1-2. Udigu musinke ava ligwanekere nawo Vakriste neina, ou wa lifana nou ga ligwanekerere nawo Roto?

 APA ATU mono nkareso zondona ezi vana kurugana vantu neina, ose kulizuvha ngwendi moomu ga lizuvhire Roto ogu ga kere muhungami. Age kwa mu “guvisire nkareso zokunyata zovantu wovadona,” morwa ga yi divire asi Guhyetu gemeguru kwa nyenga nkareso zondona. (2 Pet. 2:7, 8) Mokumona asi Roto ga kere noutjirwe kwaKarunga ntani ga mu here, eyi kwa mu tumangedere a nyenge nkareso zondona zovantu ava va mu kundurukidire. Nose kwa tu kundurukida vantu ava ava dili kufumadeka nawa-nawa nompango daJehova. Nye nampili ngoso, ose kuvhura tu twikire kukara tuna kuhuka pamukaro nsene tu hara Karunga ntani nokumufumadeka unene.—Yis. 14:2.

² Jehova kutuvatera tu yi rugane oyo kupitira momakorangedo aga atu gwana mobuke zoYisewe. Vakriste navenye, yikare asi vagara, vakadi, vanona ntani novakondi, navenye kuvhura kugwanena mo mauwa pokukonakona mapukururo aga ga kara mo.

3. Kuliza noYisewe 17:3, konda musinke zimwe zeyi natu poperera mutjima gwetu? (Tara hena efano.)

³ Konda zomulyo zeyi natu poperera mutjima gwetu gopasifanekeso kuna kara asi, Jehova kukonakona nomutjima detu. Eyi kutanta asi age kumona yoyinzi kupitakana tupu eyi ava mono wopeke mwetu ntani age ga diva eyi ya kara momutjima gwetu. (Resa Yisewe 17:3.) Age nga tu hara nsene tu twikira kugazadara kuhamena epukururo eli, eli nga li vhura kutuvatera tu ka paruke narunye. (Joh. 4:14) Makura ose kapi ngatu pulisira nkareso zondona zovantu womouzuni ou ntani noyimpempa yaSatana yi tu kundame. (1 Joh. 5:18, 19) Ngomu ngatu hedera pepi Jehova,  ose ngatu mu hara unene ntani nga tu mufumadeka. Mokumona asi ose kapi twa hara kukoresa Guhyetu, ose ngatu nyokera po nampili magazaro gokuhara kutura nzo. Apa nga tu ligwanekera neheteko lyokurugana yoyidona, ose ngatu li pura nyamwetu asi: ‘Ngapi omu nani koresa ogu ga likida nge eharo lyenene?’—1 Joh. 4:9, 10.

4. Ngapi omu utjirwe wokutjira Jehova wa poperere munazinyetu gumwe gomukadi yipo a dire kugwira meheteko?

⁴ Marta, munazinyetu gomukadi gomoCroatia ogu ga li gwanekera neheteko lyokuhondera, kwa tjanga asi: “Ayo kwa digoperere nge kugazara nawa ntani noku nyokera po edowo lyokurugana yininke yoyidona. Nye utjirwe wokutjira Jehova kwa poperere nge.” b Ngapi omu utjirwe wokutjira Karunga wa mu poperere? Marta kwa tanta asi age kwa gazadarere ko koyitundwamo eyi ngali vhura kuretesa po etokoro lyedona. Nose kuvhura kurugana yokulifana. Yitundwamo yoyidona unene kuna kara asi ose ngatu guvisa Jehova ntani kapi ngatu vhura kumukarera dogoro narunye.—Gen. 6:5, 6.

5. Yisinke ono kulirongera ko kosihorokwa saLeo?

⁵ Nsene tu tjira Jehova, ose ngatu takamesa yipo tu dire kutulisa po ukaume kumwe nava ava rugana yininke yoyidona. Leo, ogu ga tunga moCongo, kwa lirongere sirongwa oso. Konyima zonomvhura ne, kutunda apa ga gwene ekuho, age kwa tulisire po ukaume kumwe novantu ava ngava rugana yininke yoyidona. Age kwa gazarere asi nsene tupu kapi ana kulihameka mo moyirugana yoyidona, age ngoso kapi ana kuzona kwaJehova. Nye konyima zosiruwo, vakaume vendi wovadona, kwa mu ninkisire a ruganese yikorwesa monkedi zondona ntani nokuhondera. Makura yipo ga tamekere kugazadara ko kuhamena eyi va mu rongere vakurona vendi woVakriste ntani noruhafo oru ga kere naro apa nga karere Jehova. Yitundwamo musinke ya kere? Age kwa tamekere hena kurugana yininke youhunga. Nevatero lyovakuronambunga,  age ga tamekere hena kukarera Jehova. Age ngesi kuna kara mukuronambunga goruhafo ntani muzuvhisi gosiruwo nasinye.

