Paul kwa tanta asi: “Apa sipwa sange ga sindagwire nge, ame kwa mu kwete ponsingo nokumusina. Ame kwa here kumudipaga.”

Marco kwa tanta asi: “Ame ngani handuka usimbu pembo nampili kapi nina kara nokonda. Ame ngani zuguma yipundi ntani nkenye eyi nga yi karere nge pepi.”

Kuvhura tu dire kukara nehandu ngwendi vagara owo vavali. Nye natuvenye kutudigopera kulipangera poyiruwo yimwe. Eyi kuhoroka morwa ose kwa pinga ediro kusikilira mo kwaAdamu. (Rom. 5:12) Vamwe kuvadigopera kupangera ehandu lyawo ngwendi Paul naMarco. Vamwe kuvadigopera kupangera magazaro gawo. Pasihonena, awo kugazadara yininke eyi ayi va tjilisa ndi yokuvaguvisa. Ano vamwe kuvadigopera kunyokera po ruhonda, yikwaepangwe ntani unkorwe.

Vantu ava ava dili kupangera magazaro gawo, nomadowo gawo ntani yirugana yawo kuzonagura eparu lyawo. Ngapi natu nyokera po yitundwamo oyo? Kuvhura yi tu tompoke nsene tu tunga po sikara selipangero. Mokutuvatera tu yi rugane oyo, tu zeni tu ka zogere mapuro gatatu: (1) Yisinke elipangero? (2) Morwasinke sikara selipangero sa karera nomulyo? (3) Ngapi natu tunga po ‘siyimwa esi sompepo’ zokupongoka? (Gar. 5:22, 23) Konyima natu ka zogera eyi natu rugana poyiruwo apa atu dili kukara nelipangero.

Muntu ogu ga kara nelipangero, kapi tupu a rugana nkenye eyi. Age kapi a uyunga ndi a rugane eyi ayi dili kuhafesa Karunga.

Jesus kwa tu likida asi yisinke ayi tanta kukara nelipangero. Bibeli kutanta asi: “Age ngava mu swaura, nye age kapi nga ninki asi nage a va swaure. Napa si ngava mu hepeke, kapi nga handuka, nye nayinye kwa yi sigililire Karunga ogu a pangura mouhunga.” (1 Pet. 2:23) Jesus kwa likidire elipangero apa nonkore dendi da mu swawire age kwa kuzenzerera kositji. (Mat. 27:39-44) Age hena kwa likidire elipangero apa vampitisili womaukarelikarunga va hetekerere ko kumukwata mononkango. (Mat. 22:15-22) Age hena kwa tulire po sihonena sosiwa apa Vajuda va here kumutoona nomamanya. Mevango lyokuvatengwida kuwoko, “Jesus ta vanda makura ta tundu mo montembeli.”—Joh. 8:57-59.

Nose kuvhura tu honene Jesus. Mupositoli Peturusa kwa tjenge asi: “NaKristusa nyone ga hepera, yiyo ga mu sigira sihonena mu rugane moomu nga rugana age.” (1 Pet. 2:21) Nampili ngomu twa dira kusikilira mo, nose kuvhura tu honene Jesus pokulikida elipangero. Morwasinke ya karera nomulyo tu yi rugane?

Twa hepa kukara nelipangero yipo tu hafese Jehova. Nampili nare twa gusa kukarera Jehova, nsene kapi tuna kupangera nonkango detu noyirugana yetu, kuvhura ngatu  zumbanese elikwatakano lyetu naJehova Karunga.

Koneka sihonena saMosesa, ogu ga kere “mugara gomulinunupiki kupitakana navenye vepevhu.” (Num. 12:3) Mosesa kwa likidire elididimiko nomvhura dononzi apa Vaisraeli ngava sivana. Nye ezuva limwe kapi ga likidire sikara selipangero. Age kwa handukire apa Vaisraeli va sivanene asi kapi vana kara nomema gokugwanena po. Age kwa handukilire vantu nokuvatantera asi: “Purakeneni vanandjorongani one! Makura kuvhura nye tu mu gusire mema memanya eli ndi?”—Num. 20:2-11.

Mosesa kapi ga likidire elipangero. Age kapi ga geve mfumwa kwaJehova ogu ga rugene sitetu yipo Vaisraeli va gwane mema. (Epis. 106:32, 33) Eyi kwa ninkisire Jehova a dire kumupulisira mokuhwilira moSirongo sEtumbwidiro. (Num. 20:12) Mosesa nampo kwa liverere eparu lyendi mudima kweyi ga dilire kulikida sikara selipangero.—Deut. 3:23-27.

