1. (a) Ehuguvaro musinke ga tu pa Jehova? (b) Yisinke ayi tanta ‘kuhuguvara mwaHOMPA?’ (Tara “Efatururo lyonkango.”)

 JEHOVA kwa gava ehuguvaro lyewa kwanavenye ava va mu hara. Ntaantani tupu ngaka hagekese po mauvera, ruguwo ntani nomfa. (Ehor. 21:3, 4) Age ngaka vatera “valinunupiki” ava va huguvara mwendi va ka wapukurure evhu li ka kare paradisa. (Epis. 37:9-11) Ntani ngaka vatera nkenye gumwe gwetu a ka kare nelikwatakano lyenene kumwe nendi kupitakana eli tuna kara nalyo ngesi. Ehuguvaro musi kouwa! Nye konda musinke azi tuvatere tu yi pure asi matumbwidiro gaKarunga ngaga ka sika mo? Jehova kusikisa mo nkenye apa eyi a uyunga. Yipo nye, ose twa kara nokonda zongwa zeyi natu ‘huguvarera mwaHOMPA!’ * (Epis. 27:14) Ose kuyilikida eyi pokundindira nelididimiko ntani noruhafo yipo Karunga ngaka sikise mo matumbwidiro gendi nagenye.—Jes. 55:10, 11.

2. Yisinke ga sikisa mo nare Jehova?

² Jehova ga yi likida nare asi age kusikisa mo matumbwidiro gendi. Tu tareni ko sihonena simwe. Mobuke zEhororo, age kwa pumbire asi nga reta kumwe vantu wokonomuhoko nadinye ntani womarudi nagenye ntani womaraka gokulisiga-siga yipo va ya mu karere mouumwe. Neina vantu ava kuvatumbura asi “emukurumbunga lyovantu.” (Ehor. 7:9, 10) Nampili ngomu mombunga ozo mwa kara vagara novakadi novanona wokutundilira konontundiliro dokulisiga-siga nomarudi gokulisiga-siga ntani nomaraka gokulisiga-siga, awo kwa kara ngepata limwe eli lya kara mouumwe. (Epis. 133:1; Joh. 10:16) Navenye ava va hamena kemukurumbunga olyo, awo vazuvhisi woupampi. Awo va li wapaikira  kutantera ko nkenye ogu ana kupurakena kehuguvaro lyawolyouzuni wouwa wokomeho. (Mat. 28:19, 20; Ehor. 14:6, 7; 22:17) Nsene asi ove kwa hamena kemukurumbunga lyovantu owo, tuna si huguvara asi ehuguvaro lyoyininke yoyiwa eyi yina kuwiza mulyo unene koge.

3. Yisinke sitambo saSatana?

³ Muzonaguli kapi ana hara o kare nehuguvaro lyokomeho. Sitambo sendi kuna kara sokukuninkisa o yi pure asi Jehova kapi a ku pakere mbili ntani asi kapi ngaka sikisa mo matumbwidiro gendi. Nsene Satana yi mu tompoka kutuninkisa tu dire kukara nehuguvaro, ose kapi ngatu kara nouradi ntani kuvhura ngatu hageke kukarera Jehova. Ngomu natu ka yi lironga, Muzonaguli kwa hetekerere ko kuninkisa Joba a dire kukara nehuguvaro ntani nokumuninka a hageke kukarera Jehova.

4. Yisinke natu ka konakona mosirongwa esi? (Joba 1:9-12)

⁴ Mosirongwa esi, tatu ka konakona nonkedi edi ga ruganesere Satana yipo a sininike Joba a hageke kukarera Jehova. (Resa Joba 1:9-12.) Tatu ka zogera hena eyi natu lirongera ko kosihonena saJoba ntani konda zeyi natu diworokera asi Karunga ga tu hara ntani nga sikisa mo matumbwidiro gendi.

5-6. Yisinke ya horokerere Joba mosiruwo tupu sosisupi?

⁵ Joba kwa parukire eparu lyewa. Age kwa haferere ukaume wounene ou ga kere nawo naJehova. Age kwa kere nepata lyenene lyoruhafo ntani kwa ngawopere unene. (Joba 1:1-5) Nye age kwa zumbanesere hambara yininke yendi nayinye mezuva limwe tupu. Pomuhowo, age kwa zumbanesere yimuna yendi. (Joba 1:13-17) Ano konyima, vana vendi navenye kwa ya fire. Gazadara ko tupu kosihorokwa oso. Vakurona kuvaguvisa unene apa gumwe govana vawo a fu. Gazadara ko tupu omu Joba namukadendi valizuvhire apa va dimbwilire asi vana vawo navenye murongo vana fu. Eyi kwa ninkisire Joba a taure yikoverero yendi morwa ruguwo ntani nokuligandera pevhu.—Joba 1:18-20.

