1. Yisinke ga tumbwidira Jehova vananzo ava ava litezurura?

 NAMPILI ngomu Jehova ga kara Musiti gwetu, Mugavi veta ntani Mupanguli, age hena Guhyetu geharo gemeguru. (Epis. 100:3; Jes. 33:22) Apa atu mu zonene ntani nokulitezurura kutundilira komutjima, age kapi tupu atu gusire po, nye ga kara neharo lyokutugusira po. (Epis. 86:5) Jehova kwa geve etumbwidiro lyewa kupitira momuporofete Jesaya asi: “Nonzo deni nampili di gehe ngwendi honde, ngadi zera ngwendi yiterengenze.”—Jes. 1:18.

2. Yisinke twa hepa kurugana nsene tuna hara kukara nombili novakwetetu?

² Mokumona asi kapi twa sikilira mo, natuvenye kuuyunga nokurugana yininke eyi nayi koresa wopeke. (Jak. 3:2) Nye oyo kapi yina kutanta asi kapi tatu vhuru kukara nombili novakwetetu. Ose kuvhura kukara nombili nsene tu gusira po wopeke. (Yis. 17:9; 19:11; Mat. 18:21, 22) Jehova kuna tu harere tu gusire po wopeke nsene asi gumwe ana uyunga ndi ana rugana yininke eyi nayi tu koresa. (Koros. 3:13) Ose twa kara nokonda zongwa zeyi natu gusilira po wopeke, morwa Jehova “kapi a likata-kata kudongwenena po.”—Jes. 55:7.

3. Yisinke natu ka zogera mosirongwa esi?

³ Mosirongwa esi, tatu ka zogera omu vantu wokudira kusikilira mo nava honena Jehova yipo va gusire po wopeke. Nonzo musinke twa hepa kutantera vakuronambunga? Morwasinke Jehova ana tu harere tu gusire po wopeke? Ntani yisinke natu  lirongera ko kovanavazinyetu vamwe ava va li gwanekera noyitundwamo yoyidona morwa nonzo dava wopeke?

4. (a) Yisinke ga hepa kurugana mukareli gwaJehova nsene ana tura nzo zonene? (b) Yisinke situmbukira sovakuronambunga apa gumwe a tura nzo zonene?

⁴ Twa hepa kutantera vakuronambunga nsene gumwe ana tura nzo zonene. Nonzo dimwe dononene kwa di tumbura mo-1 Vakolinte 6:9, 10. Nonzo dononene kulirwanesa noveta zaKarunga. Nsene Mukriste a tura nzo zangoso, ga hepa kukanderera kwaJehova yipo a pure egusiropo ntani ga hepa kutantera ko vakuronambunga kuhamena nzo zendi. (Epis. 32:5; Jak. 5:14) Situmbukira musinke va kara naso vakuronambunga? Jehova yige gelike tupu ga kara nononkondo dokudongonona po nonzo nadinye dovantu, kupitira monzambo zosizoweseso. * Nye nampili ngoso, Jehova kwa gava situmbukira kovakuronambunga sokutokora kuliza noMatjangwa nsene asi munanzo kuvhura a twikire kukara mombungakriste. (1 Kol. 5:12) Mokuninka asi yi va tompoke oyo, sininke simwe esi ava rugana kuna kara pokuhetekera ko kugwana malimbururo komapuro aga gana kukwama ko. Ngoso muntu ogo kwa rugana nzo mowina ndi? Ngoso age kwa hetekerere ko kuhoreka nzo zendi kwava wopeke ndi? Age kwa rugurukire kurugana nzo ozo ure wosiruwo songandi ndi? Ntani unene po, pana kara umbangi ou una kulikida asi ana litezurura kutundilira komutjima ndi? Pana kara umbangi ou una kulikida asi Jehova ana mu gusire po ndi?—Yirug. 3:19.

5. Mauwa musinke aga kara po apa vakuronambunga ava sikisa mo situmbukira sawo sokupangura munanzo?

⁵ Apa vakuronambunga ava pangura munanzo, sitambo sawo kuna kara sokutulisa po etokoro eli lina tokokwa nare meguru. (Mat. 18:18) Ngapi omu mbungakriste azi gwanene mo uwa mewapaiko eli? Ayo kupopera mbungakriste apa munanzo ava mu gusa mombunga ntani yipo a dire kupukisa nonzwi daJehova. (1 Kol. 5:6, 7, 11-13; Tit. 3:10, 11) Ayo hena kuvhura kuvatera munanzo a li tezurure ntani yipo Jehova a mu gusire po. (Ruk. 5:32) Vakuronambunga kukanderera kumwe nage ntani nokupura Jehova a mu vatere a tengwidire po elikwatakano lyendi kumwe nendi.—Jak. 5:15.

