1. Erondoro musinke ga geve mupositoli Paurusa koVakriste wovagwavekwa?

MUPOSITOLI Paurusa kwa rondwere asi: “Mwa ha lifana nouzuni ou.” (Rom. 12:2) Age kwa tjangerere nonkango odo koVakriste womosiruwo sanare. Morwasinke ga tjangerere nonkango odo koVakriste ava va ligeve kwaKarunga ntani ava va gwavekere nompepo zokupongoka?—Rom. 1:7.

2-3. Ngapi omu Satana a hetekere ko kutugusa kwaJehova, nye yisinke nayi tu vatera tu nyokere po nkareso ezi azi tu digopere kusiga?

² Paurusa kwa kere nosinka morwa magano govantu gomouzuni kwa kundamene nkareso zoVakriste. (Efe. 4:17-19) Eyi kuvhura kutuhorokera nose. Mokumona asi Satana yige mupangeli gouzuni ou, age kuruganesa nonkedi dokulisiga-siga yipo a tu pukise. Pasihonena, nsene tuna hara kudivikwa, age kuruganesa nkedi ozo yipo a tu guse ko kwaJehova. Age kuvhura kuruganesa hena eyi va tu ronga ndi mpo zetu ndi monkedi omu va tu rera yipo a tu pukise.

³ Kuvhura yi tu tompoke mokunyokera po “nohotepopero” ndi nkareso ezi azi tu digopere kusiga ndi? (2 Kol. 10:4) Koneka eyi ga uyungire Paurusa, age kwa tente asi: “Ose kuhanagura po yipanga yonondunge nankenye ndunge za litumba, asi zi kondjese ediwo lyaKarunga. Ose kuvhulilira po nkenye egazaro lyosintu, asi li limburukwe kwaKristusa.” (2 Kol. 10:5) Nonkango edi kulikida asi nevatero lyaJehova,  ose kuvhura yi tu tompoke kusiga nkareso ozo. Ngwendi moomu tupu mutji agu dipaga uhungu, Nonkango daKarunga nado kuvhura kutuvatera tu nyokere po nkareso zomouzuni waSatana.

4. Yininke musinke twa sigire apa twa tamekere kulironga Bibeli?

⁴ Gazadara ko eyi wa hepere kusiga apa wa tamekere kulironga Bibeli nokutokora kumukarera. Sinzi setu nampo kwa sigire yininke yoyidona. (1 Kol. 6:9-11) Tuna hafa kweyi Jehova ga tu vatera tu sige yininke oyo yoyidona.

5. Kuliza noVaroma 12:2, yininke musinke yivali twa hepa kurugana?

⁵ Nampili ngoso, twa hepa simpe kutwikira kutura po marunduruko monkareso zetu. Nampili ngomu twa hagekere kutura nonzo dononene komeho tu gwane ekuho, simpe twa hepa kutwikira kunyokera po nkenye eyi nayi tu ninkisa tu tengwire konkareso zetu zanare. Ngapi natu yi rugana? Paurusa kwa tente asi: “Mwa ha lifana nouzuni ou. Nye sigeni Karunga a rundurure magazaro geni, mu situnuke nawa-nawa.” (Rom. 12:2) Yipo nye, twa hepa kurugana yininke yivali. Sokuhova, twa “ha lifana nouzuni ou.” Sauvali, twa hepa ‘kurundurura magazaro getu.’

6. Yisinke natu lirongera ko kononkango daJesus edi da kara mwaMateusa 12:43-45?

⁶ Nonkango daPaurusa kulikida asi kapi ya gwanena po tupu kurundurura emoneko lyetu lyokontunda. Nye ayo kwa kwatera mo yoyinzi. (Tara kakende “ Ame na litjindja ndi kuna kulininkisa?”) Twa hepa kutjindja magazaro getu nomalizuvho getu nonkareso zetu. Yipo nye, natuvenye twa hepa kulipura asi: ‘Ame na tjindja nawa-nawa nkareso zange ngoMukriste ndi kuna kulininkisa tupu yipo ni hafese wopeke?’ Nonkango daJesus edi da kara mwaMateusa 12:43-45, kututantera  eyi natu rugana. (Resa.) Nonkango odo kuturonga sirongwa somulyo asi: Kapi ya gwanena po tupu kusiga magazaro gomadona, twa hepa kugapinganesera po nomagazaro gomawa.

7. Ngapi omu natu tjindja mutjima gwetu nomagazaro getu?

⁷ Kuvhura yi tu tompoke mokutjindja nomutjima detu ndi? Nonkango daKarunga kutanta asi: “Mu situnuke, nomutjima deni nonompepo deni di kare nompe. Guseni muntu gomupe, ogu va unga a kare sihwi saKarunga, ogu a lihorora moukaro ou wa hungama, awo wa pongoka. Ukaro wangoso mousili au tundu.” (Efe. 4:23, 24) Yosili, kuvhura yi tu tompoke mokutjindja nomutjima detu nye ayo kapisi ureru. Kapisi tu nyokere po tupu madowo gomadona nokunyenga yoyidona, nye twa hepa kutjindja ‘nomutjima detu.’ Eyi kwa kwatera mo kutjindja eyi twa hara ntani nkareso zetu. Mokuyirugana oyo, twa hepa kulitura mo unene.

