1. Utjirwe musinke ava kara nawo vamwe?

 GAZADARA ko maukaro aga gana kukwama ko, aga va ligwanekera nago vanavazinyetu vamwe. Nestor namukadendi María, kwa here kudirukira kevango oku kwa kere hepero zonene zovazuvhisi. * Mokuninka asi va yi rugane oyo, awo va hepere kudiva omu nava ruganesa yimaliwa yoyisesu. Nye awo kwa kere nowoma asi kuvhura ngava dire kukara noruhafo, nsene va kara noyimaliwa yoyisesu. Apa Biniam ga kere gumwe goNombangi daJehova mosirongo esi va silikire sirugana setu, age ga yi dimbwilire asi mokumona asi age kwa kere gumwe govantu vaKarunga, nage kuvhura ngava mu hepeke. Ano oyo kwa mu tjilisire. Nye age kwa kere noutjirwe wounene kuhamena eyi ngava vhura kurugana vekoro lyendi, apa ngava dimburura asi age kuna hamene koukarelikarunga woupe. Valérie kwa mu kwatekere kankera zosiponga unene ntani age kwa mu digoperere kugwana ndokotora gokutaura, ogu ga vhulire kufumadeka epuliro lyendi lyokuhamena honde. Age kwa tjilire asi nampo kuvhura a fe.

2. Morwasinke natu ruganena paapa twa hulira yipo tu nyokere po utjirwe?

² Nove wa kara rumwe noutjirwe wangoso ndi? Sinzi setu twa kere nawo. Nsene tu pira kudiva kupangera utjirwe wetu, ayo kuvhura ngayi tu ninkise tu ture po matokoro gepuko aga nga ga tura elikwatakano lyetu naJehova mosiponga. Ano eyi yiyo ana hara Satana. Age kuhetekera ko ku ruganesa hena utjirwe ou twa kara nawo, yipo tu dire kulimburukwa noveta daJehova, kukwatera mo mpango zokuzuvhisa mbudi zongwa.  (Ehor. 12:17) Satana mudona, age kwato nkenda ntani ga kara nononkondo. Nye kuvhura omu nyokere po. Ngapi no yi rugana?

3. Yisinke nayi tuvatera tu funde po utjirwe?

³ Apa atu yi pura nawa-nawa asi Jehova ga tu hara ntani asi nga tu vatera nkenye apa, Satana kapi nga vhura kututjilisa. (Epis. 118:6) Pasihonena, mutjangi gEpisarome 118 kwa ligwanekerere nomaukaro goudigu. Age kwa kere nononkore dononzi, kukwatera mo vantu vamwe wokufumana (velise 9, 10). Poyiruwo yimwe age kwa kere nosinka sosinene (velise 13). Ntani age kwa gwene episuro lyokutunda kwaJehova (velise 18). Nye nampili ngoso, mutjangi gepisarome kwa dimbire asi: “Neisi ngani tjilira.” Yisinke ya mu ninkisire a li zuvhe epopero? Nampili ngomu Jehova ga mu piswire, age ga yi divire asi oGuhwe vemeguru kwa mu hara unene. Mutjangi gepisarome ga yi pulire nawa-nawa asi, yikare asi ukaro musinke nga li gwanekera nawo, Karunga ga liwapaikilire ku mu vatera nkenye apa.—Epis. 118:29.

4. Utjirwe musinke ngatu nyokera po nsene tu kara nehuguvaro asi Karunga ga tu hara?

⁴ Twa hepa kuyipura nawa-nawa asi Jehova kwa tu hara pamundinda. Eyi ngayi tu vatera tu nyokere po utjirwe ou una kukwama ko: (1) utjirwe wokudira kupakera mbili epata lyetu, (2) kutjira vantu ntani (3) kutjira nomfa. Vanavazinyetu ava tuna tumbura moparagarafu zokuhova kwa fundire po utjirwe morwa va yi pulire nawa-nawa asi Karunga ga kara neharo.

