Ame kwa hampuruka nge mo-19 Kudumonkuru 1940, modoropa Amioûn mosirongo saLebanon. Konyima zonomvhura dongandi, epata lyetu kwa dirukilire kositata saTripoli. Vakondi vange va divire Jehova Karunga ntani va mu here. Ose kwa tu reta tu vatano, vakadona vatatu ano vamati vavali. Ano ame nsiraura. Kukara noyimaliwa kapi sa kere sininke somulyo unene kovakondi vange. Nye eyi ya kere nomulyo unene mepata lyetu kuna kara kulironga Bibeli, kuza komapongo ntani kuvatera wopeke va dive Karunga.

Mombungakriste zetu kwa kere mo vagwavekwa. Ano gumwe govagwavekwa owo kwa kere Michel Aboud, ogu nga pitisire epongo lyelirongo lyobuke lyombungakriste. Age kwa lirongere usili moAmerika ntani kwa tamekere kuzuvhisa mo-1921 moLebanon. Ame kudiworoka nkareso zongwa ezi ga kere nazo ntani napa ga vaterere varongwa vavali ava va ka tundire koSikora zaGiliyata oAnne naGwen Beavor. Awo kwa kere vakaume vetu wovawa. Konyima zonomvhura dononzi, ame kwa hefe sili apa na ka ligwene naAnne moAmerika. Ano konyima, ame kwa ligwene hena naGwen awo opo vana likwara naWilfred Gooch ntani awo ngava rugana moBeteli zaLondon moIngiranda.

Apa na kere mudinkantu, Nombangi daJehova nonsesu da kere moLebanon. Ose kwa zuvhisilire  ko wopeke nomupampi kuhamena Bibeli. Ose kwa twikilire kuzuvhisa nampili ngomu twa ligwanekerere nomarwaneso gokutunda kovampitisili womaukarelikarunga. Ame simpe kudiworoka yihorokwa yimwe eyi ya tu horokerere.

Ezuva limwe, name namukurwa nge gomukadi Sana, kwa zuvhisilire kononzugo dekeguru. Makura muruti gumwe yipo ga wizire monzugo ezi twa kere, nampo kweli ogu ga mu zigidire. Muruti ogo, yipo ga tamekere kutuka mukurwange. Age kwa handukire makura ta zundura Sana, ta remana. Ano kweli gumwe ogu ga belele vaporosi, makura tava wiza. Awo kwa divilisire asi kweli ogu ana kuvatera Sana. Vaporosi kwa twere muruti ogo kositasi sovaporosi. Awo kwa ka dimbwilire asi ana kara nouta. Makura mukondi govaporosi ta pura muruti asi: “Ove nani muntu musinke? Ove kuronga vantu kuhamena Karunga ndi kuhamena ukorokotji?”

Sihorokwa simwe esi nina kudiworoka nawa kuna kara apa mbungakriste zetu za futilire besa yipo tu ze tu ka zuvhisire kodoropa zimwe ezi za likere ure nositata setu. Ose kwa haferere kuzuvhisa. Ano konyima, muruti gumwe gomodoropa ozo kwa zuvhire eyi twa rugene, yipo ga ninkire vantu wovanzi va tu homokere. Awo kwa tu homokerere nokutuzugumanga mamanya. Ntani otate kwa va remekere ano sipara sawo kwa kere honde-honde. Awo kwa tengwire kobesa noyina. Ano nose yipo twa va kweme monyima morwa twa kere nowoma. Kapi ngani divara eyi va uyungire oyina apa va kuhwire otate. Awo kwa tente asi: “Jehova, va dongwenena po, morwa kapi vana diva eyi vana rugana.”

