VAKRISTE womosiruwo sovapositoli kwa litulire mo unene mokuzuvhisira vantu wovanzi ‘mbudi zongwa zoUhompa.’ (Mat. 24:14) Vamwe kwa ka zuvhisilire koyirongo yapeke. Pasihonena, mupositoli Paurusa mosirugana sendi soutumwa kwa zire kosirongo esi vana kutumbura naina asi Turkia mokukazuvhisira vantu wovanzi. * Konyima zonomvhura 2 000 da ka pita, momvhura 2014, moTurkia kwa rugane mo ezuvhiso lyokulikarera. Morwasinke? Wolye va lihamekere mo?

Mosirongo saTurkia kwa kara mo vazuvhisi wokupitakana po-2 800, nye sivaro sovatungimo mamiliyona 79. Eyi kulikida asi vazuvhisi vamo vasesu pokuvahetakanesa novatungimo. Ngoyitundwamo, vazuvhisi kuzuvhisira tupu vantu wovasesu. Sitambo sezuvhiso olyo lyokulikarera kwa kere sokuzuvhisira vantu wovanzi mosiruwo sosisupi. Sivaro sovanavazinyetu wokusika 550 ava ava uyunga Ruturkia wokoyirongo yapeke kwa zire koTurkia va ka zuvhise kumwe novazuvhisi womosirongo oso. Yitundwamo musinke va gwene?

Kwa geve umbangi wounene. Mbungakriste zomoIstanbul kwa tjenge asi: “Apa vantu va tu mwene, tava pura asi: ‘Muna kara nosigongi ndi? Ose kuna kumona Nombangi daJehova nkenye oku!’” Ano mbungakriste zomositata saIzmir kwa tjenge asi: “Mugara ogu a rugana apa adi sikamekere notaxi kwa pulire mukuronambunga asi: ‘Yisinke yina kuhoroka? Yirugana yeni yokuzuvhisa yina ligwederere ndi?’” Yosili, vantu va dimbwilire eyi twa rugene.

Vazuvhisi ava va tundire koyirongo yapeke, kwa haferere sirugana esi sokuzuvhisa. Steffen gokoDenemarke, kwa tanta asi: “Nkenye ezuva, ame ngani zuvhisire vantu ava va dira kuzuvha rumwe kuhamena Jehova. Ame kwa lizuvhire asi kuna kudivisa edina lyaKarunga, Jehova.” Jean-David gokoFransa kwa tjenge asi: “Ose kwa zuvhisilire mositarata simwe tupu novili dononzi. Ose kwa haferere sili sirugana sokuzuvhisa! Vantu wovanzi kapi va divire Nombangi daJehova. Momambo gomanzi, ose twa vhulire kutameka nzogera novantu nokuvalikida novidiyo ntani kuvasigira yimbapiratjangwa.”

 Vazuvhisi wokusika po-550 kwa hanesere yimbapiratjangwa yokusika po-60 000 moyivike yivali tupu. Yosili, ezuvhiso eli kwa geve umbangi wounene.

Upampi wovazuvhisi kwa ligwederere. Ezuvhiso olyo lyokulikarera kwa tumangedere vazuvhisi womosirongo saTurkia. Sinzi sawo kwa tamekere kugazadara ko kulihameka mosirugana sosiruwo nasinye. Konyima, sivaro sovazuvhisi wokukarerera kwa ya ligwederere.

Apa vazuvhisi wokoyirongo yapeke va tengwire koyirongo yawo kwa ka simwitilire omu sa va kundamene sirugana oso. Şirin, munazinyetukadi gokoNdovesiranda kwa tjenge asi: “Vanavazinyetu womoTurkia kwa zuvhisire nouradi. Nsene kapi nina kara moyirugana yokuzuvhisa, ame kulizuvha nomuga kuzuvhisira vantu. Nye morwa ezuvhiso olyo lyokulikarera nosihonena sovanavazinyetu womosirongo sina ntani kukanderera kwa vaterere nge ni rugane eyi ngayi digopere nge kurugana. Ame na vhulire hena kuzuvhisira mononzira nokuhanesa yitratate. Ame ngesi kapi nina kara hena nonomuga.”

Johannes gokoNdovesiranda kwa tente asi: “Na lirongerere ko yirongwa yimwe eyi ani ruganesa mokuzuvhisa. Vanavazinyetu womoTurkia kwa kara neharo lyokuzuvhisira vantu navenye. Awo kuruganesa nkenye mpito va zuvhise. Name kwa tokwere kurugana yokulifana apa na tengwire kosirongo setu. Ngesi ame kuzuvhisira vantu wovanzi kupita pwanare.”

Zeynep gokoFransa kwa tente asi: “Ezuvhiso eli lyokulikarera kwa kundama sirugana sange sokuzuvhisa. Alyo kwa vatera nge ni kare nouradi nokuhuguvara unene mwaJehova.”

