1. Morwasinke vakareli vaJehova ava lizuvhire mukuma poyiruwo yimwe?

SINZI SETU kulizuvha mukuma poyiruwo yimwe. Vamwe kulizuvha mukuma siruwo tupu sosisupi, nye kwavamwe kugusa siruwo. Ose kuvhura kulizuvha mukuma nampili kuna kara novantu. Vamwe kuvadigopera kutulisa po vakaume mombungakriste zompe. Vamwe kwa tundilira momapata omu ngava rugana kumwe yininke yoyinzi, nye awo kulizuvha mukuma apa ava li kara ure nekoro lyawo. Vamwe kudiworoka siruwo esi ngava hafere kumwe nomulikwali gwawo ogu ga dogoroka. Ano Vakriste vamwe, unene po ava kava tambwire usili ntaantani kulizuvha mukuma apa vekoro lyawo novakaume vawo wovahapuli ava dili kuvapakera mbili nokuvahepeka.

2. Mapuro musinke natu ka limburura mosirongwa esi?

² Jehova ga tu diva nawa-nawa ntani kutukwata egano. Jehova kuyidiva apa atu lizuvhu mukuma ntani ana hara kutuvatera. Ngapi omu Jehova a tu vatere? Yisinke natu rugana nsene asi ose kulizuvha mukuma? Ntani ngapi natu vatera vanavazinyetu womombungakriste ava ava lizuvhu mukuma? Tu zeni tu ka gwane malimbururo komapuro ogo.

3. Ngapi ga yi likidire Jehova asi ga kere nosinka kwaEliya?

³ Jehova kuna harere vakareli vendi navenye va hafe. Age kwa kara pepi nose ntani age kuyidimburura nsene tuna guwu. (Epis. 145:18, 19) Tu tareni omu Jehova ga kere nosinka komalizuvho gomuporofete Eliya. Age kwa parukire mosiruwo soudigu. Nonkore daJehova ngadi hepeke vakareli vaJehova, unene po ado kwa here kudipaga muporofete Eliya.  (1 Vah. 19:1, 2) Eliya kwa lizuvhire asi gelike muporofete ana hupu po mokukarera Jehova, ano eyi kwa mu guvisire. (1 Vah. 19:10) Karunga kwa rugene ko yuma usimbu yipo a vatere Eliya. Jehova kwa tumine muengeli a ka tantere muporofete Eliya asi kapisi gelike ana kara nokumudiworokesa asi pwa kere simpe vantu ava ngava karere Jehova noulimburukwi.—1 Vah. 19:5, 18.

4. Ngapi Marukusa 10:29, 30 azi likida asi Jehova ga kara nosinka kwava ava dili kugwana evatero ngesi kovanekoro novakaume vawo?

⁴ Jehova ga yi diva asi apa atu tokora kumukarera, vamwe vetu kutura po malizambero gomanene. Ano morwa eyi, ose kapi atu gwana evatero lyokutunda kovanekoro novakaume ava ava dili kukarera Jehova. Peturusa nampo ga kere nosinka, makura yipo ga pulire Jesus asi: “Ose amesi nayinye twa siga, yiyo atu ku kwama. Yinke eyi ngatu ka gwanena po?” (Mat. 19:27) Jesus kwa tumbwidilire varongwa vendi asi mbungakriste ngazi kara ngwendi epata lyawo lyopampepo. (Resa Marukusa 10:29, 30.) Ano Guhyetu gemeguru Jehova kwa tumbwidira asi age nga pakera mbili ava vana hara kumukarera. (Epis. 9:10) Koneka yininke eyi no rugana yipo Jehova a ku vatere o lididimikire mukuma.

5. Mauwa musinke ngo gwanena mo nsene o gazadara ko omu Jehova ana kukuvatera?

⁵ Gazadara ko omu ana kukuvatera Jehova. (Epis. 55:22) Eyi ngayi kuvatera o dimburure asi kapisi nyovelike ono kara. Munazinyetu gomukadi gomudike Carol, * ogu ga kara gelike mousili kwa tanta asi: “Apa ani gazadara omu Jehova ga vatera nge ni lididimikire maudigu, ayo kuvatera nge ni dimburure asi kapisi nyamelike nina kara. Ntani ayo kuvatera nge ni kare nehuguvaro asi Jehova nga twikira kuvatera nge nokomeho.”

