1. Yisinke ayi tu hafesa?

AYO kutuhafesa kweyi vakareli vaJehova vana kuninka site sawo si teme. Mvhura za ka pita, awo kwa rugana marongo goBibeli gokupitakana pomabiliyona 10. Ntani gazadara ko komamiliyona govantu ava va kere poMurarero gwaHompa. Awo kwa lirongere uhwi wosizoweseso ou ga tu pa Jehova.—1 Joh. 4:9.

2, 3. (a) Yininke musinke ayi dili kutukondera tu ‘paime ngwendi nombungururu’? (b) Yisinke natu ka lironga mosirongwa esi?

² Vakareli vaJehova uzuni mudima kuuyunga maraka gokulisiga-siga. Nye eyi kapi ayi tu kondere mokukarera Jehova mouumwe. (Ehor. 7:9) Yi kare asi eraka musinke atu uyunga ndi kupi twa tunga, ose kuvhura tu paime “ngwendi nombungururu edi adi minikire mouzuni.”—Fil. 2:15.

³ Sirugana setu sokuzuvhisa nouumwe wetu ntani nkareso zetu zokurungarara ndi zokuvangarara kufumadekesa ko Jehova. Mosirongwa esi, tatu ka lironga omu natu ninka site  setu si teme mononkedi odo.—Resa Mateusa 5:14-16.

4, 5. (a) Monkedi musinke hena natu ninka site setu si teme? (b) Mauwa musinke aga tundu mo mokukara nonkareso zongwa? (Tara efano pepenuno 21.)

⁴ MoRuhungu 1 Pembagona 1925, kwa kere mo sirongwa “Site momundema” esi sa uyungire asi, pomazuva gopouhura kwato gokuvhura kulimburukwa nsene “kapi ana kuninka site sendi siteme.” Sirongwa oso kwa uyungire hena asi: “Age kuyirugana eyi pokuzuvhisira vantu mbudi zongwa nokutwikira kusikisa mo yininke yapeke hena.” Ose kuninka site setu si teme pokuzuvhisa mbudi zongwa nokutulisa po varongwa. (Mat. 28:19, 20) Ntani hena nkareso zetu zongwa kufumadekesa ko Jehova. Vantu ava atu gwana mokuzuvhisa kunomena nkareso zetu zongwa. Apa atu menyamenya nokumorora vantu, kuvavatera va tu dive asi ose vantu musinke ntani kuvatumangeda va ya karere Jehova.

⁵ Jesus kwa tanterere varongwa vendi asi: “Muna kuza ponzugo, tanko tomu gava mbili.” (Mat. 10:12) Momukunda omu Jesus novarongwa vendi ngava zuvhisire, vantu vamo ngava tambura vageni momambo gawo. Nye naina, komavango gomanzi vantu kapi ava tambura vageni. Nampili ngoso, nsene o kara nonkareso zosiundambo nokuvafatwilira konda zeyi ono gendere, ngayi ninkisa vantu va ku purakene ntani kapi ngava kara nosinka. Kumenya-menya kuninkisa vantu va ku mangurukire. Vanavazinyetu ava ava ruganesa yitoroli kwa va tompoka mokuzuvhisa morwa kumenya-menya. Nsene o lihameka mosirugana oso pokumenya-menya nokuvamorora, ngo ya dimburura asi vantu kwa hara kupurakena kombudi zetu. Ano oyo ngayi va tumangeda va ya guse yimbapiratjangwa yetu. Nkareso zoge zongwa ngazi va vatera va hare kudiva ko yoyinzi.

6. Ngapi valikwali wovakurupe va tamwinine sirugana sawo sokuzuvhisa?

⁶ Valikwali wovakurupe womoIngiranda kapi ava vhuru kuzuvhisa tunda embo zende embo morwa kuvera. Awo yipo va tokwere kuninka site sawo si teme pokuzuvhisira ponze zembo lyawo. Awo ngava tura yimbapiratjangwa positafura posiruwo esi vakurona ngava ya simbi vana vawo posure ezi za kara pepi nembo lyawo. Vakurona vamwe ngava gusa buke Questions Young People Ask—Answers That Work, Volumes 1 no 2 ntani noyimbapiratjangwa yimwe hena. Muzuvhisi gokukarerera gomombungakriste zawo kwa tamekere kuzuvhisa nawo. Nkareso zendi zongwa ntani nelituromo lyovalikwali vena za vatera vakurona vamwe va tameke kulironga Bibeli.

