1, 2. (a) Ngapi omu uumwe una kutwikira kusesupa mouzuni? (b) Yisinke natu ka konakona mosirongwa esi?

MUNAZINYETU gomoEuropa kwa tanta asi: “Kutunda unona wange ame ngani mono tupu udona welike. Kapi na here epangero lyomosirongo setu nye ngani zi hena koyigongi yonombungapolitika. Nomvhura dononzi, mumati gwange kwa kere muteroriste.” Munazinyetu gomugara gomoAfrika Mbindakano ogu ga kere nonyanya pwanare, kwa tanta asi: “Ame ngani tara rudi rwetu asi rwa pitakana marudi gapeke, ntani ame kwa ya hamenene kombungapolitika zimwe. Ose ngava tu rongo tu dipage varwanesi vetu nonomukove nampili womorudi rwetu ava ngava kwatesa ko nombungapolitika dapeke.” Munazinyetu gomukadi gumwe gomoEuropa kwa tanta asi: “Ame kwa kere nelitondororo ntani kapi na here vantu wokonomuhoko dapeke nava va kere nongereka zokulisiga nezi zetu.”

² Nkareso ezi va kere nazo vanavazinyetu owo, kuna lihanene mouzuni naina. Nombunga edi adi korangeda nyanya ntani maligaunuko monombunga politika yina vhuka. Ano moyirongo yoyinzi, vantu kwa nyenga vanayirongo. Bibeli kwa yi pumbire  asi pomazuva gopouhura vantu “ngava kara woyimbokauka.” (2 Tim. 3:1, 3) Ngomu vantu vana kuligaunuka mouzuni ou, ngapi omu Vakriste nava twikira kukara mouumwe? Kuvhura tu lirongere ko kweyi ga rugene Jesus apa vantu va ligaunukire-gaunukire morwa upolitika. Tatu ka konakona mapuro gatatu gomulyo: Morwasinke Jesus ga dilire kulihameka moupolitika? Ngapi ga yi likidire asi kapi ga harera vakareli vaKarunga va lihameke moupolitika? Ngapi ga yi likidire asi kukara nonyanya sininke sosidona?

3, 4. (a) Endindiro musinke va kere nalyo Vajuda momazuva gaJesus? (b) Ngapi endindiro lina lya kundamene varongwa vaJesus?

³ Sinzi soVajuda ava ga zuvhisilire Jesus kwa here kumanguruka mo mepangero lyoVaroma. Varwanenirudi woVajuda ngava ninkisa vantu va kondjere emanguruko eli. Sinzi sawo ngava kwama magano gaJudasa gomoGalireya. Age kwa kere mesiyasa goyimpempa mosiruwo sovapositoli ogu ga pukisire vantu wovanzi. Munahistoli Josephus kwa tanta asi Judasa “nga korangeda vantu womosirongo sawo va lihameke moyita, ntani age kwa tere vantu ava ngava limburukwa kepangero lyoVaroma asi woma.” Varoma yipo va dipagere Judasa. (Yirug. 5:37) Varwanenirudi vamwe kwa ya kere nonyanya yipo va gwane eyi va here.

⁴ Mokulisiga, Vajuda wovalimburukwi kwa ndindilire ewizo lyaMesiyasa. Awo kwa ndindilire asi apa nga wiza Mesiyasa, nomuhoko ngadi hafa nokumanguruka mo mepangero lyoVaroma. (Ruk. 2:38; 3:15) Vamwe kwa gazarere asi Mesiyasa nga ya tulisa po uhompa pevhu moIsraeli. Ntani asi Vajuda wovanzi ava va lihanenene moyirongo yoyinzi ngava tengura kosirongo sawo. Johanesa Mukuhwi kwa pulire Jesus asi: “Ove nyove ogu asi ngo wiza ndi, ndi tu ndindire nage peke?” (Mat. 11:2, 3) Age nampo kwa here kudiva nsene asi kweli gwapeke ogu nga ya sikisa mo nayinye eyi va ndindilire Vajuda. Varongwa vavali ava va ligwanekerere naJesus monzira zokoEmausi konyima zevhumbuko lyendi, nawo eyi va ndindilire kuhamena Mesiyasa kapi ya sikire mo. (Resa Rukasa 24:21.) Kutunda opo, Jesus kwa mu pulire vapositoli vendi asi: “Hompa, ntaantani tupu ngesi o tengwidire Vaisraeli nonkondo dokupangera vene sirongo sawo ndi?”—Yirug. 1:6.

5. (a) Morwasinke Vagalireya va harerere Jesus a kare hompa gwawo? (b) Epukururo musinke ga va pere Jesus?

