1-2. Ezigido musinke a gava Jehova kovakareli vendi wovalimburukwi?

 NGAPI omu no limburura nsene gumwe a ku pura asi yilye Jehova? Ove kuvhura o limburure asi ‘Jehova kuna kara Otate, Karunga gwange ntani kaume gwange.’ Nampo wa gazadara ko nonkedi dimwe omu no faturura kuhamena Jehova. Nye nampili ngoso, ove kutara Jehova asi kaume koge ndi?

² Hompa Ndafita kwa hetakanesere Jehova komuntu ogu a tambura vagenda, ano vakareli vendi wovalimburukwi kwa va hetakanesere kovagenda. Age kwa pulire Jehova asi: “HOMPA, yilye ogu ga fira kukara monzugo zoge? Yilye ogu ga fira kukara kondundu zoge zokupongoka zaSiyoni? (Epis. 15:1) Kovelise ezi tuna lirongere ko asi ose kuvhura kukara vakaume vaJehova. Alyo kuna kara ezigido lyomulyo lyokutunda kwendi!

JEHOVA ANA HARA TU KARE VAKAUME VENDI

3. Yilye ga kere mugenda gwaJehova gokuhova, ntani ngapi omu va lizuvhire?

³ Pomuhowo komeho Jehova a site yininke, age kwa kere gelike. Nye konyima, yipo ga ya sitire Mbeli zendi. Jehova kwa fene ngwendi muntu ogu ana kutambura mugenda gwendi gokuhova motende zendi zopasifanekeso, ano age kwa hefe apa ga yi rugene. Bibeli kutanta asi Jehova kwa haferere Munwendi. Ano Munwendi Jesus nga hafa “nkenye apa komeho” zoGuhwe Jehova.​—Yis. 8:30.

4. Wolye vamwe va ya kere vakaume vaJehova?

⁴ Kutunda opo, Jehova kwa sitire vaengeli, nawo kwa ya kere vakaume vendi. Bibeli kutumbura vaengeli asi “vana vaKarunga” ntani azo kulikida asi awo kuhafa kweyi va kara naJehova. (Joba 38:7; Ndan. 7:10) Nomvhura dononzi, vakaume vaJehova kwa kere tupu vemeguru. Ano konyima, Jehova  kwa sitire vantu ntani nawo va ya vhulire kukara vakaume vendi. Mwaza siruwo, vakaume vendi vamwe kwa ya kere Enoka, Nowa, Abirahamu ntani Joba. Bibeli kulikida asi awo kwa kere vakaume vaJehova morwa ngava mulimburukwa​—Gen. 5:24; 6:9; Joba 29:4; Jes. 41:8.

5. Yisinke natu lirongera ko kouporofete ou wa kara mwaHesekiyeli 37:26, 27?

⁵ Kutundilira pwanare, Jehova kwa twikira kuzigida vantu yipo va kare vakaume vendi. (Resa Hesekiyeli 37:26, 27.) Pasihonena, kouporofete waHesekiyeli ose tuna lirongere ko asi Jehova ana hara vakareli vendi wovalimburukwi va kare nelikwatakano nendi. Age kwa tumbwidira asi nga tura po “egwanekero kumwe nawo.” Uporofete owo kwa tamba kwava va kara nehuguvaro lyokukaparukira meguru ntani nava va kara nehuguvaro lyokukaparukira pevhu ngava ka kara “mosiunda simwe” motende zaJehova zopasifanekeso. (Joh. 10:16) Ano siruwo oso kuna kara ngesi!

JEHOVA KUTUPAKERA MBILI NKENYE OKU TUNA KARA

6. Ngapi omu muntu na kara kaume kaJehova motende zendi zopasifanekeso ntani kupi za kara tende zaJehova?

⁶ Mosiruwo sanare, tende kwa kere sininke omu nga rara muntu nokulikunga komaukaro mpepo. Muntu ogu ga kere notende, nga pakere mbili nkenye mugenda ogu nga rara motende zendi. Apa atu ligava kwaJehova, ose kuyakara vagenda motende zaJehova zopasifanekeso. (Epis. 61:4) Ose twa kara nanayinye eyi twa hepa yipo tu nkondopeke elikwatakano lyetu naJehova ntani twa kara novakaume ava ava ya kara vakaume vaJehova. Vantu wokonomuhoko nadinye kuvhura kuyakara motende zendi zopasifanekeso. Nampo wa za kosirongo sapeke yipo o ka kare posigongi sokulikarera nokukaligwana nava wopeke ava va kara motende zaKarunga zopasifanekeso. Nsene tu karera Jehova noulimburukwi kuvhura tu kare motende zendi zopasifanekeso yi kare asi kupi oku twa hamena.​—Ehor. 21:3.

7. Ngapi omu twa yi diva asi vakareli vaJehova ava va fa awo simpe vakaume vendi motende zendi zopasifanekeso? (Tara hena efano.)

