1. Kuliza nEpisarome 18:46, ngapi omu Ndafita ga tumbwire Jehova?

 OSE KWA kuparuka mouzuni omu mwa kara maudigu aga naga vhura kuninkisa eparu li digope ndi ga tjindje maparu getu. Ose kukara norupandu asi Jehova nga tu vatera. Mosirongwa sina ka pita, ka va tu diworokesere asi Jehova age Karunga gomunamwenyo ntani age ga liwapaikira kutuvatera nkenye apa. Apa atu gwana evatero lyendi, ayo kutuhuguvaresa asi “Karunga munamwenyo.” (Resa Episarome 18:46.) Nye nampili ngoso, Ndafita konyima kwa uyungire asi Karunga “mugameni gwange.” Morwasinke Ndafita ga fanekesere Jehova Karunga munamwenyo, kegameno?

2. Yisinke natu lirongera ko kononkango daNdafita kuhamena eyi ga tumbwire Jehova asi “mugameni gwange”?

² Mosirongwa esi tatu ka zogera konda zeyi Jehova va mu fanekesera kegameno ntani yisinke nayi ka tu ronga kumuhamena. Ntani natu ka lironga omu natu mu huguvara ngomupopeli gwetu. Ano konyima natu ka zogera nonkedi omu natu vhura kuhonena yikara yaJehova.

MORWASINKE JEHOVA AVA MU TUMBWIRE ASI EGAMENO

3. Ngapi omu Bibeli za tumbura yikando yoyinzi nkango ‘egameno’ ndi ‘emanya’? (Tara efano )

³ Bibeli kufanekesa Jehova ‘kegameno,’ mokutuvatera tu kwate egano yikara yendi yimwe. Yiruwo yoyinzi apa vakareli vaJehova womosiruwo sanare ngava hamberere Karunga koyikara yendi yoyiwa, awo kwa mu tumbura moBibeli asi mugameni. Sikando sokuhova omu va tumbura Jehova asi “age Emanya,” kuna kara mwaDeuteronomium 32:4. Mekanderero lyaHana, age kwa uyungire asi “kutupu mugameni ngaKarunga gwetu.” (1 Sam. 2:2) Habakuku kwa tumbwire Jehova asi ‘mugameni gwange.’ (Hab. 1:12) Mutjangi gEpisarome 73 kwa tumbwire Karunga asi “nonkondo dange.” (Epis. 73:26) Ntani nampili Jehova mwene kwa litumbura asi munankondo. (Jes. 44:8) Tu zeni tu ka lironge yikara yitatu eyi ayi  ninkisa Jehova a kare ngwendi Emanya ntani natu ka lironga omu natu ninka Jehova a kare “Emanya lyetu.”​—Deut. 32:31.

4. Ngapi omu Jehova a tu popere moyiruwo yoyidigu? (Episarome 94:22)

⁴ Jehova kutupopera moyiruwo yoyidigu. Ngwendi moomu muntu a vanda kemanya lyenene yipo li mu popere kekundungu, mokulifana, Jehova nage kutupopera apa atu ligwanekere nomaudigu. (Resa Episarome 94:22.) Age kutupopera ntani kututakamesa koyininke eyi nayi tu koresa siruwo sosire. Ntani age kwa tu tumbwidira asi komeho nga ka gusa po nayinye eyi ayi tu ninkisa tu kare nosinka ndi tu hepe.​—Hes. 34:25, 26.

5. Ngapi omu Jehova na vhura kukara egameno lyetu?

⁵ Nkedi zimwe omu atu gwana epopero lyokutunda kwaJehova kuna kara pokukanderera kwendi. Apa atu kanderere, Jehova kutupa “mbili” ezi azi takamesa nomutjima nomagazaro getu. (Fil. 4:6, 7) Tu zeni tu ka tare sihonena samunazinyetu gomugara Artem ogu va tulire modorongo morwa epuro lyendi. Apa ga kere modorongo, mukwayita kwa rugurukire kumupura mapuro yikando yoyinzi nokumutekura momudona ntani nokumutjilisa. Age kwa uyunga asi: “Ame ngani kara nosinka sosinene nkenye apa nga puragere nge mukwayita ogo. Ame ngani kanderere kwaJehova nkenye apa. Ame ngani mu pura a pe nge ko mbili zomomutjima ntani nounongo. Nampili ngomu na ligwanekerere neheteko eli, ame kwa litulire. Nevatero lyaJehova, ayo kwa fene ngwendi ame kwa vende konyima zemanya lyemunene.”