6. Ngapi etjangwa lya-1 Peturusa 5:9, 10 nali korangeda ava ava lizuvhu mukuma?

⁶ Gazadara ko omu Jehova ana kuvatera vanavazinyetu ava ava lizuvhu mukuma. (Resa 1 Peturusa 5:9, 10.) Munazinyetu  gomugara Hiroshi ogu ga kara gelike mousili kwa tanta asi: “Ayo ureru kudimburura asi nkenye gumwe gomombungakriste ga kara nomaudigu. Ayo kutukorangeda sili pokudiva asi natuvenye kuna kukondja paapa twa hulira mokukarera Jehova, unene po nsene nyoselike twa kara mousili.”

7. Ngapi a ku ku vatere kukanderera?

⁷ Kanderera nkenye apa nokuresa Bibeli ntani wiza komapongo. Eyi kwa kwatera mo kutantera Jehova nayinye omu ono kulizuvha. (1 Pet. 5:7) Munazinyetu gomukadi Massiel kwa tanta asi: “Sininke simwe esi sa vatera nge ni lididimikire mukuma kuna kara kukanderera kwaJehova nkenye apa.” Apa mudinkantu ogu ga tokwere kukarera Jehova, age kwa lizuvhire mukuma morwa gelike ga kere mousili. Age kwa tanta hena asi: “Ame kutara Jehova ngwendi otate ntani ame kukanderera kwendi yikando yoyinzi nkenye ezuva nokumutantera omu nina kulizuvha.”

8. Ngapi omu kuresa Bibeli nokuteda ko a yi ku vatere?

⁸ Resa Bibeli nkenye ezuva ntani teda ko monkedi omu Jehova ga ku likida eharo. Munazinyetu gomukadi Bianca ogu ga lididimikira madompeso gokutunda kovanekoro kwa tanta asi: “Ayo kuvatera nge apa ani resa Bibeli nokuteda ko koyihorokwa yamo ntani nomasimwititi govanavazinyetu ava va lididimikira ukaro ngwendi wange.” Vanavazinyetu vamwe kudiworoka matjangwa gokuhengagwida ngwendi Mapisarome 27:10 ntani Jesaya 41:10. Ano vanavazinyetu vamwe kupurakena koyimbapiratjangwa eyi va kwateka apa ava liwapaikire komapongo ndi kuna kurugana ereso lyawo lyoBibeli. Awo kwa tanta asi ayo kuvavatera va dire kuzuvha mukuma unene.

9. Mauwa musinke o gwanene mo pokuwiza komapongo?

⁹ Wiza komapongo nkenye apa. Nsene o wiza nkenye apa komapongo, ove ngo ya gwanena mo ekorangedo ntani ngo ya lidiva novanavazinyetu. (Heb. 10:24, 25) Massiel ogu vana tumbura muhowo kwa tanta asi: “Nampili ngomu ngani lizuvhu nomuga, ame kwa tokwere kuza komapongo nagenye ntani nokulihameka mo mokugava malimbururo. Eyi kwa vatera nge ni lizuvhe asi name kwa hamena kombungakriste.”

10. Morwasinke ya karera nomulyo tu tulise po ukaume noVakriste wovalimburukwi?

¹⁰ Tulisa po ukaume noVakriste wovalimburukwi. Tulisa po vakaume womombungakriste ava no vhura kulirongera ko, yi kare asi nomvhura dawo dingapi ndi ntundiliro zawo za lisiga nezi zoge. Bibeli kuuyunga  asi “vakurona kwa kara nounongo.” (Joba 12:12) Vakurona kuvhura nawo va lirongere ko yoyinzi kovadinkantu. Ndafita kwa kere munona kwaJonatana nye nampili ngoso age kwa tulisire po ukaume wounene nendi. (1 Sam. 18:1) Ndafita naJonatana ngava livatere kumwe mokukarera Jehova yi kare asi momaudigu musinke. (1 Sam. 23:16-18) Munazinyetu gomukadi Irina ogu ga kara gelike mousili kwa tanta asi: “Vanavazinyetu ku ya kara ngwendi vakurona vetu novamumbya vetu. Jehova kuvhura kuvaruganesa va sikise mo yihepwa yetu.”