7. Yisinke nayi kuvatera yipo o zuvhisire vatjwayuki?

⁷ Monomvhura edi, vantu wovanzi kwa tjwayukira koyirongo yapeke. Yisinke no rugana mokuvavatera va dive Jehova nositambo sendi? Ove kuvhura o lironge omu ava morora meraka lyawo. JW Language app kuvhura zi ku vatere o dive ko nonkango dimwe demeraka lyawo eyi nayi va tumangeda va hare kudiva ko yoyinzi. Kuvhura o va likide hena novidiyo noyimbapiratjangwa ya kara meraka lyawo koIntaneta zetu jw.org.—Deut. 10:19.

8, 9. (a) Ngapi omu mapongo getu gomokatji kosivike aga tu vatere? (b) Ngapi vakurona nava vatera vana vawo va lihameke mo momapongo?

⁸ Jehova kwa tu wapaikira epongo, eparu lyetu noyirugana yokuzuvhisa lyomokatji  kosivike eli ali tu vatere yi tu tompoke mokuzuvhisa. Magano aga atu gwana mepongo olyo kutuvatera tu dive nawa omu natu rugana matengwiropo ntani marongo goBibeli.

⁹ Wovape ava ava wiza komapongo getu kuvatetukisa apa ava mono vanona kuna kugava malimbururo. Vakurona, vatereni vana veni va ninke site sawo si teme pokuvaronga va limburure mononkango davene komapongo. Malimbururo gawo gokutundilira komutjima kwa tumangeda vamwe va tambure usili.—1 Kol. 14:25.

10. Ngapi omu ukareli wepata au retesa po uumwe mepata?

¹⁰ Nkedi zimwe hena natu ninka site setu si teme kuna kara pokukwatesa ko uumwe mepata ntani mombungakriste. Vakurona kuvhura va yi rugane oyo pokukara noukareli wEpata nkenye sivike. Vamwe kutarera JW Broadcasting ano konyima zoyo awo kuzogera omu nava tura pasirugana eyi vana lirongere ko. Pokurugana ukereli wepata vakurona va hepa kudiworoka asi monkedi omu no ronga vanona kwa lisiga nomu no ronga vadinkantu. Yipo nye, ruganesa yirongwa eyi nayi vatera nkenye gumwe mepata a gwanene mo mauwa.—Epis. 148:12, 13.

11-13. Ngapi omu natuvenye natu kwatesa ko uumwe mombungakriste?

¹¹ Ngomudinkantu, ngapi no kwatesa ko uumwe mombungakriste nokukorangeda wopeke va ninke site sawo si teme? Nkedi zimwe omu no yi rugana kuna kara pokutulisa po ukaume novakurupe. Kuvhura o va pure va ku simwitire ko eyi yava vatera va twikire kukarera Jehova. Ayo ngayi kunkondopeka ntani namuvenye ngayi mu tumangeda mu ninke site seni si teme. Natuvenye kuvhura kutambura ava ava wiza komapongo getu. Nsene tu yi rugana ngatu kwatesa ko uumwe mombungakriste ntani ngatu vatera vagenda va ninke site sawo si teme. Kutambura vagenda kwa kwatera mo kuvamorora nokumenya-menya ntani kuvalikida oku nava hingira. Va vatera hena va lidive navamwe womombungakriste yipo va lizuvhe asi tuna va tambura.

¹² Nsene vana ku pe mpito zokupitisira epongo lyomoyirugana yokuzuvhisa ,wa  hepa kuvatera vakurupe va lihameke mokuzuvhisa. Va hepa hena kudivilisa asi vakurupe owo vana kara nomukunda ogu nava zuvhisira. Poyiruwo yimwe kuvhura o horowore mudinkantu ogu nava pwaga nendi yipo a va vatere. Vakurupe ntani nava ava vere, poyiruwo yimwe kudompa mutjima morwa kapi ava vhuru kulihameka mo unene mokuzuvhisa. Nye ayo ngayi va vatera nsene o kwata egano ukaro wawo. Yi kare asi vakurupe ndi vadinkantu ndi ava va kara noudivi wounzi ndi wousesu, nsene o va likida nkenda ngayi va tumangeda va zuvhise nomupampi.—Lev. 19:32.

¹³ Mutjangi gEpisarome kwa tente asi: “Ee, yireru omu ya wapa ayo ya tovara yokukara vantu vaKarunga kumwe ngwendi vantu namumbyendi!” (Resa Episarome 133:1, 2.) Vaisraeli ngava gwanene mo uwa apa ngava pongo kumwe mokukarera Jehova. Ayo kwa fene ngwendi murora gondiro ogu agu vatere sipapa si wape. Nose kuvhura tu vatere vanavazinyetu pokuvatekura monaruwa. Ano eyi ngayi tu vatera tu kare mouumwe. Yipo nye, litura mo mokulidiva nawa novanavazinyetu.—2 Kol. 6:11-13.