6. Vakadi musinke vavali wopasifanekeso natu ka zogera ngesi?

⁶ Tu zeni tu ka zogere Yisewe egaununo 9, omu atu resa kuhamena vakadi vavali. Gumwe kwa fanekesa unongo, ano gumwe kwa fanekesa ugova. (Hetakanesa Varoma 5:14; Vagarata 4:24.) Ngomu natu ka yi rugana ngoso, diworoka asi mouzuni ou waSatana kuna zura mo ruhonda ntani mafano goruhonda. (Efe. 4:19) Yipo nye ayo ya kara nomulyo tu twikire kutunga po sikara setjirokarunga ntani noku nyokera po kurugana yoyidona. (Yis. 16:6) Natuvenye, yikare asi vagara ndi vakadi, kuvhura kugwanena mo uwa mweyi va tumbura megauno eli. Nkenye gumwe gopovakadi owo vavali kwa mu faturura asi age kuna kugava ezigido ‘kovantu wokudira nondunge.’ Nkenye gumwe gwawo kwa uyunga ngwendi asi: ‘Wiza membo lyange oya lye nondya.’ (Yis. 9:1, 5, 6, 13, 16, 17) Nye pwa kara elisigo pweyi ya horokerere ava va tambwire ezigido olyo.

7. Kuliza noYisewe 9:13-18, yisinke ayi horokere vantu ava ava tambura ezigido lyomukadi gomugova? (Tara hena efano.)

⁷ Tu tareni ezigido ‘lyomukadi gomugova.’ (Resa Yisewe 9:13-18.) Age kuzigida ava va dira nondunge asi: ‘Hwilireni’ mu ya lye. Yisinke ya va horokerere? Awo kwa kere “konhiinhi zosirongo sovafe.” Nampo kuvhura mu diworoke mbuyungiso zokulifana zopasifanekeso ezi va tumbura mobuke zoYisewe. Amo kuturondora mo kuhamena mukadi “ogu ga hara yipara” ntani “mukadi goruhonda.” Amo kututantera mo asi: “Nsene o za kembo lyendi, ove monzira zonomfa ono kugenda.” (Yis. 2:11-19) MoYisewe 5:3-10 kwa kara mo hena erondoro limwe lyokuhamena ‘mukadi gwa peke’ ogu “a gendi nzira zonomfa.”

8. Etokoro musinke twa hepa kutura po?

⁸ Ava ava zuvhu ‘mukadi gomugova’ va hepa kutura po etokoro nsene asi ta va tambura ezigido lyendi ndi ta va li nyoka. Nose kuvhura nampo ngatu ture po etokoro lyokufana ngoso. Yisinke ngatu rugana nsene gumwe nga hetekera ko kutuninkisa tu hondere ndi nsene nga tu mona mafano goruhonda hararasi?

9-10. Nokonda musinke dimwe deyi natu nyokerera po ruhonda?

⁹ Pwa kara nokonda domulyo deyi natu nyokerera po ruhonda. ‘Mukadi gomugova’ kwa uyungire asi: “Mema gowidi mawa unene.” Yisinke ga fanekesa “mema gowidi?” Bibeli kwa fanekesa eligwanekero panyama eli ava vhuru kuhafera valikwali komema gomawa. (Yis. 5:15-18) Valikwali ava va likwara paveta va va pulisira yipo va  hafere eligwanekero panyama. Nye ayo ya lisiga ‘nomema gowidi’ gopasifanekeso. Ago kuvhura kutamba koruhonda. Vantu ava ava hondere, rorunzi awo kuhetekera ko kuyihoreka, ngwendi moomu tupu muwidi a hetekere ko kuvaka yininke mokahore-hore. “Mema gowidi” gopasifanekeso kuvhura ga moneke ngwendi matovara nsene asi owo vana hamene mo vagazara asi kwato ogu na diva eyi va rugana. Oyo kuna kara yimpempa ya kahura ko! Morwa Jehova kumona nayinye. Nsene Jehova a dira kutuhafera, aso kuna kara sininke sosidona unene esi nasi vhura kutuhorokera ntani aso kapisi sininke sosiwa. (1 Kol. 6:9, 10) Nye koyili hena yimwe eyi nayi vhura kutuhorokera.