11. Yisinke natu rugana yipo tu tulise po ukaume wounene novakwetu?

¹¹ Kuvhura yi dire kukara ureru kutulisa po vakaume wovape, unene po nsene asi ove nomuga. Munazinyetu gomukadi gonomuga Ratna ogu ga lirongere usili nampili ngomu ga li gwanekerere nomakondjeso kwa tanta asi: “Ame naya yi dimbwilire asi na hepere evatero lyovanavazinyetu.” Ayo kuvhura kukara udigu kutantera gumwe malizuvho goge, nye nsene o yi rugana ngoso, ove ngo tulisa po ukaume nage. Vakaume woge vana hara kukukorangeda nokukuvatera, nye wa hepa kuvatantera yipo va dive omu nava vhura kuyirugana.

12. Ngapi omu kulihameka moyirugana yokuzuvhisa nayi tu vatera tu tulise po vakaume wovawa?

¹² Kulihameka mokuzuvhisa novakwetu kuna kara nkedi zimwe zongwa unene zokutulisa po vakaume. Carol ogu ka tu tumbura muhowo kwa tanta asi: “Kulihameka mokuzuvhisa ntani noyirugana yimwe yomombunga zaJehova kwa vatera nge ni tulise po vakaume wovawa. Ano monomvhura dononzi, Jehova kwa vatera nge kupitira movakaume ava na tulisa po.” Ayo ya kara nomulyo tu tulise po ukaume noVakriste vakwetu. Jehova kuruganesa vakaume owo yipo va tu korangede apa atu lizuvhu mukuma.—Yis. 17:17.

13. Situmbukira musinke va kara naso navenye womombungakriste?

¹³ Navenye womombungakriste va kara nositumbukira sokuvatera mbungakriste zi kare mombili ntani nokulikida eharo kovanavazinyetu yipo va dire kulizuvha mukuma. (Joh. 13:35) Eyi atu rugana neyi atu uyunga kuvhura kukorangeda wopeke. Munazinyetu gumwe gomukadi kwa tanta asi: “Apa na lirongere usili, vanavazinyetu kwa ya kere ngwendi ekoro lyange. Pwa hana evatero lyawo, ame ngano kapi na ya kara gumwe goNombangi daJehova.” Yisinke no rugana o vatere vanavazinyetu ava va kara velike mousili, va lizuvhe asi twa va hara?

14. Yisinke no rugana yipo o tulise po ukaume nava wovape?

¹⁴ Tulisa po ukaume nava wovape. Ose kuvhura kuyirugana oyo pokuvatambura komapongo. (Rom. 15:7) Nye nampili ngoso, twa hepa kurugana ko yoyinzi kupitakana tupu kuvatambura komapongo. Twa hepa kutulisa po ukaume wounene nawo. Yipo nye, kara nombili ntani yi likida asi wa kara nosinka kwawo. Hetekera ko kukwata egano maudigu aga vana kuligwanekera nago nye nyokera po kuvapura mapuro aga naga va fisa nomuga. Vamwe kuvadigopera kuuyunga omu vana kulizuvha, yipo nye takamesa yipo o dire kuvasininika va uyunge. Nye ruganesa mapuro gomawa ntani purakena nawa ngomu vana kukulimburura. Pasihonena, kuvhura o va pure omu va tamekere kulironga usili.

15. Ngapi Vakriste ava va kura pampepo nava vatera womombungakriste?

¹⁵ Navenye womombungakriste ngava kura  pampepo nsene Vakriste ava va kura pampepo vayi likida asi va va hara, unene po vakuronambunga. Melissa ogu va rerera ozina mousili kwa tanta asi: “Ame kupandura unene vanavazinyetu wovagara ava va kere ngwendi otate, awo kwa vatera nge unene. Ame kuuyunga nawo nsene nina hepa evatero kwawo. Munazinyetu gomudinkantu Mauricio kwa guvire apa murongi gwendi goBibeli ga sigire usili. Mauricio kwa tanta asi: “Vakuronambunga va yi likidire asi va kara nosinka kwange, ano eyi kwa vaterere nge unene. Awo ngava uyunga name nkenye apa, ngava rugana kumwe name mokuzuvhisa, ngava tantere nge yitwa yomulyo eyi ngava gwana moBibeli ntani ngatu dana hena kumwe maudano.” Melissa naMauricio ngesi kwa kara mosirugana sokuzuvhisa sosiruwo nasinye.

