1. Usili musinke ga uyungire hompa Saromo, ou wa kara mwaMuudisi 7:20?

 HOMPA Saromo kwa tjenge asi: “Kutupu nampili gumwe pevhu, ogu a rugana narunye youhunga ga hana kupuka.” (Muud. 7:20) Nonkango odo usili! Morwa natuvenye vananzo. (1 Joh. 1:8) Yipo nye, natuvenye twa hepa egusiropo lyokutunda kwaKarunga ntani kovakwetetu.

2. Ngapi atu lizuvhu apa kaume gwetu gomunene atu gusire po?

² Yosili ove nampo kuna kudiworoka siruwo simwe apa wa koresere kaume goge gomunene. Ove wa here mu twikire kukara vakaume, makura yipo wa mu pulire a ku gusire po. Ngapi omu wa li zuvhire apa kaume goge ga ku gusilire po? Ove wa tamekere kulizuvha ko hansa ndi? Nhi, ntani ove kwa hefe!

3. Yisinke natu ka zogera mosirongwa esi?

³ Ose tuna hara Jehova a kare kaume gwetu gomunene, nye poyiruwo yimwe ose kurugana ndi kuuuyunga yininke eyi a yi mu koresa. Morwasinke natu yi pulira asi Jehova ana hara kutugusira po? Elisigo musinke lya kara po apa Jehova a gusire po wopeke ntani nomu atu gusire po wopeke? Ntani wolye ava a gusire po Karunga?

4. Morwasinke natu yi pulira asi Jehova ga liwapaikira kutugusira po?

⁴ Nonkango daKarunga kutuhuguvaresa asi Jehova ga liwapaikira kutugusira po. Apa Jehova ga lisingwenene mwene kwaMosesa pondundu zaSinayi, age kwa tumine muengeli a ka uyunge nonkango edi asi: “HOMPA ta piti komeho zendi oku ta uyunga asi: “Hompa, Hompa, Karunga goMufenkenda, age  Karunga gombili noMudidimiki. Uwa wendi unzi, age Mulimburukwi. Age kufira nkenda dogoro koruvharo romayovi, a dongonone po udona nomayipiko nononzo.” (Ex. 34:6, 7) Jehova age Karunga gombili ntani gonkenda ogu ga liwapaikira kugusira po vananzo ava ava litezurura.—Neh. 9:17; Epis. 86:15.

5. Kuliza nEpisarome 103:13, 14, yisinke a rugana Jehova mokumona asi ga diva omu vantu va kara?

⁵ Mokumona asi Jehova Musiti gwetu, age ga diva nayinye yokutuhamena. Gazadara ko tupu! Age ga diva mauzera nagenye gankenye muntu ogu ga kara pevhu. (Epis. 139:15-17) Yipo nye, age kumona ediro kusikilira mo eli twa pinga kovakondi vetu, Adamu naEva. Age hena ga diva eyi ya tu horokera meparu, eyi ya tu ninkisa tu ya kare vantu ava tuna kara ngesi. Yisinke a rugana Jehova mokumona asi ga tu diva nawa? Ayo ku mu tumangeda a tu fire nkenda.—Epis. 78:39; resa Episarome 103:13, 14.

6. Ngapi omu ga yi likida Jehova asi ga liwapaikira kutugusira po?

⁶ Jehova ga yi likida asi age ga liwapaikira kutugusira po. Age kukwata egano asi morwa yirugana yomuntu gokuhova Adamu, kwa tu ninkisa natuvenye tu kare vananzo ntani nokufa. (Rom. 5:12) Kwato eyi natu vhura kurugana ko mokutukondera nyamwetu ndi wopeke mokudira kuzona ntani nokufa. (Epis. 49:7-9) Nampili ngoso, Karunga gwetu geharo kwa tu likidire nkenda ntani kwa rugene ko yuma yipo tu manguruke koyininke oyo. Yisinke ga rugene? Ngomu tupu va yi likida mwaJohanesa 3:16, Jehova kwa tumine Munendi gelike a huru mo ku ya tu fira. (Mat. 20:28; Rom. 5:19) Jesus kwa tu fililire po mwarwetu, yipo a mangurure nkenye ogu a tura epuro mwendi. (Heb. 2:9) Gazadareni ko tupu kukora oku ga lizuvhire Jehova pokumona Munendi omu ana kufa nomfa donondona. Yosili, Jehova ngano kapi ga pulisilire Munendi a ya tu fire nsene asi kapi ga here kutugusira po.

