1. Yisinke eyi va va tanterere vanayirongo va rugane?

MBUNGA zovagara novakadi kwa zire koJerusarema. Awo kwa tundire koyirongo yokulisiga-siga ntani kwa uyungire maraka gokulisiga-siga. Nye koyili yimwe yokutetukisa ya horokere ezuva olyo. Vajuda vamwe kwa tamekere kuuyunga maraka govanayirongo. Yininke eyi va uyungire Vajuda owo ntani neyi ga uyungire mupositoli Peturusa, kwa tetukisire vanayirongo owo. Vanayirongo kwa lirongere asi nsene va tura epuro mwaJesus Kristusa, ngayi va ninkisa va ka paruke. Eyi va lirongere kwa va gumine komutjima makura yipo va pulire asi ‘yisinke natu rugana vakwetu?’ Peturusa ta va limburura asi: ‘litezurureni yipo vamukuhwe.’—Yirug. 2:37, 38.

2. Yisinke natu ka zogera mosirongwa esi? (Tara efano lyopontunda.)

² Eyi ya kweme ko konyima kwa kere sitetu. Ezuva olyo vantu wokusika po-3 000 kwa gwene ekuho nokuyakara varongwa vaJesus Kristusa. Eli kwa kere etameko lyosirugana sokutulisa po varongwa, esi Jesus ga tanterere vasikuli vendi va rugane. Sirugana oso kuna kusirugana simpe varongwa vendi neina. Momazuva getu, vantu kapi ava gwana ekuho konyima tupu zokuzogera nawo novili dongandi. Nye ayo kugusa makwedi ndi mvhura ndi kupitakana opo komeho murongwa a gwane ekuho. Apo pwa hepa elituromo lyenene mokuvatera muntu a ya kare murongwa gwaKristusa. Mosirongwa esi, tatu ka zogera eyi no rugana o vatere murongwa goge goBibeli a gwane ekuho.

3. Kuliza naMateusa 28:19, 20, yisinke ga hepa kurugana murongwa yipo va ture po ezokomeho dogoro kekuho?

³ Komeho murongwa goBibeli a gwane ekuho, ga hepa kutura pasirugana eyi ana kulironga. (Resa Mateusa 28:19, 20.)  Apa murongwa a tura pasirugana eyi ana kulironga, age kwa fana ngwendi mugara gomunandunge gomosifanekeso saJesus ogu ga tungilire nzugo zendi pemanya. (Mat. 7:24, 25; Ruk. 6:47, 48) Ngapi natu vatera murongwa a ture pasirugana eyi ana kulironga? Tu zeni tu zogere ko yininke yitatu eyi natu rugana.

4. Ngapi natu vatera murongwa a ture po ezokomeho dogoro a ka gwane ekuho? (Tara kakende “ Vatera murongwa goge a litulire po yitambo ntani nokuyisikisa mo.”)

⁴ Vatera murongwa goge a litulire po yitambo. Morwasinke no yi ruganena? Koneka sifanekeso esi. Nsene asi ove kuna kuza morugendo netuwa, ove kuvhura o tokore kusikama pomavango gamwe goufuuli. Ayo ngayi kuninkisa o mone oku ono kuza ngwendi pepi. Mokulifana, nsene murongwa goBibeli a litulira po yitambo eyi na sikisa mo mosiruwo sosisupi, ngayi mu ninkisa a dimburure asi kuvhura yi mu tompoke kugwana ekuho. Ruganesa ruha oru ava tumbura asi “Heteka eyi” mobuke Hafera eparu narunye yipo o vatere murongwa goge a litulire po yitambo. Kehagero lyankenye sirongwa, zogera nomurongwa goge omu sitambo sa likwatakana neyi ana lirongo. Nsene ono hara murongwa goge a litulire po sitambo simwe hena, sitjanga moruha “Heteka hena eyi.” Zogera nomurongwa goge yitambo eyi na vhura kusikisa mo mosiruwo tupu sosisupi ntani neyi nayi mu gusa siruwo komeho a ka yi sikise mo.

