedi tupu ntazimwe, ame na ya kere novarongwa woBibeli 17, ano vamwe kwa ya tambwire usili. Gumwe gwawo kwa kere Sadiq Masih ogu ga kere nare mukwayita, age kwa tu vaterere naGeorge mokutoroka yimbapiratjangwa moRuurdu, eraka eli ngava uyunga wovanzi moPakistan. Konyima zosiruwo, Sadiq kwa ya kere muzuvhisi gomupampi.

Konyima, tani tengura koKarachi oku na ka zuvhisilire kumwe naHenry Finch ntani Harry Forrest ava va ka tundire koSikora zaGiliyata. Awo kwa dewire nge mosirugana sokuzuvhisa. Sikando simwe, name namunazinyetu Finch kwa zire tu ka zuvhisire koPakistani. Ose kwa gwene vantu ava ngava uyunga Ruurdu ava va here kulironga Bibeli. Konyima zonomvhura mbali, name kwa zire koSikora zaGiliyata, ano apa twa ka mene yipo na tengwire koPakistan nokuya vatera mokudingura nombungakriste. Ame kwa tungire mositata saLahore kumwe novatumwa vakwetu vatatu.

Momvhura 1954 tapa horoka madiro kulizuvha mokatji kovanavazinyetu wovatumwa moLahore, mberewa zomutayi yipo za va tumine kwapeke. Ame kwa pere nge epukururo morwa name kwa lihamekere mo. Ayo kwa guvisire nge sili, ntani kwa lizuvhire asi nina tengura monyima. Makura tani tengura koKarachi ano konyima tani zi koIngiranda, morwa kwa gazarere asi nani ka tura po ezokomeho.

Mombungakriste zetu zomoIngiranda, kwa kere mo Vanabeteli wovanzi. Pryce Hughes mukwafi momberewa zomutayi, yige nga deura nge. Ezuva limwe, age kwa tanterere nge omu ga mu pukwilire Joseph F. Rutherford ogu nga pitisire sirugana sokuzuvhisa uzuni mudima. Munazinyetu Hughes apa ga hetekere ko kuligusa-gusa mo, yipo munazinyetu Rutherford ga mu tugumukilire. Ayo kwa tetukisire nge monkedi omu munazinyetu Hughes ga simwitilire nelituromo eyi ya mu horokerere. Age kwa tente asi ayo kwa mu guvisire pomuhowo apa va mu pukwilire. Nye konyima ga ya dimbwilire asi ga hepere epukururo lina ntani ayo kwa likidire asi Jehova ga mu hara. (Heb. 12:6) Eyi ga uyungire kwa gumine nge komutjima ntani ya vaterere nge ni twikire kukarera Jehova.

Posiruwo sooso, onane tava dirukire koIngiranda nokutameka kulironga Bibeli naJohn E. Barr, ogu gaya kere gumwe gomoMbungagendesi. Awo kwa tulire po usimbu ezokomeho ano mo-1957 tava gwana ekuho. Konyima tani ya zuvhu asi komeho va dogoroke otate nawo ngava lirongo noNombangi daJehova.

Momvhura 1958 yipo twa likwere naLene ogu nga uyunga Rudene. Mvhura ezi za kweme ko yipo twa mwene ko munona gomukadona Jane mbeli zetu povana vetu vatano. Ame na gwene hena yitumbukira mombungakriste zaFulham. Mwaza siruwo mukadange Lene kwa ya mu kwete uvera makura twa hepere kudirukira kosirongo somukarompepo goupyu. Mo-1967 yipo nye twa dirukilire kositata saAdelaide moAustralia.

Mombungakriste zetu zomoAdelaide kwa kere mo vagwavekwa 12. Awo kwa kere nomupampi mokuzuvhisa. Kapi ya tu gusire siruwo mokuya yika kurugana yopampepo.

Momvhura 1979, tatu ya mono ko hena munona gwautano Daniel. Age kwa mu retere nourema *  ntani twa yi divire asi kapi nga paruka siruwo sosire. Nampili ngesi kudigopera nge kufaturura ruguwo oru twa kere naro. Ose kwa rugene paapa twa hulira mokumupakera mbili, nye nampili ngoso kapi twa sigilire vakuru vendi. Poyiruwo yimwe, rutu rwaDaniel ngaru sovagana morwa kudira kukara nompepo zokugwanena po. Eyi ngayi horoka morwa momutjima gwendi kwa kere mo makero gavali, ntani twa hepere kumudukisira kosipangero. Nye nampili ngomu nga vere, age kwa kere mumati gonondunge, ntani kwa kere noyikara yoyiwa. Age hena kwa here unene Jehova. Apa ngatu kanderere pokulya, nage nga likwata komawoko nokunyongeka mutwe gwendi ntani nga uyunga asi: “Amen!” Konyima zoyo ntani nye ana kulya.

Apa Daniel ga kere nonomvhura ne, age kwa mu kwatekere kankera zomohonde. Name namukadange kwa lizuvhire sili eroroko parutu nopamalizuvho. Ayo kwa reterere nge sinka sosinene sili. Tani diworoka siruwo simwe apa twa guvire unene, mutareli gwetu gonombunga Neville Bromwich kwa wizire pembo lyetu. Ngurova ozo, age kwa tu lidingilire oku ta lili. Natuvenye kwa lilire. Nonkango dendi kwa tu hengagwidire sili. Age kwa menekere ngurangura zonene povili zokuhova. Tupu ga tundire po makura Daniel ta dogoroka. Nomfa dendi kwa tu koresere sili. Nampili ngoso, ose twa lididimikilire morwa twa diva asi kwato eyi yokugusa mo Daniel meharo lyaJehova, nonomfa si deedi. (Rom. 8:38, 39) Ose kuna kundindira nononkondo apa Karunga nga ka vhumbura munwetu mouzuni woupe.—Joh. 5:28, 29.

Nampili ngomu na ligwanekerere nouvera wounene, ame simpe ni mukuronambunga. Maudigu aga na pitire kwa vatera nge ni kare nonkenda kwa va vana kupita momaudigu. Ame kapi ani va pangura. Nye ame kulipura asi: ‘Ngapi omu maudigu aga va pita meparu ga va kundama? Ngapi omu nani va likida asi nava hara? Ngapi omu nani va korangeda va twikire kukarera Jehova?’ Ame kuhafera kudingura vanavazinyetu womombungakriste. Apa ani korangeda wopeke pampepo, name kugwanena mo mauwa.

Ame kulizuvha ngwendi mutjangi gEpisarome ogu ga tjenge asi: ‘Nsene nina kara noyinka momutjima gwange, [Jehova, NW] makura ta gu tendekere nge.’ (Epis. 94:19) Jehova kwa vatera nge apa na ligwanekerere nomarwaneso gokutunda kovanekoro nokomaukarelikarunga noyinka yemeparu ntani apa na kere moruguwo. Yosili, age kwa kere ngaGuhya geharo kwange.