⁵ Endindiro eli va kere nalyo vantu kuhamena Mesiyasa kwa ninkisire Vagalireya va hare kutumba Jesus a kare hompa gwawo. Awo nampo kwa gazarere asi ga wapera kukara mupitisili gwawo morwa nga verura vaveli nokukutika wonzara ntani ga divire kuuyunga nawa. Jesus ga yi dimbwilire eyi konyima zapa ga kutikire sivaro sovagara 5 000. Bibeli kutanta asi: “Jesus apa ga dimbwilire asi awo kuna hara kuwiza, va mu guse mesininiko asi va mu tumbe a kare hompa gwawo, makura ta tengwire hena gelike kondundu.” (Joh. 6:10-15) Ezuva eli lya kweme ko Jesus kwa kere moGalireya kesinya kwina lyefuta. Ta dimburura asi vantu kapi hena vana hafa makura ta va fatwilire sitambo seyi ga wizilire pevhu. Age kwa wizilire aya va ronge kuhamena Uhompa waKarunga nye kapisi mokuvapa yihepwa yopanyama. Age kwa va tanterere asi: “Walye omu ruganene nondya edi adi haga, nye omu ruganene nondya edi adi karerere dogoro komwenyo gwanarunye.”—Joh. 6:25-27.

6. Ngapi omu Jesus ga yi zeresere asi Uhompa wendi kapisi wouzuni ou? (Tara efano pepenuno 3.)

⁶ Komeho va ka mu dipage, Jesus ga yi dimbwilire asi varongwa vendi kwa kere nendindiro  asi ta ka tulisa po uhompa moJerusarema. Mokuvapukurura, age kwa va tanterere ko sifanekeso soyimaliva. Aso kwa likidire asi Jesus ‘mugara gemezimo lyovazuni’ ga hepere kuza, eyi kulikida asi pwa hepere kupita siruwo. (Ruk. 19:11-13, 15) Jesus kwa fatwilire hena vemepangero lyoVaroma konda zeyi ga dilire kulihameka momaupolitika. Pontius Piratusa kwa pulire Jesus asi: “Nani ove o hompa goVajuda?” (Joh. 18:33) Nampo age kwa kere nosinka asi Jesus kuvhura nga retese po ndjorongani movantu. Nye Jesus ta mu limburura asi: “Uhompa wange kapisi wouzuni ou.” (Joh. 18:36) Age kapi ga lihamekere momaupolitika morwa age kwa ndindilire a ka kare Hompa meguru. Jesus kwa tanterere Piratusa hena asi age kwa wizira pevhu ‘mokuya gava undipo wokuhamena kousili.’—Resa Johanesa 18:37.

7. Morwasinke ya karera udigu kunyokera po kukwatesa ko nombungapolitika mwankenye rupe?

⁷ Nsene tu kwata nawa egano sirugana setu ngwendi Jesus, kapi ngatu kwatesa ko nombungapolitika mwankenye rupe. Nye eyi kapisi ureru kuyirugana. Mutareli gumwe gonombungakriste kwa tanta asi: “Vantu womomukunda gwetu kuna kutwesa ko unene upolitika. Awo kutara rudi rwawo asi kwa pitakana marudi gapeke. Ano wovanzi kugazara asi mokuparuka nawa va hepa kuhamena kombungapolitika zongandi. Nye vanavazinyetu kuna kara mouumwe morwa awo kuna kudemenena kuzuvhisa mbudi zongwa zoUhompa. Awo kwa huguvara mwaKarunga asi nga ka gusa po udona nomaudigu getu nagenye.”

8. Udigu musinke va ligwanekerere nawo Vajuda womosiruwo sovapositoli?

⁸ Vantu kwa hara kuhamena komaupolitika nositambo sokuhagekesa po udona. Mosiruwo saJesus, kufuta mutero kwa ninkisire vantu va lihameke moupolitika. Judasa gomoGalireya ogu tuna tumbura kwa ya kere murwanesi morwa yeeyi epangero lyoVaroma ngali pura vantu va fute mutero. Vanamvharerwa woVaroma ntani nava ngava purakene kwa Jesus ngava va pura va futire mambo nomavango gawo ntani nayimwe hena. Vafutisi mutero kwa digopekere eparu lyovantu owo. Awo ngava futu vemepangero yipo va va pe ko yipundi makura awo ngava pura mutero gomunzi. Sakeusa, mukurona govafutisi womutero ogu ga kere moJeliko kwa ya ngawoperere morwa nga pura vantu yimaliwa yoyinzi. (Ruk. 19:2, 8) Vantu wovanzi nawo yiyo ngava rugana mosiruwo sina.

