Mapuro gokutunda kovaresi
Ayo ya wapa koMukriste a weke uta mokulipoperesa ko kovakorokotji ndi?
Vakriste awo kukwama nompango doBibeli nsene tava tokora omu nava vhura kulipopera vene. Nompango odo kwa likida asi ayo epuko koMukriste mokuruganesa yikwata ngwendi uta mokulipoperesa ko. Tu tareni yitwa yina kukwama ko:
Eparu lyovantu kwa pongoka kosipara saJehova. Ndafita kwa tjenge kuhamena Jehova asi yige “ntundiliro zomwenyo.” (Epis. 36:9) Yipo nye, nsene Mukriste ana hara kulipopera mwene ndi yiweka yendi ga hepa kunyokera po kurugana eyi nayi twaredesa a ture unzoni wokudipaga muntu.—Deut. 22:8; Epis. 51:14.
Yimo nkenye sikwata na ruganesa muntu a lipoperese ko kuvhura kumutwaredesa a ka dipage muntu, nye uta ureru kudipaga usimbu muntu yi kare asi momponyo ndi hawe. * Ntani hena muntu ogu ana ku homokere kuvhura a tukuke nsene a mona uta makura tayi ninkisa ukaro udonape dogoro gumwe a ka fe po.
Apa Jesus ga tanterere vasikuli vendi va simbe rufuro masiku gena komeho va ka mu dipage, kapi ga yi va tanterere nokonda zokukalipoperesa ko. (Ruk. 22:36, 38) Nye age kwa here kuvaronga sirongwa somulyo mokudira kukara nonyanya nampili kuna kuvahomokera vantu vana simbi yirwiso. (Ruk. 22:52) Apa Peturusa ga tetere kutwi komukareli gomupristeli gomunene, Jesus kwa tanterere Peturusa asi: “Zweka mo rufuro roge mosiraro saro.” Makura Jesus yipo ga tumbwire mpango ezi vana kukwama vasikuli vendi naina asi: “Nkenye ogu a kwata rufuro, yiro ngaru mu lya rooro.”—Mat. 26:51, 52.
Ngwendi moomu va yi pumbire mwaMika 4:3, vantu vaKarunga ‘nomfuro dawo kwa di hambura yipururu ano magonga gawo matemo.’ Vakriste wousili awo kwa divikwa asi vantu wombili morwa awo kukwama mpangera ezi ga geve Karunga kupitira mwaPaurusa asi: “Walye omu likwatere-kwatere nonkoko . . . . Kombinga zeni, one kareni nombili kovantu navenye ntani.” (Rom. 12:17, 18) Paurusa nage kapi ga tezere po mpangera ozo mokulipopera mwene nampili ngomu ga ligwanekerere ‘novanamahaka.’ (2 Kol. 11:26) Nye age kwa huguvarere mwaKarunga ntani ga divire asi unongo womoNonkango daKarunga “wa pitakana unene yirwiso yomoyita.”—Muud. 9:18.
Mwenyo mulyo unene koVakriste kupitakana yiweka. Bibeli kwa tanta asi: “Mwenyo gomuntu kapi agu paruka kemona lyendi, mpili li kare lyenzi unene.” (Ruk. 12:15) Nsene tuna hetekere ko kuuyungisa nombili mukorokotji ana kara nouta nye kapi ana kutupurakena, twa hepa kukwama epukururo lyaJesus asi: “Walye omu lihokwa moyininke ya hana kuhungama.” Eyi kutanta asi twa hepa kumupa eyi ana hara. (Mat. 5:39, 40; Ruk. 6:29) * Mulyo unene tu kandane po kukoka vakorokotji. Nsene tu kwama epukururo lyomoBibeli lyokunyokera po kukara ‘nomalitumbadekero gemona’ ntani nsene vantu womomukunda va tu diva asi ose vakareli vaJehova wombili kuvhura vakorokotji ngava dire kutukwama-kwama.—1 Joh. 2:16; Yis. 18:10.
Vakriste kufumadeka ezwi lyokomutjima lyovakwawo. (Rom. 14:21) Vanavazinyetu vamwe kuvhura va tukuke ndi va punduke nsene va zuvha asi gumwe gomombungakriste kwa weka uta mokulipoperasa ko kovakorotji. Nampili tu lizuvhe asi va yi pulisira mosirongo setu kuweka uta, ose kapi ngatu rugana eyi ngayi vhura kupundukisa vanavazinyetu morwa twa va hara.—1 Kol. 10:32, 33; 13:4, 5.
Vakriste kwa hara kutura po sihonena sosiwa kovakwawo. (2 Kol. 4:2; 1 Pet. 5:2, 3) Konyima zokumupa mapukururo gomoBibeli, nsene Mukriste a twikira kuweka uta mokulipoperesa ko kovakorokotji, age kapi ta kara muntu gosihonena sosiwa. Age kapi ngava mu pa nkenye yitumbukira mombungakriste ndi va mu ruganese mombunga zaJehova. Ayo kwa lifana hena noMukriste ogu yirugana yendi mwa hamena kukara nouta. Muntu gwangoso ya wapa ngano kupapara ko yirugana yapeke. *
Mukriste ga hepa kutokora mwene omu na lipopera nepata lyendi noyiweka yendi. Nye etokoro olyo lya hepa kuliza nonompango doBibeli, Karunga kwa di gava morwa kwa tu hara. Yipo nye, Vakriste ava va kara nelikwatakano lyenene naJehova kapi ngava weka uta mokulipoperesa ko kovakorokotji. Awo va yi diva asi nsene va huguvara mwaKarunga nokusikisa mo nompango domoBibeli awo ngava gwana egameno lyanarunye.—Epis. 97:10; Yis. 1:33; 2:6, 7.
Poudigu wounene, Vakriste kapi ngava hetekera ko kulikandura nye ngava huguvara mwaJehova
^ para. 3 Mukriste kuvhura a tokore kuweka uta ngwendi musaso ndi pistora mokusanesa ko yikorama a gwane mberera ndi a lipoperese ko koyikasama. Nye nsene kapi ana kuuruganesa, ga hepa kugusa mo yikutji nokuupangurura au horeke. Nsene epangero lyomosirongo seni kapi lya pulisira muntu kuweka uta, Mukriste ga hepa kulimburukwa veta ozo.—Rom. 13:1.
^ para. 2 Komauzera kuhamena eyi no rugana nsene muntu ana hara kukukwatera kononkondo, tara sirongwa “Omu no kandana po kukwatera kononkondo” mosifo Awake! 8 Nsinano 1993.
^ para. 4 Komauzera gomanzi kuhamena yirugana omu mwa hamena kukara nouta, tara Ruhungu 1 Mangundu 2005, epe. 31; ntani 15 Pembankuru 1983, epe. 25-26.