1. Morwasinke natu purakenena kerondoro lyaJesus?

APA Jesus ga uyungire kuhamena mazuva gopouhura, age kwa tente asi: ‘Omu litakamese nyamweni! Walye omu lizumbilire . . . moyinka youzuni ou.’ (Ruk. 21:34) Twa hepa kupurakena kerondoro olyo. Morwasinke? Morwa natuvenye kuna kuligwanekera nomaudigu gokulifana.

2. Maudigu musinke ava ligwanekerere nago vanavazinyetu?

² Poyiruwo yimwe, ose kuligwanekera nomaudigu gokulisiga-siga posikando simwe. Tu tareni ko yihonena yimwe. Munazinyetu John, * ogu a vere uvera womouruvi, kwa guvire unene apa mukadendi ga mu zumbire konyima zokulikwara nomvhura 19. Ntani vana vendi vavali wovakadi kwa hagekere kukarera Jehova. Bob namukadendi Linda kwa ligwanekerere nomaudigu gapeke. Awo kwa zumbanesere yirugana yawo ntani kapi va kere noyimaliwa yokufutira embo lyawo. Kugusa ko maudigu ogo, Linda kwa mu kwatekere uvera womutjima ntani nouvera umwe hena ou wa tamekere kuzonagura rutu rwendi.

3. Yisinke ali tu tantere etjangwa lyomoVafilipi 4:6, 7, kuhamena Jehova?

³ Jehova Musiti gwetu geharo ga diva omu atu lizuvhu nsene tuna kara noyinka. Age ana hara tu lididimikire maudigu aga tuna kuligwanekera nago. (Resa Vafilipi 4:6, 7.) MoNonkango daKarunga kwa kara mo yihonena yoyinzi eyi ya likida omu vakareli vaJehova va lididimikilire maudigu aga va ligwanekerere nago. Ntani hena kwa likida mo omu Jehova ga  va vaterere. Tu zeni tu ka zogere ko yihonena yimwe.

4. Maudigu musinke ga ligwanekerere nago Eliya ntani ngapi omu ga lizuvhire kuhamena Jehova?

⁴ Eliya nga karere Jehova moyiruwo yoyidigu ntani age kwa ligwanekerere nomaudigu gomanene. Hompa Ahaba kwa kere hompa gomudona mehistoli lyovahompa navenye womoIsraeli, age kwa kwere Jesebeli ogu nga karere sikarunga Bara. Mouvali wawo, awo kwa hanesere ukareli owo mosirongo nasinye nokudipaga vaporofete vaJehova wovanzi. Nye Eliya kwa hendukire. Age ya mu tompokere kupita merumbu eli lyakere posiruwo sina morwa ga huguvarere mwaJehova. (1 Vah. 17:2-4, 14-16) Age hena kwa huguvarere mwaJehova apa ga uyungisire vaporofete vaBara nava ngava karere sikarunga oso. Age nga korangeda Vaisraeli va karere Jehova. (1 Vah. 18:21-24, 36-38) Eliya ga mwene omu Jehova ga mu poperere nokumuvatera yikando yoyinzi apa ga kere nomaudigu.

5-6. Kuliza no-1 Vahompa 19:1-4, ngapi ga lizuvhire Eliya, ntani ngapi Jehova ga likidire asi ga mu hara?

⁵ Resa 1 Vahompa 19:1-4. Eliya kwa kere nowoma apa Jesebeli ga here kumudipaga, makura yipo ga tjwayukilire koBereseba. Age kwa guvire unene, makura yipo ‘ga here asi a fe.’ Yisinke ya mu ninkisire a lizuvhe ngoso? Eliya nage kwa kere muntu gokudira kusikilira mo, nage “muntu gokuhepa ga kere ngwendi nyose.” (Jak. 5:17) Nampo yinka kwa mu ninkisire a lizuvhe eroroko.  Nampo Eliya kwa gazarere asi eyi ga rugene mokuvatera vantu va karere Jehova kwa kere yomawoko-woko, morwa vantu womoIsraeli kapi va tulire po marunduruko ntani gelike ga twikilire kukarera Jehova. (1 Vah. 18:3, 4, 13; 19:10, 14) Kuvhura yi tu teture monkedi omu ga lizuvhire muporofete ogu. Nye Jehova ga kwete egano omu ga lizuvhire Eliya.

⁶ Jehova kapi ga handukilire Eliya kweyi ga pwagesere malizuvho gendi. Nye age kwa vaterere Eliya a gwane nonkondo. (1 Vah. 19:5-7) Konyima, Jehova kwa ruganesere nonkondo dendi mokuvatera Eliya a tjindje magazaro gendi. Makura Jehova yipo ga tanterere Eliya asi pwa kere simpe vantu wokusika po-7 000 ava va nyokere kukarera Bara. (1 Vah. 19:11-18) Pokumutantera nonkango odo, Jehova kwa likidire Eliya asi ga mu hara.