6. Morwasinke natu huguvarera Jehova nkenye apa? (Jesaya 26:3, 4)

⁶ Jehova mulimburukwi ntani kapi nga tu sigilira. Ngwendi moomu emanya lyemunene ndi ndundu azi kara pevango limwe, Jehova nage ga liwapaikira kutuvatera. Kuvhura tu mu huguvare morwa age ‘kutupopera nkenye apa.’ (Resa Jesaya 26:3, 4.) Age nkenye apa nga sikisa mo matumbwidiro gendi, nga purakena komakanderero getu ntani nokutupa evatero eli tuna hepa. Ose kuvhura tu huguvare Jehova morwa age kulikida nkenda ava ava mu karere. (2 Sam. 22:26) Age kapi nga divara eyi atu mu ruganene ntani age nkenye apa nga tu futa.​—Heb. 6:10; 11:6.

7. Yisinke ngatu ligwanekera nayo nsene tu huguvara mwaJehova? (Tara hena efano.)

⁷ Ose kuninka Jehova a kare epopero lyetu apa atu mu huguvara unene. Tuna si huguvara asi nsene tu mu limburukwa nampili moyiruwo yoyidigu, ose ngatu gwanena mo mauwa. (Jes. 48:17, 18) Nkenye apa atu dimburura asi Jehova ga tu vatera, ayo ku tuninkisa tu mu huguvare unene. Ose twa yi pura nawa-nawa asi Jehova yige gelike gokutuvatera yipo tu lididimikire nkenye eheteko nampili yi tu digopere. Rorunzi apa atu kara momaukaro aga aga tu ninkisa tu lizuvhe ngwendi asi kwato ogu natu vatera, ose ku dimburura asi kuvhura tu huguvare nkenye apa mwaJehova. Vladimir kwa tanta asi: “Ame kwa lizuvhire asi pepi naJehova nina kara apa na kere modorongo. Ame kwa lirongere kuhuguvara unene mwaJehova morwa nyamelike na kere ntani yige gelike ga vhulire kuvatera nge yipo ni lididimikire.”

8. (a) Morwasinke natu uyungira asi Jehova kapi a litjindji? (b) Mauwa musinke natu gwanena mo kweyi Jehova ga kara mupopeli gwetu? (Episarome 62:6, 7)

⁸ Jehova kapi a litjindji. Jehova kwa fana  ngwendi emanya lyemunene ndi ndundu ezi azi dili kurunduruka. Yikara ntani nositambo sendi kapi ayi litjindji. (Mara. 3:6) Apa Adamu naEva va mu rwanesere, Jehova kapi ga tjindjire sitambo sendi kovantu. Mupositoli Paurusa kwa tjenge asi Jehova “nokuvhura si kulikumbagera mwene.” (2 Tim. 2:13) Eyi kutanta asi yi kare asi yisinke nayi horoka ndi eyi nava ku rugana wopeke, Jehova kapi nga tjindja yikara yendi, sitambo sendi ndi nompango dendi. Mokumona asi Jehova kapi a litjindji, twa yi diva asi age nga tu vatera moyiruwo yoyidigu ntani age nga sikisa mo matumbwidiro gendi gokomeho.​—Resa Episarome 62:6, 7.

9. Yisinke ono lirongere ko kosihorokwa saTatyana?

⁹ Nsene tu teda ko koyikara yaJehova ntani nositambo sendi kevhu ntani kovantu, ngayi tu vatera tu mu huguvare ntani nokumuninka a kare epopero lyetu. Nsene tu yi rugana, ayo ngayi tu vatera tu liture ntani nokulididimikira poyiruwo yoyidigu. (Epis. 16:8) Ano eyi yiyo ya horokerere munazinyetu Tatyana ogu ga kere modorongo zemembo morwa epuro lyendi. Age kwa uyunga asi: “Ame nkenye apa ngani kara nyamelike. Pomuhowo kwa kere sili udigu. Ayo nkenye apa ngayi dompesa nge.” Yipo ga tamekere kuteda ko kwaJehova ntani nositambo sendi kovantu, yipo ga ya dimbwilire mulyo gokulididimikira udigu owo. Eyi ya mu vaterere a kare ana litura ntani nokumupa nonkondo yipo a twikire kulimburukwa. Age kwa uyunga asi: “Kukwata egano konda zeyi yina kuhorokera, kwa vaterere nge ni diworoke asi yininke oyo kwahorokere morwa Jehova. Ano eyi kwa vatera nge ni dire kuligazara nyamwange.”