9, 10. (a) Ngapi nonkore daJesus da hetekerere ko kumuninka a lihameke moupolitika? (b) Yisinke natu lirongera ko kweyi ga limbwilire Jesus? (Tara efano pepenuno 3.)

 ⁹ Nonkore daJesus kwa here Jesus a kwatese ko magano gawo kuhamena kufuta mutero. Mutero ogo, kwa tamba komutero ogu Vajuda ngava futire “hompa gwaRoma.” (Resa Mateusa 22:16-18.) Vajuda kapi va here kufuta mutero ogo morwa ngayi va diworokesa asi awo kwa kere mepangero lyoVaroma. WonkwaHerodesa ava va retesere po egano olyo lyomutero kwa ndindilire asi nsene Jesus a tanta asi Vajuda nokufutasi mutero ngava mu tara asi murwanesi gepangero lyoVaroma. Ano nsene a pulisira kufuta mutero, varongwa vendi ngava hageka kuhama kwendi.

¹⁰ Nye Jesus kapi ga rugene nayinye eyi va here. Age kwa va limbwilire nonondunge asi: “Omu futire hompa gwaRoma eyi ya mu hamena, ano Karunga nage yeeyi ya mu hamena.” (Mat. 22:21) Jesus ga yi divire asi vafutisi mutero kwa here kupura vantu yimaliwa yoyinzi. Nye age kapi ga demenene koyininke oyo. Age kwa demenene po koUhompa waKarunga ou ngau ya gusa po maudigu govantu. Monkedi zangoso age kwa tulilire po varongwa vendi sihonena sosiwa. Va hepa kunyokera po kulihameka momaupolitika, yi kare asi mouhunga gana kara ndi hawe. Vakriste kupapara Uhompa waKarunga neyi ga hepa ko Karunga kwawo. Awo kapi ava lihameke mononzogera dovantu kuhamena maudona aga gana kuhoroka mouzuni.—Mat. 6:33.

11. Nkedi musinke zongwa mokuhagekesa po udona?

¹¹ Sinzi soNombangi daJehova ya va tompoka mokuligusa ko komaupolitika. Munazinyetu gomukadi gomoBritania kwa tanta asi: “Apa na mene kukalironga kuhamena nkarapamwe zovantu koUnivesiti, yipo naya tamekere kulihameka moupolita. Ame kwa here kukondjera umanguruki wovasovagani, morwa ngava va hepeke unene nare. Nampili ngomu ngayi tompoka nge apa ngatu lipatana, ame simpe ngani handuka. Kapi na yi kwete egano asi mokuhagekesa po udona vantu va hepere kunyokera po elitondororo. Apa na lirongere Bibeli, na ya dimbwilire asi name na hepere kurugana ko yuma. Munazinyetu gomukadi gosirumbu yige ga vaterere nge ni rundurure nkareso zange. Ngesi ame muzuvhisi gokukarerera mombungakriste zorupurupuru, ntani ame kuhetekera ko kuzuvhisira vantu wokonomuhoko nadinye.”

12. Erondoro musinke ga pere Jesus varongwa vendi?

¹² Mosiruwo saJesus, vampitisili womaukarelikarunga ngava lihameke momaupolitika. Buke zimwe kwa tanta asi “Vajuda kwa va gawinine monombunga domaukarelikarunga ngwendi moomu tupu nombungapolitika da ligaunukire-gaunukire.” Eyi yiyo nye Jesus ga rondwere varongwa vendi asi “takameseni oku tomu nomene hingo zoVafalisayi nezi zaHerodesa.” (Mar. 8:15) Apa Jesus ga tumbwire Herodesa nampo kwa tembe hena kwava ngava mu kwama. Vafalisayi kwa here Vajuda va manguruke mo mepangero lyoVaroma. Buke zaMateusa kulikida asi Jesus kwa rondwere hena varongwa vendi va takamese koVasadukayi. Awo kwa here Varoma va twikire kupangera. Sinzi sawo ngava hafere omu epangero lyoVaroma ngali gendesa yininke. Jesus kwa rondwere varongwa vendi va takamese hingo ndi marongo aga da retesere po nombunga odo. (Mat. 16:6, 12) Jesus kwa geve erondoro olyo konyima tupu zapa vantu va here kumutumba a kare hompa gwawo.