⁶ Ntani Satana kwa zugumine Joba uvera wokukora unene. (Joba 2:6-8; 7:5) Komeho yi ya horoke oyo, sinzi sovantu kwa fumadekere unene Joba. Awo ngava wiza kwendi yipo aya va pe ko magano. (Joba 31:18) Nye posiruwo esi awo kapi ngava pura hena magano kwendi. Vamumbya vendi novakwawo kapi va mu here hena, kukwatera mo novakareli vendi vaava.—Joba 19:13, 14, 16.

7. (a) Konda musinke ga mwene Joba asi yizo za mu ninkisire a hepe, nye yisinke ga nyokerere po kurugana? (b) Ngapi omu Mukriste nampo na ligwanekera noudigu ngwendi ou una lizi nosihorokwa esi sina kara pefano?

⁷ Satana kwa here Joba a yi pure asi age kwa hepere morwa Jehova kapi ga mu haferere. Pasihonena, Satana kwa ruganesere mpepo zononkondo a zonagure embo omu mwa kere vana vaJoba navenye murongo ava va haferere kulya kumwe nondya. (Joba 1:18, 19) Ntani Satana kwa ninkire mundiro gu tunde meguru gu zonagure po yimuna yaJoba ntani novakareli vendi ava ngava yi kungu. (Joba 1:16) Mokumona asi mpepo nomundiro kwa tundire meguru, eyi kwa ninkisire Joba a gazare asi kwaJehova ya tundire. Ano ngoyitundwamo, Joba kwa yi pulire asi age nampo kwa guvisire Jehova. Nye nampili ngoso, Joba kwa nyokere kufingilira oGuhwe vemeguru. Joba ga yi dimbwilire asi monomvhura dononzi, age kwa gwene yininke yoyinzi yokutunda kwaJehova. Yipo nye, age kwa gazarere asi nsene asi age ga haferere kutambura yininke yoyiwa, ga hepere hena kutambura yininke yoyidona. Makura yipo ga uyungire asi: ‘Edina lyaJehova va li fumadeke.’ (Joba 1:20, 21; 2:10) Nampili ngomu Joba ga zumbanesere yimaliwa yendi novana vendi ntani nokukara  nouvera, age kwa twikilire kulimburukwa Jehova. Nye Satana kwa twikilire kurugana ko hena yuma yimwe yapeke.

8. Nkedi musinke hena ga ruganesere Satana mokuheteka Joba?

⁸ Satana kwa ruganesere hena nkedi zapeke, age kwa ruganesere vagara vatatu ava va lininkisire asi awo vakaume vaJoba. Awo kwa hetekerere ko kuninkisa Joba a lizuvhe asi age kwato mulyo. Vagara ava kwa uyungire asi Joba kwa hepere morwa kwa rugene yininke yoyinzi yoyidona. (Joba 22:5-9) Awo hena kwa hetekerere ko kumuninkisa a yi pure asi yikare asi yininke yokuhura kupi yoyiwa ana kurugana, nye yininke nayinye oyo kapi ya kere nomulyo kwaKarunga. (Joba 4:18; 22:2, 3; 25:4) Awo kwa hetekerere ko kuninkisa Joba a gazare asi Karunga kapi ga mu hara ntani asi kapi nga mu pakera mbili ntani hena asi ayo kwato mulyo kukarera Karunga. Nonkango dawo nampo kwa ninkisire Joba a lizuvhe asi ukaro wendi kapi ngau runduruka.

9. Yisinke ya vaterere Joba a kare nouradi ntani a nkondopare?

⁹ Hetekera ko kumona sihorokwa esi momagano goge. Joba kuna hingire pondambo zohando ntani kuna kuzuvha kukora kokunene. (Joba 2:8) Ano vakwawo kuna kuuyunga asi age kapisi muntu gomuwa ntani kwato yomulyo eyi ga rugana rumwe. Maudigu gendi kuna kumuninkisa a lizuvhe ngwendi mamanya gomanene vana mu kambeke ntani ana guwu unene morwa yeeyi ana fisa vana vendi. Pomuhowo, Joba teete zendi. (Joba 2:13–3:1) Nye nsene asi vagara owo ava va li ninkisire asi awo vakaume vaJoba kwa gazarere asi Joba kuna mwena morwa Jehova ana mu sigilire, awo mepuko va kere. Sikando simwe Joba kwa kankwire mutwe gwendi ntani nokunwika kovakaume vendi woyipempa nokuuyunga asi: “Ame ngani kara ngorooro mokupira unzoni wange dogoro kezuva lyonomfa dange.” (Joba 27:5) Yisinke ya vaterere Joba a kare nouradi ntani a nkondopare momaudigu nagenye aga? Nampili ngomu ga  guvire unene, age kwa twikilire kukara nehuguvaro asi Karunga gwendi geharo nga mu vatera. Age ga yi divire asi nampili a fe, Jehova nga ka mu vhumbura.—Joba 14:13-15.