⁷ Ngapi kuhamena vakareli vaJehova wovalimburukwi ava va fa? Awo simpe vakaume vaJehova motende zendi zopasifanekeso ndi? Nhi! Morwasinke tuna kuuyungira ngoso? Morwa Jehova simpe kuvadiworoka. Jesus kwa fatwilire asi: “Nye kuhamena evhumbuko lyovafe, Mosesa ga yi zeresa mosihorokwa sosihwa somega, apa ga tumbwire asi Jehova, ‘Karunga gwaAbirahamu naKarunga  gwaIsaka naKarunga gwaJakopo.’ Age Karunga govanamwenyo, nye kapisi govafe, yeeyi navenye kwendi vanamwenyo.”​—Ruk. 20:37, 38.

MAUWA MUSINKE ATU GWANENE MO NTANI YISINKE NATU RUGANA?

8. Mauwa musinke atu gwanene mo apa atu kara mo motende zaJehova zopasifanekeso?

⁸ Ngwendi moomu tupu tende azi popere muntu ntani nokupwizumukira mo, mokulifana tende zaJehova zopasifanekeso kupopera vakaume vendi kwankenye eyi nayi tura elikwatanakano lyawo kumwe nendi mosiponga ntani kuvavatera va kare nehuguvaro lyokomeho. Nsene tu twikira kukara pepi naJehova, Satana kapi ngayi mu tompoka kuzonagura po elikwatakano lyetu naJehova. (Epis. 31:23; 1 Joh. 3:8) Mouzuni woupe, Jehova ngaka twikira kupopera vakaume vendi wovalimburukwi konomfa ntani koyininke eyi ayi vhuru kuzonagura po elikwatakano lyawo kumwe nendi.​—Ehor. 21:4.

9. Yisinke ana harere Jehova vakaume vendi va rugane?

⁹ Azo mfumwa sili mokukara motende zaJehova zopasifanekeso. Ose kuvhura kukara nelikwatakano lyewa kumwe nendi eli ngali vhura kukarerera dogoro narunye. Yisinke natu rugana yipo tu twikire kukara vakaume vendi? Nsene gumwe ana kuzigida kembo lyendi, ove no hara kudiva eyi nayi mu hafesa. Pasihonena, age na ndindira ko koge o huture ko nonkaku komeho o hwilire monzugo ntani no yi rugana ngoso. Mokulifana, ose tuna hara kudiva eyi Jehova ana harere va rugane ava vana hara kutwikira kukara vakaume vendi. Eharo lyokuhara Jehova ngali tu tumangeda tu rugane nayinye eyi twa hepa kurugana yipo tu “mu hafese.” (Koros. 1:10) Ayo usili asi Jehova age kaume gwetu, nye usili woowu asi age hena Karunga gwetu ntani Guhyetu ogu twa hepa kufumadeka. (Epis. 25:14) Yipo nye, twa hepa kudiworoka nkenye apa sitwa oso ntani tu mu fumadeke unene. Nsene tu mu fumadeka unene, ngayi tu vatera tu nyokere po kurugana yininke eyi ngayi mu guvisa. Tuna hara kugenda nelinunupiko naKarunga gwetu.​—Mika 6:8.

JEHOVA KWA TEKWIRE VAISRAELI GA HANA KUKARA NOMPONGO

10-11. Ngapi omu Jehova ga tekwire Vaisraeli momburundu zaSinayi ntani ngapi omu sihorokwa esi asi likida asi kapi ga kara nompongo?

¹⁰ Apa Jehova a tekura vakaume vendi, age kapi ava tekura nompongo. (Rom. 2:11) Ose kuvhura tu yi mone eyi monkedi omu ga tekwire Vaisraeli apa va kere momburundu zaSinayi.

¹¹ Apa Jehova ga poperere vantu vendi moupika waEgipite, age kwa horowere vapristeli va ka rugane konkongoronzugo. Age kwa horowere hena Varevhi yipo va rugane yirugana yapeke ponkongoronzugo. Ngoso Jehova kwa pakerere tupu mbili ava ngava rugana ponkongoronzugo ndi ava va tungire pepi nazo ndi? Hawe. Jehova kapi ga kara nompongo.