7. Ekorangedo musinke atu gwanene mo monkedi ezi Jehova ga vaterere Eliya?

⁷ Ove kuna kara noyinka ndi? Ayo kutuhengagwida pokudiva asi Jehova ga kwete egano omu ga lizuvhire Eliya. Eyi kutuvatera nose tu dive asi Jehova kukwata egano maudigu getu. Age ga diva maupirankondo getu ntani ga diva eyi atu gazara nomu atu lizuvhu. (Epis. 103:14; 139:3, 4) Nsene tu honena Eliya pokuhuguvara mwaJehova, age nga tu vatera tu lididimikire maudigu aga aga tu retere yinka.—Epis. 55:22.

8. Ngapi omu Jehova nga ku vatera o lididimikire yinka?

⁸ Yinka kuvhura kukuninkisa o gazare asi ukaro woge kapi ngau litjindja ntani kuvhura kukudompesa. Nsene ngayi ku horokera oyo, diworoka asi Jehova nga ku vatera o lididimikire. Ngapi omu nga ku vatera? Age kuna hara omu tantere maudigu goge. Ntani age nga ku vatera. (Epis. 5:3; 1 Pet. 5:7) Yipo nye, kanderera nkenye apa kwaJehova kuhamena maudigu goge. Age kapi nga uyunga nove kuvyukilira ngwendi moomu ga yi rugene kwaEliya, nye nga uyunga nove kupitira moNonkango dendi, Bibeli, ntani nomombunga zendi. Yihorokwa eyi o resa moBibeli kuvhura kukuhengagwida nokukuvatera o kare nehuguvaro. Ntani vapuli vakweni ngava ku korangeda.—Rom. 15:4; Heb. 10:24, 25.

9. Ngapi omu kaume ogu wa huguvara na vhura kukuvatera?

⁹ Jehova kwa tanterere Eliya a gave yirugana yendi yimwe kwaElisa. Monkedi zangesi, Jehova kwa pere Eliya kaume gomuwa ogu ga vhulire kumuvatera a lididimikire maudigu. Mokulifana, apa atu tantere ko kaume gwetu omu tuna kulizuvha, age nga tu vatera tu lididimikire maudigu getu. (2 Vah. 2:2; Yis. 17:17) Nsene kuna kulizuvha asi kwato ogu no tantera maudigu goge, kanderera kwaJehova, age nga ku vatera o gwane ko Mukriste ogu ga kura pampepo ogu nga ku korangeda.

10. Yisinke natu lirongera ko kosihorokwa saEliya, ntani ngapi etumbwidiro lyomwa-Jesaya 40:28, 29 ali tu vatere?

¹⁰ Jehova kwa vaterere Eliya yipo a lididimikire maudigu gendi ntani nokutwikira kumukarera noulimburukwi nomvhura dononzi. Sihonena saEliya kutupa ehuguvaro. Poyiruwo yimwe, ose nampo kuligwanekera nomaudigu gomanzi aga aga tu ninkisa tu lizuvhe eroroko parutu nopamalizuvho. Nye nsene tu huguvara mwaJehova, age nga tu pa nonkondo yipo tu twikire kumukarera.—Resa Jesaya 40:28, 29.

11-13. Ngapi sinka sa kundamene vakareli vaKarunga vatatu womosiruwo sanare?

¹¹ Vantu vamwe ava va tumbura moBibeli  nawo kwa ligwanekerere nomaudigu. Pasihonena, Hana kwa kere nosinka sosinene morwa kwa gazarere asi kapi nga reta vana ntani musupakadi zendi nga mu hepeke. (1 Sam. 1:2, 6) Sinka oso kwa guvisire Hana, ano eyi kwa mu ninkisire dogoro ta lilire mo, nonondya nokulya si.—1 Sam. 1:7, 10.

¹² Poyiruwo yimwe, hompa Ndafita nage kwa kere noyinka. Gazadara ko maudigu aga ga ligwanekerere nago. Age kwa lizuvhire unzoni komapuko gomanzi aga ga tulire. (Epis. 40:12) Munwendi Abisaromo ogu ga here, kwa mu rwanesere, ano konyima Abisaromo kwa ya mu dipagere. (2 Sam. 15:13, 14; 18:33) Ntani kaume kendi hena gumwe gomunene kwa mu gendere konhi. (2 Sam. 16:23–17:2; Epis. 55:12-14) Sinzi somapisarome aga ga tjenge Ndafita, kwa faturura mo ruguwo rwendi ntani kwa likida mo asi age kwa huguvarere unene mwaJehova.—Epis. 38:5-10; 94:17-19.