13, 14. (a) Ngapi omu vampitisili womaukarelikarunga nomaupolitika ga retesere po nyanya? (b) Morwasinke ya karera epuko kukara nonyanya nampili kuna kututekura momudona? (Tara efano pepenuno 3.)

 ¹³ Apa vampitisili womaukarelikarunga ava kwatesa ko maupolitika ayo kuretesa po nyanya. Jesus kwa rongere varongwa vendi va dire kulihameka momaupolitika. Eyi kwa ninkisire vakurona wovapristeli noVafalisayi va papare nompito dokumudipaga. Awo kwa mu tere ngomurwanesi ogu ga here kugusa yitumbukira yawo. Yipo va liyongere asi: “Nsene tu mu tarerera ngorooro, navenye ngano tava mu pura, makura Varoma ngava wiza va ya hanagure ntembeli nomuhoko gwetu.” (Joh. 11:48) Mupristeli gomunene, Kayifasa yige ga yi gendesere yipo va dipage Jesus.—Joh. 11:49-53; 18:14.

¹⁴ Kayifasa kwa tumine vakwayita va ka kwate Jesus pokatji komasiku. Jesus ga divire eyi va here kurugana makura apa va mene kulya murarero gokuhulilira kumwe novapositoli vendi yipo ga va tanterere va ka rande nomfuro. Age kwa here kuvaronga sirongwa somulyo. (Ruk. 22:36-38) Konyima, Peturusa ga ya ruganesere rufuro mokuwurura gumwe govakwayita vena. Age kwa handukire kweyi va ya kwete Jesus. (Joh. 18:10) Nye Jesus kwa tanterere Peturusa asi: “Zweka mo rufuro roge mosiraro saro, yeeyi nkenye ogu a kwata rufuro, yiro ngaru mu lya rooro.” (Mat. 26:52, 53) Eyi kwa liza neyi ga kanderere Jesus mekanderero lyendi asi varongwa vendi kapisi wouzuni. (Resa Johanesa 17:16.) Karunga yige gelike gokuvhura kuhagekesa po udona.

15, 16. (a) Ngapi Bibeli za vatera Vakriste va nyokere po nyanya? (b) Malisigo musinke ga kara pokatji kovantu vaJehova ntani womouzuni?

¹⁵ Munazinyetu ogu tuna tumbura gokombindakano zaEuropa gayi limonena eyi. Age kwa tanta asi: “Na yi dimburura asi nyanya kapi azi gusa po udona. Vantu wonyanya narunye kuyavadipaga. Ano vamwe kuyanyegenya unene. Nina hafa kweyi na lironga moBibeli asi Karunga yige gelike gokuvhura ku ka hagekesa po udona pevhu. Nomvhura 25 da ka pita ame kwa zuvhisira vantu mbudi ozo.” Munazinyetu gomoAfrika Mbindakano, kwa ninka mukove gwendi gu kare ‘Nonkango daKarunga.’ Age kuzuvhisa mbudi zongwa kovamusinda vendi yi kare asi rudi rwawo musinke. (Efe. 6:17) Apa munazinyetu gomukadi gomoEuropa ga ya kere gumwe goNombangi daJehova age kwa ya kwere munazinyetu gomorudi oru ga nyengere. Vanavazinyetu ava vatatu kwa tulire po marunduruko ogo yipo va honene Kristusa.

¹⁶ Awo kwa tulire po marunduruko gomulyo sili. Bibeli kwa fanekesa vantu wovadona kefuta eli ali dili kumwena nomankupi aga aga yerauka, ako kutupu eparu. (Jes. 17:12; 57:20, 21; Ehor. 13:1) Ose kutwikira kukara mombili nomouumwe ngomu maupolitika gana kupiyaganeka vantu nokuvagaununa ntani nokuretesa po nyanya mokatji kawo. Jehova kumuhafesa pokumona omu vakareli vendi va kara mouumwe nampili ngomu va kara mouzuni ou womaligaunuko.—Resa Sefaniya 3:17.

17. (a) Nonkedi musinke ntatu nadi tu vatera tu kare mouumwe? (b) Yisinke ngatu ka lironga mosirongwa sokukwama ko?

¹⁷ Tuna lirongo asi mokukara mouumwe twa hepa: (1) Kuhuguvara moUhompa waKarunga mokuka hagekesa po udona, (2) kunyoka kulihameka moupolitika, ntani 3) kunyokera po nyanya. Nye poyiruwo yimwe, elitondororo kuvhura kutugaununa. Mosirongwa sokukwama ko ngatu ka lironga omu nayi tu tompoka kunyokera po elitondororo ngwendi moomu va yi rugene Vakriste womosiruwo sovapositoli.