LISA * kwa uyunga asi: “Nkenda ezi va likidire nge vanavazinyetu kwa kundamene nge momunene.” Age kwa tembe kweyi ya mu vaterere pomuhowo a tambure usili. Ayo kwa lifene naAnne, ogu ga uyungire asi: “Eyi ya ninkisire nge ni tambure usili kwa kere nkenda ezi va likidire nge Nombangi daJehova, kupitakana tupu eyi ngava rongo.” Vanavazinyetu navenye ava vavali wovakadi kuhafera kuresa Bibeli nokuteda ko, nye nkenda kwa va kundama momunene.

Ngapi omu natu likida nkenda ezi na zi kundama wopeke momuwa? Tu zeni tu ka zogere ko nonkedi mbali omu natu yi rugana: kupitira mweyi a tu uyunga ntani mweyi a tu rugana. Ano konyima natu ka zogera asi wolye ava natu likida nkenda.

Mukadi ogu va tumbura moYisewe egaununo 31 kulikida “veta zonkenda” mweyi a uyunga. (Yis. 31:26, NW.) Age kupulisira “veta” ezi zi kundame eyi a uyunga ntani no mu a yi uyunga. Vaguhya nawo va hepa kulikida “veta” ezi mweyi ava uyunga. Sinzi sovakurona va yi diva asi nsene va uyunga nonkango donondona kuvhura kukoresa vana vawo ntani kuvhura kuvaninkisa va dire kupurakena kweyi ava uyunga. Nsene vakurona va uyunga nonkenda, eyi ngayi karera ureru vana vawo yipo va purakene kweyi vana kuuyunga ntani noku va limburukwa.

Yikare asi o mukurona ndi hawe, ngapi omu nokara nonkenda mweyi o uyunga? Ose kuvhura kugwana egano moYisewe 31:26, omu va uyunga asi: “Kana kendi kukazahwira nonkango donondunge.” Oyo kwa kwatera mo kuhorowora nawa nonkango detu ntani nomu natu uyunga. Ayo yakara nomulyo tu li pure nyamwetu asi ‘eyi nina hara kuuyunga nayi handukisa wopeke ndi nayi retesa po mbili?’ (Yis. 15:1) Yosili, ayo ya wapa tu gazadare ko komeho tu uyunge.

Sisewe simwe kwa uyunga asi: “Nonkango da hana mutwe nondungu kuwurura ngwendi rufuro.” (Yis. 12:18) Nsene tu gazadara ko omu nonkango detu na di vhura kukundama wopeke, ayo nga yi tu vatera tu li pangere mweyi a tu uyunga. Yosili, nsene tu uyunga kuliza ‘noveta zonkenda,’ eyi ngayi tu vatera tu dire kuuyunga nonkango donondona ntani ngayi tu vatera tu dire kuuyunga monkedi zondona. (Efe. 4:31, 32) Ayo nga yi tu vatera tu uyunge nonkango donongwa monkedi zongwa zeharo. Jehova kwa tura po sihonena sosiwa apa ga hengagwidire mukareli gwendi Eliya ogu ga tukukire. Muengeli ogu ga uyungilire po Jehova kwa uyungire ‘nokazwi kompepo kokurerekeda.’ (1 Vah. 19:12) Kukara nonkenda kwa kwatera mo yoyinzi kupitakana tupu kuuyunga nonkenda. Twa hepa hena kulikida nkenda moyirugana yetu. Ngapi natu yi rugana?

Ose kuhonena Jehova pokuuyunga nonkenda ntani pokuruganena wopeke yuma eyi nayi likida asi twa kara nonkenda. (Efe. 4:32; 5:1, 2) Lisa, ogu ka tu tumbura ketameko kwa faturura nkenda ezi va mu likidire Nombangi daJehova. Age kwa uyunga asi: “Apa va tu tanterere nepata lyetu asi tu diruke usimbu, valikwali  vavali woNombangi kwa lihundilire koyirugana yawo yipo va ya tu vatere kurongera nomurongero detu. Posiruwo oso, ame simpe kapi nina tameke kulironga Bibeli. Nkenda ezi va likidire epata lyawo kwa vaterere Lisa yipo a tameke kulironga usili.

Anne ogu ka tu tumbura ketameko lyosirongwa kwa likidire rupandu konkenda ezi va mu likidire Nombangi daJehova. Age kwa uyunga asi: “Monkedi omu vantu ngava tekura nge kwa ninkisire nge ni dire kuhuguvara vantu.” Age kwa uyunga hena asi: “Apa na ligwene noNombangi, ame kapi na va huguvarere. Ame kwa lipulire asi: ‘Morwasinke vana kulikidira elituromo mwange?’ Nye nkenda ezi ga likidire nge murongi gwange goBibeli kwa tumangedere nge ni mu huguvare.” Yitundwamo musinke ya ya horokere? “Konyima, ame kwa ya tamekere kugazadara ko momunene kweyi ngani lirongo.”