5. Maukaro musinke naga vhura kuninkisa nturagumbo a kare nosinka sosinene? (Tara efano lyopontunda.)

⁵ Nturagumbo goMukriste kutara situmbukira sokupakera mbili epata lyendi asi mulyo unene kwendi. (1 Tim. 5:8) Nsene asi ove kupakera mbili epata, nampo wa kere nosinka posiruwo souvera woKorona asi kuvhura o zumbanese yirugana yoge. Ove nampo kwa kere nosinka asi ngayi ku digopera kurandera epata lyoge nondya ndi o gwane embo oku nomu vhura kukara nepata lyoge. Ove nampo wa kere hena nosinka asi nsene o zumbanesa yirugana yoge, ove kapi ngo gwana yirugana yapeke. Ndi nampo wa kere nosinka asi kapi ngayi kutompoka kuparuka noyimaliwa yoyisesu ngwendi Nestor naMaría ava ka tu tumbura ketameko. Satana kwa ninkisa sinzi sovantu va hageke kukarera Jehova morwa kukara noutjirwe wangoso.

6. Yisinke a hetekere ko Satana kutuninkisa tu pure?

⁶ Satana kuhetekera ko kutuninkisa tu yi pure asi Jehova kapi ga tu hara ntani age kapi ngatu vatera tu pakere mbili epata lyetu. Ngoyitundwamo, ose kuvhura ngatu gazare asi twa hepa kurugana nkenye eyi yipo tu dire kuzumbanesa yirugana yetu yoyipe, nampili yi kare asi kapi ya liza nonompango domoBibeli.

7. Nonkango musinke ga tu huguvaresa Jesus?

⁷ Jesus, ogu ga diva nawa oGuhwe kupitakana nkenye ogu, kutuhuguvaresa asi Karunga ‘ga diva eyi twa hepa komeho tu yi mu hundire.’ (Mat. 6:8) Ntani Jesus gayi diva asi Jehova ga liwapaikira mokutupakera mbili. NgoVakriste, ose kwa hamena kepata lyaJehova. Ose kuvhura kuyipura nawa-nawa asi ngaGuhya gepata, Jehova nga sikisa mo mpangera ezi za kara mwa-1 Timoteusa 5:8 ezi ga tantera vanturagumbo navenye va rugane.

8. (a) Yisinke ngayi tu vatera tu nyokere po kukara noutjirwe wokupakera mbili epata lyetu? (Mateusa 6:31-33) (b) Ngapi natu vhura kuhonena valikwali ava vana kara pefano vana kuretera munazinyetu gomukadi nondya?

⁸ Nsene tu yi pura asi Jehova ga tu hara ntani asi ga hara epata lyetu, ose ngatu kara nehuguvaro nawa-nawa asi ngatu kara noyininke eyi twa hepa. (Resa Mateusa 6:31-33.) Jehova, Karunga geharo ntani Karunga gougavi ntani ana hara kutupakera mbili. Apa ga sitire evhu,  age kapi tupu ga sitire yininke eyi twa hepa yipo tu paruke, nye hena age kwa rugene yininke yoyinzi. Age kwa sita yininke yoyinzi pevhu yipo tu hafere eparu. (Gen. 2:9) Nampili ngomu poyiruwo yimwe atu kara tupu noyininke eyi twa hepa, twa hepa kudiworoka asi Jehova yige a yi tu pe. (Mat. 6:11) Twa hepa kudiworoka nkenye apa asi nkenye eyi nga tu pa Jehova, mulyo unene kupitakana nkenye eyi tuna kuzumbanesa ngesi, ntani komeho nga ka tupa eparu lyanarunye. Oyo yiyo ga ya dimbwilire Nestor naMaría.—Jes. 65:21, 22.

9. Yisinke ono lirongere ko kosihonena saNestor naMaría?

⁹ Nestor naMaría kwa kere nembo lyewa ntani kwa kere noyirugana yoyiwa moColombia. Awo kwa tente asi: “Ose kwa gazadarere ko kurerupika eparu lyetu ntani noku tamununa sirugana setu sokuzuvhisa, nye ose kwa kere noutjirwe asi kapi ngatu kara noruhafo nsene tu kara noyimaliwa yoyisesu.” Yisinke ya va vaterere va funde po utjirwe wawo? Awo kwa gazadarere ko nonkedi dononzi omu Jehova ga va likida eharo. Pokuyipura asi Jehova ngava pakera mbili nkenye apa, awo kwa tokwere kuhageka yirugana yawo yokufuta nawa. Awo kwa randesere embo lyawo ntani kwa dirukilire koruha rosirongo saColombia oku kwa hepere evatero lyenene lyovazuvhisi. Ngapi omu ava lizuvhu kuhamena etokoro eli va tura po? Nestor kwa uyunga asi: “Ose twa li monena usili wononkango edi da kara mwaMateusa 6:33. Ose kwa kere noyininke nayinye eyi twa hepere. Ntani ose ngesi kuna kuparuka eparu lyoruhafo.