10. Ngapi omu Jehova na kara egameno lyetu ngesi?

¹⁰ Ntaantani ngatu ligwanekere noyiruwo yoyidigu ntani ngatu hepa kuhuguvara mwaJehova kupitakana pwanare. Yipo nye, ayo ya kara nomulyo tu nkondopeke epuro lyetu mwaJehova ntani noku yi pura asi nga tu vatera tu twikire kumulimburukwa mwankenye ukaro. Ngapi omu natu yi rugana? Pokuresa yihorokwa yomoBibeli ntani yilimonena yovakareli vaJehova womomazuva getu. Dimburura omu Karunga ga vatera vakareli vendi. Gazadara momunene yihorokwa oyo. Pokuyirugana ngoso, ngayi kuvatera o ture Jehova a kare mugameni goge.

HONENA YIKARA YAJEHOVA

11. Morwasinke tuna harere kuhonena yikara yaJehova? (Tara hena kakende “ Sitambo sovanavazinyetu wovadinkantu.”)

¹¹ Tuna lirongo omu yikara yaJehova ya mu ninkisa a kare ngwendi egameno lyetu. Ngesi tu zogereni omu natu honena yikara yendi. Nsene tu hetekera ko kuhonena yikara yaJehova, ngatu nkondopeka vanavazinyetu. Pasihonena, Jesus kwa pere Simoni edina Kefasa (eli va toroka asi “Peturusa”) kutanta asi “emanya.” (Joh. 1:42) Jesus kwa uyungire asi Peturusa nga hengagwida wopeke mombungakriste ntani nokunkondopeka epuro lyawo. Vakuronambunga kwa va faturura asi “mundwire gemanya lyenene.” Eyi kutanta asi awo kupopera womombungakriste. (Jes. 32:2) Nye natuvenye kuvhura tu likorangede-korangede, nsene tu honena yikara yaJehova.​—Efe. 5:1.

12. Ngapi omu natu vatera wopeke moyiruwo yoyidigu?

 ¹² Vatera vanavazinyetu moyiruwo yoyidigu. Nsene vanavazinyetu va zumbanesa ndi va siga mambo gawo morwa yimpagwa yopaunsitwe ndi morwa yita, kuvhura tu kare nawo momambo getu. Ngomu maukaro ‘gopomazuva gopouhura’ gana kudonapa unene, kuvhura tu pe vanavazinyetu yininke eyi vana hepa. (2 Tim. 3:1) Kuvhura hena tu hengagwide vanavazinyetu ntani noku va likida eharo eli vana hepa. Nkedi zimwe omu natu yi rugana kuna kara pokuuyunga nawo apa ava wiza komapongo ntani nokuvakorangeda. Tuna hara kuninka mbungakriste li kare evango omu atu vhuru kulilikida eharo ntani noku likorangeda. Sinzi sovantu neina kutekura vakwawo momudona. Eyi kuvhura kuninkisa vanavazinyetu va kare nosinka sosinene ntani va lizuvhe asi kwato ogu ga va hara. Yipo nye, apa vanavazinyetu ava wiza komapongo, tuna hara kuvakorangeda ntani nokuvalikida asi twa va hara.

13. Ngapi omu vakuronambunga nava hengagwida wopeke moyiruwo yoyidigu? (Tara hena efano.)

¹³ Vakuronambunga kuvatera vanavazinyetu moyiruwo yoyidigu. Apa ayi horoka yimpagwa yopaunsitwe ndi apa vanavazinyetu ava hepa uhaku wohararasi, vakuronambunga kurugana ko yuma usimbu yipo va vatere vanavazinyetu. Vakuronambunga kugava hena mavyukiso ntani nomakorangedo gokutundilira moBibeli. Vanavazinyetu ngava lizuvha emanguruko pokupura mukuronambunga yipo a va vatere nsene va diva asi age nga va uyungisa nombili nokuvapurakena ntani noku hetekera ko kukwata egano omu vana kulizuvha. Yikara oyo kuvatera wopeke va lizuvhe asi vava hara. Ntani ngayi va karera ureru kutura pasirugana nkenye evyukiso lyomoBibeli eli nga vhura kuvapa nkenye mukuronambunga.​—1 Tes. 2:7, 8, 11.