6. Nsene asi muntu vana mu gusa mombunga, Jehova kuvhura simpe nga mu gusire po ndi? Faturura.

⁶ Yisinke nayi horoka nsene asi munzoni kapi ana litezurura apa vakuronambunga nava gwanekera nendi? Moukaro wangoso, munzoni ogongava mu gusa mombunga. Nsene asi ga teza veta zepangero, vakuronambunga kapi ngava mu kondera mokudira kugwana etengeko lyoyirugana yendi yoyidona. Jehova kwa pulisira mapangero mokupangura nokutengeka nkenye ogu a teza po veta zosirongo, yikare asi ana litezurura ndi hawe. (Rom. 13:4) Nye nsene muntu ogo aya dimburura asi eyi ga rugana epuko ntani nokulitezurura, Jehova ga liwapaikira kumugusira po. (Ruk. 15:17-24) Age kuvhura kumugusira po nampili yi kare asi ga tura nonzo dononene.—2 Hist. 33:9, 12, 13; 1 Tim. 1:15.

7. Monkedi musinke natu gusira po muntu ogu ga tu zonena?

⁷ Ayo kutuhafesa pokudiva asi ose kapi twa kara nononkondo dokutokora nsene asi Jehova kuvhura a gusire po munzoni. Nye nampili ngoso, koyili yininke yimwe eyi twa hepa kutokora. Yininke musinke oyo? Momaukaro gamwe, muntu gongandi kuvhura a tu zonene, ano konyima kuvhura a wize noku ya pura egusiropo. Ano momaukaro gamwe kuvhura  a dire kupura egusiropo. Nye nampili ngoso, ose kuvhura kutokora kugusira po muntu ogo ntani nokunyokera po kukara nonkoko nehandu komuntu ogo. Yosili ayo kuvhura kugusa siruwo nelituromo mokuyirugana oyo, unene po nsene asi kwa tu koresa unene. Ruhungu romo 15 Sitarara 1994 kwa uyunga asi: “KoMukriste, kugusira po kutanta asi kusiga yininke momawoko gaJehova. Age mupanguli gomuhungami po mouzuni mudima ntani age nga divilisa asi tuna gwana mbili posiruwo souhunga.” Morwasinke Jehova a tu korangedere tu gusire po wopeke ntani nokusiga udigu momawoko gendi?

8. Ngapi omu natu yi likida asi twa kara norupandu konkenda zaJehova?

⁸ Apa atu gusire po, ose kuyilikida asi twa kara norupandu konkenda zaJehova. Mosifanekeso simwe, Jesus kwa hetakanesere Jehova komuhona ogu ga gusilire po mukareli gwendi makongo gomanzi aga ga dilire kuvhura kufuta. Nye mukareli ogu va gusilire po kapi ga kere nonkenda komukareli ogu ga mu korotere yimaliwa yoyisesu. (Mat. 18:23-35) Sirongwa musinke ga here kuturonga Jesus? Nsene asi tu kara norupandu konkenda zonene zaJehova ezi atu likida, ngayi tu tumangeda tu gusire po wopeke. (Epis. 103:9) Nomvhura dononzi dina ka pita, Ruhungu rumwe kwa uyungire kuhamena sitwa oso asi: “Yikare asi yikando yingapi atu gusire po vakwetu, ose kapi ngatu vhura kugusira po vakwetu ngwendi moomu ga tu gusira po Karunga kupitira monzambo zaJesus.”

9. Wolye ava a likida Jehova nkenda? (Mateusa 6:14, 15)

⁹ Nsene tu gusira po wopeke, Jehova nage ngatu gusira po. Jehova kulikida nkenda kwava va kara nonkenda. (Mat. 5:7; Jak. 2:13) Jesus kwa zeresere nawa sitwa oso apa ga rongere varongwa vendi omu nava kanderera. (Resa Mateusa 6:14, 15.) Ose kulironga sirongwa sokulifana kononkango edi Jehova ga tanterere mukareli gwendi Joba. Mugara ogo gomulimburukwi kwa mu koresere unene nonkango edi ga uyungire Elifasa naBilidade ntani naSofara. Jehova kwa tanterere Joba ava kanderere po. Konyima zapa ga yi rugene oyo Joba, Jehova kwa mu tungikire.—Joba 42:8-10.