Yisinke natu lirongera ko? Yi kare asi nare twa gusa kukarera Jehova ndi hawe, twa hepa kunyokera po kudira kufumadeka vantu ava ava tu handukisa ndi ava vana hepa kuvapukurura. (Efe. 4:32; Koros. 3:12) Ngomu tuna kukurupa, kuvhura yi tu karere udigu kulikida elididimiko. Nye diworoka eyi ya horokerere Mosesa. Nsene tu dira kulikida elipangero, ose ngatu nyatekesa edina lyetu kosipara saJehova. Ngapi natu tunga po sikara esi somulyo?

Hundira kwaJehova mpepo zokupongoka. Morwasinke? Morwa elipangero kuna kara siyimwa sompepo zokupongoka ntani Jehova kugava mpepo zokupongoka kwava ava zi hundire. (Ruk. 11:13) Kupitira mompepo zokupongoka, Jehova kuvhura a tu vatere yipo tu likide elipangero. (Fil. 4:13) Age hena kuvhura a tu vatere yipo tu tunge po yiyimwa yimwe yompepo zokupongoka, ngwendi eharo. Yiyimwa oyo kutuvatera yipo tu likide elipangero.—1 Kol. 13:5.

Nyokera po nkenye eyi nayi kuninkisa yipo o dire kulikida elipangero. Pasihonena, nyokera po maruha gamwe gokoIntaneta ntani noyilihafeso omu ava likida yirugana yoyidona. (Efe. 5:3, 4) Ntani twa hepa kunyokera po nkenye eyi nayi tu ninkisa tu rugane yoyidona. (Yis. 22:3; 1 Kol. 6:12) Pasihonena, muntu ogu ayi digopere kunyokera po ruhonda, ga hepa kuhageka kuresa nobuke deharo ntani kutarera nomuvi deharo.

 Ayo kuvhura yi tu digopere kutura epukururo eli pasirugana. Nye nsene tu litura mo unene, Jehova nga tu pa nonkondo edi twa hepa yipo tu likide elipangero. (2 Pet. 1:5-8) Age nga tu vatera tu pangere magazaro getu nononkango detu ntani noyirugana yetu. Paul naMarco ava tuna tumbura ketameko, va lironga kupangera ehandu lyawo. Eyi kulikida asi Jehova kuvhura atu vatere nose. Koneka hena sihonena samunazinyetu gumwe ogu nga handukire vakwawo nsene kuna kusinga. Poyiruwo yimwe age nga tangwisa vasingi vakwawo. Yisinke ga rugene ko? Age kwa tanta asi: “Ame ngani kanderere nkenye ezuva. Ntani ngani lirongo yirongwa eyi ya zogera kuhamena elipangero ntani nokukwata momutwe novelise dimwe domoBibeli. Nampili ngomu nayi rugana nomvhura dononzi, ame simpe kulidiworokesa nkenye ngurangura asi kapi nina hara kuhanduka. Ntani ame kulivinduka nkenye oku nina hara kuza yipo ni dire kukara mongenderera.”

Natuvenye poyiruwo yimwe kuvhura ngatu dire kulikida elipangero. Nsene yihoroka oyo, kuvhura tu lizuvhe nomuga kukanderera kwaJehova. Nye posiruwo oso yipo twa hepa evatero lyaJehova. Yipo nye, kanderera kwaJehova nsene kapi yina kutompoka kulikida elipangero. Likwambera kwendi yipo a ku gusire po ntani mu hundira yipo a ku vatere. Ntani tokomena mokudira kurugana epuko lyokulifana. (Epis. 51:9-11) Wa ha gazara asi Jehova kapi nga purakena kekanderero lyoge. (Epis. 102:17) Mupositoli Johanesa kwa tente asi honde zaMunwaKarunga ‘kukuhura nonzo nadinye.’ (1 Joh. 1:7; 2:1; Epis. 86:5) Diworoka asi Jehova kuhundira vakareli vendi va twikire kugusira po vakwawo. Eyi kulikida asi nage kurugana yokulifana.—Mat. 18:21, 22; Koros. 3:13.

Apa Mosesa ga dilire kulikida elipangero momburundu, ayo kwa handukisire Jehova. Nye age ga mu gusilire po. Ntani Bibeli kwa tumbura Moses asi age kwa kere mugara gepuro ogu twa hepa kuhonena. (Deut. 34:10; Heb. 11:24-28) Jehova kapi ga pulisilire Mosesa a ka lyate moSirongo sEtumbwidiro, nye age nga ka mu pulisira mokukaparuka narunye moParadisa. Nose kuvhura ngatu ka gwane mwenyo gwanarunye nsene tu kondja mokutunga po sikara esi somulyo.—1 Kol. 9:25.