14. Ngapi natu yi likida asi ose kuvhura kukara vantu wokuhuguvara?

¹⁴ Kara gokuhuguvara. Tuna hara wopeke va tu huguvare asi ngatu va vatera apa ngava hepa evatero, unene po moyiruwo yoyidigu. (Yis. 17: 17) Yisinke no rugana yipo wopeke va ku huguvare? Ose kurugana paapa twa hulira yipo tu honene Jehova nkenye ezuva. Pasihonena, pokusikisa mo eyi twa tumbwidira ntani pokurugana yirugana yetu nosiruwo. (Mat. 5:37) Ntani nsene tuna diva vamwe ava vana hepa evatero, kuvhura tu va vatere. Mokugwederera ko, tuna hara kusikisa mo yirugana yetu kuliza nomavyukiso aga tuna gwana.

15. Ngapi omu womombungakriste ava gwanene mo mauwa apa ava huguvara vakuronambunga?

¹⁵ Ngapi womombungakriste ava gwanene mo mauwa apa ava huguvara vakuronambunga? Apa vanavazinyetu ava diva asi kuvhura va pure vakuronambunga nkenye apa nava hepa evatero, ayo kuvatera vanavazinyetu va dire kukara nosinka sosinene. Vanavazinyetu kuvhura hena va lizuvhe asi vava hara apa ava diva asi vakuronambunga va liwapaikira kuvavatera. Apa vakuronambunga ava ruganesa Bibeli ntani noyimbapiratjangwa yipo va gave mapukururo, nye kapisi pokuruganesa magano gawo, vanavazinyetu ngava va huguvara unene. Vanavazinyetu kuhuguvara hena vakuronambunga ava ava dili kuuyunga yininke yemehoramo ntani noku sikisa mo etumbwidiro lyawo.

16. Ngapi omu atu gwanene mo mauwa ntani nava wopeke apa atu rugana eyi a tara Jehova asi ya hungama?

 ¹⁶ Rugana nkenye apa eyi a tara Jehova asi ya hungama. Nsene tu limburukwa Jehova moyininke nayinye ntani nokutura po matokoro gokutundilira moBibeli, ose ngatu tulira po wopeke sihonena sosiwa. Nsene tu lironga Bibeli ntani nokunkondopeka epuro lyetu mwaJehova, ose ngatu mu limburukwa ntani nonompango dendi. Ose ngatu dimburura marongo goyipempa ntani nomagano aga ga dira kuliza nomagazaro gaJehova ntani ayo kapi ngayi pukisa magazaro getu. (Efe. 4:14; Jak. 1:6-8) Ehuguvaro lyetu mwaJehova ntani nomomatumbwidiro gendi, kutuvatera tu kare tuna litura apa atu zuvhu nombudi donondona. (Epis. 112:7, 8) Ose kuvhura tu vatere hena ava vana kuligwanekera nomaheteko.​—1 Tes. 3:2, 3.

17. Yisinke nayi vatera vakuronambunga yipo va nkondopeke vanavazinyetu?

¹⁷ Vakuronambunga va lipangere mwanayinye, va kare nonondunge, nonkareso zongwa ntani ava ava tambura magano govakwawo. Vagara ava kuvatera wopeke va kare vana litura ntani nokukara nepuro lyokupama mwaJehova. Ntani awo kunkondopeka mbungakriste ‘pokuronga kuliza nousili yipo va korangede wopeke.’ (Tit. 1:9; 1 Tim. 3:1-3) Sihonena sawo ntani omu ava pakere mbili womombungakriste, kuvatera vanavazinyetu yipo va ze nkenye apa komapongonomokuzuvhisa ntani nokurugana elirongo lyanyamwawo lyoBibeli. Apa vanavazinyetu ava ligwanekere nomaudigu aga aga va retere sinka, vakuronambunga kuvadiworokesa yipo va huguvare mwaJehova ntani nokudemenena komatumbwidiro gendi.

18. Morwasinke tuna harere kuhamberera Jehova ntani noku mu hedera unene? (Tara hena kakende “ Monkedi omu natu vhura kuhedera unene Jehova.”)

¹⁸ Konyima zokugazadara ko yikara yaJehova yoyiwa, ose kuvhura tu uyunge ngwendi hompa Ndafita asi: “Tangeni HOMPA, mupopeli gwange.” (Epis. 144:1) Ose kuvhura kuhuguvara Jehova nkenye apa. Nampili tu kurupe, ose kuvhura tu huguvare asi age nga twikira kutuvatera tu twikire kukara pepi nendi ntani ose kuvhura tu uyunge asi: ‘Age, mugameni gwange.’​—Epis. 92:14, 15.