¹³ Konyima, muepisarome gumwe kwa ya tamekere kufira mfudu eparu lyovadinikarunga. Age nampo kwa kere gomoruvharo roMurevhi Asafa ntani age nga rugana “montembeli” zaKarunga. Muepisarome ogu kwa guvire, ano eyi kwa mu ninkisire a dire kuhafa ntani kwa mu ninkisire hena a lizuvhe asi eyi ga kere nayo kapi ya mu gwanenene po. Age hena ga ya tamekere kugazara asi mauwa aga aga tundu mokukarera Jehova masesu.—Epis. 73:2-5, 7, 12-14, 16, 17, 21.

14-15. Yisinke tuna lirongere ko koyihonena eyi yitatu yomoBibeli?

¹⁴ Vakareli vaJehova ava vatatu, navenye kwa huguvarere mwaJehova yipo a va vatere. Awo kwa kanderere kwaJehova nokumutantera maudigu gawo. Awo kwa  mu tanterere nokonda edi da va ninkisire va guve unene. Ntani awo ngava twikire kukarera Jehova komavango goukareli.—1 Sam. 1:9, 10; Epis. 55:22; 73:17; 122:1.

¹⁵ Jehova ga limbwilire makanderero gawo nagenye. Hana kapi ga kere hena nosinka. (1 Sam. 1:18) Ndafita kwa tjenge asi: “Muhungami kwa kara nomaudigu gomanzi, nye HOMPA kumuyoworora mo mwanagenye.” (Epis. 34:19) Konyima, muepisarome kwa ya lizuvhire asi Jehova kwa mu ‘kwete kehoko lyendi lyorulyo’ mokumupitisira. Age kwa dimbire asi: “Nye yoyiwa po kwange ame, yokukara pepi naKarunga! HOMPA Karunga yige a popere nge.” (Epis. 73:23, 24, 28) Yisinke tuna lirongere ko koyihonena eyi? Poyiruwo yimwe, ngatu ligwanekera nomaudigu aga ngaga tu retera sinka. Nye kuvhura ngatu ga lididimikire nsene tu teda ko kuhamena omu Jehova ga vaterere wopeke, ntani nsene tu huguvara mwendi nokurugana eyi ga hara.—Epis. 143:1, 4-8.

16-17. (a) Morwasinke natu dilira kuligusa ko kwaJehova nokovanavazinyetu? (b) Kupi oku natu vhura kugwana nonkondo?

¹⁶ Yihonena oyo yitatu kuna kuturonga hena sirongwa simwe somulyo. Kapi tuna hara kuligusa ko kwaJehova nokovantu vendi. (Yis. 18:1) Nancy, ogu ga kere nosinka  sosinene apa mugara gwendi ga mu zumbire kwa tanta asi: “Mazuva gomanzi ngani lizuvhu ngwendi ni dire kumona muntu gongandi ndi ni uyunge nagumwe. Nye ngomu ngani kara nyamelike yimo ngorooro ngani guwu unene.” Nye yininke kwa ya rundurukire apa Nancy ga ya tamekere kuvatera wopeke ava va kere nomaudigu. Age kwa tanta asi: “Ame ngani purakene wopeke apa ngava tantere nge maudigu gawo. Apa ngani demenene komaudigu gawo, ya vaterere nge ni dire kudemenena komaudigu gange.”

¹⁷ Ose kuvhura kugwana nonkondo pokuwiza komapongo. Apa atu wiza komapongo, Jehova ‘kutuhengagwida.’ (Epis. 86:17) Apa atu ya kara komapongo, age kutunkondopeka kupitira mompepo zokupongoka nomoNonkango dendi ntani nomovantu vendi. Mapongo kutupa mpito tu ‘likwafe-kwafe’ ndi tu likorangede-korangede. (Rom. 1:11, 12) Munazinyetu gomukadi gedina Sophia kwa tanta asi: “Jehova ntani vanavazinyetu kuvatera nge ni twikire kulididimika, unene po apa ani wiza komapongo getu. Ame kwa yi dimburura asi apa ani litura mo unene mokuzuvhisa nokuza komapongo, kuvatera nge ni lididimikire yinka nomaudigu.”

18. Ngapi omu Jehova a tu vatere nsene tuna guwu?

¹⁸ Nsene ngo guva, diworoka asi Jehova kapi tupu ga tumbwidira asi nga ka gusa po maudigu komeho, nye age hena kutuvatera ngesi tu lididimikire yinka. Age kutupa “nonkondo” yipo tu lididimikire nkenye yinka ntani nsene kuna kuzumbanesa ehuguvaro.—Fil. 2:13.

19. Etumbwidiro musinke atu gwana moVaroma 8:37-39?

¹⁹ Resa Varoma 8:37-39. Mupositoli Paurusa kwa tente asi kwato yokutugusa mo meharo lyaKarunga. Ngapi omu natu vatera vanavazinyetu ava vana kuhetekera ko kulididimikira yinka? Sirongwa sokukwama ko ngasi ka zogera omu natu honena Jehova nokuvatera vanavazinyetu pokulikida nkenda nsene vana kara noyinka.