10. Morwasinke vantu ava tjilire vantu vakwawo?

¹⁰ Kutunda tupu apa oAdamu naEva va rwanesere Jehova, vantu kwa hepeka vakwawo momudona. (Muud. 8:9) Pasihonena, vantu kuruganesa unankondo wawo mokutekura vakwawo momudona, vakorokotji kurugana yininke yoyidona, vanona vamwe kutuka vanasure vakwawo noku va tukukisa ntani vantu vamwe kutekura vanekoro vawo momudona. Eyi yiyo ayi ninkisa vantu va tjire vantu vakwawo. Ngapi omu Satana a hetekere ko kuruganesa utjirwe ou wokutjira vantu yipo a tu pukise?

11-12. Ngapi omu Satana a ruganesa utjirwe wokutjira vantu yipo a tu pukise?

¹¹ Satana kuhetekera ko kutuninkisa tu kare noutjirwe wokutjira vantu, ano eyi kutuninkisa tu hageke kuzuvhisa ndi tu hageke kurugana yininke eyi ga tu tantera Jehova asi tu rugane.  Satana kwa ruganesa mapangero ga hagekese po sirugana setu ntani noku tuhepeka. (Ruk. 21:12; Ehor. 2:10) Mouzuni ou waSatana, sinzi sovantu kuhanesa nombudi depuko ntani kuuyunga yipempa kuhamena Nombangi daJehova. Vantu ava ava uyunga yipempa oyo kuvhura va tu swaure ndi kuvhura va tu homokere. (Mat. 10:36) Kuvhura yi tu tetukise yiraha yaSatana ndi? Hawe. Age kwa ruganesa yiraha oyo mosiruwo sanare.—Yirug. 5:27, 28, 40.

¹² Utjirwe wokutjira marwaneso gokutundilira komapangero kapisi yiso selike siraha a ruganesa Satana. Vamwe kukara nowoma kuhamena eyi ngava uyunga vekoro lyawo apa ngava kara Nombangi daJehova. Poyiruwo yimwe awo kukara nosinka sosinene kuhamena eyi ngava uyunga vanekoro vawo kupitakana kuvatekura momudona. Awo kwa hara unene vekoro lyawo ntani vana hara nawo ngava dive Jehova noku mu hara. Ayo kuvakoresa unene apa ava zuvhu vanekoro vawo kuna kuuyunga yininke yoyidona kuhamena Karunga gosili novantu vendi. Momaukaro gamwe, vanekoro ava va kere varwanesi, konyima kwa ya tambura usili. Nye ngapi nsene vanekoro vetu va tu sigilira morwa ukarelikarunga wetu woupe? Yisinke ngatu vhura kurugana ko?

13. Ngapi omu kuhuguvara meharo lyaKarunga nayi tu vatera tu lididimikire marwaneso gokutunda kovanekoro? (Episarome 27:10)

¹³ Ose kuvhura kugwana ehengagwido mononkango dousili edi da kara mEpisarome 27:10. (Resa.) Apa atu diworoka kuhamena omu Jehova ga tu hara, ayo kutuvatera tu dire kukara nosinka nampili vekoro lyetu va tu rwanese. Ntani ose twa kara nehuguvaro asi Jehova nga tu tungika morwa elididimiko lyetu. Jehova nga tu pa nkenye eyi tuna hepa yipo tu paruke ntani noku kara tuna litura nokuhafa ntani ngatu vatera tu hedere pepi nage. Eyi yiyo ga limonena Biniam ogu ka tu tumbura ketameko.

