Natuvenye twa yi diva asi Jehova yige ana kupitisira vantu vendi ntani age kuna kutupa eyi twa hepa yipo tu kare nelikwatakano nendi “pomazuva gopouhura.” (2 Tim 3:1) Nye natuvenye twa hepa kulimburukwa kwaJehova Karunga. Kuvhura tu hetakanese ukaro wetu koVaisraeli ava va kere momburundu. Awo va hepere kurugana yuma nsene tava zuvhu nombendo.

Jehova kwa tanterere Mosesa a hambure nombendo mbali dosisiliveli “dokuruganesa pokuzigida mbunga zi ponge nopokuzungurura kamba.” (Num. 10:2) Vapristeli ngava fudu nombendo odo mononkedi dokulisiga-siga yipo vantu va dive eyi nava rugana. (Num. 10:3-8) Naina, vantu vaKarunga kuna kugwana mavyukiso mononkedi dokulisiga-siga. Mosirongwa esi tatu ka zogera nonkedi ntatu omu atu vhuru kugwana mavyukiso. Nonkedi odo kutudiworokesa nombendo edi ngava fudu Vaisraeli. Ado kuna kara: Apa ava tu zigida komapongo, apa vakuronambunga ava gwana edeuro ntani apa mavyukiso ava ga rundurura mombungakriste.

Apa Jehova ga here “mbunga nazinye” zoVaisraeli zi ya ponge pevero lyonkongoronzugo, vapristeli ngava fudu nombedo odo mbali. (Num. 10:3) Mazimo nagenye goVaisraeli kwa zuvhire nombendo odo. Vantu ava va tomekere notenta dawo pepi nevero lyonkongoronzugo, kwa zire usimbu konkongoronzugo. Nye ava va tomekere notenta dawo ure nonkongoronzugo, kwa gusire siruwo komeho va ka sike. Yi kare asi awo ure va kere ndi pepi, Jehova kwa here vantu vendi navenye va ponge kumwe yipo va purakene komavyukiso gendi.

Naina ose kapi atu pongere konkongoronzugo, nye nose kutuzigida komapongo gokulisiga-siga. Mapongo ogo kwa kwatera mo sigongi somazuva gatatu ntani noyilika yimwe oku atu gwana mavyukiso. Vantu vaJehova kuhafera elikwamo lyokulifana uzuni mudima. Yipo nye, vantu ava ava zi komapongo ogo kuhamena kombunga zonene zovantu woruhafo. Vamwe kugenda sinano sosire komeho va ka sike komapongo. Nye navenye ava ava zi komapongo ogo kugwanena mo mauwa.

Ngapi kuhamena vanavazinyetu ava va kara motumbunga otu twa likara ure noku aga karere mapongo getu? Kupitira moyikwakonentu, sinzi sovanavazinyetu owo nawo kuhafera elikwamo lyokulifana ntani awo kulizuvha ngwendi mepongo lyenene vana kara nampili ngomu va tunga ure. Pasihonena, sikando simwe apa vanavazinyetu wokomberewa zonene va ya dingwire Beteli zomoBenin, elikwamo olyo kwa li likidire nomodoropa zaArlit, moNiger. Doropa ozo kwa kara momburundu zaSahara. Vanavazinyetu wokusika 21 kwa purakenene elikwamo olyo. Nampili ngomu va tunga modoropa ezi za kara ure, awo kwa lizuvhire ngwendi  kuna kara novanavazinyetu 44 131 ava va purakenene kelikwamo olyo. Munazinyetu gumwe kwa tjenge asi: “Mpandu sili zonene kweyi muna tu vatere tu tarere elikwamo eli. Ose tuna limonene asi one kwa tu hara sili.”

Apa vapristeli ngava fudu rumbendo rumwe tupu, “masimbi gopomazimo” yigo gelike ngaga zi kepongo eli nga li kara koNkongoronzugo. (Num. 10:4) Kepongo olyo, awo ngava gwana mavyukiso nedeuro kwaMosesa. Edeuro olyo kwa va vaterere va sikise mo yitumbukira yawo. Ngano nove kwa kere esimbi posiruwo oso, ove ngano wa kondjere yipo oze kepongo olyo yipo o ka gwanene mo uwa.