Sikando simwe, ose kwa ka dingwire vekoro lyetu ava va tungire modoropa ezi twa kere. Ose kwa ka gwene mubisofi membo lyomama wovagara. Mubisofi ogo, gayi divire asi vakondi vange Nombangi daJehova. Nampili ngomu na kere nonomvhura ntazimwe, age kwa here kufisa nge nomuga pokupura nge asi: “Morwasinke va dilira kukukuhwa?” Makura yipo na mu limbwilire asi ame simpe nimunona ntani mokuninka asi ni gwane ekuho, na hepa kudiva yoyinzi kuhamena koBibeli ntani nokukara nepuro lyokupama. Age kapi ga haferere eyi na mu limbwilire. Makura yipo ga tanterere omama wovagara asi kapi nina mu fumadeke.

Nye nampili ngoso, yihorokwa oyo yoyidona kapi ngayi horauka nkenye apa. Vantu womoLebanon kwa kere vantu wovawa ntani ngava tambura vakwawo momambo gawo. Ose ngatu zogere novantu wovanzi kuhamena Bibeli ntani ngatu lirongo novantu wovanzi.

Sikando simwe, munazinyetu gomudinkantu gomugara ogu ga tundire koVenezuela, kwa ya dingwire moLebanon. Posiruwo oso, ame simpe kuna kudimba sure. Age nga pongere mombungakriste zetu ntani kwa tamekere kulivandekera namukurwa nge Wafa. Konyima zosiruwo, awo kwa likwere nokudirukira koVenezuela. Apa Wafa nga tjanga nombilive, age nga tantere otate va dirukire koVenezuela nepata nalinye. Age kwa yi rugene oyo morwa ngatu rongora sili unene. Ano konyima yipo twa tokwere kudiruka.

 Ose kwa ka sikire moVenezuela mo-1953 ntani kwa tungire mositata saCaracas pepi nombara zaPeresidende. Mokumona asi ame kwa kere simpe mumatigona, poyiruwo yimwe ngani hafere kumona peresidende kuna kupita metuwa lyendi lyondiro. Nye kapi ya kere ureru kovakondi vange mokuyika sirongo oso, neraka, nompo nonondya ntani mukaro mpepo. Mokumona asi koyili yimwe yoyidona eyi yava horokerere oku twa tundire, awo kwa tamekere kuyika eparu lyepe mosirongo oso.

Otate kwa tamekere kuvera. Ayo kwa tu tetukisire unene mokumona asi awo kwa kere muntu gononkondo ntani noukanguki wouwa. Awo kapi ngava vera-vera. Awo kwa va kwatekere kankera makura konyima yipo va va tawire. Nye konyima zosivike simwe, yipo va dogorokere.

Ose kwa guvire unene. Posiruwo oso ame kwa kere nonomvhura 13. Kapi twa yi ndindilire asi otate tava fu ntani ose kwa lizuvhire asi kapi ngatu hafa hena. Poyiruwo yimwe, oyina ngayi va karere udigu kuyipura asi otate va fa. Nye nampili ngoso, twa ya dimbwilire asi twa hepa tupu kuyitambura ntani Jehova ga tu vaterere tu lididimike. Apa na kere nonomvhura 16, yipo na mene sure mositata Caracas. Ame kwa lizuvhire asi na hepa kuvatera epata lyetu.

Konyima zosiruwo, mukurwange gomukadi Sana tava likwara naRubén Araujo ogu ga ka tundire koSikora zaGiliyata ntani nokumutuma koVenezuela. Awo kwa dirukilire koAmerika. Ekoro lyange kwa tokwere asi ni ze ni ka lironge kounivesiti. Makura yipo na dirukilire koAmerika nokukatunga namukurwange gomukadi ntani naswara zange. Mukurwange ntani naswara zange, ngava vatere nge ni ture po ezokomeho lyopampepo. Ntani hena mombungakriste zetu zoRusipanye moBrooklyn mwa kere vanavazinyetu wovanzi ava vakulire pampepo. Ano vavali ava na divire unene kuna kara Milton Henschel ntani naFrederick Franz. Navenye ngava rugana moBeteli zomoBrooklyn.

