Mapuro gokutunda kovaresi
Ngapi natu vhura kukwata egano Episarome 12:7?
Episarome 12:1-4, kutanta asi ‘vantu wovalimburukwi vana dongonoka mo movantu.’ Ntani age kwa uyungire mEpisarome 12:5-7 asi:
“Morwa vahepwe kuvahepeka,
Ano vehudi kuna kumona udigu
Yiyo nye nani sikamena, yimo ana kutanta HOMPA.
Ngani va popera kwava ava va tekura momudona.
Nonkango daHOMPA kwa kohoka;
Ngwendi sisiliveli esi va hemwina mosihemwino semevhu, kwa si hemwina memusuga rutano-naruvali.
Tu nomena narunye nawa, HOMPA;
Ove o tu popere kovantu ava dogoro narunye.”
Velise zau-5 kuuyunga kuhamena eyi Karunga nga ruganena vantu. Age nga va popera.
Velise zau-6 kwa gwederera ko asi “Nonkango daHOMPA kwa kohoka ngwendi sisiliveli.” Nonkango edi kulikida omu atu lizuvhu kuhamena Nonkango daJehova.—Epis. 18:30; 119:140.
MoNobibeli dimwe, Episarome 12:7 kutanta asi: “Ove ngo va kunga.”
Ntani mokumona asi “Nonkango daHOMPA” kwa di tumbura movelise 6, vamwe kugazara asi Jehova “kukunga” nonkango dendi. Ntani twa yi diva asi Karunga kwa popera Bibeli nampili ngomu varwanesi va hetekerere ko kuzisilika noku zi zonagura po.—Jes. 40:8; 1 Pet. 1:25.
Nye nampili ngoso, Jehova kunomena hena vantu ava va tumbura movelise zau-5, age ga yi ru-gana ntani nga twikira kuvatera nokupopera “vahepwe” ntani nava ava ‘hepeke.’—Job 36:15; Ps. 6:4; 31:1,2; 54:7; 145:20.
Nye wolye ava a takamesa Jehova, ngomu va yi tumbura movelise 7, vantu ndi Nonkango dendi?
Nsene tu konakona nawa episarome eli, ose ngatu ya dimburura asi alyo kwa tamba kovantu.
Episarome 12:1 kwa uyunga kuhamena vantu wovadona ava va uyungire yipempa kuhamena vantu wovalimburukwi. Ano movelise zau-3, ose kugwana mo egano asi Jehova nga tengeka ava ava ruganesa eraka lyawo momudona. Episarome eli kutuhuguvaresa asi Karunga nga vatera vantu vendi morwa Nonkango dendi kwa kohoka.
Yipo nye, ngomu va yi tumbura movelise zo-7, ava nga popera Jehova, kuna kara vantu wovahepwe ava ava hepeke vantu wovadona.
Morwasinke Nobibeli dimwe da torokera velise ezi asi: “Ngo va kunga”? Nonkango odo da liza noMatjangwa goRuhebeli. Nye moMatjangwa goRugereka nonkango edi kwa di ruganesa asi: “Nga tu takamesa” ntani “nga tu popera.” Yipo nye, nonkango odo kwa tamba kovakareli vaJehova ava ava hepeke. Awo ngava va popera kovantu ava ava rugana yoyidona. (Epis. 12:7, 8) Metoroko lyoMatjangwa goRuhebeli meraka lyoRuarameya, velise zo-7 kutanta asi: “HOMPA, ove ngo popera vahungami kovantu wovadona dogoro narunye.” Eyi kulikida hena umbangi asi Episarome 12:7 kapi lya tamba koNonkango daKarunga.
Yipo nye, velise ezi kwa gava ehuguvaro kovantu wovalimburukwi asi Karunga nga va vatera.