¹⁰ Ruhonda kuvhura kuretesa po nomuga, kuvhura kukuninkisa o lizuvhe asi ove kwato mulyo, kuvhura kuretesa po mazimo gokudira kundindira ntani kuvhura kutezesa po mapata. Yosili, ayo ya kara nomulyo tu nyokere po ezigido lyomukadi gomugova. Kugusa ko kuzumbanesa elikwatakano lyawo naJehova, vantu wovanzi ava ava hondere kugwana hena mauvera aga aga va twaredesa konomfa. (Yis. 7:23, 26) Yisewe egaununo 9 velise 18 kouhura wazo kwa tanta asi: “Ava va hwilira mo nare koveli konhiinhi zosirongo sovafe.” Morwasinke sinzi sovantu ava tambwire ezigido lyendi eli ali twaredesa kokudona?—Yis. 9:13-18.

11. Morwasinke kutarera mafano goruhonda ya karera siponga sosinene?

¹¹ Siraha esi sina vhuka po unene neina kuna kara mafano goruhonda. Vamwe kugazara asi kutarera mafano goruhonda kapisi siponga. Nye mokulisiga, mafano goruhonda ago siponga, kuninkisa vantu va dire kulifumadeka vene ntani nava wopeke, ntani ayo udigu unene kuhageka nkareso zo ku ga tarera. Apa muntu a tarere mafano goruhonda, ayo udigu unene ku ga divara. Unene po, mafano goruhonda kapi aga dipaga madowo gomadona, nye ago ku ga pindura. (Koros. 3:5; Jak. 1:14, 15) Yosili, sinzi sovantu ava ava tarere mafano goruhonda ku va twaredesa va ka rugane yirugana yoruhonda.

12. Ngapi natu yi likida asi ose kuna kuhetekera ko kunyokera po kutarera mafano aga naga vhura kupindura edowo lyokuligwanekera panyama?

¹² Yisinke natu vhura kurugana ngoVakriste nsene tu mona efano lyoruhonda hara-rasi kosikwakonentu setu? Twa hepa kuhageka usimbu kutarera efano olyo. Ayo ngayi tu karera ureru kuyirugana oyo nsene tu diworoka asi ugawo womulyo po unene ou twa kara nawo kuna kara elikwatakano lyetu kumwe naJehova. Nampili mafano aga aga moneka asi kapisi mafano goruhonda, kuvhura kupindura edowo lyokuligwanekera panyama. Morwasinke natu ga nyokerera po? Morwa kapi tuna hara kurugana nampili ka ninke kokanunu aka na ka tu ninkisa tu hondere momutjima. (Mat. 5:28, 29) Mukuronambunga gomoThailand gedina David kwa tanta asi: “Ame kulipura nyamwange asi: ‘Nampili mafano ga dire kukara mafano goruhonda, kuvhura yi mu hafese Jehova nsene ni twikira ku ga tara ndi?’ Epuro ngeli kuvatera nge yipo ni rugane yininke yoyiwa.”

13. Yisinke ayi tu vatere tu rugane yininke yoyiwa?

¹³ Kukara noutjirwe wokudira kurugana nkenye eyi nayi vhura kuguvisa Jehova, nga yi tu vatera tu rugane yininke yoyiwa. Etjirokarunga kuna kara “etameko lyounongo.” (Yis. 9:10) Eyi kwa yi tumbura ketamekero lyegaununo 9 lyomoYisewe, omu atu resa kuhamena mukadi gopasifanekeso ogu ga fanekesa’ unongo.’

14. Ezigido musinke lyapeke eli atu resa moYisewe 9:1-6?

¹⁴ Resa Yisewe 9:1-6. Monovelise edi ose kuresa mo kuhamena ezigido lyokutundilira kwaJehova, Musiti gwetu ntani ntundiliro zounongo naunye. (Yis. 2:6; Rom. 16:27) Mosifanekeso esi somukadi gounongo, ose kuresa mo kuhamena nzugo ezi za kara nonongundi ntambali. Eyi kulikida asi Jehova age ugavi  ntani kutambura navenye ava vana hara kutura pasirugana meparu lyawo unongo wokutunda kwendi.