16-17. Mononkedi musinke hena dimwe natu vatera wopeke?

¹⁶ Vatera mononkedi dokulisiga-siga. (Gar. 6:10) Munazinyetu Leo gomutumwa ogu a ruganene mosirongo esi sa li kara ure nekoro lyendi kwa tanta asi: “Rorunzi eyi twa hepa poyiruwo yimwe kuna kara evatero. Tani diworoka ezuva limwe apa na ligwanekerere nehudi lyetuwa. Ame kwa kere nosinka sosinene apa na ka sikire kembo. Nye valikwali vamwe kwa zigidire nge kembo lyawo yipo tu ka lye kumwe. Kapi na kudiworoka nondya edi twa lire, nye kuna kudiworoka asi awo kwa purakenene nge nawa. Ano konyima zosiruwo, ame kwa lizuvhire ko hansa.”

¹⁷ Natuvenye kuhafera yigongi morwa ose kukara novanavazinyetu ntani kuzogera hena kumwe eyi yina pitire mo. Carol ogu katu tumbura muhowo kwa tanta asi: “Ame kulizuvha mukuma apa ani kara koyigongi.” Morwasinke a lizuvhire mukuma? Age kwa tanta asi: “Nampili ngomu ani kara novanavazinyetu wovanzi, nye awo kuhingira nomapata gawo gelike. Apa ani va mono, ame kulizuvha sili mukuma gomunene.” Ano vamwe kuvadigopera kuza komapongo sikando sawo sokuhova, unene po nsene kwa fisa mulikwali gwawo. Wa diva ko gumwe ogu ana kupita momaudigu gangoso ndi? Nsene yimo, kuvhura o mu pure yipo ngomu ka hingire nepata lyeni posigongi sokukwama ko.

18. Ngapi natu tura pasirugana etjangwa lyova-2 Vakolinte 6:11-13?

 ¹⁸ litulira po siruwo sokukara kumwe nava ava lizuvhu mukuma. Litulira po siruwo sokukara novanavazinyetu wokulisiga-siga, unene po ava ava lizuvhu mukuma. Ose tuna hara ‘kulitambura-tambura’ novakwetu. (Resa 2 Vakolinte 6:11-13.) Melissa ogu ka tu tumbura muhowo kwa tanta asi: “Ose ngatu yi hafere sili apa vanavazinyetu ngava tu zigida komambo gawo tu ka hafere kumwe nawo.” Kweli gumwe gomombungakriste ogu no vhura kuzigida kembo lyeni ndi?

19. Poyiruwo musinke natu hepa kukara unene novanavazinyetu?

¹⁹ Pwa kara yiruwo yimwe eyi ava tu hepa unene vanavazinyetu, yipo tu kare kumwe nawo. Vanavazinyetu vamwe kuvakarera udigu mokukara kumwe nekoro lyawo wovahapuli apa ava kara noyilika yomaukarelikarunga goyimpempa. Vamwe kuvaguvisa unene apa a li siki mo ezuva eli ga dogorokere mulikwali gwawo. Nsene tu li tulira po siruwo tu kare novanavazinyetu ava vana kupita momaudigu ogo, ose ngatu yi likida asi kuna ‘kuvapakera mbili.’—Fil. 2:20.

20. Ngapi nadi tu vatera nonkango daJesus edi da kara mwaMateusa 12:48-50, nsene kuna kulizuvha mukuma?

²⁰ Pwa kara nokonda dimwe deyi Mukriste a lizuvhire mukuma poyiruwo yimwe. Nye nampili ngoso, Jehova ga yi diva apa muntu a lizuvhu mukuma. Age kutuvatera, unene po kupitira movanavazinyetu. (Resa Mateusa 12:48-50.) Nsene tu vatera vanavazinyetu, ose ngatu yi likida asi twa kara norupandu kweyi twa hamena kombungakriste. Yi kare asi ngapi tuna kulizuvha, ose kapisi nyoselike tuna kara morwa Jehova pepi ga kara nose!