8-9. Ngapi sihorokwa samunazinyetu gomugara asi likida eyi ya karera nomulyo kutjindja eyi ya kara monomutjima detu?

⁸ Tu tareni sihonena samunazinyetu gomugara gumwe ogu ga kere nonyanya komeho a tameke kulironga Bibeli. Age nga nu unene marovhu ntani nga rwanangana novantu, nye konyima ga ya hagekere, makura ta gwana ekuho. Eyi kwa geve umbangi wouwa kovantu womomukunda gwawo. Nye ngurova zimwe konyima tupu zapa ga gwene ekuho, ta ligwanekere neheteko eli ga dilire kundindira. Mugara gumwe gokukorwa kwa wizire membo lyendi asi va ya rwane. Pomuhowo munazinyetu ogo kapi ga here kurwana. Nye apa mugara ogo ga uyungire momudona Jehova, ayo kwa mu handukisire ntani kapi ga vhulire kulipangera. Makura munazinyetugara ogo ta pwaga nokukatoona mugara ogo. Morwasinke ga yi ruganene? Nampili ngomu Bibeli za mu vaterere a funde po nkareso zendi zonyanya, nye simpe kapi ga tjindjire nawa-nawa eyi ya kere momutjima gwendi.

⁹ Nye nampili ngoso, kapi ga hagekere kutura po marunduruko. (Yis. 24:16) Nevatero lyovakuronambunga, age kwa tulire po marunduruko gomawa. Konyima zosiruwo, age kwa ya kere mukuronambunga. Ngurova zimwe poSinyanga soUhompa, age kwa ligwanekerere neheteko eli ga ligwanekerere nalyo pomuhowo. Mugara gumwe gokukorwa kwa here kutoona mukuronambunga. Yisinke ga rugene munazinyetu ogo apa ga mwene eyi ya here kuhoroka? Age kwa litulire nokuuyungisa mugara ogo gonkorwe nelinunupiko ntani ga mu vaterere a liture nokumutwara kembo. Morwasinke munazinyetu ga likidire nkareso zokulisiga sikando esi? Munazinyetu ogo kwa tjindjire nawa-nawa eyi ya kere momutjima gwendi. Age kwa kere muntu gombili nelinunupiko. Eyi kwa hafesere Jehova.

10. Yisinke natu rugana yipo tu tjindje nomutjima detu?

¹⁰ Malitjindjo aga kapi aga horoka usimbu-simbu ndi pwa hana elituromo. Mokutura po malitjindjo gangoso, twa hepa ‘kukondja’ unene ntani ayo kugusa siruwo sosire. (2 Pet. 1:5) Nsene kwa karera Jehova nomvhura dononzi, kapi ayi tanta asi kapi hena tatu vhuru kutura po malitjindjo. Nye twa hepa kukondja yipo tu tjindje nomutjima detu. Pwa kara yininke yoyinzi eyi nayi tu vatera mokutura po  malitjindjo gangoso. Tu zeni tu zogere ko yimwe.

11. Ngapi omu ekanderero ali tu vatere tu tjindje nomutjima detu?

¹¹ Kukanderera kuna kara sininke somulyo twa hepa kurugana. Twa hepa kukanderera ngwendi moomu ga yi rugene muepisarome asi: “Ungira nge mutjima gokukohoka, Karunga, ove o pe nge mpepo zompe zokuhungama.” (Epis. 51:10) Twa hepa kuyitambura asi natuvenye twa hepa kutura po malitjindjo ntani twa hepa kukanderera kwaJehova a tu vatere. Ngapi omu tuna yi diva asi Jehova ngatu vatera tu ture po malitjindjo? Etumbwidiro eli Jehova ga geve koVaisraeli ava ngava dili kuzuvha momazuva gaHesekiyeli, kuvhura kutukorangeda. Age kwa va tumbwidilire asi: “Ame ngani va pa mutjima gomupe nomagazaro gomape . . . , tani va pe mutjima gokulimburukwa.” (Hes. 11:19) Jehova ga kere neharo lyokuvatera Vaisraeli, ntani ana hara kutuvatera nose.

12-13. (a) Kuliza nEpisarome 119:59, yininke musinke natu teda ko? (b) Mapuro musinke wa hepa kulipura?

¹² Kuteda kuna kara sininke hena simwe somulyo natu rugana. Ngomu tuna kuresa Nonkango daKarunga nkenye ezuva, ya kara nomulyo tu gazadare ko unene kweyi tuna kulironga ntani nokudimburura eyi natu hepa kutjindja monkareso zetu. (Resa Episarome 119:59; Heb. 4:12; Jak. 1:25) Twa hepa kudimburura magano govantu womouzuni ou aga naga tu pukisa. Ntani ya kara nomulyo kutambura upirankondo wanyamwetu nokurugana ko yuma yipo tu ture po malitjindjo.