5. Kuliza naMarukusa 10:17-22, yisinke ga tanterere Jesus mumati gongawo a rugane ntani morwasinke?

⁵ Vatera murongwa goge a ture po malitjindjo meparu. (Resa Marukusa 10:17-22.) Jesus ga yi divire asi mumati gongawo ngayi mu digopera mokukarandesa nayinye eyi ga wekere. (Mar. 10:23) Nye Jesus kwa tanterere mumati ogo a ture po malitjindjo gomanene meparu lyendi. Morwasinke? Morwa Jesus ga mu here. Poyiruwo yimwe, ose nampo kapi atu korangeda murongwa goBibeli a ture  pasirugana eyi ana kulironga morwa ose kulizuvha asi kapi simpe ana wapere kutura po malitjindjo. Ayo kuvhura kugusa siruwo kovantu mokuhutura muntu gomukurukuru ntani nokudwara muntu gomupe. (Koros. 3:9, 10) Nye nsene o zogera usimbu nomurongwa goge kuhamena malitjindjo aga na vhura kutura po, nga yi mu rerupira kutura po usimbu malitjindjo. Nsene o zogera nendi monkedi zangoso, ngo yi likida asi wa kara nosinka kwendi.—Epis. 141:5; Yis. 27:17.

6. Morwasinke natu pulira murongwa gwetu a uyunge omu ana kulizuvha ndi omu a tara yuma yongandi?

⁶ Ayo mulyo tu pure varongwa vetu mapuro aga naga va ninkisa va uyunge omu vana kulizuvha kuhamena sirongwa songandi. Mapuro ogo ngaga kuvatera o dimburure eyi ana kukwata egano murongwa goge ntani neyi ga pura. Nsene o yi rugana ngoso nkenye siruwo, ayo ngayi kurerupira kuzogera nendi yininke eyi nayi mu digopera kutambura. Mobuke Hafera eparu narunye, kwa kara mo mapuro aga naga vatera murongwa a uyunge omu ana kulizuvha ndi omu ana kutara yuma yongandi. Pasihonena, mosirongwa 4 kwa kara mo epuro asi: “Ngapi omu ono kugazara omu Karunga a lizuvhu apa o ruganesa edina lyendi?” Ano sirongwa 9 kwa kara mo epuro asi: “Yininke musinke yimwe ono hara kutumbura mekanderero?” Pomuhowo murongwa goge kuvhura yi mu digopere kulimburura mapuro ogo, nye kuvhura o mu vatere a gazadare ko komatjangwa ntani komafano ga kara mobuke ozo.

7. Ngapi natu ruganesa nawa yihorokwa yovantu pokuronga?

⁷ Nsene murongwa goge ana kwata egano eyi na rugana, ruganesa yihorokwa yavamwe mokumukorangeda ayi rugane ngoso. Pasihonena, nsene murongwa goge kumudigopera kuwiza komapongo, kuvhura o mu likide vidiyo Jehova kupakera nge mbili ezi za kara mosirongwa so 14 koruha “Mauzera gamwe.” Yihorokwa yovanavazinyetu kuvhura kuyigwana moyirongwa yoyinzi mobuke Hafera eparu narunye. Ayo kuvhura kuyigwana koruha “Lironga yoyinzi” ndi koruha “Mauzera gamwe.” * Wa ha hetakanesa murongwa goge kwavamwe pokuuyunga asi “nsene asi ga yi sikisire mo, nove kuvhura o yisikise mo.” Pulisira murongwa goge a yi dumburure mwene monkedi zangoso. Nye tumbura tupu yininke eyi ya vaterere muntu ogo vana likida movidiyo a ture pasirugana magano gomoBibeli. Nampo kuvhura o tumbure etjangwa ndi sininke simwe esi ga rugene muntu ogo vana likida movidiyo. Ano nsene hepero, faturura omu Jehova ga vaterere muntu ogo.

8. Ngapi natu vatera varongwa vetu va hare Jehova?

⁸ Vatera murongwa goge a hare Jehova. Ngapi no yi rugana? Mu vatera a dimburure yikara yaJehova yoyiwa. Vatera murongwa goge a mone Jehova asi age Karunga goruhafo ogu a vatere vantu ava va mu hara. (Heb. 11:6) Vatera murongwa goge a dimburure asi nsene a tura pasirugana eyi ana kulironga, nga gwanena mo mauwa ntani mufatwilira asi mauwa ogo kulikida asi Jehova ga mu hara. (Jes. 48:17, 18) Nsene murongwa goge a hara Jehova ngayi murerupira kutura po malitjindjo meparu lyendi.—1 Joh. 5:3.