Naina vakuronambunga awo kapisi “masimbi” ntani awo kapi ava kara vahompa kwava vava pa asi vava takamese. (1 Pet. 5:1-3) Nye awo kurugana unene yipo va pakere mbili siunda saKarunga. Awo kulimburukwa apa ava va zigida va ka gwane edeuro, ngwendi kosikora zovakuronambunga. Kosikora ozo, vakuronambunga kuvavatera omu nava pakera mbili yininke yomombungakriste. Edeuro olyo kuvatera vakuronambunga nava womombungakriste va hedere Jehova pepi. Nampili kapi wa za ko kosikora ozo, nove kuvhura o gwanene mo mauwa medeuro olyo kupitira mwava va za ko.

Vapristeli poyiruwo yimwe ngava hagaike kufuda nombendo. Eli kwa kere ediviso asi Vaisraeli va hepa kudirura kamba zawo. (Num. 10:5, 6) Apa Vaisraeli ngava diruka awo ngava yi rugana monkedi zongwa, nye ngava rugana unene. Ntani Vaisraeli vamwe nampo kapi va here kudirukira kevango lyapeke. Morwasinke?

Vamwe nampo ngava lizuvhu asi awo kuna kudiruka usimbu ntani ayo ngayi horoka hararasi. Bibeli kutanta asi: “Siruwo esi lina kukara ko eremo kontunda zoNkongoronzugo, nawo nokurunduruka si.” Nye “pamwe eremo kukara ko tupu ngurova dogoro ngurangura makura.” Poyiruwo yimwe ngali “kara ko tupu mazuva gavali ndi kwedi kumwe ndi mvhura zimwe.” (Num. 9:21, 22) Yikando yokuhura kupi Vaisraeli va dirwire kamba zawo? MwaNumeri egaununo 33 kwa tumbura mo mavega 40 aga va tomekere Vaisraeli notenta dawo

Poyiruwo yimwe Vaisraeli ngava tomeke notenta dawo pevega eli lya kere nonomundwire. Mokumona asi awo kwa kere “momburundu zonene zondigu” eyi nampo kwava hafesere sili. (Deut. 1:19) Awo nampo kwa lizuvhire asi nsene nava diruka kuvhura va ka gwane evango lyedona.

Apa Vaisraeli ngava diruka, awo va hepere elididimiko, morwa vamwe va hepere kundindira siruwo sawo yipo va katuke. Vaisraeli kapi ngava katuka posiruwo simwe apa vapristeli ngava fudu nombendo kuhagaika. Rumbendo oro rokuhagaika kwa divisire mazimo aga ga tomekere notenta dawo koUpumezuva yipo ga diruke. Mazimo ogo kwa kere: lyaJuda, lyaIsasikali ntani lyaSeburoni. (Num. 2:3-7; 10:5, 6) Konyima zapa mazimo ogo ga dirukire, vapristeli kwa fudire nombendo kuhagaika sikando sauvali yipo va divise mazimo gokoMbindakano ga diruke. Vapristeli kwa rugurukire kufuda nombendo odo dogoro mazimo nagenye gana diruka.

Nampo nove ya kudigoperere kutambura marunduruko gomape aga va tulisire po mombunga zaJehova. Ove nampo kwa lizuvhire asi marunduruko manzi tuna kugwana. Ndi nampo ove kwa here omu ya kere yininke nare ntani kapi wa here va yi rundurure. Yi kare asi yisinke ya horoka, ove nampo kwa ku gusire siruwo komeho o yike malitjindjo ogo. Nye konyima, nampo wa yi dimbwilire asi malitjindjo ogo mawa ntani Jehova kuna kukuhafera.

Momazuva gaMosesa, Jehova kwa pitisilire mamiliyona govantu momburundu kukwatera mo vagara novakadi novanona. Ngano Jehova kapi ga va pitisilire nokuvavatera, awo ngano kapi va parukire. Neina, nsene nose tu kwama mapukururo gaJehova ngayi tu vatera tu twikire kukara nelikwatakano nendi ntani ngayi tu vatera tu kare nepuro lyokupama! Yipo nye, nose ngano tu tokomeneni kulimburukwa komarumbendo ngamoomu va yi rugene Vaisraeli!