¹³ Lipura asi: ‘Ame na kara nomfudu momutjima gwange ndi?’ (1 Pet. 2:1) ‘Ame kulitara asi ame mulyo kupitakana wopeke morwa ntundiliro zange ndi erongo eli na gwana ndi morwa yimaliwa eyi na kara nayo ndi?’ (Yis. 16:5) ‘Ame kulizuvha asi vantu ava va dira kukara noyininke eyi na kara nayo ndi vantu worudi rwapeke kwato mulyo ndi?’ (Jak. 2:2-4) ‘Ame kwa hara unene yininke yomouzuni ou waSatana ndi?’ (1 Joh. 2:15-17) ‘Ame kuhafera yilihafeso yonyanya neyi yoruhonda ndi?’ (Epis. 97:10; 101:3; Amosa 5:15) Mapuro aga kuvhura kutuvatera tu dimburure apa twa hepa kuwapukurura. Nsene tu tjindja nkareso zetu, ose ngatu hafesa Guhyetu gemeguru.—Epis. 19:14.

14. Morwasinke ya karera nomulyo tu horowore vakaume wovawa?

¹⁴ Kuhorowora vakaume wovawa kuna kara sininke simwe somulyo. Yi kare asi twa yi dimburura ndi hawe, vantu ava atu kara nawo kutukundama. (Yis. 13:20) Koyirugana ndi kosure, ose kwa kara novantu ava ava dili kuvhura kutuvatera tu rugane eyi ga hara Karunga. Nye nampili ngoso, ose kuvhura kugwana vakaume wovawa mombungakriste. Awo kutukorangeda tu rugane “yirugana yoyiwa.”—Heb. 10:24, 25.

15-16. Ngapi omu Satana a hetekere ko kupukisa magazaro getu?

¹⁵ Diworoka asi Satana kuna tokomene kutjindja magazaro getu. Age kuruganesa magano nomarongo gokulisiga-siga yipo a pukise magazaro getu.

¹⁶ Satana kuna kuruganesa epuro lyokulifana eli ga pulire Eva mosipata saEdeni asi: “Enye sili Karunga ga mu tantera asi . . . ?” (Gen. 3:1) Mouzuni ou ana kupangera Satana, ose pamwe kuzuvha mapuro  aga naga tu ninkisa tu kare nomasinganyeko. Pasihonena mapuro ngwendi asi: “Enye sili Karunga kapi ga pulisira kulikwara mugara nomugara ndi mukadi nomukadi ndi? Enye sili Karunga kapi ga mu harera mu dane Krismesa nomazuva gehampuruko ndi? Enye sili Karunga kapi ga mu harera mu tambure honde ndi? Enye sili Karunga geharo kapi ga mu harera mu kare novakweneni ava va gusa mombunga ndi?

17. Yisinke natu rugana nsene gumwe kuna kutupura mapuro aga naga tu retera masinganyeko, ntani yitundwamo musinke ngayi kara kuliza noVakorosi 2:6, 7?

¹⁷ Twa hepa kupura nawa-nawa eyi twa lironga. Nsene tu dira kugwana malimbururo komapuro aga twa kara nago, ayo kuvhura ngayi tu ninkise tu kare nomasinganyeko. Masinganyeko ogo kuvhura kupukisa nondunge detu nokutuninkisa tu dire kukara nepuro. Yisinke twa hepa kurugana? Nonkango daKarunga kututantera tu rundurure magazaro getu yipo tu dive ‘kukoneka mpango zaKarunga neyi yoyiwa ya tu wapera ayo ya sikilira mo.’ (Rom. 12:2) Nsene tu lironga nkenye apa Bibeli, ngayi tu vatera tu dimburure asi eyi atu lirongo usili. Ntani ngayi tu vatera tu dimburure asi nompango daJehova usili. Ngwendi moomu sa kara sitji nonondandani dokupama, nose ngatu ‘nkondopara mepuro.’—Resa Vakorosi 2:6, 7.

18. Yisinke natu rugana yipo tu nyokere po yininke eyi nayi vhura kutupukisa mouzuni ou waSatana?

¹⁸ Kwato gumwe gokuvhura kunkondopeka epuro lyoge. Yipo nye, twikira kutjindja eyi ya kara momutjima goge. Kanderera nkenye apa nokuhundira mpepo zaJehova zi ku vatere. Teda ko nokutwikira kukona-kona magazaro goge noyirugana yoge. Tulisa po vakaume wovawa ava ngava ku vatera yipo o rundurure magazaro goge. Nsene o yi rugana oyo, ayo ngayi ku popera kouzuni ou waSatana ntani ngo ‘hanagura po yipanga yonondunge nankenye ndunge za litumba, asi zi kondjese ediwo lyaKarunga.’—2 Kol. 10:5.