Ngomu mvhura zange zokuhova mounivesiti za hederere kehagero, ame ngani gazara kuhamena eparu lyange. Ame ngani resa nokugazadara ko yirongwa eyi ya kere moRuhungu kuhamena vanavazinyetu ava va li tulilire po yitambo mosirugana saJehova. Ame ngani mono omu vazuvhisi wokukarerera novaBeteli womombungakriste zetu va kere noruhafo ntani name kwa here ni va fane. Nye posiruwo oso ame simpe kapi na gwene ekuho. Ame nayi dimbwilire asi na hepere kuligava kwaJehova. Makura yipo nayi rugene ngoso. Ano mo-30 Nsinano 1957, yipo na gwene ekuho.

Konyima zapa na gwene ekuho, ame kwa here kukara muzuvhisi gokukarerera. Ame kwa here unene kukara muzuvhisi gokukarerera. Nye nayi dimbwilire hena asi ngayi karera nge udigu. Ame kwa gazadarere ko omu ngayi tompoka nge mokukara muzuvhisi gokukarerera nokulironga kounivesiti. Name novakondi vange, ngatu litjangere nombilive kuhamena etokoro lyange lyokuhageka kudimba kounivesiti. Ame kwa tengwire  koVenezuela ntani na ya tamekere uzuvhisi wokukarerera.

MwaPembagona 1957 yipo na tengwire mositata saCaracas. Ame kwa ka dimbwilire asi ukaro wemepata lyetu kapi wa wepe. Mepata lyetu mwa hepere kukara gumwe gokurugana. Ngapi omu na vhulire kuvatera epata lyetu? Ame kwa gwene yirugana yomombanga nye simpe na here kurugana uzuvhisi wokukarerera morwa ezi kuna kara konda ezi na dirukilire koVenezuela. Yipo na tokwere ku yi rugana nayinye mouvali wayo. Ure wonomvhura dongandi, ame ngani rugana mombanga ntani nouzuvhisi wokukarerera.

Ame kwa hefe sili unene apa twa likwere namunazinyetu gomuwa goMundovesi Sylvia, ogu ga here unene Jehova. Age kwa dirukilire koVenezuela novakondi vendi. Konyima zosiruwo twa ya kere novana vetu vavali. Gomumati, Michel Mike ano gomukadona, Samira. Ame hena na tamekere kupakera mbili oyina. Awo kwa tungire kumwe nose. Nampili ngomu na hagekere uzuvhisi wokukarerera yipo ni pakere mbili epata lyetu, ame simpe ngani zuvhisa noupampi. Poyiruwo yimwe apa ngayi tu tompoka posiruwo somapwizumuko, name naSylvia ngatu rugana uzuvhisi wokuvatera.

Apa na ligwanekerere nosihorokwa esi kani tumbura ketamekero lyosirongwa esi, awo vana vetu simpe kuna kudimba sure. Ame nayi divire asi eparu lyange kwa wepe ntani varugani vakwetu womombanga kwa fumadekere nge. Nye ame kwa here simpe vantu va tare nge asi ame nimukareli gwaJehova. Yipo nye, ame kwa gazadarere ko eyi na hepere kurugana yipo vantu va tare nge asi ame mukareli gwaJehova. Name namukadange kwa litulilire po siruwo yipo tu zogere kuhamena yirugana yetu. Ngano na hagekere yirugana yange, ame ngano na gwene pensiyuni zange. Mokumona asi kapi twa kere nomakongo, ose kwa gazarere asi nsene tu rerupika eparu lyetu, ngatu vhura kukara noyimaliwa yokugwanena po, eyi ngayi tu vatera siruwo sosire.