7. Yihonena musinke yavamwe ava va tumbura moBibeli ava ga gusilire po Jehova?

⁷ MoBibeli kwa kara mo yihonena yoyinzi yavamwe ava ga gusilire po Jehova. (Efe. 4:32) Yilye ogu ono kudiworoka ko? Ove nampo kuna kudiworoka hompa Manase. Age kwa kere mugara gomudona ntani kwa zonene kwaJehova mononkedi donondona unene. Age nga karere yikarunga yiyimpempa ntani  nga korangeda wopeke va rugane yokulifana. Age kwa dipagere vana vendi ntani noku va zamba ngononzambo kovakarunga woyimpempa. Age hena kwa tulire efano lyosikarunga soyimpempa montembeli zaJehova zokupongoka. Bibeli kwa uyunga ku mu hamena asi: “Age nga rugana yoyidona momeho gaHOMPA dogoro tayi mu handukisa unene.” (2 Hist. 33:2-7) Nye nampili ngoso, apa Manase ga likidire elitezururo lyokutundilira komutjima, Jehova kwa mu gusilire po. Ntani Karunga kwa mu tengwidilire sipundi sendi souhompa. (2 Hist. 33:12, 13) Ove nampo kuna kugazara hena kuhamena hompa Ndafita ogu ga tulire nzo zonene kwaJehova zokuhondera ntani nedipago. Nye nampili ngoso, apa Ndafita ga litezwilire ntani noku tambura epuko lyendi, Jehova kwa mu gusilire po. (2 Sam. 12:9, 10, 13, 14) Yosili, ose kuvhura ku yi pura nawa-nawa asi Jehova kuvhura kugusira po. Ntani ngomu natu ka yi lironga, nkedi zaJehova zokugusira po zalisiga poku zi hetakanesa nezi zovantu.

8. Ngapi omu upangeli waJehova au kundama nkedi zendi zokugusira po?

⁸ Jehova yige “mupanguli gouzuni.” (Gen. 18:25) Mupanguli gomuwa ga hepa kudiva nawa veta. Jehova mupanguli gwetu ntani age ga diva nawa veta, morwa age mugavi veta. (Jes. 33:22) Kwato ogu ga diva nawa youhunga neyi yepuko kupitakana omu ga yi diva Jehova. Yisinke hena ga hepa kudiva mupanguli gomuwa? Ga hepa kudiva mauzera nagenye kuhamena yuma yongandi komeho a ture po etokoro. Yosili, Jehova mupanguli gomuwa po morwa ga diva mauzera nagenye.

9. Mauzera musinke ga kara nago Jehova, apa a tokora nsene asi kuvhura a gusire po muntu ndi hawe?

⁹ Mokulisiga novapanguli wosintu, Jehova narunye ga diva mauzera nagenye kuhamena yuma yongandi. (Gen. 18:20, 21; Epis. 90:8) Age ga diva nayinye eyi vantu ava mono ntani neyi ava zuvhu. Age ga diva nawa-nawa omu yikara yetu eyi twa pinga kovakondi vetu wokuhova, erongo eli twa gwana, oku twa tunga ntani omu a tu lizuvhu pamalizuvho nopamagazaro, omu ayi kundama yirugana yetu. Jehova kumona hena eyi ya kara monomutjima detu. Age kukwata egano konda zeyi muntu a ruganene yuma yongandi. Kwato eyi yokuvhura kuhorama kosipara saJehova. (Heb. 4:13) Apa Jehova a gusire po muntu gongandi, age kuyirugana oyo morwa ga diva mauzera nagenye kuhamena ukaro womuntu ogo.

10. Morwasinke twa kuuyungira asi Jehova kupangura nkenye apa monkedi zouhunga? (Deuteronomium 32:4)

¹⁰ Jehova kupangura nkenye apa monkedi zouhunga. Age kapi ga kara nompongo. Jehova kapi a gusire po muntu morwa asi yeeyi a moneka nawa ndi age ngawo ndi age mulyo unene ndi ga kara noudivi wounzi. (1 Sam. 16:7; Jak. 2:1-4) Kwato gokuvhura kusininika Jehova a rugane yuma ndi a mu gende konhi. (2 Hist. 19:7) Age kapi a tulisa po matokoro nehandu ndi kuliza nomutaro govantu. (Ex. 34:7) Jehova mupanguli gomuwa po, morwa age kukwata egano nayinye yokutuhamena.—Resa Deuteronomium 32:4.