15. Yisinke ana kutuzigida Karunga tu rugane?

¹⁵ Jehova kuna kara Karunga gougavi ogu a gava yoyinzi. Yikara eyi kuyimonenena mosihonena somukadi ogu ga fanekesa ‘unongo’ esi va tumbura moYisewe egaununo 9. Mosihorokwa esi kwa tumbura mo asi mukadi ogu kwa zigidire vantu yipo va wize membo lyendi noku ya lya nondya donontovara nonyama ntani novhinyu ezi ga wapayikire. (Yis. 9:2) Ntani hena kuliza novelise 4 nezi 5, mukadi ogo kwa uyungire asi ‘ava va hana nondunge, va wize va ya lye nondya dange.’ Morwasinke natu zira kembo lyomukadi gounongo yipo tu ka lye nondya edi a gava? Jehova ana hara vana vendi va kare wonondunge ntani va kare mepopero. Age kapi ana hara tu ture mapuko aga nga ga tu koresa. Eyi yiyo nye a gavere “ekwafo negameno kovantu wovahungami.” (Yis. 2:7) Apa atu kara noutjirwe wokutjira Jehova, ayo kututumangeda tu mu hafese. Ose kupurakena kevyukiso eli ntani ayo kutuhafesa kulitura pasirugana.—Jak. 1:25.

16. Ngapi omu etjirokarunga lya vaterere Alain a ture po etokoro lyewa ntani yitundwamo musinke ya kere?

¹⁶ Koneka omu utjirwe wokutjira Karunga wa vaterere Alain a ture po etokoro lyewa. Alain age mukuronambunga ntani mitili. Age kwa tanta asi: “Sinzi sovamitili ngava tara nomuvi domafano goruhonda ngwendi erongo tupu lyokuhamena eligwanekero panyama.” Nye Alain ga yi divire asi oyo kapisi usili. Age kwa tente asi: “Etjirokarunga kwa ninkisire nge ni dire kutarera nomuvi odo. Ame hena kwa fatwililire vamitili vakwetu konda zeyi na nyokerere ku di tarera.” Age kwa tulire pasirugana nonkango dounongo ‘pokugenda monzira zonondunge.’ (Yis. 9:6) Morwa uradi waAlain, ngesi vamitili vakwawo vamwe kulironga Bibeli ntani kuwiza komapongo.

17-18. Mauwa musinke ava gwanene mo ava ava tambura ezigido ‘lyomukadi gounongo’ ntani yisinke vana kundindira nononkondo? (Tara hena efano.)

¹⁷ Jehova kuruganesa yihonena yovakadi ava vavali wopasifanekeso mokutulikida omu natu vhura kukara neparu lyoruhafo. Ava ava tambura ezigido ‘lyomukadi gomugova’ kuhetekera ko kugwana ruhafo pokulihameka moruhonda. Nye awo kapi ava dimburura asi eyi ava rugana ngayi kundama eyi ngayi va horokera komeho. Yitundwamo yo yirugana yawo ngayi va twaredesa “konhiinhi zosirongo sovafe.”—Yis. 9:13, 17, 18.

¹⁸ Ava ava tambura ezigido lyomukadi ogu ga fanekesa ‘unongo’ ngava li gwanekera noyitundwamo ya peke komeho! Awo ngesi vana hafa morwa vana kara noyininke nayinye eyi vana hepa yipo va kare pepi naJehova. (Jes. 65:13) Jehova kwa uyungire kupitira momuporofete Jesaya asi: “Purakeneni nawa kwange, one mu  sikise mo eyi nina kumutantera, makura ngomu djobwane nondya nadinye donongwa.” (Jes. 55:1, 2) Ose kuna kulironga kuhara eyi ga hara Jehova ntani noku nyenga eyi ga nyenga. (Epis. 97:10) Ntani ose kuhafa apa tu zigida ko wopeke yipo nawo va gwanene mo uwa ‘mounongo’ wokutunda kwaJehova. Ose kwa fana ngwendi vakareli ava va ‘zigilire konondundu dositata’ asi: “‘Vasima va hwilire mo!’ Ano ogu ga hana nondunge, a hwilire.’” Mauwa aga atu gwanene mo ngesi ntani aga ava gwana ava ava tambura ezigido olyo, kapisi goposiruwo esi tupu, nye ago ganarunye. Ago nga ga tu pulisira tu ka ‘paruke’ narunye ngomu tuna ‘kugenda monzira zonondunge.’—Yis. 9:3, 4, 6.

19. Kuliza naMuudisi 12:13, 14, yisinke hena natu tokomena kurugana? (Tara hena kakende “ Utjirwe wokutjira Karunga kutuvatera.”)

¹⁹ Resa Muudisi 12:13, 14. Ngano etjirokarunga li twikire kutuvatera tu popere nomutjima detu ntani noku tuvatera tu kare tuna kuhuka panyama ntani pampepo pomazuva aga gomadona gopouhura. Etjirokarunga lyangoso ngali tu tumangeda tu twikire kuzigida vantu wovanzi yipo va papare ‘unongo’ wokutunda kwaJehova ntani va gwanene mo uwa.