Kapi ya kere ureru mokutura po etokoro lyangoso. Nye nampili ngoso, mukadange ntani noyina kwa kwatesere ko etokoro olyo. Ame hena kwa tokwere kukara muzuvhisi gokukarerera. Ayo kwa hafesere nge sili. Ame kwa liwapaikilire kutameka uzuvhisi wokukarerera. Nye konyima tatu gwana mbudi zohararasi.

Ezuva limwe ndokotora gwetu kwa tanterere Sylvia asi ana kara nezimo. Mbudi ozo kwa tu tetukisire. Ose kwa hefe sili. Nye simpe na gazadarere ko kuhamena etokoro lyange lyokukara muzuvhisi gokukarerera. Ame kwa lipulire asi ngayi  tompoka nge kukara muzuvhisi gokukarerera ndi? Konyima zosiruwo, ose kwa kere tuna litura ntani kwa ndindilire nononkondo mukeke gwetu. Nye ame simpe kwa lipulire nsene ngayi tompoka nge kukara muzuvhisi gokukarerera.

Konyima zokuzogera yitambo yetu, yipo twa tokwere asi ngani kara muzuvhisi gokukarerera. Munetu gomumati Gabriel kwa mu hampuruka mwaKudumogona 1985. Konyima zosiruwo, ame kwa hagekere yirugana yange yomombanga makura yipo na tamekere hena uzuvhisi wokukarerera mwaPembagona 1985. Ano mwaza siruwo, yipo naya kere gumwe gomoKomitiye zoBeteli. Ano Beteli kapi za kere mositata saCaracas, eyi kutanta asi na hepere kusinga sinano sokusika ponokilometa 80, mazuva gavali ndi gatatu mosivike.

Beteli kwa kere modoropa zaLa Victoria. Makura yipo twa tokwere kudiruka nepata tu ka kare pepi noBeteli. Eli kwa kere elitjindjo lyenene kwetu. Ame kwa hara sili epata lyetu. Awo kwa likidire nkareso zongwa. Mukurwange gomukadi Baha, kwa tambwire situmbukira neharo yipo a pakere mbili oyina. Mike ga kwere, nye Samira naGabriel simpe kwa tungire membo lyovakurona vetu. Yipo nye, mokudirukira koLa Victoria, eyi kwa tente asi va hepere kusiga vakaume vawo womoCaracas. Ntani hena mukadange Sylvia, ga hepere kukayika modoropa zompe zonunu kupitakana oku twa tungire muhowo mositata sosinene. Ano natuvenye twa hepere kuyika kutunga monzugo zonunu. Yosili, yinzi ya hamenene mo mokudiruka tu tunde moCaracas tu ze koLa Victoria.

Nye yininke kwa ya rundurukire hena konyima. Gabriel kwa ya kwere, ano Samira ga hepere kutunda mo membo. Name naSylvia kwa tu tambwire koBeteli mo-2007. Ose kurugana koBeteli dogoro na neina eli. Munetu gomugara gomukondi po ngesi mukuronambunga ntani nage namukadendi Monica ngesi vazuvhisi wokukarerera. Gabriel nage ngesi mukuronambunga. Age kwa tunga moItalia kumwe namukadendi. Ano Samira, muzuvhisi gokukarerera ntani pamwe kuvatera koBeteli.

Yosili, ame na hepere kutura po matokoro gomanzi meparu lyange. Kapi nina kulivera. Ngwendi ni ture po hena matokoro gokulifana. Ni na kara norupandu kwa nayinye eyi na ruganena Jehova mosirugana sendi. Mwa za nomvhura, ame naya dimbwilire omu ya kara nomulyo kukara nelikwatakano lyenene naJehova. Yi kare asi matokoro aga twa hepa ku tura po manunu ndi manene, Jehova ngatu pa mbili “ezi za pitakana unene nondunge nadinye.” (Fil. 4:6, 7) Name naSylvia, kuhafera kurugana koBeteli ntani ose kulizuvha asi Jehova ga tu tungika morwa twa mu tura muhowo meparu lyetu.