Mokuninka asi tu hafese Jehova, twa hepa kukara nepuro. Nye nampili ngoso Bibeli kuuyunga asi “kapisi vantu navenye kwa kara nepuro.” (2 Tes. 3:2) Apa mupositoli Paurusa ga uyungire nonkango edi, age kwa tembe kovantu wovadona ava ngava mu hepeke. Nye eyi ga uyungire kuhamena epuro kwa kere usili kwavamwe. Vantu vamwe kapi va hara kuyipura asi pwa kara Karunga ogu ga sita yininke nayinye. (Rom. 1:20) Vamwe kuvhura va uyunge asi awo kwa pura moyininke ndi mwagumwe ogu ga kara nononkondo. Nye yininke oyo kapi ya gwanena po mokuhafesa Karunga.

Twa hepa kuyipura asi Jehova yipo ga kara ntani ‘age kufuta’ ava va kara nepuro lyokupama mwendi. (Heb. 11:6) Epuro kuna kara simwe soyiyimwa yompepo zokupongoka. Kukanderera kwaJehova kuvhura kuvatera muntu a gwane mpepo zokupongoka. (Ruk. 11:9, 10, 13) Nkedi zimwe hena omu natu gwana mpepo zokupongoka kuna kara pokuresa Bibeli, ezi za wiza po kupitira mompepo zokupongoka. Ntani twa hepa kugazadara ko kweyi tuna kuresa nokuhetekera ko kuyitura pasirugana. Nsene tu yirugana eyi, ngatu pulisira mpepo zaJehova zi tu vatere momaparu getu tu paruke monkedi ezi nazi likida asi twa kara nepuro.