9. Kuliza naMarukusa 10:29, 30, yisinke nayi vatera muntu a ture po malitjindjo yipo a gwane ekuho?

⁹ Mokuninka asi murongwa a gwane ekuho, ga hepa kutura po malitjindjo. Ngwendi  mumati gongawo ogu ka tu tumbura ketameko, varongwa vamwe va hepa kutura po malitjindjo, nampo pokusiga yininke yopanyama. Awo kuvhura va papare ko yirugana yapeke nsene yirugana yawo kapi ya liza nonompango doBibeli. Wovanzi kuvhura kusiga vakaume vawo ava ava dira kuhara Jehova. Vamwe kuvhura vava sigilire vanekoro vawo ava va dira kuhara Nombangi daJehova. Jesus kwa uyungire asi vamwe ngayi va karera udigu kutura po malitjindjo gangoso. Nye ga tumbwidilire hena asi ava ava mu kwama ngava gwanena mo mauwa. Jehova ngava tungika pokuvapa epata lyopampepo lyovanavazinyetu. (Resa Marukusa 10:29, 30.) Ngapi novatera murongwa goge goBibeli a gwanene mo uwa mouhwi ou wouwa?

10. Yisinke ono lirongere ko kosihonena saManuel?

¹⁰ Tulisa po ukaume nomurongwa goge. Ayo mulyo o yi likide asi wa kara nosinka komurongwa goge. Morwasinke? Tu tareni eyi ga uyunga munazinyetu Manuel ogu ga tunga moMexico. Age kwa tanta asi: “Komeho zankenye elirongo, murongi gwange nga pura nge omu nina karere. Age nga vatere nge ni kare nina litura ntani nga pura nge ni mu tantere nkenye eyi. Ame ngani lizuvhu asi age ga kere nosinka kwange.”

11. Mauwa musinke ngava gwanena mo varongwa vetu nsene tu litulira po siruwo sokukara kumwe nawo?

¹¹ Litulira po siruwo sokukara novarongwa woge ngwendi moomu Jesus ga litulilire po siruwo sokukara novarongwa vendi. (Joh. 3:22). Nsene murongwa goge goBibeli kuna kutura po malitjindjo meparu, muzigida ko kembo lyoge mu ka hafere po kulya ko nondya ndi kukatarera elikwamo lyoBroadcasting. Murongwa goge ngayi hafera nsene o mu zigida, unene po apa vakaume vendi nekoro lyendi ava kara noyilika eyi ya lilimba noBibeli. Kazibwe ogu ga tunga moUganda kwa tanta asi: “Ame na lironga yoyinzi kuhamena Jehova pokulitulira po siruwo sokukara nomurongi gwange. Ame nalimonena omu Jehova  a pakere mbili vantu vendi ntani nomu va kara noruhafo. Eyi yiyo na here name meparu lyange.”

12. Morwasinke ya karera nomulyo tu ze novazuvhisi wokulisiga-siga komurongwa gwetu goBibeli?

¹² Zende novazuvhisi wokulisiga-siga komurongwa goge goBibeli. Poyiruwo yimwe kuvhura tu lizuvhe asi ya wapa tupu kuza nyoselike ndi nomuzuvhisi gokulifana nkenye apa komurongwa gwetu goBibeli. Nampili ngomu ya kara ureru kuyirugana ngoso, nye varongwa vetu woBibeli ngava gwanena mo uwa nsene tuza novazuvhisi wokulisiga-siga. Dimitry ogu ga tunga moMoldova kwa tanta asi: “Vazuvhisi navenye ava ngava kara pelirongo lyange ngava faturura yirongwa mononkedi dokulisiga-siga. Ayo kwa vaterere nge ni dive omu nani tura pasirugana eyi ngani lirongo. Ame kapi na kere nowoma apa na zire kepongo lyange lyokuhova morwa sinzi sovanazinyetu na va divire nare.”

13. Morwasinke natu vaterera murongwa gwetu a wize komapongo?

¹³ Vatera murongwa goge a wize komapongo. Morwasinke? Morwa Jehova kwa pangera vakareli vendi va ponge kumwe. Kuponga kumwe kuna kara ruha roukareli wetu. (Heb. 10:24, 25) Ntani hena vanazinyetu kuna kara epata lyetu lyopampepo. Apa a tu kara kumwe nawo komapongo, ayo kwa fana ngwendi kuna kulya kumwe nawo nondya donontovara. Nsene o vatera murongwa a wize komapongo, ove ngoso kuna kumuvatera a ture po ezokomeho yipo a gwane ekuho. Nye kuvhura yi mu karere udigu kuwiza komapongo. Ngapi omu buke Hafera eparu narunye nazi vatera murongwa goge a funde po maudigu aga naga mukondera a dire kuwiza komapongo?