11. Ngapi omu nkedi zaJehova zokugusira po za lisiga nomu vantu ava gusire po wopeke?

¹¹ Vatjangi woMatjangwa goRuhebeli kwa dimbwilire asi Jehova kugusira po monkedi zongwa. Momarupe gamwe, awo kwa ruganesere nkango zoRuhebeli ezi va faturura mobuke zimwe asi: “Nkango ozo kuziruganesa tupu mokutamba omu Karunga a gusire po vantu.” Nkango ozo kapi za tamba monkedi omu vantu ava gusire po vantu vakwawo.” Jehova gelike  ga kara nononkondo dokugusira po vananzo nonzo dawo nadinye. Yitundwamo musinke ayi kara apa Jehova a tu gusire po?

12-13. (a) Mauwa musinke a gwanene mo muntu apa Jehova a mu gusire po? (b) Ngapi omu Jehova a tara nonzo edi ga tu gusira po?

¹² Apa atu yi tambura asi Jehova ga tu gusira po, ose kuhafera “yiruwo yepwizumuko,” kukwatera mo mbili zopamagazaro ntani nezwi lyewa lyokomutjima. Ose kukara tupu nomalizuvho gangoso, nsene tupu ‘Jehova a tu gusira po.’ (Yirug. 3:19) Apa Jehova a tu gusire po, age kutupulisira hena tu kare vakaume vendi ntani age kututara ngwendi kapi twa zona rumwe.

¹³ Konyima zapa Jehova a tu gusire po, age kapi ngatu pa usima ndi asi a tu tengeke hena konzo ozo. (Jes. 43:25; Jer. 31:34) KwaJehova, nonzo detu ado ngwendi kwa kara moomu wa “kara Upumezuva ure noUtokero.” * (Epis. 103:12) Apa atu gazadara ko omu Jehova atu gusire po, ose kukara norupandu ntani kututumangeda tu mu fumadeke. (Epis. 130:4) Nye wolye a gusire po Jehova?

14. Yisinke tuna lirongo dogoro papa, kuhamena omu Jehova a tokora nsene asi kuvhura a gusire po muntu gongandi ndi hawe?

¹⁴ Ngomu tuna yi lirongo, etokoro lyaJehova lyokugusira po kapi lya korera konzo ezi a rugana muntu yi kare asi zonene ndi zonunu. Ntani tuna lirongo hena asi Jehova kuruganesa unongo wendi ngoMusiti gwetu, Mugavi veta ntani Mupangeli, apa a tokora nsene asi kuvhura a gusire po muntu gongandi. Nye yininke musinke a gazadara ko Jehova komeho a tokore nsene asi kuvhura a gusire po muntu gongandi ndi hawe?

15. Kuliza naRukasa 12:47, 48, sininke musinke simwe esi Jehova a gazadara ko yipo a tokore nsene asi ta gusire po muntu ndi hawe?

¹⁵ Sininke simwe esi Jehova a gazadara ko kuna kara nsene asi munanzo ga divire asi eyi ga rugene epuko. Jesus kwa zeresere sitwa esi mwaRukasa 12:47, 48. (Resa.) Apa muntu a rugana yininke yoyidona eyi ga diva asi Jehova ga yi nyenga ntani nokuyirugana mowina, age ngoso ana tura nzo zonene. Muntu gwangoso kuvhura a dire ku mu gusira po Jehova. (Mar. 3:29; Joh. 9:41) Nye nampili ngoso, twa  hepa kuyitambura asi poyiruwo yimwe, ose ku yi diva asi eyi tuna rugana epuko. Ngoso kuvhura tu kare nehuguvaro asi Jehova kuvhura a tu gusire po ndi? Nhi! Eyi ta yi tu reta kosininke simwe esi a gazadara ko Jehova komeho zokugusira po muntu.