Vazuvhisi kwa ya lidivire unene. Eharo nouumwe wovanavazinyetu wokoyirongo yokulisiga-siga kwa kere sininke sokutetukisa unene. Jean-David ogu tuna tumbura nare kwa tente asi: “Ose kwa limonenene omu va tu tambwire vanavazinyetu monkedi zongwa.” Age kwa tente hena asi: “Awo kwa tu tambwire ngovakaume ntani ngekoro lyawo. Ntani kwa tu tambwire momambo gawo. Nayi divire nare asi ose kwa kara mouumwe ntani ngani yi resa moyimbapiratjangwa yetu. Nye posiruwo esi, ame naya yi limonenene. Ame na lizuvhire mfumwa mokukara  gumwe govakareli vaJehova, ntani ame kuyimupandwira kositumbukira esi sokukara mukareli gwendi.”

Claire gokoFransa kwa tente asi: “Yi kare asi ove kwa tundilira koDenemarke ndi koFransa ndi koNdovesiranda ndi koTurkia, natuvenye vepata limwe. Karunga kwa tu retere kumwe ngepata.”

Stéphanie gokoFransa kwa tente asi: “Ezuvhiso lyokulikarera kwa tu rongere asi eyi ayi tu reta kumwe kuna kara eharo lyetu lyokuhara Jehova nye kapisi mpo ndi eraka.”

Vazuvhisi wokoyirongo yapeke kwa gazadarere ko mokudirukira koTurkia mokukavatera simpe mosirongo oso sina hepa evatero lyenene. Vamwe va dirukira ko nare. Vazuvhisi ava wokulizambera kuyivapandwira sili.

Pasihonena, vazuvhisi wokusika po-25 ava va tunga komukunda gokoure, nomvhura dononzi awo kwa kere nomukuronambunga gumwe tupu. Gazadara ko tupu omu va hefe apa vazuvhisi ntazimwe wokoNdovesiranda nava wokoHoranda va dirukilire kombunga zawo mo-2015.

Yisinke va uyunga ko vazuvhisi ava va lizambera va ka zuvhisire koTurkia? Yimo, kapi ya kara ureru kukazuvhisira oku kuna hepa vazuvhisi nye ayo kureta matungiko. Tarurura eyi va uyunga ko vamwe:

Federico munazinyetugara gokukwara gokoyiha yonomvhura 40 ogu ga tunda koSipanye kwa tanta asi: “Mokudira kukara noyiweka yoyinzi ku pa nge siruwo sokudemenena koyininke yomulyo.” Age kuvhura a korangede wopeke va rugane yokulifana ndi? Nhi. Morwa age kwa tanta asi: “Pokudirukira kosirongo nasopeke nositambo sokukavatera vantu va dive Jehova ove ngoso kuna kuligava nyamoge kwaJehova. Ove ngo limonena omu Jehova nga ku pakera mbili.”

Rudy munazinyetugara gokukwara gokoyiha yonomvhura 56 yikandwise gokoHoranda kwa tanta asi: “Ayo kutuhafesa mokulitura mo unene, mokutantera  ko vantu wovanzi ava va dira kuzuvha rumwe usili kuhamena Bibeli. Pokumona vantu omu vana kutambura mbudi noruhafo, kuhafesa sili.”

Sascha munazinyetugara gokukwara gokoyiha yonomvhura 40 ogu ga tundire koNdovesiranda kwa tanta asi: “Nkenye apa ani zi mokuzuvhisa ame kugwana vantu ava va dira kuzuvha rumwe usili. Mokutantera ko vantu vangoso kuhamena Jehova kuretera nge ruhafo.”

Atsuko munazinyetukadi gokukwara gonomvhura 30 yikandwise gokoYapani kwa tanta asi: “Ame kwa here yita yaHarumagedoni yi wize usimbu. Nye apa na dirukilire koTurkia, ame kupandura Jehova kweyi a lididimikire ga hana kureta yita oyo usimbu. Mokumona omu Jehova a gendesa yininke, ayo kuninkisa nge ni mu hedere pepi.”

Alisa munazinyetukadi gokoyiha yonomvhura 30 gokoRusia kwa tanta asi: “Kulihameka mosirugana esi sokulikarera kwa vatera nge ni limonene omu Jehova ga wapa.” (Epis. 34:8) Age kwa tanta hena asi: “Ame kapi ani tara Jehova asi Guhyetu tupu nye age hena kaume kange gomunene ogu ani ya diva nawa momaukaro gokulisiga-siga. Ame na limonena yihorokwa yoyinzi yokuhafesa ntani na gwanena mo matungiko.”

Kupitira mezuvhiso lyokulikarera moTurkia, vantu wovanzi va zuvhire mbudi zongwa. Nye simpe mosirongo oso muna kara nomukunda edi va dira kuzuvhisira rumwe. Vazuvhisi ava va za va ka zuvhisire koTurkia, awo kugwana nkenye apa vantu va dira kuzuvha rumwe kuhamena Jehova. Ono hara kukazuvhisira monomukunda dokufana ngoso ndi? Nsene yimo, kuna kukukorangeda: ‘O tare mapya omu gana fire etezo.’ (Joh. 4:35) Kuvhura o ka vatere oku kuna “fire etezo” ndi? Nsene yimo, tura po mawapaiko yipo o sikise mo sitambo soge. Nsene o litura mo unene mokuzuvhisa mbudi zongwa “dogoro nokooku wa ka twa uzuni,” ngo gwanena mo matungiko gomanzi.—Yirug. 1:8.