SINZI sovantu va diva sihorokwa saJesus ogu va pamparere kositji pokatji kovamahaka vavali. (Mat. 27:35-38) Nye nampili ngoso, vamwe kwa yi pura asi Bibeli kapi za vyukilira nawa-nawa apa azi uyunga asi simpu saJesus kwasi wapaikire va ka si horeke ntani nokusitura montoko.—Mar. 15:42-46.

Vantu vamwe ava ava rwanesa Mavangeli kwa uyunga asi muntu ogu va dipagere kositji kapi va vhulire kumupulisira va ka mu horeke, pasihonena montoko. Yipo nye, varwanesi owo kwa yi pura asi ayo kumoneka asi vantu ava va dipagere ngovakorokotji, ngava va tekura monkedi zapeke. Mugavi mbudi gumwe gedina Ariel Sabar kwa fatwilire konda zeyi vamwe va karere negano olyo mosifo ava tumbura asi Smithsonian. Age kwa tjenge asi: “Kupampara muntu kosilivindakano kwa kere etengeko ngava gava komuntu gomudona gomomukunda, ano valirongi vamwe kwa tanta asi ayo kapi tayi vhuru kuhoroka asi Varoma kuvhura va pulisire vantu owo yipo va va horeke monkedi zongwa.” Varoma kwa here kuswaukisa vakorokotji owo, yipo nye rorunzi yimpu yawo ngava yi sigi kooko kositji yipo yikasama yi ya yi lye. Ano konyima zoyo, yihupwa eyi ya hupire ko va vhulire kuyizugumina montoko kumwe noyimpu yimwe.

Nye vasimaguli kwa gwana mauzera gokulisiga kuhamena yihupwa yoVajuda vamwe ava va dipagere. Mo-1968 kwa gwene yisupa yimwe yomugara ogu va dipagere mosiruwo sovapositoli. Ayo kwa yi gwene montoko zepata limwe lyoVajuda pepi naJerusarema. Yisupa oyo kwa kere montoko ezi ava tura yisupa ndi mosikesa soyisupa. Sisupa sokosinsinsina kuna kara simwe soyisupa eyi va gwene mo. Aso kwa si pamparere kosipirangi kumwe nombohwa zokusika konosentimeta 11.5. Sabar kwa tanta asi: “Sisupa sosinsinsina somugara gedina Yehochanan kwa geve umbangi ou wa likidire konda zeyi sihorokwa semEvangeli sokuhamena evhumbiko lyaJesus lya karera usili.” Yosili, sisupa sokosinsinsina saYehochanan kwa kere sihonena somugara ogu va dipagere momazuva gaJesus ogu va pulisilire Varoma va mu horeke kuliza nomu ngava yi rugana Vajuda.”

Pwa kara magano gokulisiga-siga kuhamena omu Jesus va mu pamparere kositji kuliza neyi sa likida sisupa sokosinsinsina saYehochanan. Nye sininke simwe esi twa diva sesi asi vakorokotji vamwe ava va dipagere kositji kwava horekere monontoko ntani kapi tupu ngava va zugumine montoko zoyimpu yikwawo. Eyi kulikida asi eyi azi uyunga Bibeli asi simpu saJesus kwa si horekere montoko, usili. Maumbangi kukwatesa ko eyi azi uyunga Bibeli asi simpu saJesus kwa si wapaikire noku si tura montoko.

Unene po, Jehova kwa pumbire asi Jesus ngava mu vhumbika montoko zomugara gongawo ntani kwato gokuvhura kukondera nonkango daKarunga di dire kusika mo.—Jes. 53:9; 55:11.