14. Yisinke no vhura kulirongera ko kosihonena saBiniam?

¹⁴ Biniam kwa ya kara gumwe goNombangi daJehova nampili ngomu gayi divire asi epangero ngali hepeke Nombangi domosirongo sawo. Tu zeni tu ka tare omu kuhuguvara meharo lyaJehova ya vaterere Biniam yipo a funde po utjirwe wokutjira vantu. Age kwa uyunga asi: “Mahepeko kwa kere gomanene kupitakana omu na yi gazarere. Nye eyi na tjilire po unene kupitakana ehepeko lyokutunda kepangero kwa kere erwaneso lyokutunda kovanekoro vange. Ame kwa kere noutjirwe kuhamena etokoro eli na tulire po lyokukara gumwe  goNombangi daJehova asi ngali guvisa otate ava va dilire kukara Mbangi ntani ame kwa kere nowoma asi vekoro lyange kapi ngava fumadeka nge hena.” Nye nampili ngoso, Biniam kwa yi pulire nawa-nawa asi Jehova kupakera mbili nkenye apa ava ga hara. Biniam kwa faturura asi: “Ame kwa tedere ko kuhamena omu Jehova ga vatera wopeke va lididimikire udigu woyikwa eparu, elitondororo ntani nonyanya. Ame na yi divire asi Jehova nga tungika nge nsene ni twikira kulimburukwa. Apa va tulire nge modorongo yikando yongandi ntani noku hepeka nge, ame na li monena omu Jehova a tu vatere nsene tu twikira kumulimburukwa.” Jehova kwa ya kere Guhya kwaBiniam ntani vakareli vaJehova kwa ya kere epata lyendi lyousili.

15. Morwasinke ya dilira kukara epuko kukara nowoma wokutjira nomfa?

¹⁵ Bibeli kuuyunga asi nomfa kuna kara nkore. (1 Kol. 15:25, 26) Ose kuvhura kukara noutjirwe wonomfa, unene po apa nyamwetu ndi apa gumwe ogu twa hara a vere unene. Morwasinke twa tjilira nomfa? Morwa Jehova kwa tu sita nositambo sokuhafera eparu narunye. (Muud. 3:11) Nye kukara noutjirwe wonomfa kuvhura kutuvatera tu popere eparu lyetu. Pasihonena, utjirwe owo kuvhura u tu vatere tu lye nondya doukanguki, tu ufene po, tu pure evatero kovandokotora wovanene noku gwana nomutji nsene hepero ntani kutuvatera tu nyokere po kutura eparu lyetu mosiponga.

16. Ngapi omu Satana a hetekere ko kutupukisa pokuruganesa utjirwe wokutjira nomfa?

¹⁶ Satana ga yi diva asi ose kutara eparu lyetu asi mulyo. Nye nampili ngoso, age kuuyunga asi ose ngatu teza po ukaume wetu naJehova yipo tu paruke. (Joba 2:4, 5) Satana mepuko ga kara! Nye mokumona asi Satana yige ga kara nononkondo dokuretesa po nomfa, age kuhetekera ko kuruganesa utjirwe wetu wokutjira nomfa yipo a tu ninkise tu hageke kukarera Jehova. (Heb. 2:14, 15) Momaukaro gamwe, vantu ava a ruganesa Satana, kututjilisa asi ngava tu dipaga nsene kapi tuna ku hageka kulimburukwa Jehova. Ndi poyiruwo yimwe, Satana kuvhura kumona uvera ou nau tu retera udigu ntani age kuvhura kuruganesa ukaro owo yipo a tu hagekese kulimburukwa Jehova. Vandokotora ndi vanekoro wovahapuli kuvhura va tu sininike tu tambure honde, eyi nayi vhura kulirwanesa noveta zaJehova. Ndi gumwe kuvhura a hetekere ko kutusininika tu tambure uhaku ou wa lilimba neyi aga uyunga Matjangwa.

