Paurusa kwa tjenge asi: “Kombinga zoVeta ame na fa koVeta zene, asi ni kerere nomwenyo Karunga.”—Gar. 2:19.

Eyi ga tjenge Paurusa ya lizire nononkango edi ga tjangerere nombungakriste edi da kere moGarata, moRoma. Vakriste vamwe kwa va pukisire eyi ngava rongo varongi woyipempa. Vagara owo ngava rongo asi mokuninka asi muntu a gwane ezoworo, ga hepere ku sikisa mo Veta zaMosesa, unene po veta zovamba. Nye Paurusa ga yi divire asi Karunga kapi ga ndindilire ko hena koVakriste va va rugane yovamba. Paurusa gayi likidire nawa-nawa asi marongo ogo kwa kere gepuko ntani age kwa nkondopekere epuro lyovapuli vakwawo kupitira monzambo zaJesus Kristusa zosizoweseso.—Gar. 2:4; 5:2.

Bibeli za yi likida nawa-nawa asi apa a fu muntu, age kwato eyi a diva. (Muud. 9:5) Apa Paurusa ga uyungire asi: “Ame na fa koVeta zene,”age kwa tembe asi kapi ga hepere kukwama Veta zaMosesa. Yipo nye, Paurusa ga yi pulire nawa-nawa asi nsene a tura epuro monzambo zosizoweseso, age ‘nga kara nomwenyo mwaKarunga.’

Veta ozo kwa ya tjindjire eparu lyaPaurusa. Monkedi musinke? Paurusa ga yi fatwilire asi: “Muntu, Karunga yige a mu hungamekesa kepuro lyokupura Jesus Kristusa, kapisi morwa kusikisa mo eyi za tanta Veta.” (Gar. 2:16) Veta ozo kwa sikisire mo yininke yomulyo. Paurusa kwa tjangerere Vagarata asi: “Kwa zi gwedererere ko, zi horore maunzoni, dogoro noku za wiza honde zaAbirahamu ezi ga tente Karunga.” (Gar. 3:19) Yimo, Veta za yi zeresere asi vantu wokusikilira mo wononzo kapi tava vhuru kusikisa mo nawa-nawa Veta, yipo nye awo va hepere nzambo zokusikiira mo. Veta ozo kwa vaterere vantu va dimburure asi Jesus yige ga kere “ruvharo.” Muntu kuvhura kumuhungamekesa nsene a tura epuro mwaJesus Kristusa. (Gar. 3:24) Paurusa ga ya kwete egano sitwa esi, morwa kupitira moVeta, age kwa ya tulire epuro mwaJesus. Paurusa ‘kwa fire koVeta’ ntani ga ya kere ‘nomwenyo mwaKarunga.’ Age kwa limburukwire po Karunga, nye kapisi Veta.

Paurusa kwa tjenge egano lyokulifana mombilive zendi ezi ga tjangerere Varoma. Age kwa tjenge asi: “None yimo nye vakwetu, one kwa fa yiyo muna hamene kwaKristusa . . . Twa manguruka mo moVeta, yeeyi twa fa kombinga zeyi ya tu kwatererere moupika.” (Rom. 7:4, 6) Etjwangwa eli neli lyomoVagarata 2:19, kulikida asi Paurusa kapi ga uyungire kuhamena kufa oku za retesa po Veta nsene muntu ana tura nzo. Nye age kwa uyungire kuhamena kuzowoka. Age kwa ya mangurukire koVeta ozo, kukwatera mo navamwe. Awo kwa mangurukire moVeta ozo morwa kwa tulire epuro monzambo zaKristusa.