14. Ngapi omu no ninka site soge si teme kovamusinda woge?

¹⁴ Ove kuvhura o ninke site soge si teme pokuzuvhisira ko vamusinda woge. Yirugana yoge yoyiwa kuvhura kukoka vamusinda woge va ya lironge Bibeli. Lipura asi: ‘Ngapi omu va diva nge vamusinda vange? Ame kuzeresa embo lyange ndi? Ame kuvatera wopeke ndi?’ Hetekera ko kupura vapuli vakweni omu nkareso zawo zongwa za kundama vekoro lyawo ndi vamusinda vawo ndi varugani ndi vanasure vakwawo. Nsene o yi rugana oyo, ove ngo lirongera ko kwawo.—Efe. 5:9.

15. Morwasinke ya karera nomulyo tu rungarare?

¹⁵ Mokuninka asi site setu si twikire kutema, ya wapa kudiworoka asi pomazuva musinke tuna kuparuka. Jesus nga tantere varongwa vendi nkenye apa asi: “Rungarareni.” (Mat. 24:42; 25:13; 26:41) Nsene tu gazara asi “udigu wounene” simpe ure una kara ngayi tu ninkisa tu dire kulitura mo unene mokuzuvhisa. (Mat. 24:21) Ano site setu ngasi dima kanunu-kanunu.

16, 17. Yisinke no rugana mokukara ono rungarara?

¹⁶ Ngomu uzuni ou una kutwikira kudonapa, natuvenye twa hepa kurungarara. Jehova nga reta uhura wouzuni ou posiruwo esi ga tura po mwene. (Mat. 24:42-44) Ano posiruwo esi twa hepa kulididimika nokutwikira kurungarara. Ntani twa hepa kukanderera nokuresa Bibeli nkenye ezuva. (1 Pet. 4:7) Kuvhura hena o rese yihorokwa yovanavazinyetu ava va limonena ruhafo morwa kurungarara nokuninka site sawo si teme. Sihonena simwe kusigwana mosirongwa sosiparatjangwa asi “Nomvhura norontambali na kwatesere ko Mujuda,” esi sa kara moRuhungu 15 Kudumogona 2012, pepenuno 18-21.

¹⁷ Litura mo unene mokukarera Jehova ntani nokukara novanavazinyetu. Eyi ngayi ku retera ruhafo ntani ngo mona omu ngasi genderera siruwo. (Efe. 5:16) Nomvhura efere da ka pita, vanavazinyetu kwa litulire mo unene ntani yinzi va tompwere. Nye naina, ose kuna kutompora yoyinzi kupitakana pwanare. Yosili, site setu kuna kutema unene.

18, 19. Ngapi omu vakuronambunga nava tu vatera tu kare tuna rungarara? Gava sihonena.

 ¹⁸ Nampili ngomu twa dira kusikilira mo, ayo kapi ayi tu kondere mokukarera Jehova. Age kwa tu pa vakuronambunga ‘ngomauhwi’ yipo va tu vatere. (Resa Vaefeso 4:8, 11, 12.) Apa vakuronambunga ngava ya ku dingura, ngo ruganese mpito ozo mokulirongera ko kwawo unongo.

¹⁹ Vakuronambunga vavali womoIngiranda kwa vaterere valikwali ava va kere nomaudigu mepata. Mukadi kwa lizuvhire asi mugara gwendi kapi nga gendesa nawa yihepwa yawo yopampepo. Ano mugara gwendi kwa tanterere vakuronambunga asi age kapi ga diva nawa kuronga ntani asi kapi ngava rugana ukareli wepata nkenye sivike. Vakuronambunga yipo va korangedere valikwali owo va tede ko kosihonena saJesus ogu nga pakere mbili varongwa vendi. Awo hena kwa korangedere nturagumbo gwina a honene Jesus. Ano mukadendi kwa mu korangedere a lididimike. Valikwali owo kwa va pere hena magano omu nava rugana ukareli wepata kumwe novana vawo vavali. (Efe. 5:21-29) Nturagumbo ogo kwa ya litulire mo mokupitisira nawa epata lyendi. Konyima, vakuronambunga yipo va ya mu korangedere a twikire ngorooro ntani a hundire mpepo zokupongoka zi mu vatere a pitisire nawa mepata. Eharo eli va likidire vakuronambunga kwa vaterere momunene epata olyo.

20. Yitundwamo musinke ngayi kara nsene o ninka site soge si teme?

²⁰ Mutjangi gEpisarome kwa tente asi: “Verago vava ava tjira HOMPA, ava va liza ukaro wawo nonompangera dendi!” (Epis. 128:1) Ove ngo hafa nsene o ninka site soge si teme. Yipo nye, kara ono rungarara nokuzuvhisira ko wopeke ntani kwatesa ko uumwe womombungakriste nemepata. Wopeke ngava mona sihonena soge sosiwa ntani ngayi va tumangeda nawo va fumadeke Jehova.—Mat. 5:16.