10. Yisinke asi tu rongo sihorokwa saJoba?

¹⁰ Sihorokwa saJoba kuturonga asi Satana kapi ta vhuru kutusininika tu sige Jehova ntani kuturonga asi Jehova ga diva nayinye eyi atu ligwanekere nayo. Sihorokwa saJoba kuvhura hena kutuvatera tu kwate nawa egano yininke eyi ya hamena mosihorokwa esi. Tutareni yirongwa yimwe eyi natu lirongera ko kwaJoba.

11. Yisinke ngayi horoka nsene tu twikira kuhuguvara mwaJehova? (Jakopo 4:7)

¹¹ Joba ga yi likidire asi nsene tu twikira kuhuguvara mwaJehova, ose ngatu lididimikira nkenye udigu ntani ngayi tu tompoka kurwanesa Satana. Yitundwamo musinke ngayi kara? Matjangwa kututantera asi Muzonaguli ngatu tjwayuka.—Resa Jakopo 4:7.

12. Ngapi omu ehuguvaro lyevhumbuko lyankondopekere Joba?

¹² Twa hepa kukara nepuro lyenene mehuguvaro lyevhumbuko. Ngomu kava yi tumbwire mosirongwa sina ka pita, yikando yoyinzi Satana kuruganesa utjirwe wonomfa yipo a tu ninkise tu hageke kulimburukwa Jehova. Moukaro waJoba, Satana kwa tente asi Joba kuvhura kurugana nkenye eyi, pasihonena kuvhura a hageke kukarera Jehova morwa ana hara kuparura eparu lyendi. Satana mepuko ga kere. Nampili apa Joba ga gazarere asi ta fu, age kwa twikilire kulimburukwa Jehova. Mokumona asi age ga kere nehuguvaro mouwa waJehova ntani noku muhuguvara unene, ayo kwa mu vaterere a lididimike. Joba ga kere nepuro asi nsene Jehova kapi na mu vatera posiruwo esi ga kere simpe muzuni, age nga ka mu vhumbura komeho. Joba ga pulire nawa-nawa mehuguvaro lyevhumbuko. Nsene tupura mehuguvaro olyo, kwato eyi ngayi tu tjilisa tu hageke kulimburukwa Jehova nampili nomfa deedi.

13. Yisinke tuna kulirongera ko kweyi ga rugene Satana kwaJoba?

¹³ Twa hepa kukoneka nawa nonkedi edi ga ruganesere Satana kwaJoba morwa age kuna kuruganesa hena nonkedi odo neina. Koneka nonkango edi ga uyungire Satana asi: “Muntu [kapisi Joba gelike] kugava nkenye eyi, morwa kuhara a paruke.” (Joba 2:4, 5) Yipo nye, apa Satana ga uyungire nonkango odo, age kwa tembe asi ose kapi twa hara nawa Jehova ntani asi ngatu mu siga nsene ngayi kara asi ayo kuna kupopera eparu lyetu. Satana kwa tente hena asi Karunga kapi ga tu hara ntani asi kapi nga kara nosinka kweyi atu mu ruganene mokumuhafesa. Mokumona asi ose twa diva eyi ana kuhetekera ko Satana kurugana, ose kapi atu pura yipempa oyo.

14. Yisinke atu ya dimburura apa atu piti momaudigu?

¹⁴ Twa hepa kutara maudigu ngompito zokulironga kuhamena nyamwetu. Maudigu aga ga ligwanekerere nago Joba kwa mu vaterere a dimburure yininke yimwe eyi ga hepere kuwapukurura. Pasihonena, age ga ya dimbwilire asi ga hepere kulikida sikara selinunupiko momunene. (Joba 42:3) Nose kuvhura tu lironge yoyinzi kuhamena nyamwetu apa atu piti moudigu. Munazinyetu gomugara Nikolay * ogu va tulire modorongo nampili ngomu ga kere nouvera wounene kwa tanta asi: “Siruwo esi naka kere modorongo kwa vaterere nge ni dimburure yikara eyi na hepere kuwapukurura.” Nsene tuna dimburura yininke eyi twa hepa kuwapukurura twa hepa kurugana ko yuma yipo tu yi wapukurure.