Koneka asi yininke eyi va rugene womombungakriste kwa kundamene unene Lisa naAnne ntani eyi kwa va vaterere va lironge usili. Nkenda ezi va va likidire vanavazinyetu, kwa va vaterere va huguvare mwaJehova ntani nomovantu vendi.

Vamwe kuvhura kuvatompoka kuuyunga nonkango donongwa ntani noku menya-menya morwa monkedi ezi va va rera ndi morwa komavango oku va tunga. Aso sininke sosiwa sili kweyi vamwe va kara vantu wovawa morwa mpo zawo ndi nkareso zawo. Nye nsene asi ose kwa kara tupu nonkareso zongwa morwa mpo zetu, kuvhura yi kare asi ose nampo kapi tuna kulikida nkenda ezi a likida Karunga.—Hetakanesa Yirugana 28:2.

Kukara nonkenda ngwendi zezi a likida Karunga, kuna kara sikara simwe soyiyimwa yompepo. (Gar. 5:22, 23) Yipo nye, eyi kulikida asi twa hepa kupulisira mpepo zokupongoka zaKarunga yipo zi tu vatere tu likide nkenda zosili. Nsene tu yi rugana oyo, ose ngatu honena Jehova naJesus. Ntani hena ngwendi Jesus, ose kwa hara kuvatera wopeke. Yipo nye, eharo lyokuhara Jehova novantu kututumangeda tu vatere wopeke. Ano nkenda zokutundilira komutjima ezi atu likida wopeke, nga zi kara sikara somulyo unene esi a hafere Karunga.

Ayo kuvhura kukara ureru kulikida nkenda kwava va tu likida nkenda ndi kwava twa diva. (2 Sam. 2:6) Nkedi zimwe omu natu va likida nkenda kuna kara pokuvapandura. (Koros. 3:15) Nye ngapi nsene tu lizuvha asi gumwe kapi ya mu fira kumulikida nkenda?

Gazadara ko kweyi: Jehova kwa tu tulira po sihonena sosiwa sokulikida nkenda zonene ntani age kuturonga mononkango dendi Bibeli mulyo gokulikida sikara esi. Nkango “nkenda zonene” kwa zi ruganesa yikando yoyinzi moMatjangwa goRugereka goSikriste. Ngapi omu Karunga a tu likida nkenda?

Jehova kwa likida nkenda kovantu navenye ava va paruka pevhu pokuvapa eyi va hepere yipo va paruke. (Mat. 5:45) Nampili komeho vantu va ya dive Jehova, age kwa va likidire nkenda. (Efe. 2:4, 5, 8) Pasihonena, age kwa geve Munwendi gelike a huru yipo a ya fire vantu navenye. Mupositoli Paurusa kwa uyungire asi Jehova kwa geve sizoweseso morwa “nkenda zaKarunga, nene unene.” (Efe. 1:7) Ntani hena nampili ngomu atu zono nokuguvisa Jehova, age kutwikira kutuvyukisa nokuturonga. Mapukururo gendi nononkango dendi kwa fana ngwendi ‘moomu agu tjukumuka mudumbi.’ (Deut. 32:2) Ose kapi tatu vhuru kufuta nawa-nawa Jehova kwanainye eyi atu ruganene. Ntani twa yi diva asi nsene Jehova a dira kutulikida nkenda, kapi ngatu kara nehuguvaro lyokomeho.—Hetakanesa 1 Peturusa 1:13.   

Nkenda zaJehova ngwa ntani kututumangeda nose tulikide wopeke nkenda. Ngoyitundwamo, mevango tupu lyokulikida nkenda kwavamwe, twa hepa kukondja tu honene Jehova yipo tu likide nkenda nkenye ezuva kwava wopeke. (1 Tes. 5:15) Nsene tu twikira kulikida nkenda, ose ngatu fana ngwendi mundiro ogu vana kuzota mezuva lyoutenda unene. Ayo ngayi hengagwida vemepata lyetu, vapuli vakwetu, varugani vakwetu, vanasure vakwetu ntani vamusinda vetu.

Gazadara ko kwava vemepata lyeni ndi womombungakriste ava nava gwanena mo uwa mononkango doge donongwa ntani nomoyirugana yoge yoyiwa. Nampo kweli gumwe gomombungakriste zeni ogu ana hepa evatero mokupakera mbili embo lyendi ntani sipata sendi ndi mokurugana yirugana yimwe ngwendi kukamurandangera yininke yendi. Mokugwederera ko, nsene o ligwanekere nagumwe mokuzuvhisa ogu ana hepa evatero, kuvhura o mu vatere ndi?

Ngano tuhoneneni Jehova, yipo tu likide nkenye apa “veta zonkenda” mweyi atu uyunga ntani mweyi atu rugana.