MOSIRUWO sanare, Vaisraeli ngava futu yimaliwa yipo va kwatese ko ukarelikarunga wousili. Nye momazuva gaJesus, Vajuda ngava futu mutero gomunzi, ano eyi kwa digopekesere eparu lyawo.

Mokuninka asi va kwatese ko nkongoronzugo ntani ntembeli, Vajuda navenye wovagara va hepere kufuta ‘madimu gavali.’ Momazuva gaJesus, mutero ogo ngava gu ruganesa mokugava nonzambo ntani mokukwatesa ko ntembeli ezi ga tungire Herodesa. Vajuda vamwe kwa pulire Peturusa nsene Jesus nga futu mutero ogo, ano Jesus kwa uyungire asi kapi pwa kere epuko kufuta mutero ogo. Yipo nye, Jesus kwa tanterere Peturusa oku na vhura ku ka gwana simaliva yipo a ka fute mutero.—Mat. 17:24-27.

Vantu vaKarunga va hepere hena kufuta mutero ogu ngava tumbura asi siumurongo, eyi kwa tembe koyiyimwa yemepya ndi pweyi ngava gwana mokurandesa. (Lev. 27:30-32; Num. 18:26-28) Vampitisili womaukarelikarunga kwa uyungire asi vantu va hepere kudivilisa asi vana futu mutero goyikwahidi nayinye nampili “yehidi lyokutovesesa.” Jesus kapi ga uyungire asi ayo epuko kugava yiumurongo, nye age kwa uyungire asi monkedi ezi valirongi womatjangwa noVafalisayi ngava kwama Veta zokugava yiumurongo, kwa kere nkedi zepuko.—Mat. 23:23.

Nye posiruwo sina, Vajuda va hepere hena kufuta mutero gokulisiga-siga kepangero lyoVaroma eli ngali va pangere. Pasihonena, ava va kere nomavango va hepere kufuta yimaliwa ndi nkenye eyi ngava randesa. Ntani nsene muntu ana zangura nonsako ne mepya lyendi, ga hepere kugava po zimwe kepangero lyoVaroma. Nkenye Mujuda ga hepere hena kufuta edimu. Mutero ogu yigo va pulire Vafalisayi Jesus. Eyi ga limbwilire Jesus kwa likidire omu natu vhura kutara mutero. Age kwa tente asi “Omu futire hompa gwaRoma eyi ya mu hamena, ano Karunga nage yeeyi ya mu hamena.”—Mat. 22:15-22.

Pwa kere hena mutero ogu ngava futu nsene yininke yokurandesa yi wiza mosirongo ndi tayi pwaga mo. Mutero ogo ngava gu futire pomazenga goyikepa, pomavero gokuhwililira modoropa ndi pomarandesero.

Vantu ava nga li pangere epangero lyaRoma kwa va digoperere kufuta mutero. Kuliza nomunahistoli Tacitus gomoRoma, mepangero lyaTibeliusi posiruwo esi Jesus ga kere pevhu, age kwa tente asi “Vasiliya novaJudeya kwa li kwamberere kepangero yipo vantu va fute mutero gomusesu morwa vantu ngayi va digopere.”

Monkedi omu ngava pongaike yimaliwa yomutero, ngayi digopere vantu. Sirugana sokukara mufutisi gomutero ngava si gava komuntu ogu nga gava yimaliwa yoyinzi yipo a si gwane. Makura nage nga kutu vamwe yipo va pongaike mutero, nye vantu owo ngava pura hena yoyinzi kupitakana mutero ogu gwa kere po yipo va ngawopere mo. Sakeusa nage kwa kere mukurona gongawo govafutisi womutero . (Ruk. 19:1, 2) Vantu kwa nyengere ava ngava pongaike mutero.