14. Ngapi natu korangeda varongwa vetu va wize komapongo?

¹⁴ Ruganesa sirongwa 10 mobuke Hafera eparu narunye sikuvatere o korangede murongwa goge a wize komapongo. Komeho va pwagese buke ezi, vazuvhisi vamwe kwa va pulire va ruganese sirongwa oso novarongwa vawo. Ano sirongwa oso kwa vatera varongwa vawo va tameke kuwiza komapongo. Nye kapisi hepero o ndindire dogoro mu ka sike mosirongwa 10 ntani nye nozigida murongwa goge komapongo. Nye tameka kumuzigida pwa hana kupita siruwo sosire ntani muzigida nkenye apa. Varongwa woBibeli kwa kara nomaudigu gokulisiga-siga. Yipo nye, purakena kweyi ana kukutantera murongwa goge ntani mu vatera nsene kuvhura. Kapisi yi ku guvise nsene age kuna kugusa siruwo mokuwiza komapongo. Lididimikira ntani twikira kumuzigida.

15. Utjirwe musinke nampo ava kara nawo varongwa vetu?

¹⁵ Todiworoka apa wa kere nowoma mokukara gumwe goNombangi daJehova ndi? Nampo ove kwa lizuvhire asi kapi ngayi kutompoka kuzuvhisa tunda embo zende embo, ndi nampo wa kere nowoma asi vekoro lyoge ndi vakaume woge ngava kurwanesa. Nsene yimo, ove kuvhura o kwate egano omu a lizuvhu murongwa goge. Jesus kwa uyungire asi vamwe ngava kara noutjirwe wangoso. Nye nampili ngoso, age kwa tanterere varongwa vendi asi kapisi va pulisire utjirwe wangoso u va hagekese mokukarera Jehova. (Mat. 10:16, 17, 27, 28) Ngapi omu Jesus ga vaterere varongwa vendi va funde po utjirwe ntani ngapi nove no honena Jesus?

16. Ngapi natu deura varongwa vetu va tantere ko wopeke eyi vana kulironga?

¹⁶ Deura murongwa goge a tantere ko wopeke eyi ana kulironga. Varongwa vaJesus nampo va kere nowoma apa gava tumine  va ka zuvhise. Nye Jesus kwava vaterere pokuvatantera oku nava ka zuvhisira ntani nombudi ezi nava ka zuvhisa. (Mat. 10:5-7) Ngapi omu nohonena Jesus? Vatera murongwa goge a dive oku na zuvhisira. Pasihonena, mupura nsene ana diva ko gumwe ogu ana hara kulironga Bibeli makura mulikida nkedi zoureru omu na zuvhisira wopeke. Liyomberesa nendi magano aga ga kara mobuke Hafera eparu narunye ruha “Vamwe kutanta asi.” Nsene kuna kuyirugana ngoso, deura murongwa goge a dive kuruganesa Bibeli mokulimburura mapuro monkedi zongwa.

17. Ngapi natu ruganesa Mateusa 10:19, 20, 29-31 tu vatere varongwa vetu woBibeli va huguvare mwaJehova?

¹⁷ Vatera murongwa goge a huguvare mwaJehova. Jesus kwa tanterere varongwa vendi asi Jehova ngava vatera morwa ga va hara. (Resa Mateusa 10:19, 20, 29-31.) Diworokesa murongwa goge asi Jehova nga mu vatera nage. Kuvhura o mu vatere a huguvare mwaJehova pokukanderera kumwe nendi kuhamena yitambo yendi. Franciszek ogu ga tunga moPoranda kwa tanta asi: “Murongi gwange goBibeli nga tumbura yitambo yange momakanderero gendi. Apa na mwene omu Jehova ga limbwilire makanderero gendi, name kwa tamekere kukanderera. Apa ngani hundire epulisiro poyirugana yange yoyipe yipo nize komapongo nokoyigongi, ame nayi dimbwilire asi Jehova kwa vaterere nge.”

18. Ngapi sirugana sokuronga esi ava rugana Vakriste asi kundama Jehova?

¹⁸ Jehova ga kara nosinka sosinene kovarongwa vetu woBibeli. Age kuhafera sirugana esi ava rugana Vakriste mokuronga vantu va mu hedere pepi ntani gava hara. (Jes. 52:7) Nsene asi ngesi kapi ono kara nomurongwa ogu ono kulironga nendi Bibeli, kuvhura simpe o vatere varongwa woBibeli va ture po ezokomeho dogoro kekuho pokuza novazuvhisi vakweni kovarongwa vawo woBibeli.