16. Yisinke ali tanta elitezururo ntani morwasinke twa hepera kulitezurura?

¹⁶ Sininke simwe esi Jehova a tarurura kuna kara nsene asi munanzo ana litezurura kutundilira komutjima. Yisinke a yi tanta kulitezurura? Kulitezurura kutanta asi kutjindja nondunge detu, nkareso zetu ndi sitambo setu. Ntani ayo kwa kwatera mo asi muntu ga hepa kulivera ntani nokulizuvha ruguwo rorunene kuhamena yininke yoyidona eyi ga rugana ndi kulizuvha ruguwo rorunene morwa yeeyi ga dilire kurugana yininke youhunga, eyi ngano ga hepere kurugana. Muntu gokulitezurura, kapi tupu a guwu morwa yininke yoyidona eyi ga rugana, nye hena age kuguva morwa kapi ga kere nelikwatakano lyokupama eli lya mu ninkisire a rugane yininke yoyidona. Diworoka asi hompa Manase ntani nahompa Ndafita, navenye kwa tulire nonzo dononene, nye Jehova ga va gusilire po morwa va litezwilire kutundilira komutjima. (1 Vah. 14:8) Yosili, mokuninka asi Jehova a tu gusire po, age ga hepa kumona maumbangi aga naga likida asi tuna litezurura. (1 Vah. 14:8) Nye kapi ya gwanena po tupu kulizuvha unzoni konzo ezi twa rugana. Twa hepa kurugana ko yuma. * Eyi ta yi tu reta hena kosininke simwe esi a gazadara ko Jehova komeho zo kugusira po muntu.

17. Yisinke elitjindjo ntani morwasinke ya karera nomulyo tu nyokere po kurugana nonzo edi twa tulire nare? (Jesaya 55:7)

¹⁷ Elitjindjo kuna kara sininke simwe somulyo a tarurura Jehova komeho a gusire po muntu. Elitjindjo kutanta asi “kutura po marunduruko.” Monkango zimwe, ayo kutanta asi muntu ga hepa kusiga yirugana yendi yoyidona nokuparuka kuliza nomu Jehova ga harera vantu va paruke. (Resa Jesaya 55:7.) Muntu ga hepa kurundurura magazaro gendi yipo a gazare ngwendi Jehova. (Rom. 12:2; Efe. 4:23) Ga hepa kutokomena kunyokera po magazaro  gomadona ntani noyirugana yoyidona. (Koros. 3:7-10) Yosili epuro eli twa kara nalyo monzambo zaJesus, yilyo nawa-nawa ali ninkisa Jehova atu gusire po ntani nokutukuhura kononzo detu. Jehova nga tu gusira po kuliza nonzambo ozo apa nga mona asi ose kuna kurugana paapa twa hulira yipo tu tjindje nkareso zetu.—1 Joh. 1:7.

18. Yisinke tuna lirongo kuhamena omu Jehova a gusire po?

¹⁸ Tu zeni tu ka tarurure yitwa yimwe yomulyo eyi tuna zogere. Jehova kuna kara Karunga ogu a gusire po unene. Morwasinke tuna kuuyungira ngoso? Sokuhova, age ga liwapaikira kutugusira po. Sauvali, age ga diva nayinye yokutuhamena. Age ga diva nayinye yokutuhamena ntani yige gelike gokuvhura kudiva nsene asi tuna litezurura sili ndi hawe. Ntani sautatu, apa Jehova a tu gusire po, age kudongonona po nonzo detu nadinye ntani age ku tu tara ngwendi kapi twa zona rumwe. Eyi kutuvatera tu kare nezwi lyewa lyokomutjima ntani yipo atu hafere.

19. Nampili ngomu ngatu twikira kuzona morwa kapi twa sikilira mo, morwasinke natu karera noruhafo?

¹⁹ Mokumona asi kapi twa sikilira mo, ose ngorooro ngatu twikira kuzona. Nye ose kuvhura kugwana ehengagwido kononkango edi da kara moInsight on the Scriptures, Volume 2, pepenuno 771. Ado kuresa asi: “Jehova age nkenda ntani ga yi diva asi vakareli vendi awo varupiranonkondo. Yipo nye, kapisi hepero va guve nkenye siruwo morwa yeeyi va dira kusikilira mo ntani morwa yeeyi ava tura mapuko. (Epis. 103:8-14; 130:3) Nsene kuna kurugana paapa va hulira, mokuparuka kuliza nomu ga yi harera Karunga, awo ngava hafa. (Fil. 4:4-6; 1 Joh. 3:19-22) Nonkango odo kukorangeda sili!

20. Yisinke ngatu ka zogera mosirongwa sokukwama ko?

²⁰ Ose tuna hafa kweyi Jehova ga liwapaikira kutugusira po apa atu lizuvhu unzoni kononzo edi twa tura. Ngapi omu natu honena Jehova pokugusira po wopeke? Mononkedi musinke omu atu gusire po wopeke ya lifana nomu Jehova a gusire po, nye malisigo musinke ga kara po? Morwasinke ya karera nomulyo tu dive malisigo ogo? Sirongwa sokukwama ko nga si ka limburura mapuro ogo.