Bibeli kapi za yi uyunga. Nye azo kugava ko mauzera gomawa aga nampo ga kundamene etokoro lyawo.

Muengeli kwa tanterere Mariya asi nga kara nomarutu gavali nokuhampuruka. Apa muengeli ga uyungire mbudi ezi, Mariya naJosefa awo kwa tungire moNasareta, doropa zomoGalireya. (Ruk. 1:26-31; 2:4) Konyima, apa va ka tundire koEgipite, awo kwa zire koNasareta. Jesus yimo ga kulilire moomo ntani kwa ya kere Munasareta. (Mat. 2:19-23) Eyi yiyo nye atu gazarere kuhamena Nasareta apa atu tumbura kuhamena Jesus, Josefa ntani Mariya.

Mariya ga kere na gumwe gekoro, gedina Elisabeta ogu ga tungire moJuda. Elisabeta kwa kere mukada mupristeli Sakeusa ntani kwa kere ozina vaJohanesa Mukuhwi. (Ruk. 1:5, 9, 13, 36) Mariya kwa ka dingwire Elisabeta nokuka kara nendi makwedi gatatu moJuda. Makura Mariya yipo ga tengwire koNasareta. (Ruk. 1:39, 40, 56) Yipo nye, Mariya ga divire omu mwa kere moJuda.

Mwaza siruwo, Josefa ga limburukwire mpangera ‘zokukalitjangesa.’ Josefa yipo ga tundire koNasareta a ze koBeterehema esi sa kere “sitata saNdafita” ntani alyo kwa kere evango eli va porofetere oku va ya hampurukire Mesiyasa. (Ruk. 2:3, 4; 1 Sam. 17:15; 20:6; Mika 5:2) Konyima zapa Mariya ga hampurukire Jesus, Josefa kapi ga mu ninkire asi va gende rugendo rorure va tengure koNasareta nomukeke. Awo kwa kere moBeterehema, sitata esi sa li kere naJerusarema ure wonokilometa 9. Eyi ngano ya va rerupilire kutwara munawo kontembeli noku ka gava nzambo kuliza noveta ezi za kere po.—Lev. 12:2, 6-8; Ruk. 2:22-24.

Muengeli gwaKarunga kwa tanterere Mariya pomuhowo asi munendi nga gwana “uhompa wozinakuru Ndafita” ntani “nga pangera ngaHompa.” Nampo oJosefa naMariya ya va hafesere pokudiva asi Jesus ngava mu hampurukira mositata saNdafita. (Luke 1:32, 33; 2:11, 17) Awo nampo va gazarere asi nayi wapa kwawo va twikire kukara mositata oso nokundindira kwaKarunga a va tantere eyi na va rugana.

Kapi tuna diva asi siruwo sokuhura kupi va kere moBeterehema dogoro apa vakonentu va ya sikire. Posiruwo oso va ya sikire, epata lyawo kwa tungire monzugo ano munawo gomumati kapi ka kere mukeke nye age kwa kere “munona.” (Mat. 2:11) Ayo kumoneka asi mevango lyokuza koNasareta, awo kwa kere moBerehema siruwo songandi yipo va tunge mo.

Herodesa kwa geve mpangera asi “vanona navenye wovamati womoBeterehema wonomvhura mbali yigurumwise” va va dipage. (Mat. 2:16) Muengeli gwaJehova kwa rondwere Josefa kuhamena mpangera ozo, makura nage naMariya yipo va tjwayukire koEgipite naJesus noku ka kara kooko dogoro apa Herodesa ga fire. Konyima, Josefa yipo ga twere epata lyendi koNasareta. Morwasinke va dililire kutengura koBeterehema? Morwa posiruwo oso, munwaHerodesa gedina Arukerausi yige nga pangere moJudeya ntani age kwa kere nyanya unene. Ntani hena muengeli kwa mu rondwere asi ga ha za ko. Nasareta kwa kere evango lyepopero oku Josefa ga vhulire kuka rera nawa Jesus yipo a kare mukareli gosili gwaKarunga.—Mat. 2:19-22; 13:55; Ruk. 2:39, 52.

Ayo kumoneka asi Josefa kwa fire komeho Jesus a fe nokugava mpito yipo vantu vamwe va gwane mpito zokuza meguru. Yipo nye, Josefa ngava ka mu vhumbwira paapa pevhu. Wovanzi ngava ka mu mona noku ka lironga yoyinzi kwendi kuhamena konda zeyi ga karerere moBeterehema konyima zapa va hampurukire Jesus.