10. Monkedi musinke ngatu likoresa nyamwetu nsene tu kara nonkoko? (Vaefeso 4:31, 32)

¹⁰ Ose ngatu likoresa nyamwetu nsene tu kara nonkoko. Nkoko kwa fana ngwendi mudigo gomunene, ano Jehova kuna tu harere tunyokere po nkoko yipo tu kare nombili. (Resa Vaefeso 4:31, 32.) Age kutukorangeda tu nyokere po ‘ehandu nokusiga ugara.’ (Epis. 37:8) Ayo ngayi tu vatera nsene tu kwama epukururo olyo. Kukara nonkoko kuvhura kureta siponga koukanguki wetu ntani konondunge detu. (Yis. 14:30) Kukara nonkoko kapi ngayi koresa ogu ana tu handukisa ngwendi moomu tupu uhungu au dili kutura mosiponga ogu ana dili kuunwa. Nye ose ngatu liruganena nyamwetu uwa nsene tu gusira po wopeke. (Yis. 11:17) Ose ngatu gwana mbili zopamagazaro nomomutjima ntani ngatu twikira kukarera Jehova.

11. Yisinke azi uyunga Bibeli kuhamena kutengwida kuwoko? (Varoma 12:19-21)

¹¹ Jehova yige gelike ya fira mokutengwida kuwoko. Jehova kapi ga tu pa nonkondo dokutengwida kuwoko kogu ga tu zonena. (Resa Varoma 12:19-21.) Mokumona asi kapi twa sikilira mo, ose kapi tatu vhuru kupangura mouhunga ngwendi moomu tupu a yi rugana Karunga. (Heb. 4:13) Ntani poyiruwo yimwe, malizuvho getu kuvhura ga tu pukise tu dire kudiva yininke youhunga eyi natu rugana. Jehova kwa gendesere Jakopo a tjange nonkango edi  asi: “Yeeyi muntu kapi a rugana eyi ya hungama kosipara saKarunga nsene ana handuka.” (Jak. 1:20) Ose kuvhura kuyipura nawa-nawa asi Jehova nga rugana yininke youhunga ntani nokudivilisa asi nga pangura monkedi zouhunga.

12. Ngapi natu yi likida asi twa huguvara monkedi omu Jehova a pangura yininke?

¹² Kugusira po kulikida asi twa huguvara monkedi omu Jehova a pangura. Pokusiga yininke momawoko gaJehova, ose ku yi likida nawa-nawa asi twa kara nehuguvaro asi Jehova ngaka gusa po yininke nayinye yokukoresa eyi da retesa po nonzo. Mouzuni wendi woupe ou ga tumbwidira, yininke yokutukoresa “ngava yi divara nuunu.” (Jes. 65:17) Nye ngapi nsene vana tu koresa unene, kuvhura sili yi tu tompoke kunyokera po ehandu nonkoko komuntu ogu ga tu koresa ndi? Tu zeni tu ka tare omu vamwe ya va tompoka kuyirugana oyo.

13-14. Yisinke ono lirongere ko kwaTony naJosé kuhamena kugusira po?

¹³ Sinzi sovanavazinyetu kwa tokora kugusira po wopeke nampili ngomu ya va koresa unene yirugana ya va wopeke. Mauwa musinke va gwanena mo?

¹⁴ Nare-nare, Tony * ogu ga tunga moPhilippines, komeho a ya dive usili age kwa dimbwilire asi mugara gedina José kwa dipagere mukurwendi gomugara. Posiruwo sina, Tony kwa kere nonyanya unene ntani kwa here kutengwidira mugara ogo kuwoko. José kwa mu kwete nokumutura modorongo morwa ukorokotji ou ga rugene. Konyima zapa José va mu pwagesere modorongo, Tony kwa gene asi nga papara mugara ogo nokumudipaga. Age kwa rende uta nositambo sokudipagesa ko mugara ogo. Mwaza siruwo Tony yipo ga tamekere kulironga Bibeli noNombangi daJehova. Age kwa tanta asi: “Ngomu na li rongere Bibeli, ame kwa ya dimbwilire asi na hepere kutjindja nkareso zange noyirugana yange, oyo kwa kwaterere mo kunyokera po ehandu lyange.” Mwaza siruwo, Tony kwa gwene ekuho ano konyima kwa ya kere mukuronambunga. Gazara tupu omu ga lizuvhire Tony apa ga zuvhire asi José ana gwana ekuho ntani ana kara gumwe goNombangi daJehova. Apa va li gwene, awo kwa lidingilire mawoko ntani  Tony kwa tanterere José asi ga mu gusira po. Tony kwa tanta asi nkareso zendi zokugusira po José kwa mu retera ruhafo rorunene ntani ayo kwa mu digoperere kufaturura ruhafo oru ga li zuvhire. Yosili Jehova kwa tungikire Tony kweyi ga kere neharo lyokugusira po.

15-16. Yisinke ono lirongere ko kuhamena kugusira po kweyi ya horokera Peter naSue?