15. Kwalye twa hepa kupurakena ntani morwasinke?

¹⁵ Twa hepa kupurakena kwaJehova nye kapisi kononkore detu. Joba kwa purakenene nawa apa Jehova ga uyungire nendi. Karunga kwa limbwilire Joba pokuuyunga asi ‘Ove kumona  yirugana yononkondo dange ndi? Ame na diva nayinye eyi ya ku horokera. Ove ngoso kugazara asi kapi tani kupakere mbili ndi?’ Joba kwa limbwilire nelinunupiko ntani norupandu kouwa waJehova. Age kwa uyungire asi: “Ano ame kwa divire tupu kweyi va tanterere nge vapeke, ano ntaantani nina kulimonene nomeho gange.” (Joba 42:5) Apa Joba ga uyungire nonkango odo, age simpe nampo kwa hingilire pondambo zoyihando, ano rutu rwendi narunye kwa kere yironda ntani age kwa guvire morwa vana vendi ava va fire. Nye nampili ngoso, Jehova kwa likidire eharo kwaJoba ntani age kwa mu huguvaresere asi ga mu hafera.—Joba 42:7, 8.

16. Kuliza naJesaya 49:15, 16 yisinke twa hepa kudiworoka nsene kuna kuligwanekera nomaudigu?

¹⁶ Neina vantu kuvhura va tu tukagure noku tu tekura monkedi ezi nazi likida asi ose kwato mulyo. Awo kuvhura va hetekere ko kunyateka edina lyetu ndi mbunga zetu ntani ‘noku tu uyungira yoyidona nayinye moyimpempa-mpempa tupu.’ (Mat. 5:11) Kosihorokwa saJoba, ose kulirongera ko asi Jehova ga kara nehuguvaro asi ose ngatu twikira kumulimburukwa apa ngatu ligwanekera nomaudigu. Jehova ga tu hara ntani kapi nga siga ava va huguvara mwendi. (Resa Jesaya 49:15, 16.) Kapisi o purakene kwankenye nonkango edi dina kuuyunga nonkore daKarunga. Munazinyetu gomugara James gomoTurkey, epata lyawo kwaligwanekera nomaudigu gomanene. Age kwa tanta asi: “Ose kwa ya dimbwilire asi kupurakena yipempa yokuhamena kovantu vaKarunga, kuvhura yi tu dompese. Ose kwa demenene unene kehuguvaro lyetu lyokuhamena koUhompa waKarunga ntani ose kwa litulire mo unene mosirugana  saJehova. Ngoyitundwamo, ose kwa twikilire kukara noruhafo.” Ngwendi Joba, ose kupurakena kwaJehova. Yipempa eyi adi uyunga nonkore detu kapi ngayi tu ninkisa tu dire kuhuguvara mwaJehova.

17. Yisinke ono lirongere ko kosihonena sovakareli vaJehova wovalimburukwi ava va tumbura moVahebeli egaununo 11?

¹⁷ Joba kuna kara gumwe govakareli vaJehova ogu ga twikilire kukara nouradi ntani nokukara ana nkondopara momaudigu gomanene. Mombilive ezi ga tjenge Mupositoli Paurusa koVahebeli, age kwa tumbwire vakareli owo vamwe vaJehova asi “mbunga zonene zonombangi.” (Heb. 12:1) Awo navenye kwa ligwanekerere nomaudigu gomanene, nye va twikilire kulimburukwa Jehova. (Heb. 11:36-40) Ngoso elididimiko lyawo nelituromo lyawo kwa kere lyomawoko-woko ndi? Hawe! Nampili ngomu mosiruwo sawo va dilire kumona esikiliromo lyomatumbwidiro nagenye gaKarunga, awo kwa twikilire kuhuguvara mwaJehova. Ntani mokumona asi va yi pulire asi Jehova ga va haferere, awo va kere nehuguvaro asi ngava ka mona matumbwidiro gaJehova kuna kusika mo. (Heb. 11:4, 5) Sihonena sawo kuvhura kututumangeda tu twikire kuhuguvara mwaJehova.

18. Yisinke ono tokomene kurugana? (Vahebeli 11:6)

¹⁸ Neina ose kuna kuparuka mouzuni ou una kudonapa unene. (2 Tim. 3:13) Satana simpe kwa kutwikira kuheteka vantu vaKarunga. Yikare asi maudigu musinke ngatu ligwanekera nago komeho, ngano tu tokomeneni kuruganena Jehova momunene nokukara nehuguvaro asi ose “twa huguvara mwaKarunga.” (1 Tim. 4:10) Diworoka asi yininke eyi Karunga ga ruganenene Joba, moruhura kwa likidire asi “Jehova ga kara nonkenda zonene.” (Jak. 5:11) Ngano nose tu twikireni kuhuguvara mwaJehova nokukara nehuguvaro asi age nga ka futa “ava ava mu papara nelituromo.”—Resa Vahebeli 11:6.