12. Ngapi omu Jehova ga yi likidire koVaisraeli asi kapi ga kara nompongo? (Exodus 40:38) (Tara hena efano.)

¹² Nkenye Muisraeli, ga vhulire kukara kaume gwaJehova yi kare asi nga rugana ponkongoronzugo ndi yi kare asi kwa tungire pepi nazo ndi ure nazo. Pasihonena, Jehova kwa divilisire asi muhoko nagunye goVaisraeli gwa vhulire kumona ngundi zeremo ntani mundiro eyi ya kere peguru lyonkongoronzugo. (Resa Exodus 40:38.) Nampili vantu ava va tungire ure nonkongoronzugo va mwene eremo apa ngali tameke kugenda, makura awo ngava rongere yininke yawo nokuzungurura notende dawo ntani nokugenda kumwe noVaisraeli vakwawo.  (Num. 9:15-23) Vantu navenye va zuvhire muhagaro gomunene gonombendo mbali dosisiliveli edi da vaterere nkenye ogu a tameke kudiruka. (Num. 10:2) Yipo nye, ayo kapi ayi tanta asi vantu ava va tungire pepi nonkongoronzugo kwa kere nelikwatakano lyewa kumwe naJehova. Nye mokulisiga, nkenye Muisraeli age ga vhulire kukara kaume gwaJehova ntani ga kere nehuguvaro asi age nga mu pitisira ntani nokumupopera. Mokulifana naneina, yi kare asi kupi twa tunga, Jehova ga tu hara ntani kutupakera mbili nokutupopera.

JEHOVA KWATO MPONGO NAMPILI MOSIRUWO SETU

13. Monkedi musinke Jehova a yi likida neina asi kapi ga kara nompongo?

¹³ Vakareli vaKarunga vamwe neina kwa tunga pepi nomberewa zonene zoNombangi daJehova ndi pepi noBeteli zoNombangi daJehova. Ano vamwe kurugana monomberewa odo. Ngoyitundwamo, vantu owo kulihameka mo moyirugana yoyinzi eyi ayi pitire monomberewa odo ntani awo kukara novanavazinyetu ava ava pitisire. Vamwe kuna kara vatareli wonombunga ndi kurugana yirugana yimwe yomosirugana sosiruwo nasinye. Nampili yi kare asi ove kapisi gumwe ogu o rugana yirugana oyo, kara nehuguvaro asi kuvhura simpe o kare kaume kaJehova ntani ga ku hara. Age ga ku diva hena nawa ntani nokupakera mbili yihepwa yoge. (1 Pet. 5:7) Vakareli vaJehova navenye kugwana mavyukiso nepopero ntani nanayinye eyi va hepa yipo va kare nelikwatakano lyewa kumwe nendi.

14. Monkedi musinke hena zimwe Jehova a likida asi age kwato mpongo?

¹⁴ Nkedi zimwe omu Jehova a yi likida asi kapi ga kara nompongo kuna kara pokudivilisa asi vantu navenye ava va kara mouzuni vana kara noBibeli zemeraka eli ava zuvhu. Matjangwa gokupongoka kwa ga tjenge pomuhowo momaraka gatatu: Ruhebeli Ruarameya  ntani Rugereka. Ngoso vantu ava ava resa Bibeli momaraka ogo kwa kara nelikwatakano lyenene naJehova kupitakana ava ava dili kuzuvha maraka ogo ndi? Hawe.​—Mat. 11:25.

15. Umbangi musinke au likida asi Jehova kapi ga kara nompongo? (Tara hena efano.)

¹⁵ Jehova kapi tupu a tu tambura tu kare vakaume vendi morwa asi yeeyi twa li ronga unene ndi twa diva maraka gomosiruwo sanare aga va tjenge Bibeli. Jehova kugava unongo kovantu navenye ava va kara mouzuni, yi kare asi kovantu ava va lironga unene ndi ava va dira kulironga. Nonkango dendi Bibeli kwa di toroka momaraka mayovi, yipo nye vantu kuvhura kugwanena mo mauwa nokulironga omu nava vhura kukara vakaume vendi.​—2 Tim. 3:16, 17.

TWIKIRA KUKARA KAUME KAJEHOVA

16. Kuliza noYirugana 10:34, 35, ngapi omu natu twikira kukara vakaume vaJehova?

¹⁶ Azo mfumwa sili kweyi twa ya kara vakaume vaJehova motende zendi zopasifanekeso. Age kaume gomuwa gonkenda ntani geharo. Ntani age kwato mpongo, age kutambura vantu navenye yi kare asi kupi va tunga, ntundiliro zawo, va li ronga ndi kapi va li ronga, rudi rwawo, sipapa sawo, yi kare asi vanona ndi vakondi. Nye Jehova kutambura tupu ava ava mu limburukwa.​—Resa Yirugana 10:34, 35.

17. Kupi natu gwana mauzera gamwe kuhamena nsene tuna hara kukara vakaume vaJehova motende zendi zopasifanekeso?

¹⁷ Ngomu va yi tumbura Mepisarome 15:1, Ndafita kwa pulire mapuro asi: “HOMPA, yilye ogu ga fira kukara monzugo [motende] zoge? Yilye ogu ga fira kukara kondundu zoge zokupongoka zaSiyoni?” Jehova kwa ruganesere Ndafita a limburure mapuro ogo ga kara Mepisarome egaununo 15. Mosirongwa sokukwama ko ngatu ka zogera yininke yimwe eyi twa hepa kurugana yipo tu twikire kukara vakaume vaJehova.