¹⁵ Mo-1985, Peter naSue kwa kere mepongo koSinyanga soUhompa, ano hararasi tupu boma tazi hanuka. Mugara gumwe kwa tegere boma monda zoSinyanga soUhompa. Sue kwa remanene unene ntani yironda oyo kwa mu ninkisire a dire kumona nokuzuvha. Ntani age kapi nga fumbwire yininke. * Yikando yoyinzi Peter naSue ngava li pura vene asi ‘Muntu musinke gokuvhura kurugana sininke sosidona ngoso?’ Konyima zonomvhura dononzi, mugara ogo ga dilire kukara Mbangi zaJehova, kwa mu kwete ntani kwa mu tomenene modorongo eparu lyendi nalinye. Apa vava pulire nsene asi va gusira po mugara ogo, Peter naSue kwa uyungire asi: “Jehova kuturonga asi nsene tu kara nonkoko nehandu, ayo ngayi tu koresa panyama, pamalizuvho ntani panandunge. Konyima zosihorokwa oso, ose kwa kanderere kwaJehova yipo a tu vatere tu dire kukara nehandu nonkoko ntani nokuparuka mombili.”

¹⁶ Ngoso ya va karerere ureru kugusira po mugara ogo ndi? Ayo kapi ya va karerere ureru. Awo kwa uyunga hena asi: “Poyiruwo yimwe ose kuhanduka hena, apa Sue a hepa morwa uvera woyironda yendi. Nye ose kapi atu yi gazadara unene, yipo nye eyi kutuvatera tu nyokere po kuhanduka. Ntani hena ose kuvhura tu uyunge kutundilira komutjima asi nsene mugara ogo nga kara gumwe goNombangi daJehova, ose ngatu mu tambura noruhafo. Sihorokwa esi kwa tu ronga asi ove ngo manguruka nsene o tura pasirugana nompango doBibeli, ado kutumangurura mononkedi dononzi kupitakana omu natu vhura kuyigazarera. Ayo kutuhengagwida pokudiva asi Jehova ntaantani tupu ngaka guse po yininke nayinye yoyidona.”

17. Yisinke ono lirongere ko kosihonena saMyra kuhamena kugusira po wopeke?

 ¹⁷ Myra kwa ya li rongere usili age opo ana kwara nare ntani ana kara novana vavali wovamati. Mugara gwendi kapi ga tambwire usili. Mwaza siruwo, mugara gwendi kwa ya honderere ntani kwa sigire epata lyawo. Myra kwa uyunga asi: “Apa mugara gwange ga sigire nge novana vetu vavali, ame kwa lizuvhire ngwendi moomu ava lizuvhu sinzi sovantu apa gumwe ogu va hara ava sigi, pasihonena, kutukauka, kukara nomasinganyeko, kuguva, kulivera, kulipa usima ntani kuhanduka.” Nampili ngomu nonkwara dawo da hege, age kwa twikilire kuzuvha kukora morwa mugara gwendi kwa mu sigire. Myra kwa uyunga hena asi: “Ame kwa twikilire kukara nosinka ntani kwa twikilire kukara nehandu ure womakwedi, ame hena kwa ya dimbwilire asi malizuvho ogo kwa kundamene elikwatakano lyange naJehova ntani nava wopeke.” Ngesi Myra kwa uyunga asi age kapi hena ana kara nehandu ntani kapi ana kara nonkoko kwamugara gwendi gwanare. Age ga kara nehuguvaro asi ezuva limwe mugara gwendi nga karera Jehova. Myra kudemenena kweyi yokomeho. Ngazinya gomudike, age kwa rera vana vendi vavali yipo va karere Jehova. Neina Myra kuna kuhafera kukarera Jehova kumwe novana vendi ntani nomapata gawo.

18. Ehuguvaro musinke twa hepa kukara nalyo mwaJehova ngoMupangeli gomuwa?

¹⁸ Ayo kutuhafesa pokudiva asi kapi twa kara nositumbukira sokutokora asi ngapi omu muntu gongandi va hepa kumupangura. Mokumona asi Jehova yige mupanguli gomuwa, age nga sikisa mo sirugana oso sokupangura. (Rom. 14:10-12) Kuvhura tu kare nehuguvaro asi age nga pangura nkenye apa kuliza nonompango dendi douhunga. (Gen. 18:25; 1 Vah. 8:32) Age kapi nga rugana yininke yokudira kuhungama.

19. Yisinke ngaka sikisa mo Jehova ngomupangeli gomuwa?

¹⁹ Ose kuna kundindira nononkondo siruwo apa Jehova ngaka gusa po yininke nayinye yoyidona eyi ya wiza po morwa kudira kusikilira mo kovantu ntani morwa nonzo. Posiruwo oso, yininke nayinye eyi ayi tu koresa parutu ntani pamalizuvho ngava ka yi gusa po narunye. (Epis. 72:12-14; Ehor. 21:3, 4) Ose kapi ngatu ka yi diworoka hena. Ngomu tuna kundindira siruwo sosiwa si sike mo, ose twa hepa kupandura Jehova kweyi ga tu pa mpito zo ku mu honena yipo tu gusire po wopeke.