17. Kuliza noVaroma 8:37-39, morwasinke natu dilira kukara noutjirwe wokutjira nomfa?

¹⁷ Nampili ngomu twa dira kuhara kufa, ose twa yi diva asi Jehova kapi nga hageka kutuhara nampili tu fe. (Resa Varoma 8:37-39.) Apa vakaume vaJehova ava fu, age kuvadiworoka ngwendi vava asi vazuni. (Ruk. 20:37, 38) Age kuna kundindira nononkondo siruwo esi ngaka va tengwidira keparu. (Joba 14:15) Jehova kwa futa mfuto zonene yipo asi ngatu ka “gwane mwenyo gwanarunye.” (Joh. 3:16) Ose twa yi diva asi Jehova ga tu hara unene ntani kutupakera mbili. Yipo nye, mevango lyokuhageka kukarera Jehova apa ngatu ligwanekera nomatjiliso gonomfa, ose ngatu huguvara mwendi yipo a tu pe ehengagwido nounongo ntani yipo a tu pe nonkondo dokutwikira kumukarera. Oyo yiyo ga rugene Valérie namugara gwendi.—Epis. 41:3.

18. Yisinke no vhura kulirongera ko kosihonena saValérie?

¹⁸ Apa Valérie ga kere nonomvhura 35, age kwa mu kwatekere kankera ezi za dira kuhwa kuhoroka ntani zosiponga unene. Tu zeni tu ka tare omu eharo lya mu vaterere yipo a funde po utjirwe wokutjira nomfa. Age kwa simwitira asi: “Ayo kwa tu tetukisire namugara gwange apa naya dimbwilire asi na kara nokankera.  Ame na hepere kuza ketauro lyenene yipo ni paruke. Ame kwa zire kovandokotora wovanzi, nye navenye kwa nyokere kutaura nge va hana kutura nge honde. Ame kwa tukukire sili! Nye kuliza nompangera zaKarunga, ame kwa nyokere kutambura honde. Jehova kwa likida nge eharo lyenene meparu lyange. Ano konyima ame kwa ya gwana mpito zokulikida eharo lyange kwendi. Nkenye apa ngani gwana nombudi donondona, ame ngani tokomene kuhafesa unene Jehova nye kapisi ni hafese Satana. Ano konyima, ame na ya gwene etauro kwa ndokotora va hana kutura nge honde. Nampili ngomu ani twikire kuvera-vera, Jehova ga twikira kuvatera nge namugara gwange nanayinye eyi twa hepere. Pasihonena, mosikondovike simwe mepongo komeho va ka kwatekenge uvera, ose kwa zogerere sirongwa esi asi ‘Kulididimikira maudigu nouradi.’ * Sirongwa esi kwa tu hengagwidire sili unene. Ose ngatu si resa yikando yoyinzi. Yirongwa yangesi ntani kutwikira kuzuvhisa no kuza komapongo, kwa vaterere nge namugara gwange tu twikire kukara tuna litura ntani noku tura po matokoro gomawa.”

19. Yisinke ngayi horoka tupu ntaantani?

¹⁹ Nevatero lyaJehova, Vakriste navenye uzuni mudima kwa lididimikira maudigu gomanene ntani ya va tompoka kunyokera po Muzonaguli. (1 Pet. 5:8, 9) Nove kuvhura yi ku tompoke. Ntaantani tupu Jehova nga tantere Jesus ntani nava nga ka pangera kumwe nawo meguru “yipo a ya zonagure po yirugana yoMuzonaguli.” (1 Joh. 3:8) Ano konyima zoyo, vakareli vaJehova ava vana kumukarera pevhu ngava “yoworoka komahepeko nokoyihuna.” (Jes. 54:14; Mika 4:4) Yipo nye, tu twikireni paapa twa hulira yipo tu funde po mautjirwe getu dogoro nga di ka sike mo nonkango odo.

20. Yisinke na yi tuvatera tu funde po mautjirwe getu?

²⁰ Twa hepa kuyipura nawa-nawa asi Jehova ga tu hara ntani kupopera vakereli vendi. Mokututompoka kuyirugana oyo, twa hepa kutantera ko vanavazinyetu kuhamena omu Jehova ga popera vakareli vendi mosiruwo sanare. Ntani ose kuvhura kudiworoka kuhamena omu Jehova ga tu vatera pamundinda yipo yi tu tompoke kulididimikira yiruwo yoyidigu. Nevatero lyaJehova, ose kuvhura kufunda po mautjirwe getu.—Epis. 34:4.